1. (a) Akula mu kikoso lukindji lwa lubishi lubi na mbyo ibuwa. (b) Mushindo kinyi ubaadi Yesu mwilupatuule?

LUMUNE lwa ku nkindji ya Yesu pabitale Bufumu, alwisambila muntu sh’efuba bakunyine mbyo ibuwa na mwishikwanyi namu bakunyine lubishi lubi munkatshi mwa mbyo ibuwa. Lubishi lubi lubaadi lukule kukila mbyo ibuwa, kadi sh’efuba nkutumina bafubi baaye eyi shi, “ebilekyei bikule byoso pamune mpâ na pa kipindji kya kuumbula.” Mu kipindji kya kuumbula, abakakatusha lubishi bubi na kukonga mbyo ibuwa. Yesu nabeene baadi mupatuule luno lukindji. (Badika Mateo 13:24-30, 37-43, EEM) Luno lukindji aluleesha kinyi? (Tala kashibo akamba shi: “Mbyo ibuwa na lubishi lubi.”)

2. (a) Nkinyi akilesha myanda ibaadi ikitshikye mwifuba dya mu myaminyi a mbyo? (b) Nkipindji kinyi kya mu lukindji kyatukyebe kwisambila mu uno mwisambo?

² Myanda ibaadi ikitshikye mwifuba dya mu myaminyi a mbyo ayilesha mushindo na nsaa ayikyebe Yesu kukaasha munkatshi mwa bantu mbyo ibuwa—beena Kidishitu bashingwe mwimu abakamunana naaye mu Bufumu bwaye. Kukuna kubabangile mu Pentekote a mu kipwa kya 33 kunyima kwa Yesu Kidishitu (K.Y.K.). Kubunga akukalombana nsaa ayikekala bashingwe mwimu bakii na muwa mu mafuku a nfudiilo a uno ndumbulwilo abakedibwa bitampi bya nfudiilo na kwibaata bwa kwenda mwiyilu. (Mat. 24:31; Bif. 7:1-4) Anka bi muntu mwimane pa mwengye kwete kumona muntu kubula na bintu byooso bimwifunyishe, luno lukindji alwitupa mweneno mukata pabitale myanda ibaadi ayitungu kushintuluka mu kipungo kya bipwa pepi na 2 000. Muyiile byatumono, myanda kinyi ya Bufumu ikwete kwenda na kushintuluka? Lukindji alwakula pabitale nsaa ya kukuna, kukula na kuumbula. Mu uno mwisambo atukyebe kwisambila ngofu pabitale nsaa ya kuumbula. *

3. (a) Nkinyi kibaadi kikitshikye kunyima kwa siekele a kumpala? (b) Muyiile Mateo 13:28, mmatwala kinyi ababadi batekye, na mba nanyi abeatekyele? (Tala mayi a ku nfudiilo.)

³ Ku mbangilo kwa siekele a kabidi K.Y.K., “lubishi lubi  nkwilêsha” pababangile kumweneka beena Kidishitu ba madimi mu nsenga ishima. (Mat. 13:26, EEM) Mu siekele a kananka, beena Kidishitu be bu lubishi lubi babaadi bafwime ngofu kukila beena Kidishitu bashingwe mwimu. Tentekyesha shi mu lukindji, bafubi abatekyele nfumwabo matalwa a kutukula lubishi lubi. * (Mat. 13:28) Nfumu balulwile naminyi?

4. (a) Nkinyi akilesha lwalulo lwa Nfumu, Yesu? (b) Nsaa kinyi ibabangile kumweneka beena Kidishitu be bu mbyo ibuwa?

⁴ Pabaadi akula pabitale mbyo ibuwa na lubishi lubi, Yesu bambile shi: “Ebilekyei bikule byoso pamune mpâ na pa kipindji kya kuumbula.” Uno mwiya aulesha shi kubanga mu siekele a kumpala mpaa na lelo, kwi beena Kidishitu bashingwe mwimu pa nsenga be bu mbyo ibuwa. Bino byooso atwibishinkamisha ku ano mayi abaadi Yesu mulungule balondji baaye shi: “Ami ne n’enu mafuku oso mpaa na ku nfudiilo kwa [kino] kipungo.” (Mat. 28:20, Kilombeno kipya 2009) Byabya, Yesu akalama bashingwe mwimu mu mafuku ooso mpaa na ku kipungo kya nfudiilo. Na dingi bu bibaadi beena Kidishitu bee bu lubishi lubi mbafwime kukila bashingwe mwimu, tatuuku kalolo shi mba nnanyi babaadi mu kasaka ka mbyo ibuwa mu kyakya kipungo. Byabya, bipwa makumi kumpala kwa kipungo kya kuumbula, kasaka ka mbyo ibuwa kababangile kumweneka. Mushindo kinyi ubabidi bikitshikye?

