1. (a) Ngikashi kinyi ya Yehowa ayitungu shi mwina Kidishitu ataluule? (b) Mmiloo kinyi yatupete nsaa yatutaluula ngikashi y’Efile Mukulu?

NSAA y’onangushenaa pabitale ngikashi ya Yehowa, ngikashi kinyi ayikufwila mu binangu? Bebungi ba kwatudi abeelaa binangu pabitale kifulo, bululame, binangu, na bukome. Anka, atwiuku shi Yehowa e na ngikashi ibungi ikile buwa. Kadi, twi balombeene kutemuna ngikashi ilekeene ikile pa 40 ya Yehowa, eyikashi dyooso mbapwe kwidisambila mu mikanda yeetu. Banda kwela binangu pabitale bukwashi bukata bwatudi balombeene kupeta mu ngikashi ya Yehowa yatukyebe kutaluula mu kwilongyela kwetu sunga mu kulonga kwa mu kifuko! Kwakwa kulonga nkulombeene kwitukwasha mu mushindo kinyi? Nkulombeene kwitukwasha bwa kuntunguka na kusangeela Nshetu e mwiyilu. Na dingi, su tukwete kutungunuka na kukumiina Yehowa, atwikala na lukalo lukata lwa kwifubwila pepi naye na lwa kulonda kileshesho kyaaye.—Yos. 23:8; Mis. 73:28.

2. (a) Tuusha kileshesho akilesha mushindo watudi balombeene kusangeela ngofu ngikashi ya Yehowa. (b) Nkonko kinyi yatukyebe kutaluula?

² Kishima “kusangeela” kintu kampanda akilesha kinyi? Muyiile byatukyebe kwisamba pabitale kino kishima pano, atukyebe kwisambila pabitale kushinguula muulo wa kintu kampanda. Kusangeela nkulombeene kwenda na kutama kapeelakapeela. Tubande kwata kileshesho: Kusangeela kwetu kwa kidibwa kyatukwete kuteeka akubangaa nsaa yatupusha mapembwe aakyo, atutompo tu ndambo, mpa na kutungunuka na kwikiteeka. Mu mushindo umune, atutungunuka na kusangeela eyikashi kampanda dya Yehowa nsaa yatwidilongo, atunangwila ku dyanka, na atulesha dyadya eyikashi mu muuwa wetu. (Ef. 5:1) Uno mwisambo na ingi ibidi ayilondo ayikyebe kwitukwasha bwa kusangeela ngofu ngikashi y’Efile Mukulu ayitungu shi twelele binangu ngofu kukila ingi yooso. Pabitale eyikashi dyooso, atukyebe kutaluula ino nkonko: Dino eyikashi adipatuula kinyi? Yehowa mmulombeene kwidilesha mu mushindo kinyi? Na mushindo kinyi watudi balombeene kulonda kileshesho kya Yehowa patulesha dino eyikashi?

3, 4. (a) Mushindo kinyi oodi mulombeene kutundula muntu a bantu? (b) Mushindo kinyi auleshaa Yehowa shi mmuntu a bantu?

³ Kya kumpala, tubande kutaluula eyikashi dya bu muntu a bantu. Mushindo kinyi oodi mulombeene kutundula muntu a bantu? Pangi we kwamba shi: Nyi ‘muntu sha kalolo, e pepi na bantu, na oodi mulombeene kwisamba naaye.’ We mulombeene kuuka shi uno mmuntu a bantu sunga shi ta muntu abantu nsaa yotemesha byakwete kwakula na kutala abikitshi mbidi yaaye nsaa yakwete kwakula—ma jeste, byakitshi mpala yaaye, na ingi myanda yakwete kukita nsaa yaadi muumiine.

