1, 2. Nsaa yatumono bi ndumbulwilo a Yehowa e mwiyilu na pa nsenga mushindo kinyi ukwete kutama lukulupilo lwetu?

MMWANDA wa muloo pa kumona shi twi mu ndumbulwilo mukata e mwiyilu na pa nsenga. Kimonwa ki mu Ezekyele shapitre 1 na mu Danyele shapitre 7 akilesha patooka mushindo wi Yehowa akyebe nkakunkusha myanda yooso mpa na ku nfudiilo a byooso. Yesu ndjo kwete kukunkusha kipindji kya ndumbulwilo a Yehowa ki pa nsenga bwakidya kwipana ngofu mu kulungula kwa mukandu wibuwa, bwa kukwasha baaba abakitshi uno mudimo bwashi bekale mu kipwano kibuwa na Yehowa, na bwashi lulangwilo lwa binyibinyi lwa Yehowa lwende kumpala. Bino abitupa lukumiino lukata mu ndumbulwilo a Yehowa!​—Mat. 24:45.

² Tukwete kutambuka pamune na uno ndumbulwilo ebuwa su? Muloo wetu bwa bya binyibinyi ukwete kutama su ukwete kutshimba? Nsaa yatutaluula ino nkonko, atukyebe kumona su twi bapwe kubanga kukooka sunga kushimisha kisumi kibatudi nakyo kumpala. Mwanda bino mbilombeene kukitshika. Mu mafuku a batumibwa, Mpoolo mutumibwa baadi munyingishe beena Kidishitu bwabadya kulonda kileshesho kya kisumi kibaadi nakyo Yesu. Mpoolo bambile shi bino mbilombeene kwibakwasha bwashi ‘tabakookanga ku mashimba [abo].’ (Eb. 12:3, NW) Bi mumune n’atwe namu, kutaluula kalolo myanda yatulongyele mu mwisambo ukile, wikeele uleshe myanda yabakwete kukita kwi ndumbulwilo a Yehowa, akwitukwasha ngofu bwatudya kushaala banyingye mpa na muloo.

3. Nkinyi akitungu kukita bwa kupela kukôka, na mmyanda kinyi yatukyebe kutaluula mu uno mwisambo?

³ Byabya, Mpoolo baadi muleshe shi kwi myanda ibungi ayitungu kukita bwa kupela kukooka. Balesheshe shi abitungu twikale ‘atukitshi bibuwa.’ (Gal. 6:9) Byabya, nyi abitungu shi tukite. Tutaluleyi myanda itano ya mu mudimo wetu ilombeene kwitukwasha bwa kushaala banyingye na kutambuka pamune na ndumbulwilo a Yehowa. Su tubakitshi byabya atwikala na mushindo wa kumona su atwe banabeene na bifuko byetu twi na myanda ayitungu kutaluula kalolo mu nshalelo etu.

4. Bwakinyi twi balombeene kwamba shi kwibunga pamune nyi nkintu kikata mu lulangwilo lwa binyibinyi?

⁴ Kwibunga pamune nyi nkintu kya muulo ukata kwi bafubi ba Yehowa. Mwiyilu, Yehowa e na nsaa yetanyinaa bipangwa bya mu kikudi bwa kwibunga pamune naaye. (1 Bf. 22:19; Yob. 1:6; 2:1; Dan. 7:10) Mu Isaleele a kala, bibaadi abitungu shi mwilo wa bantu wibungye pamune ‘bwa’shi bapushe na bwa’shi balongye.’ (Miy. 31:10-12) Beena Yuuda mu mafuku a batumibwa abaadi na kiubishi kya kwibunga mu bitumbwilo bwa kubadika Bifundwe. (Luk. 4:16; Bik. 15:21) Kwibunga kwa uno mushindo kubaadi kutungunukye mpa na pabatukile kakongye ka beena Kidishitu, kyakya nyi nkintu kikata mu lulangwilo lwetu. Beena Kidishitu ba binyibinyi bakwete ‘kwikankamishena ku muntu na muntu bwa kwinyingisheena mu kifulo na mu mifubo ibuwa.’ Atwe booso abitungu shi ‘twi kwasheene ku muntu na muntu, bikishekishe pano [patumono] efuku dya [Yehowa] dibesesela pepi.’​—Eb. 10:24, 25.

