1, 2. Baledi na bana abekalaa na lukalo lwa kinyi, kadi nkalakasho kinyi yabafumankanaa nayo?

ABAADI beele bana nkama ba mu États-Unis luno lukonko shi: “Su benulungula shi baledi beenu abakyebe kufwa malooba, nwi balombeene kwibalungula kinyi lelo uno?” Pamutwe pa kutuula binangu ku myanda ikwete kwibakalakasha na yabadi bekutwene na baledi baabo, bana pepi na 95 pa lukama, abambile shi mbalombeene kulungula baledi shi: “Nfwileyi namu lusa” na shi “ne mwinufule ngofu.”—For Parents Only, mukanda wa Shaunti Feldhahn na Lisa Rice.

² Misusa yooso bana mbafule baledi baabo, na baledi naamu mbafule bana baabo. Uno nyi mwanda wa binyibinyi mu nshibo ya beena Kidishitu. Sunga byekala shi baledi na bana abekalaa na lukalo lwa kwikala pamune, ingi nsaa ta mbibofule bwa kwisambanga nya. Mpa na nsaa ayitungu shi belungushene myanda i mu mashimba aabo, bwakinyi abapelaa kwakula ingi myanda? Nkintu kinyi akikutshishaa miisambo ibuwa? Mushindo kinyi wa kwikikambila?

3. (a) Bwakinyi bifuko bibungi tabi na mushindo wa kushaala bwa kwisamba pamune? (b) Bwakinyi kukisha nsaa pamune takubaadi bu mwanda wi bukopo mu Isaleele a kala?

³ Mu bingi bifuko abamonaa shi bi bukopo bwa kupeta nsaa ya kwisamba pamune. Kala tabibaadi byabya nya. Moyiise balungwile beena Isaleele ba nsha bana shi: “Bishima bya [mayi a Efile Mukulu] . . . webyambulwile bana boobe; webalungule anka pooshaala kwoobe naa pootambuka mwishinda, pooyikala mulaale sunga bwimane.” (Miy. 6:6, 7) Bana abaadi abakisha efuku pamune na nyinabo ku nshibo sunga na nshaabo ku mafuba sunga ku mbalo yaaye ya mudimo. Kubaadi nsaa ibungi bwashi bana na baledi bashaale pamune bwa kwisamba.  Byabya, baledi abaadi na mushindo wa kuuka bana baabo, bi nkalo yaabo, na myanda yabakumiina. Bana naamu abaadi na mushindo wi buwa wa kuuka baledi baabo kalolo.

4. Bwakinyi mu bifuko bibungi bi bukopo bwa kushaala nkwisamba pamune lelo uno?

⁴ Lelo uno myanda ngilekeene! Mu angi maumbo, bana abendaa mu kalasa abo bakii bakinga, ingi misusa pabadi na bipwa bibidi. Balume na bakashi bebungi abafubilaa kula na mashibo aabo. Mu nsaa ipeela ilombeene baledi kukisha na bana pamune, ta be na mushindo wa kwisamba mwanda bakwete kukisha yaaya nsaa ku ma ordinatere, ku televizio, na ku bingi byamo. Misusa ibungi, baledi na bana abekalaa muntu na muntu ku lwaye lupese; be nka bu bantu benyi. Ta be na mushindo wa kwisamba pamune nya.

5, 6. Bangi baledi ‘abakimbaa’ nsaa ya kukisha na bana baabo naminyi?

⁵ We mulombeene ‘kukimba’ nsaa ya kukita ingi midimo bwa kupeta mushindo wa kukisha nsaa ibungi na kifuko kyobe su? (Badika Beena-Efeeze 5:15, 16.) Mu bingi bifuko abatshibaa nsaa ya kutala televizio sunga kutumika ku ordinatere. Bangi naamu abetatshishaa bwa kupeta nsaa ya kudya pamune efuku dyooso. Kukita kwa lulangwilo lwa mu kifuko kwi buwa bwikashaa, mwanda akukwasha baledi na bana bwabadya kwikala pepi na muntu ooso bwa kutaluula myanda ya mu kikudi kalolo! Kwilamina nsaa sunga lubingo lwa kukita luno lulangwilo nyi mwanda wi buwa, anka kwi ingi myanda ayitungu kukita bwa kwisambanga. Byabya, kwisambanga nsaa yooso nyi nkintu kikata akitungu kukita. Kumpala kwashi mwan’oobe ende ku kalasa, mulungule kintu akimusangasha, talulaayi kifundwe kya kwifuku, sunga shi kitaayi luteko pamune naye. Kukita kwa byabya akumukwasha ngofu mu dyadya efuku.