⁴ Mushindo kinyi auleshaa Yehowa shi mmuntu a bantu? Sunga mbyadi Mupangi a eyilu na nsenga sha bukome booso, Yehowa etushinkamiisha shi akumiina kuteemesha nteko yeetu na kwiyalula. (Badika Misambo 145:18; Yeeshaya 30:18, 19.) Twi balombeene kwisamba n’Efile Mukulu mu nsaa yooso na mbalo yooso yatudi. Twi balombeene kwisesela pepi naaye kushii lukalakasho, atushinguula shi t’etutopeka nya. (Mis. 65:3; Ja. 1:5) Eyi dy’Efile Mukulu adyakula pabitale Yehowa padimulesha shi e nka bi bantu bwa kulesha shi akumiinaa besesela pepi naaye. Nyi bwakinyi, Daavide bafundjile shi: “Meso a Yehowa e” kwatudi na shi ‘mboko [Yaaye] ilume ayitunyingisha.’ (Mis. 34:16; 63:9) Mutemuki Yeeshaya baadi mupwandjikishe Yehowa na mulami a mikooko, pabambile shi: “Eeyibungu na mboko yaaye; atwala twana twa mikooko mu kyaadi kyaaye.” (Yesh. 40:11) Banda kwela binagu! Yehowa akumiina shi twikale pepi naye abikalaa kaana ka mukooko akabombeela mu kyadi kya mulami sha kifulo. Twi na muloo ukata wa kwikala na muntu a bantu bu Nshetu! Mushindo kinyi watudi balombeene kulonda kileshesho kya Yehowa pabitale uno mwanda?

5. Bwakinyi abitungu shi mukulu ooso ekale muntu a bantu?

⁵ Mu mafuku ashaale, abekalanga bepushe Batemwe be na katshintshi bashaale mu maubo e mu nsenga ishima shi: “Anusangeela eyikashi kinyi dya mukulu mu kakongye?” Bebungi bakwabadi mbalule shi: “Nkwikala muntu a bantu.” Eyendo, mwina Kidishitu ooso e na kya kulesha ngofu dino eyikashi,  kadi, bi na muulo bwashi mukulu ooso ekale muntu a bantu. (Yesh. 32:1, 2) Pabaadi akula bwakinyi dino eyikashi dii na muulo ukata, ungi mukwetu mukashi bakwile shi: “Ingi ngikashi ya mukulu ngilombeene kwitukwasha anka su mmuntu a bantu.” Bomono mushindo ubabalesha uno mwanda? Kadi nkinyi kilombeene kukwasha muntu bwa kwikala bu muntu a bantu?

6. Nkinyi akitungu kukita bwa kwikala muntu a bantu?

⁶ Bwa kwikala muntu a bantu abitungu kwitatshisha ngofu bwa bangi. Su mukulu mu kakongye etatshisha bwa bangi, na akumiina kwipaana bwa kukwasha bakwabo balume na bakashi mpa na baana bakinga, byabya abilesha shi mmuntu a bantu. (Mak. 10:13-16) Carlos ungi nsongwalume taadi na bipwa 12 amba shi: “Nkwete kutala bakulu patudi ku bisangilo pabakwasha bangi na kusepa nabo, byabya abinsangasha ngofu.” Eyendo, mukulu ta mulombeene penda kwakula shi ne muntu a bantu nya, kadi abitungu aleshe dyadya eyikashi. (1 Yo. 3:18) Mushindo kinyi wadi mulombeene kwibikita?

7. Bwakinyi kufwala kwa katadi ka kikongeno nkulombeene kwibwesha mwisambo, na abitulongyesha kinyi?

⁷ Banda kutala uno mwanda. Mu mafuku ashaale, ungi mukwetu mulume baadi mufwale katadi ka ku kikongeno, aye nkutwela mu ndekye bwa kwalukiila kwabo kunyima kwa kikongeno. Mufubi a ku ndekye bamwene katadi nkafunde shi: ‘Bufumu bw’Efile Mukulu bufikye!’ ndjo nkulungula yawa mukwetu shi: “Oolo bufikye—abitungu tubande kwisamba ngofu pabitale uno mwanda.” Kunyima, abo nkubanga kwisamba, na yawa mufubi a ku ndekye aye nkutambula ma jurnale eetu na muloo ooso. Bebungi ba kwatudi mbafumankane na myanda i bino. Binobino, bwakinyi katadi ka kikongeno akebweshaa miisambo pakantshi pa bantu? Mwanda, mu ungi mushindo akalungula bantu shi: “Fikaayi peepi nami. Ngipusheyi kwanyende.” Katadi ka kikongeno nkitundwilo akimweka kwi bantu, akibalesha shi atukumiina kwibalungula bi lukumiino lwetu. Mu mushindo umune, abitungu shi mukulu mwina Kidishitu aleshe bitundwilo abimweka abilungula bakwabo shi: “Fikaayi peepi naami.” Kwi bingi bitundwilo su?

