Kudiisha bantu bebungi ku maasa a bantu bapeela
“Akupu [Yesu] baatshyokwele mikate, aye nkwiyipa balondji, balondji nkwiyaabila bibumbu bya bantu.”—MAT. 14:19.
1-3. Lesha mushindo ubaadi Yesu mudiishe kibumbu kya bantu pepi na Betsaide. (Tala kifuwatulo ki ku mbangilo kwa uno mwisambo.)
BANDA kutala uno mwanda. (Badika Mateo 14:14-21.) Nkumpala kwa kukita kidibwa kya Lukilo mu kipwa kya 32 kunyima kwa Yesu Kidishitu (K.Y.K.). Kibumbu kya balume pepi 5 000, kukaasha bakashi na baana, be na Yesu na balondji baaye mu kabaaka pepi na Betsaide, kibundji ki kunundu kwa kyese kya Mwela wa Galilee.
2 Pabamwene kibumbu kya bantu, Yesu bebapushishe lusa, ndjo aye nkupaasha baasha maladi abaadi munkatshi mwabo na nkwibalongyesha myanda ibungi pabitale Bufumu bw’Efile Mukulu. Mufito pa ubabangile kwela, balondji abo nkulungula Yesu bwashi apalakashe bantu bwashi bende mu bibundji bi pepi bakeudile bya kudya. Anka Yesu balungwile balondji baaye shi: “Ebapeeyi anwe baanabeene bya kudya.” Bishima byaaye bibaadi bilombeene kwibakanyisha, mwanda byakudya bibabadi nabyo ku maasa bibaadi bipeela ngofu—mikate itano na mishipa ipeela ibidi.
3 Pa mwanda wa lusa, Yesu bakitshine kipaso—kipaso kimune kyabadi bafunde kwi bafundji booso bananka ba Mukandu wibuwa. (Mak. 6:35-44; Luk. 9:10-17; Yo. 6:1-13) Yesu balungwile balondji baaye bwa kulungula bantu bwashi bashaale mu bisaka bya bantu 50 na bya bantu 100. Kunyima kwa kwela luteko, babangile kutshokola mikate na kutshibuula mishipa. Akupu, pamutwe pa kwiyipa bantu mususa umune, Yesu “nkwiyipa balondji, balondji nkwiyaabila bibumbu bya bantu.” Mu kipaso kya kukanya, kubaadi bidiibwa bibungi bilombeene muntu ooso kudya! Banda kunangushena, Yesu baadi mudiishe bantu nkama ku maasa a bantu bapeela—balondji baaye. *
4. (a) Yesu baadi mutuule binangu byaye ngofu mu kutuusha kwa bidibwa kinyi, na mbwakinyi? (b) Mu uno mwisambo na aulondo atukyebe kulonga kinyi?
4 Yesu baadi mutuule binangu byaye ngofu mu kupa kwa balondji baaye bidibwa bya mu kikudi. Baadi auku shi, kudya kwa bidibwa bya mu kikudi bya binyibinyi abisanganyibwa mu Eyi dy’Efile Mukulu, akufisha ku muwa wa losoo. (Yo. 6:26, 27; 17:3) Pa mwanda wa lusa lumune lubaadi lumutakule mu kudisha kibumbu kya bantu na mikate na mishipa, Yesu baadi akisha nsaa ibungi mu kulongyeshanga balondji baaye. (Mak. 6:34) Anka baadi auku shi mafuku aaye pa nsenga aakyebe kwikala apeela na’shi akyebe kwaluka mwiyilu. (Mat. 16:21; Yo. 14:12) Mushindo kinyi ubadya kwikala Yesu mutungunukye na kudiisha balondji baaye bidibwa bya mu kikudi kalolo pakekala mwiyilu? Badya kukita nka mushindo umune—baadi mulombeene kudiisha bantu bebungi ku maasa a bantu bapeela. Byabya, baaba bantu bapeela abekala ba nnanyi? Tubande kutala mushindo ubaadi Yesu mudiishe balondji baaye bashingwe mwimu ba mu mafuku a batumibwa ku bukwashi bwa bantu bapeela. Akupu, mu mwisambo aulondo, atukyebe kutaluula luno lukonko lwi na muulo ukata kwi ooso a kwatudi alwamba shi: Mushindo kinyi watudi balombeene kutundula bantu bapeela babadi batuule kwi Kidishitu bwa kwitudiisha lelo uno?
