1, 2. Batemwe ba Yehowa be na kinemo kinyi kikata, na mmushindo kinyi opushaa pabitale kyakya kinemo?

BANTU bebungi abamonaa bu mwanda wa kinemo nsaa yabebapa bwedi kunyima kwa kukita mufubo kampanda ushabandile kukita muntu. Bu kileshesho, bangi mbebape bwedi bwabetamina bu prix Nobel pamwanda wa katshintshi kaabo mu kutwesha kwa kufukama kunyima kwa ngoshi sunga kwikutwena kampanda. Anka, atwe twi na kinemo kikata kya kwikala bu mikyendji sunga bu batumibwa b’Efile Mukulu bwa kukwasha bantu bwashi bekale mu kipwano kibuwa na Mupangi aabo!

² Bu byatudi Batemwe ba Yehowa, twi na kyakya kineemo. Muyile mwiya w’Efile Mukulu na Kidishitu, tukwete kusendeela bantu shi: “Ealushei kwi Efile Mukulu.” (2 Kod. 5:20, EEM) Yehowa kwete kutumika netu bwa kukaka bantu kwadi. Pa kukita kwa byabya, midiyo ya bantu be mu maumbo akile pa 235 mbapete bukwashi bwa kwikala mu kipwano n’Efile Mukulu na kwikala na lukulupilo lwa kwikala na muwa wa looso. (Tt. 2:11) Na katshintshi kooso, atwitamina “yaawa ooso akumina [bwa kwata] meema a muuwa, buntu.” (Bif. 22:17) Pa mwanda wa kifulo kyatudi nakyo bwa uno mufubo wibuwa na kwiukita n’eshimba dimune, mbalombeene kwitwitamina bu bantu be na “katshintshi ka kukita mifubo ibuwa.” (Tt. 2:14, NW) Binobino, tubande kutaluula mushindo ulombeene katshintshi ketu ka kukita mifubo ibuwa kwitukwasha bwa kukaka bantu kwi Yehowa. Kya kumpala nyi mufubo wetu wa kulungula mukandu wibuwa.

3. Kuuka shi “Yehowa [n]sha mpàngo na katshintshi,” akwitupa lukulupilo kinyi?

³ Mukanda wa Yeeshaya 9:6 awakula pabitale myanda ayikalombasha Mwana a Efile Mukulu pakekala Nfumu shi: “Yehowa sha mpàngo na bukome [katshintshi, NW] ngi akumbasha byabya.” Ano mayi aalesha shi Nshetu a mwiyilu kwete kwitatshisha ngofu bwa kipandjilo kya bipangwa byaye. Kileshesho kya katshintshi ka Yehowa akilesha patooka shi, mudimo wabadi betupe kwi Efile Mukulu wa bu  balungudi ba mukandu wa Bufumu abitungu twiukite n’eshimba dimune na muloo na katshintshi. Lukalo lukata lwatudi nalo lwa kukwasha bantu bwashi baukye Efile Mukulu alulesha katshintshi ka Yehowa. Byabya, bu by’atufubu pamune n’Efile Mukulu, tukwete kwipaana ngofu bwa kulungula mukandu wibuwa patudi na mushindo wa kwiukita su?—1 Kod. 3:9.

4. Mmushindo kinyi witulekyele Yesu kileshesho kya katshintshi mu mudimo wa bulungudi?

⁴ Tubande kwisamba pabitale katshintshi ka Yesu. Mmwitulekyele kileshesho kibuwa kya katshintshi ka kunyingiila mu mufubo wa bulungudi. Sunga pabaadi mu bitompwanga, baadi nka na katshintshi ka kulungula mukandu wibuwa mpa na ku lufu lwaye lwa makyenga pano pa nsenga. (Yo. 18:36, 37) Bu bibaadi nsaa ya lufu lwaye lwa bu mulambu ayifubwila pepi, Yesu baadi mutamishe lukalo lwaye lwa kukwasha bangi bwabadya kuuka Yehowa.