8. Mushindo kinyi auleshaa bakulu shi abetatshisha ngofu bwa bangi, na mushindo kinyi wabidi bilombeene kukwasha kakongye?

⁸ Bipikwa mbilombeene kwilekeena muyiile ma mbalo, kadi, nsaa yatusepesha bakwetu balume na bakashi, kwiyimushena nabo ku maboko, kwibakuukila, atwibalesha binyibinyi shi tukwete kwitatshisha bwabo. Nnanyi mulombeene kukita bino byooso? Banda kutala kileshesho kibaadi Yesu mwitulekyele. Mateo akula bibaadi bikitshikye pabaadi Yesu mwibungye na balongi baaye shi: “Yesu beeseeseele kwabadi, aye nkwibalungula.” (Mat. 28:18) Mu mushindo umune lelo uno, bakulu be na kya kwifubwila pepi na bakwabo beena Kidishitu bwa kwisamba nabo. Mushindo kinyi wabidi bilombeene kukwasha kakongye? Ungi mukwetu mukashi mbala mashinda taadi na bipwa 88 alesha bino shi: “Tusepo twibuwa na miisambo ayinyingisha ku mashimba yatwisamba na bakulu ku Nshibo ya Bufumu, abinkwasha ngofu. Ungi mukwetu mukashi sha kululama baadi muleshe shi: “Mbilombeene kumweneka bu mwanda upeela kadi pe mukulu ankuukila ku bisangilo na muloo ooso, nyi mwanda ukata kwandji.”

9, 10. (a) Nkileshesho kinyi ki buwa kyabadi betulekyele kwi Yehowa? (b) Mushindo kinyi ulombeene bakulu kwikala peepi na bakwabo?

 ⁹ Binyibinyi, ooso akwatudi ta mulombeene kwikala muntu a bantu su te pepi nabo bwa kwibakwasha nya. Yehowa mmwitulekyele kileshesho kibuuwa pabitale uno mwanda. “Aye shii . . . kula na ooso a kwatudi.” (Bik. 17:27) Mushindo umune ulombeene bakulu kwikala pepi na beena Kidishitu nabo, nsaa yabafiki kumpala sunga kushaala kunyima kwa bisangilo bwa kwisamba na bakwabo balume na bakashi—bakulu na bakinga. Ungi mukwetu mulume mbala-mashinda alesha bino shi: “Nsaa i mukulu anyipusha bwa kuuka byandji, na nsaa yanteemesha  pankwete kumulungula, nasangalaa ngofu.” Ungi mukwetu mukashi kwete kufubila Yehowa takudi bipwa pepi 50 alesha bino shi: “Bakulu abakumiina kwisamba naami kunyima kwa bisangilo, bino abilesha shi abangataa na muulo.”

¹⁰ Kushii mpaka, balami beena Kidishitu abakuminaa kwitatshisha bwa ingi midimo. Byabya, pabadi ku bisangilo abitungu bekale batuule nkalo ya mikooko pa mbalo ya kumpala.

11, 12. (a) Kwikala muntu shi na ntonto akulesha kinyi? (b) Mushindo kinyi witulekyele Yehowa kileshesho pabitale kwikala muntu shi na ntondo?