5. Mushindo kinyi watudi balombeene kwikankamishena mu bisangilo?

⁵ Ungi mushindo watukwete kwikankamishena ku muntu na muntu nyi nkwalula ku nkonko mu bisangilo. Twi balombeene kulesha patooka bi lukumiino lwetu nsaa yatwalula ku nkonko yabeele, na kulesha abyamba Bifundwe, nsaa yatulondela bakwetu ka mwanda kampanda akalesha muulo wa kulonda mayi e mu Bible, sunga mu ungi mushindo. (Mis. 22:22; 40:9) Eyendo shi sunga twekala bapwe kubanga kutwela mu bisangilo munda mwa bipwa bi bungi bwi naminyi, patupusha mushindo wi bakwetu balume na bakashi bakulu mpa na bana bakwete kwaluula na mashimba aabo ooso ku nkonko yabeele atunyingishibwa ngofu.

6. Bisangilo abitukwasha naminyi bwa kushaala banyingye mu kikudi?

⁶ Myanda kinyi dingi ayitakulaa Efile Mukulu bwa kwata kwibunga kwetu na muulo? Bisangilo na bikongeno byetu abitukwasha bwa kwakula n’eshimba dinyingye, na bwa kunyinga nsaa yatufumankana na bantu bashikwe mufubo wetu sunga bantu abapele kwituteemesha mu teritware etu. (Bik. 4:23, 31) Myanda ya mu kikudi yatulongo mu Bifundwe ikwete kunyingisha lukumiino lwetu. (Bik. 15:32; Lom. 1:11, 12) Malongyesha na kwinyingishena kwatupete nsaa yatwibungu bwa kulangwila abitukwasha bwa kupeta muloo wa binyibinyi na kwitukwasha bwa “kwikisha mu mafuku a mpombo.” (Mis. 94:12, 13) Komite a malongyesha a Kasaka ka Bakunkushi-Bakulu kwete kukunkusha mudimo wa kulumbuula midimo yooso ya mu kikudi ayikwasha bwa kulongyesha mwilo wa Yehowa pa nsenga ishima. Twi balombeene kwikala na lutumbu lukata bwa bino byabadi betulumbulwile bwatudya kupeta malongyesha ebuwa mu bisangilo byetu bya lubingo looso.

7, 8. (a) Nkintu kinyi kya kumpala akitutakulaa bwa kwibunga mu bisangilo byetu bya beena Kidishitu? (b) Bisangilo bikwete nkukwasha naminyi mu kikudi?

⁷ Anka, kwi kintu ki na muulo ukata kikile bukwashi bwatupete patudi ku bisangilo. Kya kumpala, atwibungaa pamune bwa kulangwila Yehowa. (Badika Misambo 95:6.) Twi na mwabi ukata wa kutumbisha Efile Mukulu etu ebuwa! (Kol. 3:16) Twi na kya kwikala atulangwila Yehowa nsaa yatwibungu na kwalula ku nkonko yabeele mu bisangilo bya Bufumu. (Bif. 4:11) Nyi bwakinyi, abetupa dino elango dya kupela ‘kukooka kwenda mu biikongeeno byeetu, bu bii bangi mbapwe kukooka’!​—Eb. 10:25.

⁸ Tukwete kumona bisangilo byetu bya beena Kidishitu bu bukwashi bukata bwa kushaala banyingye mpa na nsaa ya bakabutula uno ndumbulwilo a myanda e bubi kwi Yehowa su? Su mbyabya, bisangilo abikyebe kwikala bu kimune kya ku “byabya [bintu] bikile buwa” byatudya kutwesha mu programe a myanda yatukitaa mu nshalelo etu a kwifuku n’efuku. (Fid. 1:10) Takwi kintu su nkimune kilombeene kwitukutshisha kwibunga na bakwetu bwa kulangwila Yehowa nya.

