BWA kwaluula luno lukonko, tubandeyi kutala bino bileshesho bibidi bya kiimu ky’Efile Mukulu bi mu Bible: Mpeshi a kabutu mu mafuku a Nowa na kabutu ka beena Kanaana.

ABYAMBA BANTU: “Efile Mukulu baadi na kifita mwanda pabaadi munokyeshe mpeshi, babutwile bantu booso kukaasha penda Nowa na kifuko kyaaye.”

 ABYAMBA BIBLE: Efile Mukulu bambile shi: “Nee na disanka bwa lufu lwa mubi’nyi? Tomono mbwa’shi mubi aaluule eikashi, na ashaalè atala.” (Ezekyele 33:11) Byabya kabutu ka bantu bebubi mu mafuku a Nowa takabaadi kasangashe Efile Mukulu nya. Kadi bwakinyi bakitshine byabya?

Bible aluula shi pabaadi Efile Mukulu mutshibile bantu bashy’abamukokyela kiimu mu aa mafuku, bibaadi bu “kilêshêsho kya abikafikila bangi bashy’abamunêmeka.” (2 Mpyeele 2:5, 6) Bino bibaadi bikite Efile Mukulu abitulongyesha kinyi?

Kya kumpala, Efile Mukulu auku shi sunga kubutula kwa bantu akumutapa kwishimba, kwete kumona bantu booso be na kifita bakwete kukyengesha benaabo, na dingi abakayimuka kumpala kwaye bwa bikitshino byabo. Akyebe mpa na kupudisha kukutwa kwa kululama na makyenga.

Kya kabidi, bibaadi bikite Efile Mukulu mu mafuku a kala abilesha shi Efile Mukulu aukishaa bantu na kifulo kyooso kumpala kwa kwibanyoka. Nowa baadi mulungudi a myanda ya kululama, kadi bantu tababaadi bamuteemeshe nya. Bible amba shi: “Tababaady’ababasuka kintu, nyaa naa pabaanokyele mpeshi a kafwambu [kabutu] beebatutshile booso.”​—Mateo 24:39.

Efile Mukulu baadi mutungunukye na kukita byabya su? Oolo. Bu kileshesho, baadi mudimushe mwilo waaye wa Isaleele shi su balonda buntomboshi bwa miilo i pepi nabo, akatadiila beshikwanyi baabo bwabadya kutwela mu nsenga yaabo, na kubutula epata dyaabo dya Yeelusaleme; mpa na kwenda nabo mu bupika. Beena Isaleele abatombokyele​—abo nkubanga mpa na kulambula baana baabo kwi b’efile ba madimi. Yehowa bakitshine kintu su? Oolo, kadi nkapenda kunyima kwaye kutuma batemuki bwa kudimusha mwilo waaye misusa ibungi bwashi ushintuule bikitshino byawo pakukii nsaa. Bambile shi: “Mfumu Efile Mukulu taakitaa kintu kushii kusokwela bafubi baaye batemuki mwanda waye ufwame.”​—Amose 3:7.

MUSHINDO UKUTALE UNO MWANDA: Patumono mushindo ubaadi Yehowa anyoko bantu mu mafuku a kala atupete lukulupilo. Twi balombeene kutengyela na lukulupilo looso nsaa ayikyebe Efile Mukulu kunyoka baaba booso be na kifita abafwisha makyenga. Bible amba shi: “Babi abeebatuutu . . . Beeyishe naamu, abapyaana nsenga, abasangeela mu butaale bw’eyendo.” (Misambo 37:9-11) Opwandikisha naminyi pabitale kiimu akikyebe kukaasha bantu mu makyenga? Kino kiimu nkya kifita su akilesha lusa?

ABYAMBA BANTU: “Kabutu ka beena Kanaana nyi ngoshi ya kibeshi i mumune na ngoshi ya ano mafuku ya kutuuta bisamba bya bantu.”

ABYAMBA BIBLE: ‘[Efile Mukulu] byooso byakitshi mbipwidikye. [Nyi] Efile Mukulu a bulamate; mwadi tamwi kukutwa bululame.’ (Miiya Ikituulwe 32:4) Kiimu ky’Efile Mukulu takii bu ngoshi ya baana ba bantu nya. Bwakinyi? Mwanda, mu kwilekeena na baana ba bantu, Efile Mukulu atalaa bi mu mashimba a bantu.

Bu kileshesho, pabaadi Efile Mukulu mutshibile kibundji kya Sodome na kya Gomore kiimu aye nkwata kitshibilo kya kwibibutula, Abrahame muntu sha kululama baadi auku shi kiimu ky’Efile Mukulu nkya kululama. Tabaadi mulombeene kupwandikisha shi Efile Mukulu sha kululama mulombeene “kushimisha mululame na mupiile pamune.” Na lwishinko looso, Efile Mukulu baadi mumushinkamiishe shi su mu Sodome mwekala sunga bantu ekumi balulame, pa mwanda wabo ta mulombeene kubutula kyakya kibundji nya. (Kibangilo 18:20-33) Eyendo’shi, Efile Mukulu baadi atala mashimba a baaba bantu na kumona bubi bwa bikitshino byabo.​—1 Myanda 28:9.

Mu mushindo umune, Efile Mukulu bamwene shi, beena Kanaana be bubi aye nkwata kitshibilo kya kwibabutula. Beena Kanaana abaadi abaukibwa mwanda wa buntomboshi bwabo, bubaadi butale kushiika kwa baana abatala mu kaalo bwa kwibalambula kwi b’efile. * (2 Banfumu 16:3) Na dingi beena Kanaana booso abaadi abauku shi Yehowa baadi mwelele Isaleele mwiya wa kwata eumbo dyooso dishima. Baaba abakuminyine kulwa na beena Isaleele, abaadi nka bu abalu na Yehowa, Aye baadi muleshe patooka shi e na mwilo waaye, ta mpenda na beena Isaleele nya.

Anka, Efile Mukulu baadi muleshe lusa lwaye kwi beena Kanaana abalekyele buntomboshi bwabo abo nkukumiina miiya ibuwa ya Yehowa. Bu kileshesho, Rakabe ndumba a mu Kanaana bapandjile na kifuko kyaaye. Na dingi beena Kanaana ba mu kibundji kya Gabaone babatekyele lusa, abo nkupanda na baana baabo.​—Yooshwa 6:25; 9:3, 24-26.

MUSHINDO UKUTALE UNO MWANDA: Kiimu kibabadi batshibile beena Kanaana akitupa elango dikata.  Tukwete kwifubwila pepi n’efuku dibabadi batemukye, “efuku dya kiimu naa dya kushimina kwa bantu babi.” (2 Mpyeele 3:7) Su twi bafule Yehowa, atukyebe kupeta muloo nsaa yakapudisha makyenga pakakatusha pa nsenga booso bakwete kupela bukunkushi bwaye bwa kululama.

Na kifulo kyooso Yehowa kwete kwitulesha shi, bitshibilo abyata baledi mbilombeene kulwisha sunga kulumbuula nshaleelo a baana baabo. Eyi dy’Efile Mukulu adyamba shi: “Osangule muwa bwa’shi oshaale na muwa, obe na beekulu boobe, pa kufula Yehowa Efile Mukulu oobe, pakuteemesh’eyi dyaaye na pa kumulamata.” (Miiya Ikituulwe 30:19, 20) Ano mayi ng’Efile Mukulu sha kifita su ng’Efile Mukulu mufule bantu na akumiina shi baate bitshibilo bi buwa??