1, 2. (a) Nkintu kinyi ki na muulo bwa kwikala mu kipwano kibuwa na Yehowa? (b) Kutaluula kwa myanda ifundjibwe mu Bible ayilesha mushindo ubaadi binangu bya bantu pabitale dinyoka dy’Efile Mukulu akwitukwasha naminyi?

“MWABI wande’mi nkwikala peepi n’Efile Mukulu; kisuukilo kyande kii kwi Efile Mukulu.” (Mis. 73:28) Pano mufundji a misambo alesha byadi mutuule lukulupilo lwaye mwi Efile Mukulu. Mmwanda kinyi ubaadi umutakule mu kwakula bino? Kya kumpala, nsaa ibaadi amono bantu bebubi be mu kufukama, mufundji a misambo baadi afiitshi munda. Baadi mwinyongole, amba shi: “Eyendo, mbisumanga byandi mulame eshimba dyande ditookye, naasuula maasa ande buu kitundwilo kya kupwidika kwande.” (Mis. 73:2, 3, 13, 21) Byabya, pabafikile “mu mbalo-iiselele ya Nfumu,” baadi pa mbalo ayitungu shi alumbuule binangu byaaye na kulama kipwano kyaaye n’Efile Mukulu. (Mis. 73:16-18) Uno mwanda ngulongyeshe uno muntu baadi atshinyi Efile Mukulu dino elango dikata: Kwikala munkatshi mwa bantu b’Efile Mukulu, kukumiina malango, na kwiatumikila kwi na muulo bwa kwikala mu kipwano ki buwa na Yehowa.—Mis. 73:24.

² Mpa na atwe booso twi na lukalo lwa kwikala mu kipwano kibuwa n’Efile Mukulu a binyibinyi e na muuwa. Bwa kulombasha lwalwa lukalo, bibuwa tutadiile elango dyaaye sunga dinyoka dyaaye ditulumbuule bwashi twikale bantu baadi mukumiine. Na lusa looso mu mafuku a kala, Efile Mukulu baadi apa bantu na mwilo mushindo wa kukumina dinyoka dyaaye. Myanda ayilesha bibaadi akitshi ngifundjibwe mu Bible bu “elango dyeetu” na bwa “kwitulambukisha atwe batabadi ku nfudiilo a bipungo.” (Lom. 15:4; 1 Kod. 10:11) Kutaluula kwa ino myanda kalolo akukyebe kwitukwasha bwa kwiubidishena na ngikashi ya Yehowa na akwitulesha bukwashi bwatupete nsaa yatumutadiila bwashi etulumbuule.

3. Mu Yeeshaya 64:7 na Yeelemiya 18:1-6, mushindo kinyi wabadi bapwandikishe bukome bwi nabo Yehowa? (Tala kifwatulo ki ku mbangilo.)

³ Mukanda wa Yeeshaya 64:7, autuusha kino kileshesho pabitale bukome bwi nabo Yehowa kwi bantu na mwilo waaye shi: “Yehowa, nnoobe Nshetu; atwe twi ema, obe nyi mwitubumbe, na booso bwetu twi mufubo wa ku maasa oobe.” Muntu abumbaa mabuka e na bukome bwa kufunta ema bwa kubumba kintu kyooso kyadi nakyo lukalo. Ema tadi na bukome nya. Ndjo bi muntu kwi Efile Mukulu. Muntu ta mulombeene kutopeka Efile Mukulu nya nka bi ema tandilombeene kutopeka muntu edibumbu.—Badika Yeelemiya 18:1-6.

4. Yehowa abumbaa bantu sunga miilo nka mu mushindo kampanda su? Patuula.

⁴ Yehowa baadi muleshe pabaadi na beena Isaleele ba kala shi e na bukome bwa kukita abakitaa muntu abumbu bintu by’ema. Anka kwi kwilekena kampanda. Muntu abumbu bintu by’ema mulombeene kukita kintu kyooso kyakumiina kukita na ndambo y’ema. Yehowa abumbaa bantu sunga miilo nka mu mushindo kampanda, bwa kukita bangi bantu bebuwa na bangi naamu bebubi su? Bible talongyesha byabya nya. Yehowa mmupe bantu kya buntu ki na muulo ukata—bulungantu bwa kwisangwila. Tatumikaa na matalwa aaye bwa kulesha shi kyakya kya buntu takii na muulo nya. Abitungu bantu bakumiine shi bebalumbuule kwi Yehowa, Mupangi aabo.—Badika Yeelemiya 18:7-10.

