LUKONKO lwi ku kipusu kya uno jurnale alukukalakasha su? Uuka shi lukwete kukalasha bangi, kadi bebungi lelo uno bakwete kwiyipusha su Efile Mukulu e na kifita. Bwakinyi?

Bangi abaadi bapete masaku a ku bintu byabadi bapangye kwi Efile Mukulu, abeyipusha shi: “Bwakinyi Efile Mukulu mmutadiile bwashi ino myanda yooso ikitshikye? T’ekalakashaa pabitale ino myanda su? E na kifita su?”

Bantu bebungi bakwete kwiyipusha bino nsaa yababadika Bible. Pababadika myanda ya bantu babadi besambile mu Bible, bu kileshesho mwanda utale Nowa na Mpeshi a kabutu, abeyipusha shi: ‘Bwakinyi Efile Mukulu sha kifulo mmulombeene kwipaa bano bantu booso? E na kifita su?’

Ino nkonko ayikufwilaa ingi nsaa su? Sunga shi, omonaa bu’be shii mupwandikile kwalula bano booso abeyipusha su Efile Mukulu e na kifita su? Tala lukonko lungi lukumbeene nkukwasha.

Mu kikoso, twi kwamba shi twi bashikwe kifita mwanda twi bapangibwe na mushindo wa kushinguula buwa na bubi. Pabitale uno mwanda, twi belekeene na nyema. Mupangi eetu mmwitupangye “kwifwanyiko dyaaye.” (Kibangilo 1:27) Bino abipatuula kinyi? Mmwitupe mushindo wa kulesha ngikashi yaaye, miiya yaaye itale nshalelo, na mushindo w’amonaa buwa na bubi. Banda kwela binangu, su Efile Mukulu ndjo mwitupe mushindo wa kushinguula buwa na bubi mpa na kushikwa kifita, bino tabilesha shi Efile Mukulu mmushikwe kifita su?

Bible ashinkamisha uno mwanda, mwanda Efile Mukulu alesha mu Bible shi: ‘Mashinda ande e kunundw’a mashinda eenu, na mpàngo yande ngitabukile mpàngo yeenu.’ (Yeeshaya 55:9) Su atwamba shi Efile Mukulu e na kifita, atwakula myanda ikutwene na Bible​—ta bi nka bu’twe abamba shi mashinda etu ngatabukile aaye su? Kumpala kwa kwamba byabya, bibuwa kuuka ingi myanda. Pangi pamutwe pa kwiyipusha su Efile Mukulu e na kifita, abitungu twiyipushe bwakinyi ingi myanda yaaye ayimwenekaa bu ya kifita. Bwa kwitukwasha, tubande kutala akilesha “kifita.”

Su atwamba muntu kampanda shi e na kifita, abilesha shi e na binangu bi bubi. Muntu e na kifita ngyawa asangalaa pamono bangi abakyenge sunga shi, t’ekalakashaa bwa makyenga aabo nya. Byabya, nshe baana anyoko mwan’aaye bwa kumukyengesha e na kifita. Kadi yawa anyoko mwan’aaye bwa kumulanga sunga bwa kumukalwila, e buwa. Bu bi misusa ibungi tatuukaa akitakula muntu bwa kukita mwanda kampanda, mbibofule bwatudya kutopeka binangu byaye.

Tubande kutala myanda ibidi ilombeene kutakula bantu mu kwamba shi Efile Mukulu e na kifita​—masaku aatukila ku bintu byabadi bapangye kwi Efile Mukulu na biimu by’Efile Mukulu byatubadika mu Bible. Ino myanda yooso ayilesha binyibinyi shi, Efile Mukulu e na kifita su?