9. Mushindo kinyi watuuku shi mudimo wa bulungudi wi na muulo?

⁹ Kwipaana mu mudimo wa bulungudi akwitukwasha bwa kutungunuka na kutambuka pamune na ndumbulwilo a Yehowa. Yesu pabaadi pano pa nsenga baadi ende na kukita uno mudimo. (Mat. 28:19, 20) Kubanga nka mu aa mafuku, mudimo wa kulungula mukandu wibuwa na kwikasha bantu bu balongi ndjo kintu ki na muulo ukata mu ndumbulwilo a Yehowa. Myanda ibungi ikwete kukitshika mu ano mafuku ayishinkamisha shi, mikeyilu ikwete kukwasha mu uno mudimo na kwitukunkusha kwi baaba “be na mashimba alongame bwa muuwa wa looso.” (Bik. 13:48, NW; Bif. 14:6, 7) Lelo uno, pa nsenga pe kipindji kya ndumbulwilo a Yehowa, kipwe kwilumbuula kalolo bwa kukwasha ku uno mudimo wi na muulo ukata. Mudimo wa bulungudi wi na muulo mu nshalelo etu su?

10. (a) Tuusha kileshesho akilesha mushindo watudi balombeene kulama muloo wetu mu bya binyibinyi. (b) Mudimo wa bulungudi ngukukwashe naminyi bwa kupela kukôka?

¹⁰ Kwikala na kisumi mu mudimo wa bulungudi akwitukwasha bwa kulama muloo wetu mu bya binyibinyi. Tubande kwata kileshesho kya Mitchel ungi mukwetu taadi bipwa bibungi bu mukulu na bu mbala-mashinda a myeshi yooso mu kakongye. Bakwile bino: “Nakuminaa kwisamba na bantu pabitale bya binyibinyi. Na nangushenaa pabitale nimero mupya a Kitenta kya Mulami sunga a Réveillez-vous ! na nasangalaa ngofu pa kumona binangu, kapatupatu, na mushindo wabadi bapatuule myanda kalolo mu nimero ooso. Nakuminaa kwenda mu bulungudi bwa kumona mushindo aupusha bantu, na mushindo wandi mulombeene kupudisha  nkalo yaabo. Mudimo wande wa bulungudi ukwete kunyingisha. Nakumiinaa kutuula kintu kyooso pa mbalo yakyo bwa kulama nsaa ya kukita mudimo wa bulungudi.” Bi mumune n’atwe namu, kwipaana kwetu mu mudimo wiselele nkulombeene kwitukwasha bwa kutungunuka na kunyinga mu ano mafuku a ku nfudiilo.​—Badika 1 Beena-Kodinto 15:58.

11. Bwakinyi abitungu shi twikale atudi bidibwa bya mu kikudi byooso bikwete kwitupa Yehowa?

¹¹ Yehowa mmufundishe myanda ibungi ya mu kikudi ilombeene kwitupa bukome. Kushi mpaka we mulombeene kutentekyesha ungi mususa kunyima kwa kubadika mukanda kampanda, boodi munangushene shi: ‘Kino ndjo kyangikalanga nakyo lukalo! Bi nka bu’shi Yehowa mmufundjishe uno mwanda penda bwande!’ Uno ta mmwanda aukitshikaa mu masaku nya. Ku bukwashi bwa bino bidibwa, Yehowa kwete kwitulongyesha na kwitukunkusha. Bakwile shi: “Naakakulambukisha, nkuleeshe eshinda dya kulonda.” (Mis. 32:8) Tukwete kukita mwetu mooso bwa kudya bidibwa bya mu kikudi byooso byatupete na kunangwila ku byanka su? Kukita kwa byabya akukyebe kwitukwasha bwa kutungunuka na kupa bikuba kushii kubofula mu kikudi mu ano mafuku a ku nfudiilo.​—Badika Misambo 1:1-3; 35:28; 119:97.