5. Nsaa i bantu abapele kukookyela Yehowa, mushindo kinyi watumika na matalwa aaye?

⁵ Kadi su muntu akoma eshimba apela shi bamulumbuule kwi Mubumbi Mukata a mabuka? Byabya, mushindo kinyi w’atumikaa na bukome bwaye? Banda kutala byakitaa n’ema su tadikii dingi buuwa bwa kukita nadyo kintu kampanda ki na muulo. Kushi mpaka, muntu abumbaa mabuka mmulombeene kubumba nadyo kingi kintu sunga kwidisumbula! Byabya su ema di bubi, misusa ibungi adilwilaa su muntu abumbu ta mwidifunte kalolo. Mubumbi etu tekalaa byabya nya. (Miy. 32:4) Su muntu takumiina shi Yehowa amulumbuule, bubi mbwa yawa muntu. Yehowa atumikaa na matalwa aaye, bu abikitaa muntu abumbu mabuka, nsaa y’ashintuula mushindo wakwete kukitshina bantu myanda muyile mushindo wabakumina bukunkushi bwaye. Baaba abakumiina shi ebalumbuule abekala bantu bebuwa. Bu kileshesho, beena Kidishitu bashingwe mwimu “mbipulu bya kufwilwa lusa,” byabadi babumbe bu ‘bipulu bimune bya kineemo.’ Ku lungi lupese, baaba abakomo mashimba na kupela kukokyela Efile Muklu abekala bu “bipulu bya nsungu byoso bilumbuulwe bwa kulwishiibwa.”—Lom. 9:19-23, Kilombeeno kipya 2009.

6, 7. Mushindo kinyi wi Nfumu Daavide na Nfumu Saule mbelekeene pabitale bibabadi bakite n’elango dya Yehowa?

 ⁶ Ungi mushindo ukwete Yehowa kushintuula bantu nku bukwashi bw’elango sunga dinyoka. P’atutaluula mwanda wa Saule na Daavide, twi balombeene kumona mushindo autumikaa Yehowa na bukome bwaye kwi bantu bakumiina kulumbuula. Nfumu Daavide pabatambukile lusandji na Betsabee, mulwisho waaye ubaadi umukalakashe aye nabeene mpa na bangi bantu. Sunga Daavide baadi nfumu, Yehowa tabaadi mukutwe kumupa elango di bukopo nya. Efile Mukulu batumine mutemuki aaye Nataane kwi Daavide na mukyendji ukata. (2 Sam. 12:1-12) Daavide bakitshine kinyi? Benyongwele aye nkwilanga. Efile Mukulu nkumufwila lusa.—Badika 2 Samwele 12:13.

 ⁷ Anka Saule baadi nfumu kumpala kwa Daavide tabaadi mukokyele elango nya. Yehowa batumiine Saule eyi ku bukwashi bwa mutemuki Samwele bwashi akite mwaye mooso bwa kubutula beena Amaleke booso na bimunwanga byabo. Saule bapelele kukokyela uno mwiya w’Efile Mukulu. Aye nkulama nfumu Agage na ingi nyema ibaadi musangule. Bwakinyi? Bakitshine byabya mwanda baadi akumiina penda kwitumbisha. (1 Sam. 15:1-3, 7-9, 12)  Pababadi bamupe elango, Saule baadya kubofusha eshimba dyaaye, na kukumiina bwashi Mubumbi Mukata amulumbuule. Kadi, Saule bapelele kulumbuulwa. Aye nkwibingisha. Baadi apwandikisha shi tabaadi mukite bubi mwanda baadi mwate nyema bwa kwiyilambula, ndjo aye nkupela kukokyela eyi dya Yehowa dibabamulungwile kwi Samwele. Yehowa nkupela Saule bu nfumu, na efuku su ndimune Saule tabaadi mwalushe kipwano kyaaye n’Efile Mukulu a binyibinyi nya.—Badika 1 Samwele 15:13-15, 20-23.