¹¹ Kukutwa kwa ntondo nyi dingi eyikashi dibuwa dya mu ngikashi ya Yehowa. Kwikala muntu shi na ntondo akulesha kinyi? Kwikala muntu shi na ntondo akulesha kwikala muntu mululame, kupela kulamata ku lupese kampanda sunga kusangula mpala. Kukutwa kwa ntondo kwa binyibinyi akumwenekyelaa ku bintu bibi: binangu na bikitshino. Bwakinyi byooso bi na muulo? Mwanda su muntu mmukutwe ntondo binangu byaaye abimutakula mu kukitshina bantu booso myanda kushii ntondo. Bifundwe bya beena Kidishitu bya mu kina Greeke, abilesha shi, “kukutwa ntondo” akulesha kupela kwa “kusangula mapala,” byabya abilesha kupela kukitshina penda muntu umune bibuwa na kuleka bangi. (Bikitshino 10:34; Kilombeno kipya) Byabya, muntu shi na ntondo atulaa binangu byaaye, kushii penda ku abimweneka muntu sunga bi mpala yaaye, kadi atalaa bi mwikelo waaye.

¹² Yehowa nyi kileshesho kikata bwa kukutwa kwa ntondo. Eyi Dyaye adyakula shi “tee na ntondo” na shi takitshinaa muntu su gumune myanda na kukutwa kwa kululama. (Badika Bikitshino 10:34, 35.) Mwanda ubaadi utuukye mu mafuku a Moyiise awibilesha.

13, 14. (a) Mmwanda kinyi ubaadi nawo baana bakashi batano ba Selofehade? (b) Mmushindo kinyi ubaadi Yehowa muleshe shi te na ntondo?

 ¹³ Kumpala kwashi beena Isaleele batwele mu Nsenga ya Mulayilo, baana bakashi bataano bashibaadi bebakilwe abaadi kumpala kwa mwanda ukata. Mwanda kinyi? Abaadi abauku shi kifuko kyabo, anka bu bingi bifuko bya beena Isaleele, bibaadi abitungu shi bapete kyabo kipindji kya nsenga kibaadi akituungu kupa nshaabo. (Mb. 26:52-55) Byabya, nshabo, Selofehade a mu kifuko kya Manasee tabaadi mupwe kufwa. Muyiile kipikwa, baana balume ba Selofehade ndjo abaadi na matalwa a kupeta kipindji kya nsenga, kadi aye baadi mutande penda baana bakashi. (Mb. 26:33) Bu bibaadi shi tabaadi na mwana mulume akwata kipindji kya nsenga, kyakya kipindji abadya kwikipa beena kifuko kadi baana baaye bakashi bashaala kushii bupyanyi bwa kifuko kyabo su?

¹⁴ Bano baana bakashi nkwisesela kwi Moyiise abo nkumwipusha shi: “Mbilombêne eshina dya nshetu dyakutwa kutundûlwa mu kifuko kyâbo mwanda wa’shi ta mmutande bâna balume su?” Abo nkubaanga kumuteka shi: “Betupe namu anka kyetu kipindji kya nsenga paapa p’ababila bakwabo na nshetu.” Kadi Moyiise bakwile shi: ‘Atulondo nka penda mwiya su?’ Nyaa, “batûdile lukalo lwâbo kwi Yehowa.”  (Mb. 27:2-5, EEM) Lwalulo lubaadi naminyi? Yehowa nkulungula Moyiise shi: “Baba bâna bakashi ba Selofehade be na kabingilo. Ebape’nka kwibapa kipindji kya nsenga paapa p’obila bakwabo na nshabo kikale kyâbo.” Yehowa tabaadi mwimene nka paapa nya. Baadi mutuushe dingi eyi dilekene na mwiya aye nkulungula Moyiise shi: “Su muntu shi mutande mwana mulume afwa, mwan’ê mukashi akapyana bintu byê.” (Mb. 27:6-8, EEM; Yos. 17:1-6) Kubanga nka paapa, bakashi booso ba mu Isaleele abaadi na wawa mwanda, uno mwiya ubaadi awibabwelela.

15. (a) Mushindo kinyi wi Yehowa akitshinaa mwilo waye myanda ibuuwa, bikishekishe baaba be mu nkalakasho? (b) Myanda kinyi ingi ya mu Bible ayilesha shi Yehowa te na ntondo su?