5. Yesu bakitshine kinyi muyiile lukindji lwaye lwa mutshi wa nfigiye?

⁵ Bu kileshesho, ku mpwilo kwa kipwa kya 32 kunyima kwa Yesu Kidishitu (K.Y.K.), Yesu baadi mutuushe kileshesho kya muntu baadi na mutshi wa nfigiye mwifuba dyaaye utaubaadi bipwa bisatu kushi kupa bikuba. Pababamulungwile bwashi eutshibe, kidime a mitshi ya nfigiye batekyele bwashi beulekye abande kwiudiisha. (Badika Luuka 13:6-9.) Nka penda kasaka kapeela ka balondji nyi abaadi balombeene kwikala bu bikuba bya ku mudimo wa bulungudi bwa Yesu. Anka bu byabebilesha mu lukindji lwa kidime a mitshi ya nfigiye, Yesu baadi mwate mafuku apeela pepi na myeshi isamombo bwa kutamisha mufubo wa bulungudi mu Yudeya na mu Peree. Mafuku apeela kumpala kwa lufu lwaye, Yesu badidile bwa bantu ba mu kibundji kyabo abaadi ‘bapape matwi.’—Mat. 13:15; Luk. 19:41.

6. Bwakinyi abitungu kutamisha nfubilo etu a mudimo wa bulungudi?

⁶ Bu byatudi bapwe kwisesela ngofu mu mafuku a ku nfudiilo, tatwi balombeene kutamisha nfubilo etu a mudimo wa bulungudi su? (Badika Danyele 2:41-45.) Kwikala bu Batemwe ba Yehowa nyi nkinemo kikata! Twi bupenka mu nsenga ishima bakwete kupa bantu lukulupilo lwa binyibinyi lwa nfudiilo a myanda ayibakalakasha. Ungi mufundji a jurnale ekalanga muleshe mafuku ashaale shi, lukonko lwashi “Bwakinyi myanda ibubi ikwete kukwata bantu bebuwa?” lwi bukopo kwaluula. Wawa mmudimo wetu’twe beena Kidishitu be na kinemo kya kutuusha myalulo ya mu Bible pabitale ino nkonko kwi booso abetuteemesha. Twi na kya kwikala “basasakate ku kikudi” nsaa yatukwete kukita mudimo wetu w’Efile Mukulu. (Lom. 12:11, Kilombeno kipya 2009) Ku bukwashi bw’Efile Mukulu, katshintshi ketu mu mudimo wa bulungudi nkalombeene kukwasha bangi bwabadya kwiuka Yehowa na kumufula.

7, 8. Binangu bya kwisumina ingi miloo abitumbisha Yehowa naminyi?

⁷ Anka bu byabidi bileshibwe pabitale myanda ibamwene Mpoolo mutumibwa, mu mudimo wetu kwi nsaa ‘y’atukutwa tulo’ na ‘yatudi na nsala.’ (2 Kod. 6:5, EEM) Bino bishima abilesha menemene kwisumina ingi miloo, na abitutentekyesha mudimo ukwete kukita ba mbala-mashinda bakwete kutuula mudimo wabo pa mbalo ya kumpala nsaa yabakimbi mushindo wa kupudisha nkalo yaabo. Banda kutala dingi, ba misionere betu bakwete ‘kwipaana bu mulambu wa bitomwanga pa kitapilo’ bwa kukwasha bantu ba mu maumbo ashii aabo. (Fid. 2:17, NW) Kadi twi kwamba naminyi pabitale bakwetu bakulu mu tukongye bakwete kufuba ngofu abesumina bya kudya sunga tulo bwa kukwasha mikoko ya Yehowa? Twi na dingi bakwetu batabadi banunu mpa na bano be mu maumbo alanda bakwete kukita mwabo mooso bwa kutwela mu bisangilo bya beena Kidishitu mpa na kwenda mu mudimo wa bulungudi. Mashimba etu ngaule na muloo nsaa yatutentekyesha bano bafubi b’Efile Mukulu booso bakwete kwisumina ingi miloo. Mushindo wabakwete kukita uno mudimo, ukwete kukuma mweneno a bangi pabitale mudimo wetu.