8. Twi balombeene kupeta elango kinyi ku mushindo ubaadi ukite mwilo wa Isaleele pabaadi Yehowa akyebe kwiulumbuula?

⁸ Yehowa tapeyaa penda bantu kampanda mushindo wa kumukokyela nya apeyaa dingi mpa na miilo. Mu kipwa kya 1513 kwibedi kwa Yesu Kidishitu (Eb.Y.K.) baana ba Isaleele, abaadi batuukye mu bupika mu Ejipitu, abo nkutwela mu kilombeeno kya kipwano ky’Efile Mukulu. Isaleele mmwilo waaye ubaadi musangule na ubaadi na mwabi wa kulumbuulwa naaye, bu ema di ku maasa kwa Mubumbi Mukata. Anka, mwilo ubatungunukile na kukita myanda ibubi ku meso kwa Yehowa, awo nkubanga mpa na kulangwila b’efile ba miilo ibaadi pepi nabo. Misusa yooso, Yehowa baadi nka atumu batemuki bwashi mwilo walushe binangu byawo, anka beena Isaleele tababatemeeshe nya. (Yel. 35:12-15) Bibaadi abitungu kunyoka Isaleele ngofu pa mwanda wa kukutwa kwa kukokyela. Anka byabakitaa na kipulu akitungu kulwishibwa, mafumu a bisamba ekumi bya kunundu abaadi beatshokole kwi beena Asiriya na mafumu a bisamba bibidi bya kuushi abaadi beakite nka byabya kwi beena Babilone. Dino nyi elango dikata kwatudi! Nsaa  ayitulumbuula Yehowa twi balombeene kupeta bukwashi anka su atukumina shi etulumbuule.

9, 10. Beena Niniive abakitshine kinyi pababatambwile eyi dy’Efile Mukulu?

⁹ Yehowa baadi mupe dingi mwilo wa mu Asiriya epata dya Niniive mushindo wa kukookyela elango dyaaye. Eyi dyaaye dibafikile kwi Yoona shi: “Ebwee, wende ku Niniive, lupata lukata, webawukishe’shi bubi bwabo mbupwe kufika naa kwandi.” Niniive baadi mulombeene kabutu.—Yon. 1:1, 2; 3:1-4.

¹⁰ Byabya, pabaadi Yoona mwibalungule uno mwanda wa kabutu, “beemushaale [beena Ninive] babaakuminyiine Efile Mukulu. Babaakitshine kishila, babaafwadile mpaaya bibangile ku bakata nyaa na ku bapeela”. Nfumu aabo “beebwele mu lupuna-nsulu lwaye, nkufuula nkandjo aaye a bufumu. Beepuutshile mpaaya, nkushaala mu buto.” Beena Niniive abakokyeele bibaadi Yehowa akumiina kwibalumbuula abo nkwilanga ku mashimba. Pa mwanda wa byabya, Yehowa tabaadi mmwibatule dingi nya.—Yon. 3:5-10.

11. Eyikashi kinyi dya Yehowa adimweka mu mushindo ubaadi mukitshine beena Isaleele na beena Niniive myanda?

¹¹ Kwikala kwa bu mwilo usangulwe takubaadi kukutshishe beena Isaleele kunyokibwa nya. Anka beena Niniive, tababaadi mu kilombeeno ky’Efile Mukulu nya. Kadi, Yehowa batumine muntu bwashi ebalungule mukandu wa kabutu kabaadi akakyebe kwibafwila, akupu baadi mwibafwile lusa nsaa ibabadi bakokyele kwikala bu ema dibofule mu maasa aaye. Kino kileshesho akilesha binyibinyi shi Yehowa Efile Mukulu etu “tee na ntondo.”—Miy. 10:17.