¹⁵ Kyakya kitshibilo kibaadi akilesha kalolo na kukutwa kwa ntondo ki buwa bwikashaa! Yehowa baadi mukitshiine bano baana bakashi abaadi na lukalakasho myanda na kinemo kyooso, anka bu bibaadi mukitshiine beena Isaleele abaadi na baana balume. (Mis. 68:6) Uno nyi ngumune wa ku myanda ibungi ya mu Bible ayilesha binyibinyi shi: Yehowa akitshiinaa bafubi baaye myanda kushii ntondo.—1 Sam. 16:1-13; Bik. 10:30-35, 44-48.

16. Mushindo kinyi watudi balombeene kuuka shi ta twi na ntondo na nkinyi kilombeene kwitukwasha?

¹⁶ Mushindo kinyi watudi balombeene kulonda kileshesho kya Yehowa pabitale kukutwa kwa ntondo? Tentekyesha shi, kukutwa kwa ntondo akumwenekyelaa ku bintu bibidi. Twi balombeene kukitshina bangi myanda na kululama anka su ta twi na ntondo. Binyibinyi, ooso a kwatudi e na lukalo lwa kwikala na binangu bibuuwa kushi ntondo. Anka we mulombeene kushinguula shi ta mbibofule bwa tudya kutaluula kalolo myanda i mu mashimba eetu nya. Byabya, nkinyi akitungu shi tukite bwa kuuka shi ta twi na ntondo? Oolo, nsaa ibaadi Yesu akyebe kuuka bibaadi abipwandjikisha bantu pa mwanda waye, bayipwishe balongi baaye babaadi mukulupile shi: “Mu kwisamba kwa bantu, Mwana a muntu nnanyi? (Mat. 16:13, 14) Tatwi balombeene kulonda kileshesho kya Yesu su? We mulombeene kwipusha kuuku oobe opwandjikisha shi mmuntu a kukulupila bwa kuuka su we na nkumo ya bu muntu shi na ntondo. Su yawa kuuku sunga loole oobe ashinkamisha shi kwi tuntu kampanda atulesha shi we na ntondo y’ekoba, ya bantu bashii balume sunga bakashi noobe, sunga kusangula mpeta sunga mulanda, we mulombeene kukita kinyi? Teka Yehowa n’eshimba dyoobe dyooso pabitale bi mwishimba dyoobe, mutekye bwashi akukwashe bwa kulumbuula mmweneno oobe a myanda bwa kulesha shi okwete kulonda kileshesho kya kukutwa kwaye kwa ntondo mu myanda yooso.—Mat. 7:7; Kol. 3:10, 11.

17. Mu myanda kinyi mwatudi balombeene kukitshina bantu myanda kushii ntondo?

 ¹⁷ Mu kakongye ka beene Kidishitu, atulesha lukalo lwetu lwa kulonda kileshesho kya kukutwa kwa ntondo kwa Yehowa nsaa y’atukitshiina bakwetu booso balume na bakashi myanda na kalolo na kanemo kooso. Bu kileshesho, pabitale kukuukila kwa bantu, twi na kya kwitamina bakwetu beena Kidishitu booso, mpa na baaba batuukile mu ma mbalo elekeene na etu, ba mpeta na balanda, baana ba nshiye, na bakashi bafwishe balume. (Badika Beena-Galate 2:10; Jaake 1:27.) Na dingi, mu mudimo wa kulungula mukandu wa Bufumu, twi balombeene kulesha shi ta twi na ntondo nsaa yatulungula mukandu wibuwa kwi bantu ba bisamba byooso, mpa na bantu ba mu angi maumbo ashii etu. Twi na muloo ukata mwanda mikanda yeetu ayipatuula Bible i mu ndimi 600. Ino se mmyanda ayishinkamisha binyibinyi shi Yehowa te na ntondo!

18. Mushindo kinyi oodi mulombeene kulesha shi osangeela ngikashi ya Yehowa ya bu muntu a bantu na shii na ntondo?

¹⁸ Eyendo, nsaa yatunangwila ku mushindo wi Yehowa mmuntu a bantu na shii na ntondo, atusangeela ino ngikashi ngofu. Bino abitupa mushindo wa kulonda kileshesho kya ngikashi yooso ya Yehowa, atwiyilesha patudi na bakwetu beena Kidishitu mpa na booso batukwete kulungula mukandu wibuwa.