12. Nkinyi kilombeene kwitukwasha bwa kupela kwata bidibwa bya mu kikudi na muulo upela?

¹² Abitungu shi tunemekye byooso bikwete kukitshika bwashi twikale atupete bino bidibwa abitunyingisha mu kikudi. Komite a bafundji, mu Kasaka ka Bakunkushi-Bakulu, kwete kukunkusha mudimo wa kukimbuula, kufunda, kubadika, kwela bifwatulo, na kwalula mikanda yetu mpa na ingi myanda yabakwete kwela ku Internet. Mu ma filiale akwete kutuusha mikanda bakwete kwiyituma mu tukongye twi pepi mpa na twi kula. Bwakinyi bakwete kukita uno mudimo ooso? Mbwashi mwilo wa Yehowa udishibwe kalolo mu kikudi. (Yesh. 65:13) Twipaneyi mu kudya kwa bidibwa bya mu kikudi byooso byatupete ku bukwashi bwa ndumbulwilo a Yehowa.​—Mis. 119:27.

13, 14. Mba nnanyi bakwete kukokyela ndumbulwilo a Yehowa mwiyilu, na mushindo kinyi watudi balombeene kulesha shi atumukokyela pano pa nsenga?

¹³ Mu kimonwa kibapetele Yowano mutumibwa, bamwene Yesu mushaale pa nfwalasa tooka bwa kutshokola baaba booso bashikwe Yehowa. (Bif. 19:11-15) Mmwanda wa muloo ukata patuuku shi Yesu e na mikeyilu i na kululama ku mboko yaaye ibalume na e na dingi bashingwe mwimu baadi musangule pa nsenga, bapwe kupeta efuto dyabo dya kwenda mwiyilu! (Bif. 2:26, 27) Kukumbasha mpàngo ya ndumbulwilo a Yehowa mmwanda ukile buwa!

¹⁴ Bi mumune na kibumbu kikata, nkipaane mu kukwasha mudimo wa beena Kidishitu bashingwe mwimu bakii pa nsenga na bakwete kukunkusha kipindji kya ndumbulwilo a Yehowa ki pano pa nsenga lelo uno. (Badika Zakarii 8:23.) Mushindo kinyi watudi balombeene kulesha shi atukokyela ndumbulwilo a Yehowa? Twi balombene kwibilesha nsaa yatukokyela baaba bakwete kwitukunkusha. (Eb. 13:7, 17) Bino abibangilaa mu kakongye ketu. Myanda yatwakula pabitale bakulu ayilesha shi tukwete kwibanemeka na kunemeka bukunkushi bwabo su? Tukwete kukwasha baana betu bwabadya kunemeka bano bakwetu baasha kululama na bwashi bekale abebakimbi bwabadya kupeta malango aatukila mu bifundwe su? Na dingi, tukwete kwisamba mu kifuko kyetu pabitale mushindo watudi balombeene kutuusha bya buntu bikumbeene kukwasha mudimo aukitshika mu nsenga ishima su? (Mye. 3:9; 1 Kod. 16:2; 2 Kod. 8:12) Tukwete kumona shi kukwasha ku mudimo wa kubamba Nshibo yetu ya Bufumu kwi na muulo su? Kikudi kya Yehowa akitwelaa mbalo i kaaka kanemo na buumune. Kyakya kikudi kikwete kwitukwasha bwashi tatukookanga mu ano mafuku a ku nfudiilo.​—Yesh. 40:29-31.