⁸ Mu mukanda ubabadi batume mu Grande-Brétagne, mu Lincolnshire mu kibundji kya Boston Target, ungi muntu shi Temwe beubadikile bambile shi: “Bantu bakwete kushimisha lukumiino lwabo mu bipwilo . . . Bakata ba bino bipwilo bakwete kukita kinyi? Tabakwete kwenda bibaadi abyende Kidishitu mu kutala bantu  nya . . . Kipwilo penda kimune akimweneka bu kikwete kwitatshisha bwa bantu nyi mBatemwe ba Yehowa, bakwete kwenda mu kutala bantu na mbepaane ngofu mu kulungula bya binyibinyi.” Mu ino nsenga iwule bantu bepaane penda mu kukita abibatumu binangu byabo, binangu byetu bya kwisumina ingi miloo abitumbisha Yehowa Efile Mukulu ngofu.—Lom. 12:1.

9. Nkinyi kilombeene kwitutakula mu kulama katshintshi mu kukita kwa mifubo ibuwa mu mudimo wetu wa bulungudi?

⁹ Byabya twi balombeene kukita kinyi su atumweneka bu’twe abaabanga kushimisha katshintshi mu mudimo wa bulungudi? Bibuwa tunangusheene pabitale myanda yabakwete kulombasha kwi Yehowa ku bukwashi bwa mudimo wa bulungudi. (Badika Beena-Looma 10:13-15.) Bwa kupanda abitungu kwidila eshina dya Yehowa na lukumiino looso, kadi bantu ta mbalombeene kumwiyaayila su tatwibebalungule eshina dyaaye. Kuuka kwa bino nkulombeene kwitutakula mu kulama katshintshi mu kukita kwa mifubo ibuwa na kwipaana mu kulungula kwa mukandu wibuwa wa Bufumu.

10. Bwakinyi twi balombeene kwamba shi mwikelo wetu wibuwa aukakaa bantu kwi Yehowa?

¹⁰ Pabitale muulo wi nawo mudimo wa bulungudi, penda katshintshi ta nkalombeene kukaka bantu kwi Efile Mukulu nya. Kintu kya kabidi kilombeene kukaka bantu kwi Efile Mukulu nyi mwikelo wibuwa wa bwina Kidishitu. Mpoolo baadi mushimikye kasele pabitale muulo wi nawo mwikelo wetu wibuwa pabaadi mufunde shi: “Tatukyebe kukokosha muntu su ngumune, kupela tala mufubo wetu wakatopekwa.” (2 Kod. 6:3, EEM) Ngakwilo ebuwa na mwikelo ululame aulongamisha malongyesha a Efile Mukulu, na kwikasha lulangwilo lwa Yehowa bu kintu kibuwa kwi bangi. (Tt. 2:10) Nyi bwakinyi, misusa ibungi tukwete kupusha bangi abakula pabitale mwikelo wetu wibuwa wa bwina Kidishitu.

11. Bwakinyi abitungu tutaluule mwikelo wetu kalolo?

¹¹ Atuuku shi bikitshino byetu mbilombeene kutakula bantu mu kukita myanda ibuwa, anka  bikitshino bibubi namu mbilombeene kulwisha myanda yooso. Nyi bwakinyi sunga twekala ku mudimo, ku nshibo, sunga ku kalasa, abitungu tukite mwetu mooso bwa kupela kukita kintu kilombeene kutakula bantu mu kutopeka mudimo wetu na mwikelo wetu. Su twakumiina kukita bubi, masaku akata ngalombeene kwitufwiila. (Eb. 10:26, 27) Byabya, abitungu tutaluule kalolo mushindo aumono bangi kyooso kyatukitshi na bi nshalelo etu. Bu bi binangu bya bantu ba uno ndumbulwilo bikwete kwenda na kulwila, bantu bebuwa abakyebe kumona “kwilekeena kwi . . . pankatshi pa . . . afubila Efile Mukulu naa shyaamufubila.” (Ma. 3:18) Eyendo mwikelo wetu wibuwa wa bwina Kidishitu wi na muulo ukata mu kwalusha bantu mu kipwano kibuwa n’Efile Mukulu.

12-14. Mushindo watunyingiila mu bitompwanga aukwasha bangi mu mudimo wa bulungudi naminyi? Tuusha kileshesho.