Binunu bya bantu bibaadi bidishiibwe ku maasa a bantu bapeela (Tala paragrafe 4)
YESU ASANGULA BANTU BAPEELA
5, 6. (a) Nkitshibilo kinyi kikata kibaadi Yesu mwate bwashi balondji baaye bekale bibuwa mu kikudi kunyima kwa lufu lwaye? (b) Mushindo kinyi ubaadi Yesu mulumbuule balondji baaye bwa kwibapa mudimo ukata kunyima kwa lufu lwaye?
5 Nfumu a kifuko atwalaa mashito aaye kalolo akitaa mwaye mooso bwashi kifuko kyaaye kikale bibuwa kunyima kwa lufu lwaye. Bi mumune na Yesu—bu bibaadi mulombeene kwikala Nfumu a kakongye ka beena Kidishitu—bakitshine mwaye mooso bwa kutala shi, balondji baaye abekala bibuwa mu kikudi kunyima kwa lufu lwaye. (Ef. 1:22) Bu kileshesho: Pepi na bipwa bibidi kumpala kwa lufu lwaye, Yesu baatshile kitshibilo kikata. Basangwile bantu bapeela ba kumpala baadi mulombeene kutumika nabo bwa kudiisha bantu bebungi. Banda kutala kibaadi kikitshikye.
6 Kunyima kwa kuteka bufuku bushima, Yesu bakongyele balondji baaye na basangwile batumibwa 12 munkatshi mwabo. (Luk. 6:12-16) Mu bipwa bibidi bibalondele, baadi pepi na balondji 12, ebalongyeshanga mu mayi na mu bikitshino. Baadi auku shi be na kya kulonga bi bungi; anka mu aa mafuku abatungunukile na kwibetamina bu “balondji.” (Mat. 11:1; 20:17) Baadi mwibape elango na kwibalongyesha ngofu mu mudimo wa bulungudi. (Mat. 10:1-42; 20:20-23; Luk. 8:1; 9:52-55) Baadi ebalumbuula binyibinyi bwashi bakite mudimo ukata kunyima kwa lufu lwaye na kwaluka kwaye kwa mwiyilu.
7. Mushindo kinyi ubaadi Yesu mupatuule lukonko lwa kuuka mudimo wa kumpala wa batumibwa?
7 Batumibwa abadya kwikala na mudimo kinyi? Pabaadi Pentekote a mu kipwa kya 33 (K.Y.K.) efubwila pepi, bibaadi abimweneka kalolo shi batumibwa abakekala na “mudimo wa kukunkusha.” (Bik. 1:20, NW) Kadi binobino, mudimo wabo wa kumpala ubadya kwikala mudimo kinyi? Kunyima kwa kusanguka kwaye, Yesu baadi mupatuule luno lukonko pabaadi esamba na Mpyeele mutumibwa. (Badika Yowano 21:1, 2, 15-17.) Pabaadi na bangi ba ku batumibwa, Yesu balungwile Mpyeele shi: “Diisha baana ba mikooko yande.” Paapa Yesu balesheshe shi batumibwa abakekala munkatshi mwa bantu bapeela baakyebe nkatumika nabo bwa kupa bantu bebungi bidibwa bya mu kikudi. Uno nyi mwanda wa muloo ukata aulesha mushindo aupushaa Yesu pabitale “baana ba mikooko” yaaye! *
KUDIISHA BANTU BEBUNGI KUBANGA MU PENTEKOTE MPA NA MU MAFUKU AALONDO
8. Mu Pentekote, mushindo kinyi ubaadi beena kukumiina bapya baleshe shi abakumiina mushindo ukwete kwibadiisha Kidishitu?
8 Kubanga mu Pentekote a mu kipwa kya 33 K.Y.K., Kidishitu aye baapu kusanguka baadi mutumikye na batumibwa baaye bwa kudiisha balondji baaye bashingwe mwimu bakii pa nsenga. (Badika Bikitshino 2:41, 42.) Beena Yuuda na bashii beena Yuuda abekeele bu beena Kidishitu bashingwe mwimu mu aa mafuku, abaadi abakumiina wawa mushindo wa kwibapa bya kudya. Mususa umune, “abaadi na katshintshi ku bulambukishi bwa batumiibwa.” Muyiile abyamba ungi mufundji a myanda, kishima kya mu ki na Greeke kyabadi balule shi “abaadi na katshintshi” nkilombeene kulesha “kwipaana na kwikala na binangu bilamate ku mwanda kampanda.” Beena kukumiina bapya abaadi na nsala ibukopo ya mu kikudi, na abaadi abauku binyibinyi mbalo yabadi balombeene kupeta bidibwa. Na bululame booso, abaadi abakimbi kwi batumibwa bwashi bebapatulwile mayi na bikitshino bya Yesu na kwibamunyikila etaata dya akipatuula bifundwe pabitale Yesu. *—Bik. 2:22-36.