⁶ Bangi baledi mbapete mushindo wa kushintuula myanda mu nshaleelo aabo bwa kukisha nsaa ibungi na bana baabo. Bu kileshesho, Laura * mukashi sha bana babidi balekyele mudimo waaye ubaadi aumwata nsaa ibungi amba shi: “Ku namashika atwe  booso tubaadi atulwila nsaa ya kwenda ku mudimo sunga ku kalasa. Panaadi naluka ku nshibo ku kyolwa, naadi nasangana mwina mudimo mmupwe kulumbulwila bana mbalo mbalaale. Kuleka kwande kwa mudimo kubaadi akutungu shi twikale na makuta apeela, kadi namono shi binobino nawuku bi binangu na myanda ya bana bande. Nateemesha byooso byabakula mu nteko yaabo na kwibakunkusha, kwibanyingisha, na kwibalongyesha.”

7. Baledi na bana bakwete kwidila pabitale mwanda kinyi?

⁷ Kunyima kwa kwela bana bebungi nkonko, bafundji ba mukanda wa penda baledi (angl) abalesha kingi kintu akikutshishaa miisambo. Abamba shi: “Kya kumpala bana bebungi abedilaa pa mwanda wa baledi baabo shi tabakwete ‘kwibateemesha.’” Wawa mmwanda wi bukopo dingi ku lungi lupese. Misusa ibungi baledi bakwete kwinyongola lwabo lupese shi, bana tabebapushiisha. Bwa kwisamba kalolo, beena kifuko abitungu bekale abeteemeshena.—Badika Jaake 1:19.

8. Mushindo kinyi autungu shi baledi bateemeshe bana baabo?

⁸ Baledi, nukwete kuteemesha bana benu su? Bino mbikile bukopo menemene nsaa yanudi bakookye sunga nsaa yanumono shi ta kwi mushindo wa kwisamba. Anka myanda yomono bu ishi na muulo ngilombeene kwikala na muulo kwi mwan’oobe. Kwikala na “kupusha kwa bukidi” akulesha kuteemesha kushii penda apakula mwana, kadi mpa na mushindo wakwete kwakula. Bukata bw’eyi dya mwana na mushindo aukitshi mbidi yaaye abilesha byapusha. Kwela nkonko kwi na muulo ukata dingi. Bible amba shi: “Mitentekyesho ya muntu ngifwame’nka bu mwidindji dya mema dila, anka sha binangu nyi mulombêne kwiisokola.” (Mye. 20:5, Ñono na malango) Abitungu kwikala na kapatupatu na binangu pokwete kwisamba mwanda ukata na mwana oobe.

9. Bwakinyi abitungu shi bana bapushishe baledi baabo?

⁹ Bana, nukwete kukokyela baledi benu su? Eyi dy’Efile Mukulu adyakula shi: “Mwan’ande, lama abikulambukisha nshoobe, tolenguulang’elango dya nyinoobe.” (Mye. 1:8) Tentekyesha shi, baledi boobe mbakufule na abekalakashaa pa mwanda oobe, byabya bibuwa kwibateemesha na kwibakokyela. (Ef. 6:1) Mbibofule bwa kukokyela nsaa yanwisamba kalolo na baledi na powuku shi mbakufule. Lungula baledi boobe mushindo okwete kupusha kwishimba pabitale myanda kampanda. Bino abibakwasha bwa badya nkuteemesha. Eyendo, abitungu shi obe namu okite bukopo bwa kwibapushiisha.

10. Mwanda wa Roboame wi mu Bible, awitulongyesha kinyi?

¹⁰ Abitungu wekale mudimukye nsaa yoteemesha malango a ba nsongwalume na bansongwakashi ba mulongo oobe. Mbalombeene nkulungula myanda ayipushika bu i buwa, anka malango aabo ta ngalombeene nkukwasha nya. Ngalombeene mpa na nkulwisha. Pa mwanda wa kukutwa kwa binangu na kuuka kwa myanda abiuku bantu bakulu, bansongwalume na bansongwakashi bebungi tabe na mweneno a myanda ebuwa na ta be na mushindo wa kushinguula masaku alombeene kutuuka ku ingi myanda nya. Tentekyesha kileshesho kya Roboame mwana a Nfumu Salomone. Pabafikile bu nfumu a Isaleele, bibadya kwikala buuwa su balondele malango a bantu bakulu. Anka, aye balondele malango e bubi a bakinga naaye. Bantu booso tababaadi dingi balamate ku bufumu bwaye nya. (1 Bf. 12:1-17) Pamutwe pa kulonda kileshesho ki bubi kya Roboame, kita moobe mooso bwa kwikala w’esamba na baledi boobe kushii kwibafya mwanda. Lungula baledi boobe binangu byodi nabyo. Londa malango na binangu byabo bwashi bikukwashe.—Mye. 13:20.