5. Mushindo kinyi ubaadi ulombane butemuki bwa Malakii mu siekele a kumpala?

⁵ Bipwa nkama kumpala kwa Yesu kutuusha lukindji lwa lubishi lubi na mbyo ibuwa, Yehowa balungwile mutemuki Malakii ku bukwashi bwa kikudi kiselele myanda i mu lukindji lwa Yesu. (Badika Malakii 3:1-4.) Yowano mubatshishi baadi ‘mukyendji alumbuula eshinda.’ (Mat. 11:10, 11) Pabafikile mu kipwa kya 29 K.Y.K., nsaa ya kutshibila kisamba kya Isaleele kiimu ibaadi ifubwile peepi. Yesu baadi mukyendji wa kabidi. Baadi musuule ntempelo a mu Yeelusaleme misusa ibidi—wa  kumpala, ku mbangilo kwa mudimo waaye na wa kabidi ku nfudiilo kwao. (Mat. 21:12, 13; Yo. 2:14-17) Byabya, mudimo wa Yesu wa kusuula ubaadi utale kipungo kya nsaa.

6. (a) Nkinyi akilesha kulombana kukata kwa butemuki bwa Malakii? (b) Mmu kipungo kinyi kibafikile Yesu mu kutala ntempelo a mu kikudi? (Tala mayi a ku nfudiilo.)

⁶ Nkinyi akilesha kulombana kukata kwa butemuki bwa Malakii? Bipwa makumi kumpala kwa kipwa kya 1914, C. T. Russell na benaaye abaadi bakite mudimo wi nka bu ubakitshine Yowano Mubatshishi. Wawa mudimo ukata ubaadi utale kwalusha bya binyibinyi bya mu Bible. Balongi ba Bible abaadi balongyeshe akilesha mulambu wa nkuulo ya Kidishitu, na kulesha patooka malongyesha a madimi bu iferno, na kulongyesha kufika kwa nfudiilo a Bipungo bya bantu ba Bingi Bisamba. Anka, kubaadi bipwilo bi bungi bibaadi na bantu abeamba bu balondji ba Kidishitu. Byabya, lukonko lwa nfudiilo alutungu kwaluula nduno: Mu kyakya kisaka mba nanyi abaadi bu mbyo ibuwa? Bwa kwaluula ku luno lukonko, Yesu babangile kutala ntempelo a mu kikudi mu kipwa kya 1914. Wawa mudimo wa kutala na kusuula ubaadi ukitshikye munda mwa kipungo kya nsaa—kubanga mu kipwa kya 1914 mpaa na ku mbangilo kwa kipwa kya 1919. *

7. Pabafikile Yesu mu kutala mu 1914, nkinyi kibapetele?

⁷ Pabafikile Yesu mu kutala, nkinyi kibapetele? Kasaka kapeela ka balongi ba Bible baasha kishima abaadi bepaane na bukome mpa na bupeta bwabo munda mwa bipwa bikile pa 30 mu kukita mudimo wa kulungula mukandu wibuwa. * Ubaadi bu mwanda wa muloo ukata kwi Yesu na miikeyilu pababapetele kasaka kapeela ka mbyo inyingye yabashii bakambile kwi lubishi lubi lwa Satana! Anka, kubaadi lukalo lwa ‘kutoosha [kusuula] baana ba Levi,’ bashingwe mwimu. (Mal. 3:2, 3, EEM; 1 Mp. 4:17) Bwakinyi byabya?