12, 13. (a) Bwakinyi Efile Mukulu ashintuulaa bitshibilo nsaa i bantu abashintuula bikitshino byabo? (b) ‘Kwaluula’ kwa bitshibilo bya Yehowa akwitulesha kinyi mu mwanda wa Saule ? na wa beena Ninive?

¹² Efile Mukulu ashintuulaa bitshibilo byaaye nsaa i bantu abashintuula mwikeelo wabo. Byabya abimweneka nsaa i Yehowa aata kitshibilo kya kukita kintu kampanda muyiile kiimu kyaaye kya kululama kadi ekishintuula pamono bantu abaluula mwikelo wabo. Bifundwe abyakula pabitale nfumu a kumpala a mu Isaleele shi, Yehowa baadi ‘mwitukye lubwe bwa kiinyi kibamutudiishe Saule buu nfumu.’ (1 Sam. 15:11, EEM) Pabaadi beena Niniive belangye abo nkuleka bubi bwabo, Bible alesha shi: “Efile baamwene bibaabakitshiine, babaadi baalulukye, baaleka eshinda dyaabo diibubi. Baalulwile naamu kitshibilo kyaaye kya kwibafwambusha buu bibaadi mukane.”—Yon. 3:10.

¹³ Kishima kya mu ki na Ebreeyi kyabadi baluule shi “baalulwile” akilesha kushintuula binangu sunga bitshibilo. Binangu bya Yehowa bibashintulukile pabitale kusangula kwaye kwa Saule na aye nkumusumbushena. Baadi mushintuule binangu byaye kushii bwa kulesha shi balwishishe paaye kusangula Saule, kadi mwanda Saule bakitshine myanda kushii lukumiino aye nkupela kumukokyela. Efile Mukulu a binyibinyi baadi mushintuule binangu byaaye kwi beena Niniive; nsaa ibaadi mushintuule kitshibilo kibaadi mwibatshile. Kuuka kwashi Yehowa e na kalolo na lusa na akuminaa kushintuula bitshibilo byaaye nsaa i bantu abashintuula bikitshino byabo akwitunyingisha ngofu!

14. (a) Yehowa kwete kwitulumbuula ku bukwashi bwa kinyi lelo uno? (b) Mushindo kinyi watudi balombeene kutadiila Efile Mukulu bwashi etulumbuule?

¹⁴ Lelo uno Yehowa kwete kwitulumbuula ku bukwashi bwa Bible, Eyi dyaaye na ndumbulwilo aaye. (2 Tim. 3:16, 17) Tatwi balombeene kukumiina elango sunga dinyoka dyatupete ku bukwashi bwa bino bintu su? Sunga twekala bapwe kubatshishiibwa takudi bipwa bungi kinyi, sunga twekala na mashito ebungi mu mufubo wetu watudi nawo, twi balombeene kutungunuka na kulonda malango a Yehowa, bwashi etwikashe bu bipulu bya kineemo.

15, 16. (a) Mbinangu kinyi bibubi bilombeene kufwila muntu nsaa yashimisha mashito aaye? Tuusha kileshesho. (b) Nkinyi kilombeene kwitukwasha bwa kukaasha binangu bibubi nsaa yabetunyoko?

 ¹⁵ Ingi nsaa mbalombeene kwitunyoka ku bukwashi bw’elango kampanda bwa kwituludika. Byabya imo nsaa naamu mbalombeene kwitunyoka pamwanda wa kintu kampanda kibubi kyatudi bakite. Dyadya dinyoka ndilombeene kwikala bu kushimisha kwa mashito mu kakongye. Tubande kutala kileshesho kya Dennis * baadi mukulu mu kakongye. Baadi mupushe bubi mwanda wa kitshibilo kibubi kibaadi mwate pabitale kukimba kwa makuta, na baadi musashilwe pa bwaye. Dennis baadi mupushe naminyi pababalungwile kankongye shi takii dingi mukulu? Bambile shi: “Naadi nepusha bu’mi shi kapu. Kunyima kwa bipwa 30 naadi mupetuule mashito aande. Kumpala naadi mbala-mashinda a myeshi yooso, ami nkufuba ku Betele, naadi dingi bu mufubi a midimo, akupu ami nkwikala mukulu mu kakongye. Naadi mukite dingi mwisambo wande wa kumpala ku kikongeeno kya distrike. Nashimiishe byooso mususa umune. Kukasha buufu bunaadi nabo, naadi n’emono anka bu muntu shii na dingi mbalo mu ndumbulwilo.”

