Estelle, * nyina baana bebungi, baadi ende misango yooso mu kipwilo, amba bino shi: “Naadi mulungule mukata a mu kipwilo kyetu shi nakumiinaa kulonga Bible.” Takwi efuku su ndimune dyadi mumulongyeshe Bible nya. Kunyima, Estelle balekyele kutwela mu kyakya kipwilo. Atungunuka na kwamba shi: “Bakata ba kipwilo abaadi banfundjile abo nkwamba shi sunga ntakumiina kwenda, ne mukumbeene kutuma penda makuta. Ami nkunangushena shi: ‘Taabatala mwanda wande wa kulangwila nya; kyabakumiina mpenda makuta.’”

Angelina baadi ende ku kipwilo nsaa yooso bambile shi: “Mu kipwilo kyetu, abaadi abakisha kaseele ka milambu misango isatu nsaa yakulangwila, na bibaadi abitungu kutuusha makuta nsaa yooso yabakisha kaaka kaseele. Abaadi abatekye nka penda makuta misusa yooso. Ndjo ami nkunangusheena shi: ‘Bano bantu ta be na kikudi ky’Efile Mukulu nya.’”

Mbalo yanudi bashaale, bipwilo abitakulaa bantu patoka sunga mu bufyebufye bwashi batuushe makuta su? Bino mbipusheene na akilongyesha Bible?

Yesu aye batushiishe bwina Kidishitu bambile shi: “Nwibapete buntu, byaabya paanaayi buntu.” (Mateo 10:8) Mukandu wi mu Bible ta ngwa kuudisha bantu nya, ngwa kupa ooso eukumiina.

Mushindo kinyi ubaadi beena Kidishitu ba kumpala abatumika na makuta bwa kukwasha kakongye?

Muntu ooso baadi atuusha “muyiile kitshibilo kya mwishimba dyaaye, kushii kinyongwa sunga ku bukopo, mwanda Efile Mukulu mmufule apaana na mulòo.” (2 Beena-Kodinto 9:7) Mpoolo mutumibwa bambile shi: “Mpa kufuba bufuku na kaanya, bwa kupela kutenteka muntu [ooso] a kwanudi bushito, kwatudi beenulambukishe mukandu wibuuwa.” (1 Beena-Tesalonika 2:9) Mpoolo baadi akitshi mapema bwa kwikwasha ku mufubo waaye wa bulungudi.—Bikitshino 18:2, 3.

Batemwe ba Yehowa abebungaa mu mashibo e nka bi mashibo ooso abetamina bu Nshibo ya Bufumu. Mushindo kinyi wabapetaa makuta? Taabakishaa kaseele ka milambu sunga kutuma mikanda bwashi bebape bya buntu nya. Anka, ooso asangeela myanda ibalongo mmulombeene kwela kya buntu mu kashete ke mu Nshibo ya Bufumu kushii kulungula muntu.

Bwa kutuusha uno jurunale na kumutuma abitungaa makuta akile bungi. Anka twe mulombeene kumona mbalo su ngimune yabalesha shi uno jurunale nga kuudisha sunga mbalo yabatekye makuta nya. Bakwete kwakwila menemene pabitale kulungula kwa bya binyibinyi bya mu Bible.

Banda kwela binangu, mushindo wabakwete kupeta makuta a kufuta bino byooso ngwipushene na mayi a Yesu na kileshesho kya beena Kidishitu ba kumpala su?