9. Mushindo kinyi ubaadi batumibwa baleshe shi mbalame mudimo wabo wa kudiisha mikooko ya Yesu kalolo?
9 Batumibwa abalamine mudimo wabo wa kudiisha mikooko ya Yesu kalolo. Bu kileshesho, banda kutala mushindo ubabadi bapudishe kilumbu ki bukopo kibaadi kituukye mu kakongye kapya. Mwanda wa kukanya, kyakya kilumbu kibaadi kitale bidibwa bya ku mbidi. Bakashi bafwishe balume abaadi abesamba ki na Greeke tababaadi abebaabila byakudya by’efuku dyooso bu bibabadi abapa benabo ababaadi abakula kina Ebreeyi nya. Batumibwa abakitshine kinyi bwa kupudisha uno mwanda ukata? Batumibwa “ekumi na babidi” abasangwile balume musambo balombane bwa kukunkusha “wawa mudimo” wa kwabila bya kudya. Batumibwa bebungi ba ku baaba abaadi abaabila bibumbu bibabadi badiishe kwi Yesu mu kipaso, abamwene shi bi na muulo bwashi batuule binangu byabo penda mu kutuusha kwa bya kudya bya mu kikudi. Byabya, abaadi bepaane mu “kufubila eyi.”—Bik. 6:1-6.
10. Mmushindo kinyi ubaadi Kidishishitu mufube na batumibwa na bakulu ba mu Yeelusaleme?
10 Kubanga mu kipwa kya 49 K.Y.K., batumibwa abaadi bashaale na muuwa pa nsenga, abaadi bapete bangi bakulu balombane bwa kufuba. (Badika Bikitshino 15:1, 2.) ‘Batumibwa na bakulu ba mu Yeelusaleme’ abaadi abafubu bu kasaka ka bakunkushi-bakulu. Bu byadi shi nnaye nfumu a kakongye, Kidishitu baadi afubu na kano kasaka kapeela ka bantu balombane bwa kutala myanda ya lulangwilo na kukunkusha mudimo wa bulungudi mpa na kulongyesha kwa mukandu wi buwa wa Bufumu.—Bik. 15:6-29; 21:17-19; Kol. 1:18.
11, 12. (a) Kinyi akilesha shi Yehowa baadi mwele mwabi ku mpàngo ibaadi ayitumika nayo Mwana aaye bwa kudiisha tukongye mu mafuku a batumibwa? (b) Mushindo kinyi ubaadi aukiibwa baaba babakwete kutumika nabo kwi Kidishitu bwa kutuusha bidibwa bya mu kikudi?
11 Yehowa baadi mwele mwabi ku mpàngo ibaadi Mwana aaye mwate bwa kudiisha tukongye mu mafuku a batumibwa su? Kushii mpaka! Bwakinyi atwamba byabya? Mukanda wa Bikitshino awitupalwila bino: “Na bu bibaabadi [Mpoolo mutumibwa na benaaye] abakidi mu bibundji, abaadi abapa bantu bitshibilo bibaatshile batumibwa na bakulu babaadi ku Yeelusaleme bwa kwibilama. Byabya, tukongye tubaadi atukankamana mu lukumiino, na kufiimanga ku bungi efuku dioso.” (Bik. 16:4, 5, Kilombeno kipya 2009) Lamiinayi shi, tuno tukongye tubaadi atutama mwanda wa kipwano kibaadi pankatshi paato na kasaka ka bakunkushi-bakulu kabaadi ku Yeelusaleme. Bino tabileesha shi, Yehowa baadi mwele mwabi bwa ino mpàngo ibaadi Mwana aaye mwate bwa kudiisha tukongye mu mafuku a batumibwa su? Tutentekyesheyi shi, twi balombeene kutama mu kikudi anka su Yehowa etwelela mwabi.—Mye. 10:22; 1 Kod. 3:6, 7.