¹² Pabaadi afundjila beena Kodinto, Mpoolo balesheshe shi bapetele bitompwanga bibungi, nkalakasho, kukupilwa, na kwedibwa mu lukano. (Badika 2 Beena-Kodinto 6:4, 5.) Nsaa yatufumankana na bitompwanga bi byabya mu lukumiino, kunyinga kwetu nkulombeene kutakula bangi mu kukumiina bya binyibinyi. Twate kileshesho: Takudi ndambo ya bipwa, mu Angola abaadi abakyebe kwimika mudimo wa Batemwe ba Yehowa mu kingi kibundji. Ungi mukwetu mulume na mukashi aaye abaadi bebakwate pamune na bantu 30 abaadi basangeele mukandu wibuwa na abaadi abatwele mu bisangilo byetu. Beena kibundji abafikile bwa kutala mushindo ubabadi abakupila bano bakwetu bashibaadi bakite kintu mpa na bibabangile mase kwibatuuka. Abaadi bakyengyeshe mpa na bakashi na baana. Lukalo lwabo lubaadi lwa kutshinyisha bantu bwashi muntu su ngumune takumanga kuteemesha Batemwe ba Yehowa. Anka kunyima kwa kwibakupila munkatshi mwa bantu, bantu bebungi abaadi pepi nabo abafikile kwabadi bwa kwibateka bwashi balongye nabo Bible. Kunyima kwa byabya, mudimo wa kulungula mukandu wa Bufumu ubabangile kwenda kumpala. Bungi bwa balungudi nkufiima na abo nkupeta ingi miloo ibungi.

¹³ Kino kileshesho akilesha mushindo ulombeene kulamata kwetu kwa ku mayi a mu Bible kutakula bantu mu kukita kintu kampanda. Twi balombeene kunangwila pabitale bungi bwa bantu abaadi bealushe kwi Efile Mukulu mwanda w’eshimba dinyingye dya Mpyeele na bangi batumibwa. (Bik. 5:17-29) Mu ano mafuku etu, balongi n’etu, beena mudimo n’etu, sunga beena kifuko n’etu mbalombeene kukumiina nsaa yabamono mushindo watudi balamate ku myanda ilulame.

¹⁴ Nsaa yooso, kwi bangi bakwetu abafumankana na bitompwanga. Bu kileshesho, mu Armenie, bakwetu pepi na 40 be mu lukano mwanda wa kupela kutwelakana mu myanda ya politike, na dingi kwi bangi bebungi babakyebe kwela mu lukano mu mafuku e kumpala. Mu Erythrée, bafubi ba Yehowa 55 be mu lukano, bangi be na bipwa bikile 60. Mu Corée du Sud, Batemwe pepi na 700 be mu lukano mwanda wa lukumiino lwabo. Takudi bipwa 60 kasha babanga kukita bino mu dino eumbo. Tutekyeyi bwashi kululama kwa bakwetu babakwete kukyengesha mu maumbo elekeene kutumbishe Efile Mukulu na kukwashe bantu bafule kululama bwashi balamate ku lulangwilo lwa binyibinyi.—Mis. 76:8-10.

15. Tuusha kileshesho akilesha shi, kwikala na nshaleelo a bululame, akukaka bantu ku bya binyibinyi.

¹⁵ Kwikala na nshalelo a bululame, akukaka bantu ku bya binyibinyi. (Badika 2 Beena-Kodinto 6:4, 7.) Bu kileshesho: Ungi mukwetu mukashi baadi akyebe kufuta tikee a motoka, ungi muntu baadi eukeena naaye bamulungwile shi tofutanga mwanda kwende ta kwibula nya. Uno mukwetu mukashi nkumupatulwila shi, bibuwa kufuta tikee sunga kwende ta kwibula. Nsaa ibayiki yawa muntu, shofere bealuula kwi mukwetu mukashi na bamwipusha shi, “we Temwe a Yehowa su?” Mukwetu mukashi nkwalula shi “oolo, bwakinyi bongipusha byabya?” Shofere nkumwalula shi: “Mpushanga anwakula pabitale kufuta kwa tikee, na dingi nawuku shi Batemwe ba Yehowa tabakutwaa kufuta na be na kululama mu myanda yooso.” Kunyima kwa myeshi ipeela, pabaadi uno mukwetu ku bisangilo, yawa mwana mulume beseseele peepi naye na amwipusha shi: “Bontundula su? Nami yawa shofere baadi mwisambe nobe pabitale kufuta kwa tikee. Nsaa inamwene  mwikeelo oobe, nadi mwate kitshibilo kya kubanga kulonga Bible na Batemwe ba Yehowa.” Mwikeelo wetu wa kululama awitwikasha bu balungudi ba kukulupila.