8. Nkinyi kibaadi kikitshikye kunyima kwa kipwa kya 1914?

 ⁸ Ku mpwilo kwa kipwa kya 1914, bangi balongi abaadi babofule ku mashimba mwanda tababayiile mwiyilu nya. Kubanga mu kipwa kya 1915 na 1916 kubingwabingwa kubaadi paasha pa ndumbulwilo, kubaadi kupeeleshe mudimo wa bulungudi. Mwanda wa malwa, kunyima kwa lufu lwa mukwetu Russell mu mweshi w’Ekumi 1916, kubingwabingwa kubabangile munda mwa ndumbulwilo. Mu bakwetu musambobidi ba ku baaba abaadi abakunkusha societé Watch Tower, bananka ba kwabadi abaadi batombokyele kitshibilo kya kutuula mukwetu Rutherford bwa kukunkusha uno societé. Bano bananka abatompele kutwesha kwiabuula munkatshi mwa bakwetu balume, kadi mu mweshi wa Mwanda 1917, abo nkukatuka ku Betele—kukatuka kwabo kubaadi kukwashe bwa kusuula ndumbulwilo. Na dingi, pamwanda wa kutshina kwa bantu, bangi balongi ba Bible ababangile kuleka kufubila Efile Mukulu. Anka, balongi ba Bible bebungi abaadi bashintuule nshalelo aabo bwa kwikala beselele ku meso kw’Efile Mukulu. Byabya, Yesu nkwibaata bu beena Kidishitu ba binyibinyi mbyo ibuwa, anka aye nkupela beena Kidishitu ba madimi booso, mpaa na booso abaadi abasanganyibwa mu bipwilo bya bwina Kidishitu bwa madimi. (Mal. 3:5; 2 Tim. 2:19) Nkinyi kibakitshikile kunyima? Bwa kushinguula, tubande kutaluula dingi lukindji lwa lubishi lubi na mbyo ibuwa.

9, 10. (a) Nkinyi kyatukyebe kutaluula binobino pabitale kipungo kya kuumbula? (b) Nkinyi kibaadi kikitshikye mu kipungo kya kuumbula bwa mususa wa kumpala?

⁹ Yesu bambile shi: “Kipindji kya kuumbula akilêsha nfudîlo a [bya pano].” (Mat. 13:39, EEM) Kyakya kipungo kya kuumbula kibabangile mu kipwa kya 1914. Atukyebe kutaluula myanda itaano ibaadi Yesu muleshe.

¹⁰ Wa kumpala nkutukula lubishi lubi. Yesu bambile shi: “Na kipindji kya kuumbula, papa nakakamika bafubi abaumbulâ ami’shi: ‘Badîlai kutukula lubishi lwi bubi, nwilwanye mooma.’” Kunyima kwa kipwa kya 1914, miikeyilu ibabangile “kutukula sunga kukaasha” beena Kidishitu be bu lubishi lubi mu kwibalamuuna kwi bashingwe mwimu “baana ba mu Bufumu.”—Mat. 13:30, 38, 41, EEM.

11. Lelo uno, nkinyi akilesha kwilekena kwi pankatshi pa beena Kidishitu ba binyibinyi na beena Kidishitu ba madimi?

¹¹ Bu bibaadi mufubo wa kutukula autungunuka, kwilekena pankatshi pa bino bisaka bibidi kubabangile kumweneka kalolo. (Bif. 18:1, 4) Kubanga mu 1919, bibaadi bimwenekye patooka shi, Babilone Mukata baapu kupona. Kinyi kibaadi kileshe kwilekena pankatshi pa beena Kidishitu ba binyibinyi na beena Kidishitu ba madimi? Nyi mmudimo wa bulungudi. Baaba abaadi abakunkusha balongi ba Bible ababangile kumona shi, bi na muulo bwashi ooso akwabadi epaane mu mudimo wa kulungula mukandu wa Bufumu. Bu kileshesho, mu ungi jurnale abaatudi batuushe mu 1919 baadi na mutwe wa mwanda awamba shi: Kwi bano babadi bape mudimo (mu anglais) baadi mukankamikye beena Kidishitu bashingwe mwimu booso bwabadya kulungula mukandu wi buwa ku nshibo na nshibo. Yawa jurnale baadi amba shi: “Mudimo aumweneka bu ukile bukata, anka ngwa Mwanana, na atwiukitshi ku bukwashi bwa bukome bwaye. We na kinemo kya kukita uno mudimo.” Mbipeta kinyi bibatuukile? Kubanga mu aa mafuku na angi abalondele Kitenta kya Mulami kya mu 1922 kibaadi kileshe shi, balongi ba Bible mbatungunukye na kukita mudimo wa Bulungudi. Kubanga kala, mudimo wa kulungula mukandu wi buwa ku nshibo na nshibo ndjo kitundwilo kikata kya baaba beena Kidishitu baasha kululama—bu byaudi lelo uno.

