Bible alesha myanda ibidi ikata. Wa kumpala, sunga bantu mbakite myanda kampanda ibuwa, tababaadi bebafukye na bukome bwa kwiludika abo banabeene. Wa kabidi, bantu ta mbobeshe mpàngo yaabo mwanda “nsenga yoso ngimunyibwe na yawa mubi,” Satana Diabulu. Sunga bantu mbakite bukome bwi naminyi tambafwishe kufukama pa nsenga nya.—Badika Yeelemiya 10:23; 1 Yowano 5:19, Kilombeeno kipya.

Nsenga tayi mu kufukama mwanda bantu be na lwabi na bakwete kukimba penda bwa kwisangasha abo banabeene. Penda guvernema ekala mu nsenga ishima mulombeene kulongyesha bantu bya kufula kyakya kibuwa na kwitatshisha bwa buwa bwa bangi ndjo mulombeene kufwisha kufukama pa nsenga.—Badika Yeeshaya 32:17; 48:18, 22.

Efile Mukulu sha bukome booso mmulee shi akatuulu guvernema umune bwa kumuna bantu booso. Akapyana mafumu ooso a baana ba bantu. (Danyele 2:44) Yesu mwan’Efile Mukulu, akyebe nkamunana bu Nfumu a Butaale. Akyebe nkakasha bubi booso bwi pa nsenga na kulongyesha bantu eshinda dya kufukama.—Badika Yeeshaya 9:5, 6; 11:4, 9.

Byabya, ku bukunkushi bwa Yesu, mu nsenga ishima midiyo ya bantu bakwete kutumika na Bible Eyi dy’Efile Mukulu bwa kulongyesha bantu mushindo wabadya kwikala mu butaale na bangi. Kubashala mafuku apeela butaale abwikadika mwanda wa binyibinyi mu nsenga ishima.—Badika Yeeshaya 2:3, 4; 54:13.