11. Nkinyi kilombeene kukitshika su bana tabefubwila pepi na baledi baabo?

 ¹¹ Anwe baledi, su tanukumiina shi bana benu bakimbe binangu bya bakinga nabo, kitayi mwenu mooso bwashi tabekalanga na moo wa kwifubwila kwanudi na kwisamba neenu. Ungi mukwetu mukashi e mu bipwa ekumi baadi mufunde shi: “Nsaa nka yanteemuna eshina dya nsongwalume baledi bande abafiitshi munda. Byabya abinfiitshishaa munda na ntamono su mbya kutungunuka na mwisambo dimo nya.” Ungi mukwetu nsongwakashi bambile shi: “Bansongwalume na bansongwakashi booso abekalaa na lukalo lwa malango a baledi baabo, kadi su baledi baabo tabaata mwanda wa kwibapa malango na muulo, bana mbalombeene kwenda kwi mungi muntu, mpa na kwi baaba bashy’abauku myanda ibungi.” Su okuminaa kuteemesha myanda yooso ayikulungula bana boobe, okyebe kumona’shi tabekala abakufi mwanda na abekala abatambula malango oobe.

12. Abikitshi baledi mbilombeene kukutshisha bana mushindo wa kwisamba nabo naminyi?

¹² Kingi kintu kilombeene kukutshisha miisambo nyi nsaa i baledi abapele mususa umune byooso abibalungula bana baabo. Eyendo shi, baledi beena Kidishitu abekalaa na lukalo lwa kukalwila bana baabo. Mu ano mafuku “a nfudiilo” mwi masaku ebungi a mu kikudi mpa na ingi myanda. (2 Tim. 3:1-5) Byabya, kyakya kyabamono kwi baledi bu kukalwila, bana mbalombeene kumona bu kukishakisha.

13. Bwakinyi abitungu shi baledi bekale badimukye pabitale kwakula mususa umune?

¹³ Baledi ta mbalombeene kulesha bi mu binangu byabo nka penda mususa umune nya. Eyendo shi, tabikalaa bibofule kumiina nsaa i bana abakulungula mwanda aukukalakasha. Anka, bibuwa kuteemesha kalolo kumpala kwa kwaluula. Nfumu Salomone sha binangu bafundjile shi: “Aaluula kumpala kwa kuteemesha mmupatakane, naa abamukwatshisha buufu!” (Mye. 18:13) Su boumiina okyebe kupusha bibungi, na bana benu abakyebe kutungunuka na kwakula. Kumpala kwa kwaluula, bibuwa obande kupusha mwanda ooso. “Bwakulakule” abulwishaa eshimba. (Yob. 6:1-3) Bu byanudi baledi baasha kifulo, teemeshayi bwa kupeta binangu n’edimi dya kalolo.

14. Bwakinyi abitungu shi bana bekale na lwishinko mu kwisamba?

¹⁴ Anwe bana, ikalayi na “lwishinko pa kwisamba,” kushii kufiita munda mususa umune ku byooso abyakula baledi benu, mwanda Efile Mukulu mmwibape mudimo wa kwinukusha. (Mye. 22:6) Pangi tababamwene myanda i mumune na ino yanukwete kumona. Byabya, bakwete kwinyongola bwa bilema bibabadi bakite kala pababaadi bakii bakinga na bakwete kukita mwabo mooso bwa kwinukalwila ku yaaya myanda. Nyi bwakinyi, ikalayi anumono baledi benu bu be kwanka bwa kinukwasha, ta mbu beshikwanyi nenu nya. (Badika Myeele 1:5.) “Nemeka nshyobe na nyinobe,” ebaleshe shi we mwibafule bu byabadi bakufule. Byabya abibakwasha bwabadya ‘nkukusha mu elango dya Yehowa.’—Ef. 6:2, 4, Kilombeno kipya.

