Ntomboshi kinyi? Uno abakwete kwisamba naye kwi Yesu mu kifwatulo. Uno ntomboshi benyongola mwanda wa buntomboshi bwaye. Atekye Yesu shi: “Ontentekyeshe pookeekala mu bufumu [boobe].” Anka bu byomono mu kifwatulo, Yesu kwete kwisamba na uno ntomboshi. Ouku kyamulungula su?— * Yesu kwete kumulaa shi: “Eyendo naakulungula’shi, . . . okeekala naami mu Mpaladiiso.”

Opwandjikisha shi Mpaladiiso abakwiila pano kwi Yesu ekala naminyi?— Bwa kuuka su tubapete lwalulo lwi buwa, tubande kwisamba pabitale Mpaladiiso ababadi bakite kwi Efile Mukulu bwa mulume na mukashi ba kumpala, Adame na Eeva. Yawa Mpaladiiso baadi kunyi? Mmwiyilu su mpa nsenga?—

Su bwamba shi mpa nsenga, bwakula bya binyibinyi. Byabya patunangusheena pabitale ntomboshi e “mu Mpaladiiso,” twi balombeene kwamba shi ekala pano pa nsenga, ayikaluluka mpaladiiso. Yawa Mpaladiiso akyebe kwikala naminyi?— Tubande kutala.

Kunyima kwa Yehowa kupanga bantu ba kumpala Adame na Eeva, Bible alesha shi baadi mwibatuule mu mpaladiiso ebuwa pano pa nsenga. Abaadi abamwitanyina bu “lupango mu Edene.” Opwandjikisha shi “lupango mu Edene” lubaadi buuwa bwi naminyi?— Eyendo, lubaadi buuwa na mbalo ilongame bwa kushaala ishamwene muntu su ngumune!

Opwandjikisha naminyi? Yesu akyebe kwikala pano pa nsenga na uno ntomboshi baadi mwinyongole pa mwanda wa bubi bwaye su?— Nya, Yesu akyebe kwikala bu Nfumu mwiyilu bwa kumuna nsenga yooso ishima payiikala Mpaladiiso. Byabya Yesu akyebe nkekala na ntomboshi mu mushindo wa shi akyebe nkamusangula ku bafwe na kukita bwa shi  ekale biiya mu Mpaladiiso pa nsenga. Kadi bwakinyi Yesu akatadiila uno muntu sh’etombo bwa kushaala mu Mpaladiiso?— Tubande kwisambila pa uno mwanda.

Eyendo shi uno ntomboshi baadi mukite milwisho ikata. Kadi bi mumune na midiyo ya bantu abaadi na muuwa pa nsenga. Bebungi ba kwabadi, abaadi bakite myanda ibubi mwanda tababaadi bebalungule pabitale Yehowa na kyakyebe shi bamukitshiine.

Byabya, bantu booso be byabya, mpa na uno ntomboshi baadi esamba na Yesu ku mutshi, abakasanguka bwa kwikala na muuwa mu Mpaladiiso a kululama pano pa nsenga. Abakebalongyesha akikyebe eshimba dy’Efile Mukulu. Byabya abakyebe kulesha shi mbafule Yehowa.

Ouku mushindo wabakyebe kwibilesha su?— Pabakitshi kyakya akibatekye Efile Mukulu. Mmwanda wa muloo ukata wa kwikala mu Mpaladiiso na kwikala nsaa yooso na bantu bafule Yehowa na bantu nabo!