12. Kubunga kwa mbyo ibuwa kubabangile mu mafuku kinyi?

¹² Wa kabidi nkukonga kwa mbyo ibuwa. Yesu balungwile mikeyilu shi: “Eyikongyeeyi nwiyeele mu kisasa kyande.” (Mat. 13:30) Kubanga mu kipwa kya 1919, bashingwe mwimu mbebabungye mu kakongye ka beena Kidishitu. Bwa baaba beena Kidishitu bashingwe mwimu abekala na muwa mu mafuku a nfudiilo a bya-pano, kukonga kwa nfudiilo  akwikala kwanka nsaa yabapete efuto dyabo dya kwenda mwiyilu.—Dan. 7:18, 22, 27.

13. Mukanda wa Bifumbulwe 18:7 aulesha kinyi pabitale binangu bi nabyo mukashi ndumba, sunga Babilone Mukata binobino mpa na bwina Kidishitu bwa madimi?

¹³ Wa kasatu, nkudila na kwisuma meno. Kunyima kwa miikeyilu kwanya lubishi lubi, nkinyi akikitshika? Pabaadi akula pabitale abikekala kasaka ka lubishi lubi, Yesu bambile shi: “Mwamwa [bantu] abakadidi mpolo na kwisuma meno.” (Mat. 13:42, EEM) Byabya bikwete kukitshika ano mafuku su? Nya. Lelo uno, bwi na Kidishitu bwa madimi, bwi bu kipindji kya ndumba kikwete kutungunuka na kwiamba shi: “Nee na lupuna-sulu bu ndalamumba, ntshii mukashi kilele’mi, ntammono maalo sunga efuku dimune.” (Bif. 18:7) Kushii mpaka, bwina Kidishitu bwa madimi bukwete kwimona bu bwi na matalwa, na kwimona bu ‘bushaale bu ndalamumba’ kunundu kwa bakata ba myanda ya politike. Bwa binobino, baaba be bu lubishi lubi bakwete kwela epilo, tabakwete kudila mpolo nya. Anka dyadya epilo adikyebe kupwa.

14. (a) Nsaa kinyi na bwakinyi beena Kidishitu ba madimi ‘abakesumu meno’? (b) Mushindo kinyi wi mpushisho eetu mupya a mukanda wa Mateo 13:42 mwipushene na binangu bi mu mukanda wa Misambo 112:10? (Tala mayi a ku nfudiilo.)

¹⁴ Mu nsaa ya mpombo ikata, kunyima kwa kubutula ndumbulwilo ooso a bipwilo bya madimi, baaba booso abekalanga mwanka abakasuuku bwa kukimba mbalo ya kufwamina, anka tabakeyipete nya. (Luk. 23:30; Bif. 6:15-17) Byabya, pabakamono shi takwi mbalo ya kusuukila kabutu, abakyebe kudila mpolo na “kwisuma meno” mwanda wa nsungu. Anka bu bibalesheshe Yesu mu butemuki bwaye pabitale mpombo ikata, mu kyakya kipungo kya mufito, “abakadidi.” *—Mat. 24:30; Bif. 1:7.

15. Nkinyi akikyebe kufwiila lubishi lubi, na nsaa kinyi yabikakitshika?

¹⁵ Wa kananka, nkwedibwa mwilungu dya kaalo. Nkinyi akikyebe kufwiila mooma a lubishi lubi? Mikeyilu ‘ayikyebe kwiela mwilungu dya kaalo.’ (Mat. 13:42, EEM) Byabya abilesha kabutu ka nfudiilo. Na dingi, baaba abakasanganyibwa mu ndumbulwilo a bipwilo bya madimi abakebabutula mu nsaa ya Armagedone, kipindji kya nfudiilo kya mpombo ikata.—Mal. 4:1.