15. Nkinyi kilombeene kwitukwasha bwa kupela kushimisha lwishinko na kwinyongola bwa bakwetu?

¹⁵ Misusa yooso atwikalaa na lwishinko kwi bantu batudi bafule. Pabaadi mutume mukanda “kwi kisaka kya bantu b’Efile Mukulu be mu Kolose, bakwetu ba kishima mwi Kidishitu,” Mpoolo mutumibwa bafundjile shi: “Balume ikalayi na bakashi benu kifulo, tanwikalanga nabo lukiso. Banshya bana namu, tanukolomonanga bana benu tala bakenyongola.” (Kol. 1:1, 2; 3:19, 21, Kilombeno kipya) Mpoolo bapeele beena Efeeze dino elango: ‘Bingayi kwanudi kinyongwa kya kwishimba, bukyelo na nsungu, nulekye  kulee na kukaana mulomo; katushaayi bipaso byooso bya mushikwa.’ (Ef. 4:31) Kwikala na bipindji bya kikuba kya kikudi ky’Efile Mukulu bu—lwishinko, butontshi bwa mbidi —akukyebe kwitukwasha bwa kwikala na lwishinko sunga twekala na nkalakasho.—Gal. 5:22, 23.

16. Mushindo kinyi ubaadi Yesu mulangye balondji baaye, na bwakinyi bibaadi buwa?

¹⁶ Tubande kwata kileshesho kya Yesu. Banda kunangushena nkalakasho ibaadi nayo mu nsaa ya nfudiilo ibakitshine kidibwa kya lukilo na batumibwa baaye. Yesu baadi auku shi mu yaaya nsaa imune akyebe kufwa lufu lwa makyenga. Kutumbisha kw’eshina dya Nshaaye na kipandjilo kya bantu akifiki ku kululama kwabo. Akupu, pababaadi abadi, “[balondji] babaatushiishe eunga pa mwanda wa kuuka mukile bukata munkatshi mwabo.” Yesu tabaadi mwibasaashile nya. Anka, baadi mwibauminyishe anangushena nabo mu kufukama. Yesu bebatentekyeshe shi abo abekalanga bashaale naaye mu bitompwanga byaaye. Sunga Satana baadi atekye bwa kwibapeepula byabapepulaa ntete, Yesu baadi mushinkamishe shi abashaala banyingye mu lukumiino. Baadi mpa na mudye nabo kipwano.—Luk. 22:24-32.

17. Nkinyi kilombeene kukwasha bana bwashi bekale beshinkye?

¹⁷ Abitungu bana bekale beshinkye. Bikishekishe nsaa ayifisha bana bipwa ekumi, mbalombeene kumona shi baledi baabo ta mbebakulupile nya nsaa yabebapa malango. Sunga ingi nsaa mbilombeene kumweneka byabya, shinguulayi shi myanda ayikitshi baledi benu ayilesha shi mbenufule. Nsaa yanumiina bwa kwibateemesha na kulonda malango aabo, abakyebe kwinupa kinemo na anwikala na nkumo ya bu bantu ba kishima. Kukita kwa byabya akwinukwasha bwanudya kwikala na bulungantu mu muwa wenu. Kwikala na lwishinko nyi mwanda wa binangu. Ungi mwele awamba shi: “Mupatakane aleeshaa byadi na nsungu, anka sha-binangu eeyilamaa, eyibatshika.”—Mye. 29:11.

18. Kifulo akimwekaa naminyi mu miisambo ibuwa?

¹⁸ Byabya anwe bakwetu baledi na bana, tanukookanga su mu kifuko kyenu miisambo tayikwete kukidika mu mushindo wanukulupila. Tungunukaayi na kwitatshisha, na nutambukile mwishinda dya binyibinyi. (3 Yo. 4) Mu nsenga ipya, bantu bapwidikye abakekala abesamba na benabo mu kwipushena. Anka bwa lelo uno atwe booso tukwete kukita myanda yatushaala atwinyongola kumongo. Byabya, twi na kya kuteka lusa. Efwileneyi lusa. Nwikale “mu buumune pa kwifulêna kifulo.” (Kol. 2:2, EEM) Kifulo ki na bukome. ‘Kifulo ki na lwishinko na kalolo, takikwata nsungu, taakilama ngo, akilekanaa bito byooso, akikuminaa byooso, akikulupilaa byooso, akyataa byooso na lwishinko.’ (1 Kod. 13:4-7) Tungunukayi na kwikala na kifulo, na miisambo yenu ayikyebe kunyinga, ayisangasha kifuko kyenu na kutumbisha Yehowa.