15. Abitungu shi tukite kinyi bwa kwikala na nshalelo mwipushene na mpàngo ibuwa ya Yehowa?

¹⁵ Mu byooso, bwa kunyinga na kutambuka pamune na ndumbulwilo a Yehowa, abitungu twikale na nshalelo mwipushene na myanda yatulongyesha nsaa yatukimbi bya “kushingûla byabya abisangasha Nfumu Yesu.” (Ef. 5:10, 11) Pa mwanda wa mbidi yetu ikutwe kupwidika na byooso abikitshi Satana na ndumbulwilo aaye e bubi, tukwete kulwa ngoshi na myanda i bubi mu nshalelo etu. Anwe bakwetu balume na bakashi, ukayi shi efuku dyooso bangi ba kwanudi bakwete kukita mwabo mooso bwa kulama kipwano kyabo na Yehowa. Wawa mmwanda wi na muulo ku meso kwaye. Tatukôkanga! Kwikala na nshalelo mwipushene na mpàngo ya Yehowa akukyebe kwitusangasha ngofu na kwitupa lukulupilo shi lulangwilo lwetu ta ndwa bisumanga.​—1 Kod. 9:24-27.

16, 17. (a) Abitungu shi tukite kinyi su tubakitshi mulwisho ukata? (b) Kileshesho kya Anne akitulongyesha kinyi?

¹⁶ Byabya, nkinyi akitungu kukita su tubakitshi mulwisho ukata? Abitungu tukite mwetu mooso bwa kupeta bukwashi. Kufwamisha mwanda akunyishaa kulwisha myanda. Tentekyesha, Daavide bakwile nsaa ibaadi mufwamishe milwisho yaaye, shi ‘mbidi yaaye ibaadi imubofule na baadi na kwidil’efuku dishima.’ (Mis. 32:3) Eyendo, kufwamisha milwisho nkulombeene kwitufisha mu kukôka mu binangu na mu kikudi, kadi “muntu adidi kufwamisha bito byaaye t’obesha nya, anka eebisokola bwa kwibileka abamufwila lusa.”​—Mye. 28:13.

¹⁷ Twateyi kileshesho kya Anne. * Anne pabaadi mu bipwa ekumi, baadi afubu bu mbala-mashinda a myeshi yooso. Anka, aye nkubanga kwikala na nshalelo a bulamalama. Bino bibaadi bimukalakashe ngofu. Aye nkwamba shi: “Ku nfudiilo a byooso, naadi na kondo k’eshimba akantopeka. Nsaa yooso ntshinaadi na muloo nya.” Nkinyi kibakitshine? Baadi mwambe shi dingi efuku pabaadi ku bisangilo, abaadi abataluula mukanda wa Jaake 5:14, 15. Anne baadi mumone shi bibaadi abimutungu kupeta bukwashi bwa bakulu. Atentekyesha shi: “Byabya bifundwe nyi myanda yabadi bafundjishe kwi Yehowa bu bwanga bwa mu kikudi. Ta mbibofule kutoma bwanga nya, anka kunyima abupashaa maladi. Byabya malango andi musangane mu aa maverse, ngankwashe.” Nkupwe kukila ndambo ya bipwa Anne mupetuule bukome na dingi kwete kufubila Yehowa na kisumi kyooso na kondo k’eshimba kashy’akamutoka.

18. Abitungu shi twikale na kitshibilo kinyi?

¹⁸ Twi na kinemo kikata mu ano mafuku a ku nfudiilo kya kwikala mu uno ndumbulwilo a Yehowa e buwa! Tatukumanga kwata byabya byatudi nabyo na muulo upela. Anka, twikaleyi atwibungu pamune mu bisangilo bwa kulangwila na kakongye ketu, bwa kukimba baaba be na mashimba alongame mu teritware etu, na kusangeela bidibwa bya mu kikudi byatukwete kupeta. Tukokyeleyi baaba bakwete kwitukunkusha na twikale na nshalelo mwipushene na myanda yatulongyesha. Su tubakitshi byabya, tatwikala penda atutambuka pamune na ndumbulwilo a Yehowa nya, anka atwikala atukitshi myanda ibuwa kushii kukooka!