12 Uno mwanda ubetuleesha shi Yesu baadi mutumikye na ino mpàngo imune nsaa ibaadi adiisha balondji baaye; baadi mudiishe bibumbu bya bantu bebungi ku maasa a bantu bapeela. Bantu abaadi abeuku kalolo mushindo ubaadi Yesu afubu nawo bwa kutuusha bidiibwa bya mu kikudi. Ku nfudiilo a byooso, batumibwa—beena kasaka ka bakunkushi-bakulu ba kwibedi—abaadi balombeene kutuusha bishinkamiisho abilesha shi bakwete kupeta bukwashi bwa mwiyilu. Mukanda wa Bikitshino 5:12 awamba shi: “Bitundwilo biibungi na bilengyeleshi [bipaso] bibaadi abikitshika munkatshy’a mwilo ku maasa a batumiibwa.” * Byabya, baaba abaafikile bu beena Kidishitu tababaadi na kya kwiyipusha shi: ‘Kidishitu adiisha mikooko yaaye ku bukwashi bwa nanyi?’ Kadi ku nfudiilo kwa mafuku a batumibwa, myanda ibaadi yalulukye.
Mu mafuku a batumibwa, bibaadi abimweneka kalolo shi nnanyi abakwete kutumika naaye kwi Yesu bwa kudiisha kakongye (Tala paragrafe 12)
NSAA IBAADI LUBISHI LUBI LWI BUNGI NA MITOMBO YA MBYO IBUWA NGIPEELA
13, 14. (a) Elango kinyi dibaadi dituushe Yesu pabitale ngoshi kampanda, na nsaa kinyi ibalombeene eyi dyaaye? (b) Yaya ngoshi ibadya kwikala mu bipindji kinyi bibidi? (Tala mayi a ku nfudiilo.)
13 Yesu baadi mutemukye shi abakalwisha kakongye ka beena Kidishitu ngoshi. Tentekyesha shi, mu lukindji lwaye lwa lubishi lubi na mbyo ibuwa, Yesu balesheshe shi mu efuba dipya dya mbyo ibuwa (beena Kidishitu bashingwe mwimu) abakemukunu lubishi lubi (beena Kidishitu ba madimi). Bambile shi, byooso abakebitadiila bwashi bikule pamune—kushii kwibikalakasha mpa na mu nsaa ya kuumbula ayikyebe kufika ku “nfudiilo a byaa-pano.” (Mat. 13:24-30, 36-43) Takubaadi kupwe mafuku ebungi bwashi bishima bya Yesu bilombane nya. *
14 Kusumbula kwa lukumiino kubaadi kupambushe bangi mu mafuku a batumibwa, anka batumibwa ba Yesu abo nkwikala bu kintu kya ‘kukanda,’ bukome booso bwibubi bwa malongyesha a madimi. (2 Tes. 2:3, 6, 7) Byabya, nsaa ibafwile mutumibwa a nfudiilo, kusumbula lukumiino kubamenene mishi ako nkutungunuka na kutama mu kipindji kikata kya kukula kibaadi kipwe bipwa nkama. Na dingi mu aa mafuku, lubishi lubi lubafwimine na mitombo ya mbyo ibuwa ibaadi ipeela. Tabibaadi bibofule bwa kulumbuula mushindo ulombane wa kutuusha bidibwa bya mu kikudi nya. Byabya bibaadi abitungu kushintuluka. Anka lungi lukonko nduno, nsaa kinyi?
NNANYI ATUUSHA BYA KUDYA MU MAFUKU A KUUMBULA?
15, 16. Balongi ba Bible abaadi abalongo Bifundwe ngofu abapetele bipeta kinyi, na bibaadi bibweshe lukonko kinyi?
15 Bu bibaadi kipungo kya kukula akyende mu kufudiila, kubaadi lukalo lukata lwa bya binyibinyi bya mu Bible. Tentekyesha shi, mu kipwa kya 1870 kasaka kapeela ka bantu baasha kisumi abaadi bebungye pamune bwa kukimbuula, abo nkukita kalasa ka kulonga myanda ya mu Bible ke kula na lubishi lwi bubi—beena Kidishitu ba madimi. Ku bukwashi bwa kwiyisha na kwikala kwabo kwa na binangu bibuwa, bu bibaabadi abeyitamina bu balongi ba Bible, abaadi betatshishe ngofu bwa kukimbuula mu Bifundwe.—Mat. 11:25.
16 Balongi ba Bible abaadi abalongo Bifundwe ngofu na abo nkupeta bipeta bibuwa. Baaba balume na bakashi baasha kululama abalesheshe malongyesha a madimi patooka na kupalakasha bya binyibinyi, kutuusha na kwabila mikanda ayipatuula Bible mu nsenga ishima. Mudimo wabo ubaadi utwele mu mashimba na mu binangu bya bantu bebungi abaadi na nsala na nyota ya bya binyibinyi bya mu kikudi. Lukonko lwi na muulo nduno: Kidishitu badya kutumika na balongi ba Bible abaadi kumpala kwa 1914 bwa kudiisha mikooko yaaye su? Nya. Abaadi bakii mu kipungo kya kukula, na dingi mpàngo ya kutuula mushindo wa kutuusha bidibwa bya mu Kikudi ibaadi ikyayende na kumweneka. Nsaa tayibaadi ibande kulombana bwa kukaasha beena Kidishitu ba madimi be bu lubishi lubi munkatshi mwa beena Kidishitu ba binyibinyi, mbyo ibuwa.