16, 17. (a) Mmwanda kinyi wa nfudiilo ubaadi Yesu muleshe mu lukindji lwaye? (b) Bwakinyi atwamba shi kulombana kwa wawa mwanda ku kii mu mafuku e kumpala?

¹⁶ Wa katano, nkupenyapenya. Yesu afudiisha lukindji lwaye shi: “Penipaapa balulame abakapenyapenya bu nguba mu bufumu bwa Shabo.” (Mat. 13:43, Kilombeno kipya 2009) Bino abikyebe kukitshika nsaa kinyi na mbalo kinyi? Kulombana kwa aa mayi kukii kumpala. Yesu tabaadi mwakule shi wawa mmwanda ukwete kukitshika pano pa nsenga nya, kadi aukyebe kukitshika mwiyilu mu mafuku e kumpala. * Tubande kutaluula myanda ibidi ayitushinkamiisha byanka.

¹⁷ Mwanda wa kumpala, pabitale lukonko lwa kuuka “nsaa kinyi.” Yesu balulwile shi: “Penipaapa balulame abakapenyapenya.” Mwaku “penipaapa” aulesha mwanda  ubakatuka Yesu mu kuleesha, ‘kwela lubishi lubi mwilungu dya kaalo.’ Bino abikakitshika mu kipindji kya nfudiilo kya mpombo ikata. Byabya ‘kupenyapenya’ kwa bashingwe mwimu akukamweneka kalolo mu mafuku e kumpala. Mwanda wa kabidi, mpabitale lukonko lwa kuuka “mbalo kinyi.” Yesu baadi mwakule shi balulame abakyebe ‘kupenyapenya mu bufumu.’ Bino abilesha kinyi? Bashingwe mwimu booso baasha kululama bakii pa nsenga, nsaa ayikala kipindji kya kumpala kya mpombo ikata kipwe kukila, abekala bapwe kupeta bitampi byabo bya nfudiilo. Na dingi, anka bu byabidi bileshibwe mu butemuki bwa Yesu pabitale mpombo ikata, abakebabungila mwiyilu. (Mat. 24:31) Mwamwa abakapenyapenya “mu bufumu bwa Shabo,” na kapindji kapeela kunyima kwa ngoshi ya Armagedone, abakyebe kwikala bu benyi ba Yesu abafiki ‘ku ebambo dya Mukooko Wana.’—Bif. 19:6-9.

18, 19. Mpushisho a lukindji lwa Yesu lwa mbyo ibuwa na lubishi lubi etukwasha mu mishindo kinyi?

¹⁸ Myanda ibatulongo pabitale luno lukindji ngilombeene kwitukwasha mu mishindo kinyi? Tala ino mishindo isatu: Wa kumpala, uno mpushisho anyingishisha binangu byetu. Lukindji aluleesha bwakinyi Yehowa mmutadiile bukitekite. ‘Mmulekyeele . . . bipulu bya nsungu’ bwa kulumbuula “bipulu bya kufwilwa lusa”—mbyo ibuwa. * (Lom. 9:22-24, Kilombeno kipya 2009) Wa kabidi, uno mpushisho anyingisha lukulupilo lwetu. Bu bi nfudiilo ikwete kwisesela peepi, beshikwanyi neetu abakyebe kutamisha ngoshi yaabo kwatudi, ‘anka tabetutshyokola.’ (Badika Yeelemiya 1:19, EEM) Bu bi Yehowa kubanga kala baadi alama kasaka ka mbyo ibuwa, byabya Nshetu e mwiyilu akyebe kwikala n’etu “mafuku oso” aafiki ku bukwashi bwa Yesu na miikeyilu.—Mat. 28:20.

¹⁹ Wa kasatu lukindji alwitukwasha bwa kutundula kasaka ka mbyo ibuwa. Bwakinyi byabya bi na muulo ukata? Kuuka kwa beena Kidishitu be bu lubishi lubi kwi na muulo bwa kupeta lwalulo ku lukonko lubaadi lwele Yesu mu butemuki bwaye pabitale mafuku a nfudiilo. Bayipwishe shi: ‘Naanyi e bu mpika a kishima na mupatulukye?’ (Mat. 24:45) Miisambo ibidi ayilondo ayikyebe kwaluula ku luno lukonko.