NOWA na kifuko kyaaye mbebungile pamune nsaa ikwete kunoka mpeshi ngofu. Banda kupwandikisha byabadi, abamweneka bu be mu mufito na bimunyi byaabo bikwete kutuusha etaata dipeela, mbatoone meeso nsaa yabakwete kupusha mema a mpeshi akwete kwikupila kunundu na mu mpese yooso ya bwato. Abimweneka shi tulee tukwete kwibakalakasha.

Nowa pakwete kutala ba mu kifuko kyaaye—mukashi aaye na baana baaye basatu baasha kululama na bakashi baabo—kushii mpaka, eshimba dyaaye ngiule na lutumbu. Mu yaaya nsaa ya mufito, pakwete kumona bantu baadi mufule ngofu be peepi naye, eshimba adimunyingi. Booso abaapanda na takwi muntu su ngumune e mu masaku. Kushii mpaka babungu kifuko kyaaye bwabadya kwela luteko lwa lutumbu, akaamisha eyi dyaaye mu mushindo wadidi dilombeene kupushika mpa na kula.

Nowa baadi muntu sha lukumiino lukata. Lukumiino lwaye nyi lubaadi lutakule Yehowa Efile Mukulu aaye mu kumukalwila aye na kifuko kyaaye. (Beena-Ebreeyi 11:7) Kadi nsaa ibabangile mpeshi, lukumiino lwaye lubaadi lutshimbe su? Nya, abaadi balombeene kwikala na lukalo lwa dino eyikashi mu mafuku a nkalakasho ibaadi kumpala. Uno mwanda ngwitutale mpa na atwe be mu ano mafuku a nkalakasho ibungi. Byabya, tubandeyi kutala kyatudi balombeene kulongyela ku lukumiino lwa Nowa.

Paasha mpeshi baadi atungunuka na kunoka munda mwa “mafuku makumi ananka a kaanya na bufuku.” (Kibangilo 7:4, 11, 12) Mema abaadi aende na kukaamina ngofu. Nsaa ibaadi mema aakamina, Nowa baadi mulombeene kumona binyibinyi shi Yehowa Efile Mukulu aaye, baadi akalwila bantu baasha kululama na anyoko bantu be bubi.

Mpeshi a kabutu baadi mwimikye buntomboshi bubaadi butuukye munkatshi mwa miikeyilu. Bu bibayidi ilonde binangu bya Satana, mikeyilu ibungi ibaadi ikimbe penda buwa bwayo, ayo nkuleka “kibombêlo kyâbo” mwiyilu ayo nkwata bakashi, abo nkutanda baana ba bipambe babaabadi abetamina bu ba Nefilime. (Yuude 6, EEM; Kibangilo 6:4) Pabatuukile dyadya etombo, Satana baadi musangale ngofu, mwanda dibaadi dilwishe bantu, bipangwa bikata bya Yehowa bi pa nsenga.

Byabya, bu bibaadi mema a Mpeshi a kabutu aende na kukaamina, miikeyilu itombokye ibaadi ifuule mususa umune mbidi ya baana ba bantu ayo nkwaluka mu mbalo ya mu kikudi, tayibaadi dingi na mushindo wa kufwala mbidi ya baana ba bantu nya. Ibalekyele bakashi na baana baayo bwashi bafwe ku Mpeshi a kabutu pamune na bantu ba kipungo kyabo.

Kubanga mu mafuku a Henoke, kunyima kwa siekele musambo, Yehowa baadi mudimushe bantu shi akyebe nkabutula bantu be bubi, bantu bashii bamulamate. (Kibangilo 5:24; Yuude 14, 15) Kubanga mu aa mafuku, bantu abaadi batungunukye na kulwila, abalwisha nsenga na kwiyiusha na buntomboshi. Binobino kabutu kabaadi akatungu kwibafwila. Nowa na kifuko kyaaye abaadi basangeele kaaka kabutu su?

Nya! Sunga Efile Mukulu aabo sha lusa tabaadi musangale su nkapeela. (Ezekyele 33:11) Yehowa bakitshiine mwaye mooso bwa kupaasha bantu bebungi. Batumine Henoke bwa kwibadimusha, na balungwile Nowa bwashi akite bwato. Nowa na kifuko kyaye abaadi bakite uno mudimo munda mwa bipwa makumi, bantu booso abaadi abebamono. Na dingi Yehowa balungwile Nowa bwashi akite mudimo wa bu ‘mulambukishi a mwanda wa bululame.’ (2 Mpyeele 2:5)  Mu mushindo umune na Henoke, badimwishe bantu pabitale kiimu kibaadi akikyebe kwibafwila. Bantu abalulwile naminyi? Yesu, aye baadi mumone bibaadi myanda yooso pabaadi mwiyilu, batentekyeeshe bantu ba mu mafuku a Nowa aye nkwamba shi: “Tababaady’ababasuka kintu, nyaa na pabaanokyele Mpeshi a kafwambu [kabutu].”—Mateo 24:39.