17. Nkushintuluka kinyi kukata kubamwekyele mu kipwa kya 1914?
17 Anka bu by’atwikalanga balongye mu mwisambo ushaale, kipungo kya kuumbula kibabangile mu 1914. Mu kyakya kipwa, kushintuluka kukata kubaadi kubangye kumweka. Yesu baadi mutuudibwe bu Nfumu, na mafuku a nfudiilo nkubanga. (Bif. 11:15) Kubanga mu 1914 na ku mbangilo kwa kipwa kya 1919, Yesu baadi mushindikile Nshaaye ku ntempelo a mu kikudi bwa kutala na kukita mudimo wa kusuula kalolo. * (Ma. 3:1-4) Anka, kubanga mu kipwa kya 1919, nsaa ya kukonga mbyo ibuwa ibabangile. Nsaa ya kutuula ndumbulwilo mulombeene kutuusha bidibwa bya mu kikudi ibaadi ilombane su? Oolo!
18. Yesu baadi mulee shi akyebe kutuula nnanyi, na ndukonko kinyi lwi na muulo mu ano mafuku a nfudiilo?
18 Mu butemuki bwaye pabitale mafuku a nfudiilo, Yesu baadi mulee shi, akyebe kutuula mpika mulombeene kutuusha “bidiibwa [bya mu kikudi] ku kipindji kikumbane.” (Mat. 24:45-47, Kilombeno kipya 2009) Akyebe kutusha byabya bidibwa mu mushindo kinyi? Eyendo mu mushindo ubaadi mwibikite mu mafuku a batumibwa, Yesu akyebe dingi kudiisha bantu bebungi ku maasa a bantu bapeela. Kadi, bu bibaadi mafuku a nfudiilo abaadi aatungunuka, lukonko lubaadi na muulo nduno: Baaba bantu bapeela abakekala ba nnanyi? Mu mwisambo aulondo atukyebe kwalula luno lukonko na lungi pabitale butemuki bwa Yesu.
^ par. 3 Paragrafe 3: Kala, pabaadi Yesu mukite kipaso aye nkudiisha balume 4 000, kukaasha bakashi na baana, baadi mutuushe bidiibwa apa “balondji, balondji naamu nkupa bibumbu bya bantu.”—Mat. 15:32-38.
^ par. 7 Paragrafe 7: Mu mafuku a Mpyeele, “baana ba mikooko” abaadi balombeene kudya na kusangeela lukulupilo lwa kwenda mwiyilu.
^ par. 8 Paragrafe 8: Bu bi beena kukumiina bapya “abaadi na katshintshi ku bulambukishi bwa batumiibwa,” bino abilesha shi batumibwa abaadi abalongyesha kalolo. Angi malongyesha a batumibwa abaadi aatuukila mu mikanda ifundjibwe ku bukwashi bwa kikudi kiselele ino yatudi nayo lelo mu Bifundwe bya ki na Greeke byabetamina bu Kilombeno kipya.
^ par. 12 Paragrafe 12: Bu bibabidi shi bangi bantu abaadi bapete bya buntu bya kikudi pamune na batumibwa, abimweneka shi mu myanda yooso, bya buntu bya kukita bipaso bibaadi abifiki kwi bangi bantu sunga mutumibwa ekala panka.—Bik. 8:14-18; 10:44, 45.
^ par. 13 Paragrafe 13: Bishima bya Mpoolo mutumibwa bi mu mukanda wa Bikitshino 20:29, 30, (Kilombeno kipya) abilesha shi, abakyebe nkalwa ngoshi na kakongye mu bipindji bibidi. Kya kumpala, beena Kidishitu ba madimi (“lubishi lubi”) abakyebe ‘kutwela munkatshi’ mwa beena Kidishitu ba binyibinyi. Kya kabidi, “munkatshi” mwa beena Kidishitu ba binyibinyi, bangi abakyebe kusumbula lukumiino na kwikala na “ndambukiisho ilube.”
^ par. 17 Paragrafe 17: Tala mwisambo wi na mutwe wa mwanda awamba shi: “Talayi, ami ne n’enu mafuku oso,” mu uno jurunale mwisaki 17 paragrafe 6.