16. Bwakinyi ngikashi bu, lwishinko, kifulo, na kalolo ayikumaa bantu ku mashimba? Tuusha kileshesho akilesha abikitaa bakata ba bipwilo bya madimi.

¹⁶ Atukaka dingi bantu kwi Yehowa nsaa yatwibalesha ngikashi bu lwishinko, kifulo, na kalolo. Bangi abetumono mbalombeene kwikala na lukalo lwa kulonga bwa kuuka myanda itale Yehowa, mpàngo yaaye, na mwilo waaye. Binangu na mwikelo wa beena Kidishitu ba binyibinyi mbilekeene ngofu na binangu bya bantu abeamba bu balamate kwi Efile Mukulu aku namu mbansesa. Bangi bakata ba bipwilo mbapete bupeta bwi bungi bw’abayibi kwi beena bipwilo byabo, na kufuba na makuta ebungi bwa kwibakisha mashibo akata na kuula myotoka ya muulo wi bukopo—na ingi nsaa, abaulu mpa na byamo bya kutwesha lupapi mu tushibo twa mbwa yaabo. Na dingi, bebungi abeamba bu balondji ba Kidishitu ta be na eshimba dya ‘kupaana buntu’ nya. (Mat. 10:8) Anka bu bibaadi bakata ba bipwilo bebubi ba mu Isaleele akala, “abalambukisha bwa kupeta kantu”—na myanda ibungi yabakwete kulongyesha tayii mu Bible nya. (Mik. 3:11) Wawa mwikelo wi bubi tawalusha bantu mu kipwano n’Efile Mukulu nya.

17, 18. (a) Kulesha kwa ngikashi ya Yehowa mu nshalelo etu akumutumbisha naminyi? (b) Nkinyi akikutakula bwa kutungunuka na kukita mifubo ibuwa?

¹⁷ Ungi mwanda, mmalongyesha a beena Kidishitu ba binyibinyi na bikitshino byabo bibuwa abikumaa mashimba a bantu be peepi nabo. Bu kileshesho, pabaadi ungi mbala-mashinda ende na kulungula mukandu wibuwa ku nshibo na nshibo, bapetele ungi taabo baapu kukula anka yawa taabo nkupela kumuteemesha pabapushishe shi nyi Temwe a Yehowa. Yawa taabo bamulungwile shi nsaa ibakookola ku kibelo ekalanga ku kikamino akimbi mushindo wa kushintuula ampoule. Yawa mukwetu nkumulungula shi: “Tabibuwa kukita byabya bupenka boobe nya.” Ndjo yawa taabo nkumutwesha mu nshibo, aye nkumushintulwila anka, akupu yawa mukwetu nkwenda. Kunyima kwa mafuku apeela, mwana a yawa taabo pabafikile mu kutala nyina’ye, yawa taabo bamulondeele byooso bibaadi bikidikye, aye nkukaanya na nkukimba yawa mukwetu bwa kumutumbula. Anka paapa, yawa mwana nkukumiina kulonga Bible.

¹⁸ Bwakinyi okumiina kutungunuka na kukita mifubo ibuwa? Pangi mmwanda ouku shi, patudi na katshintshi mu mudimo wetu wa bulungudi na kukita kwa myanda ipusheene na akikyeb’Efile Mukulu, atutumbisha Yehowa na twi balombeene kukwasha bangi bwabadya kupeta kipandjilo. (Badika 1 Beena-Kodinto 10:31-33.) Katshintshi ka kukita mifubo ibuwa mu mudimo wa kulungula mukandu wibuwa na kwikala na mwikelo ausangasha Efile Mukulu akatuukila ku lukalo lwatudi nalo lwa kulesha kifulo kyetu kwi Efile Mukulu na kwi bantu n’etu. (Mat. 22:37-39) Su twi na katshintshi ka kukita mifubo ibuwa, atukyebe kupeta bwedi na miloo ibungi kubanga binobino. Na dingi, twi balombeene kukulupila efuku adikekala bantu booso na katshintshi bwa lulangwilo lwa binyibinyi bwa kutumbisha Mupangi etu, Yehowa.