Banda kunangushena bibadya kwikala nshaleelo a Nowa na kifuko kyaaye mu aa mafuku 40 kunyima kwa Yehowa kushita kiibi kya bwato. Bu bibaadi mpeshi kwete kunoka kwifuku dyooso, booso bwabo bantu mwanda abaadi abakitshi midimo yaabo ya pa kiubishi—kwikwasheena, kushaala mu tudimbo twabo, na kutala nkalo ya nyema mu tushibo twayo. Byabya, mususa umune bwato bubangile kusaana. Abo nkubanga kwenda! Mbulengame kunundu kwa mema, bubaadi abwende na kukamina mwiyilu ngofu, “meema nkukaamina, ao nkusemuna bwato; bubeebwele paanundu pa nsenga.” (Kibangilo 7:17) Kyakya kibaadi nkileshesho kikata kya bukome bwa Yehowa Efile Mukulu sha-bukome booso!

Nowa baadi muleshe lutumbu—kushii penda pa mwanda wa kupashibwa kwaye na kwa kifuko kyaaye nya, kadi bwa lusa lwa Yehowa aye baadi mwibape mudimo wa kudimusha mwilo ubabutukile paasha pa bwato. Byabya bipwa byooso bya mudimo wi bukopo bibadya kumweneka bu bishi na efuto. Bantu tababaadi abateemesha nya! Banda kwela binangu—pangi Nowa baadi na bakwabo balume, bakwabo bakashi, na baana ba bakwabo kumpala kwashi Mpeshi a kabutu anokye; anka muntu su ngumune a kwabadi tabaadi mumuteemeshe kukaasha penda ba mu nshibo yaaye. (Kibangilo 5:30) Binobino, bu bibaadi bano bantu mwanda booso bafwamine mu bwato, abaadi balombeene kunyinga ku mashimba p’abatentekyesha nsaa yooso yabakishanga mu kupa kwa baaba bantu mushindo wabadi balombeene kupanda.

Kubanga mu mafuku a Nowa, Yehowa ta mushintulukye nya. (Malakii 3:6) Yesu Kidishitu baadi muleshe shi, ano mafuku etu enka bibaadi “mafuku aa Nowa.” (Mateo 24:37) Atwe twi mu kipungo ki bukopo, kipungo kya nkalakasho ikata itale kabutu ka uno ndumbulwilo a myanda e bubi. Lelo uno, mwilo w’Efile Mukulu ukwete kutwala mukandu wa kudimusha bantu booso abeuteemesha. Okumiina kwiuteemesha su? Su we mupwe kukumiina bya binyibinyi bya uno mukandu aupa bantu muwa, okumiina kwendanga mu kwiulungula bangi su? Nowa na kifuko kyaye mbetulekyele kileshesho kikata.

Pabaadi bwato abwende panundu pa aa mema akata, baaba abaadi mwanka abaadi abapusha tulee twa mitshi ayiikupila ku bwato. Nowa baadi mulombeene kupusha moo pa mwanda wa bula na bukata bwa bwato su? Nya. Kwakwa kupusha kwa moo nkulombeene kutuuka penda kwi baasha mpaka. Bible alesha shi: “Ku lukumiino, Nowa . . . nkusee bwato.” (Beena-Ebreeyi 11:7) Lukumiino ku kinyi? Yehowa baadi mukite kilombeeno kikata, kya kupaasha Nowa na mukashi na baana baaye booso ku Mpeshi a kabutu. (Kibangilo 6:18, 19) Yawa bapangile eyilu na nsenga na bintu byooso bi mwanka, tabaadi mulombeene kwibilama na muwa su? Kushii mpaka! Nowa baadi mutuule lukulupilo lwaye kwi Yehowa na kulama mulayilo Waye. Na dingi, aye na kifuko kyaaye abaadi ‘bapande ku lufu lwa mu mema.’—1 Mpyeele 3:20, EEM.

