Su we mumone mwanda wi bubi mu kipwilo kampanda, we mulombeene kumona shi takwi kipwilo kyoodi mulombeene dingi kukulupila nya. Anka uuka shi kipwilo kyoodi mulombeene kukulupila ki kwanka. Nsaa ibaadi Yesu pano pa nsenga, baadi mubungye kasaka ka balongi baasha kululama aye nkwibalongyesha bwa kwikala na nshalelo mwipushene na miiya y’Efile Mukulu. Beena Kidishitu ba binyibinyi, bantu be na binangu bibuwa na abakumiina kwikala na nshalelo mwipushene na miiya ya Kidishitu be kwanka. Kadi, nkunyi koodi mulombeene kwibapeta?

Estelle, atwikeele baleshe mu mwisambo ushaale amba shi: “Namwene shi nabanga kulonga Bible nka nsaa inabangile kulonga na Batemwe ba Yehowa. Ntshi naadi mwishe mafuku ebungi bwa kupusha akyamba mayi e mu mukanda wa Yowano 8:32 nya, aamba shi: ‘Anukawuku biinyibiinyi, na biinyibiinyi abinwikasha bantu balungantu.’”

Ray atuleshanga dingi kumpala alesha shi: “Mu kulonga kwa Bible na Batemwe ba Yehowa, ne mulongye shi Efile Mukulu ta nnanye nsulo ya makyenga a bantu nya. Naadi musangale ngofu pa kumona shi, sunga Efile Mukulu auku bwakinyi mmutadiile buntomboshi bwi kwanka lelo uno, mmulee dingi shi kubashaala mafuku apeela bwashi ebukatushe pa nsenga.”

Misusa ibungi bi bukopo kukita myanda ibuwa mwanda twi befunyishwe na bantu be bungi bakwete kukita myanda i bubi. Kadi kwi mushindo wa shi toobesha. Bantu bebungi be na lukalo lwa muntu mulombeene kwibakwasha bwa kupusha na kutumikila malango a mu Bible. Nyi bwakinyi Batemwe ba Yehowa bakwete kulonga Bible na bantu mu nsenga ishima ku mashibo aabo. Ku lubingo looso, bantu bebungi bakwete kulonga akilongyesha Bible. Pa mwanda wa byabya bakwete kwifubwila pepi na Mupangi aabo, na be na muloo mu nshalelo aabo. *

Su ofumankana na Batemwe ba Yehowa ungi mususa, twe mulombeene kwibepusha bwakinyi mbakulupile kipwilo kyabo su? Taluula malongyesha aabo na myanda yabo. Akupu, waate kitshibilo kya kuuka su kwi kipwilo kyodi mulombeene kukulupila.