¹⁶ Bibaadi abitungu shi, Dennis ashintuule nshaleelo aaye na alekye kukita kyakya kibaadi kimufishe mu kushimisha mashito aaye mu kakongye. Kadi nkinyi kibaadi kimukwashe bwa kukatusha binangu bi bubi mu mutwe mwaye? Baadi muleeshe bino: “Naadi mwate kitshilo kya kushaala munyingye mu kikudi. Naadi mupete dingi bukwashi bwa bakwetu beena Kidishitu na kunyingishibwa akutukila mu mikanda yeetu. Mwisambo wi mu Kitenta kya Mulami kya mu 15/8/2009 awamba shi: ‘Pouvez-vous de nouveau exercer des responsabilités ?’ ubaadi nka bu mukanda wabadi banfundjile bwa kwalula ku nteko yaande. Elango dibaadi dinkwashe ngofu ndino adyamba shi, ‘su twe na angi mashito mu kakongye, kita moobe mooso bwa kwikala munyingye mu kikudi.’” Dinyoka dibaadi Dennis mupete, dibaadi dimupe miloo kinyi? Kunyima kwa bipwa bibungi baadi mwakule bino: “Yehowa baadi mungyeele mwabi, ami nkupeta dingi kinemo kya kwikala dingi bu mufubi a midimo mu kakongye.”

17. Nkinyi kilombeene kukwasha muntu ababatuusha mu kakongye bwa kwalukiila? Tuusha kileshesho.

¹⁷ Kutushibwa mu kakongye nyi ungi mushindo awitunyoko Yehowa. Akukalwila kakongye bwashi takalwilanga na nkulombeene kukwasha muntu bakitshi bubi bwadya kwaluluka. (1 Kod. 5:6, 7, 11) Robert baadi mutuushibwe mu kakongye munda mwa bipwa pepi 16, mu aa mafuku baledi baaye na beena kifuko naaye abaadi balamate ku mwiya w’Efile Mukulu wa kupela kwibunga pamune na bantu bebubi sunga kwiyimushena nabo. Takudi ndambo ya bipwa kasha Robert alukiila mu kakongye na kwete kwenda kumpala mu kikudi. Pababamwipushe kibaadi kumukwashe bwa kwalukiila kwi Yehowa na kwi mwilo Waaye kunyima kwa aa mafuku akile bungi, bambile shi, kitshibilo kibaadi kyate kifuko kyaaye kibaadi kimukwashe ngofu. Aye nkwamba shi: “Su beena kifuko naami abadi abafiki pepi nami penda bwa kapindji kapeela bwa kuuka byandi, ntshinadya kwikala na mushindo wa kwalukiila kwi Efile Mukulu na kwi mwilo Waaye nya.”

18. Twi balombeene kwikala bu ema dya mushindo kinyi mu maasa a Mubumbi Mukata?

¹⁸ Tatwi balombeene kwikala na lukalo lwa dinyoka di byabya nya, anka twi balombeene kwikala bu ema dya mushindo kinyi mu maasa a Mubumbi Mukata? Twi balombeene kukita kinyi nsaa yabetunyoko? Twi balombeene kwikala bu Daavide su mbu Saule? Mubumbi Mukata ndjo nshetu. Tatulubanga shi: “Yehowa asaashilaa muntu aadi mufule, anka bu nshe-mwana na mwana aadi mufule.” Byabya, ‘tatusumbushenanga elango dya Yehowa, dingi tatupeshanga binangu byaaye.’—Mye. 3:11, 12.