Mpeshi batshibikile kunyima kwa mafuku 40. Muyiile Kalandriye ketu bibaadi mu mweshi w’Ekumi na wa Kabidi wa kipwa kya 2370 Eb.Y.K. Kadi booso abaadi mu bwato abaadi nka na muwa. Bwabwa bwato bubaadi buwule na bipwangwa, bubaadi abwende na kutambuka kunundu kwa aa mema a kata, eyendo mpa na kunundu kwa myengye. (Kibangilo 7:19, 20) Twi balombeene kumona mu binangu Nowa kwete kukita mudimo wi bukopo na baana baaye Seme, Kame naa Yafete bwabadya kudiisha nyema yooso bwashi ikale bibuwa na mbidi bukome. Eyendo, Efile Mukulu baadi mufukamishe nyema yooso ya bukyelo bwayidya kutwela mu bwato mu aa mafuku ooso a Mpeshi a kabutu. *

Nowa baadi mushaale mupasukye. Myanda yaaye ayilesha nsaa ibabangile mpeshi na ibatshibikile. Mbileshibwe dingi shi mema abaadi aule pa nsenga munda mwa mafuku 150. Kunyima ababangile kukama. Mwifuku dimune dishy’akulubibwa, bwato nkushaala pa “ngulu aa Ararate,” asanganyibwa lelo uno mu Turquie. Byabya bibadya kwikala mu mweshi wa Kananka wa kipwa kya 2369 Eb.Y.K. Mafuku 73 kunyima kwa mweshi wa Kasamombo, masongo a myengye nkubanga kumweneka. Kuyima kwa myeshi isatu, mu mweshi wa Kitema, Nowa babangile kukaasha bingi bintu kunundu kwa bwato. Eyendo, wawa mudimo ukata ubaadi n’efuto dya kupeta etaata na lupapi lwi buwa lubatwelele mwabadi. Ku mbangilo, Nowa babangile kutompa bwa kutala su pasha pabaapu kukama mu mushindo ulombeene bantu kushaala. Batumine konyi ka kidila-nganga, kabayiile munda mwa kapindji, pangi kabaadi akende na kusomona na kudya nsaa ibakadi akapapama; akupu Nowa nkutuma ka nkudimba, kabayiile mpaa na pakabapetele mbalo ya kushaala.—Kibangilo 7:24–8:13.

Kushi mpaka, Nowa baadi na kiubishi kya kutuula binangu byaye ku myanda ya mu kikudi. Twi balombeene kunangushena mushindo ubaadi kifuko kyaaye akiibungu pamune bwa kuteka nsaa yooso na kwisamba myanda itale Nshabo e mwiyilu aye mwibakalwile ku masaku. Kumpala kwa kwata kitshibilo kyooso kii na muulo, Nowa baadi atuulu lukulupilo lwaye kwi Yehowa. Sunga nsaa ibamwene Nowa shi nsenga ibaapu ‘kuuma’—baadi mushaale mu bwato kunyima kwa kipwa kishima—kushii kwibushitula bwashi booso batuukye mwanka. (Kibangilo 8:14) Baadi mutengyele eyi dya kwi Yehowa!

Banfumu ba bifuko lelo uno mbalombeene kwambula kileshesho kya uno muntu sha kululama. Baadi akitshi myanda mu mulongo, baadi mufubi e bukopo, sha lwishinko na mulami a byooso byaadi nabyo. Mu byooso, baadi atuulu akikyebe Yehowa pa mbalo ya kumpala mu myanda yooso. Su atwambula lukumiino lwa Nowa mu ino myanda yooso, atukyebe kutwadila myabi kwi booso batudi bafule.

Ku nfudiilo, Yehowa batumiine Nowa eyi shi: “Tuuka mu bwato, obe, mukashy’obe, baana boobe balume, na bakashi ba baana boobe.” Na kukookyela kooso, abatuukile na nyema yooso. Abatuukile mu kafutakanyi su? Nya! Mwanda waaye aulesha shi byooso bibaadi mwanka “nkutuuka mu bwato muyiile mafuko aabyo.” (Kibangilo 8:15-19) Mususa umune pabaabatuukile, abaadi na muloo wa kutambula kapapi kebuwa ka ku mwengye wa Ararate na kutala bibaadi wawa mwengye, Nowa na kifuko kyaaye abaadi abamono nsenga itooshibwe. Ba Nefilime, buntomboshi, mikeyilu itombokye, na bantu booso be bubi tababaadi kwanka dimo! * Bantu abaadi na mwabi wa kubanga nshaleelo ebuwa.

Nowa baadi auku kya kukita. Babangile kulangwila; aye nkwibaka kilambwilo, nkwata nyema umune-umune  a ku yaaya ibaadi ayimweneka bu i selele ku meso kw’Efile Mukulu—ya mu bisaka bya nyema “musambobidi musambobidi” ibaadi mutweshe mu bwato—aye nkutuusha mulambu ya kushiika kwi Yehowa. (Kibangilo 7:2; 8:20, EEM) Lwalwa lulangwilo lubaadi lusangashe Yehowa su?

Bible aluula mu bino bishima bi buwa shi: ‘Yehowa nkupusha mapembwe ee buuwa.’ Efile Mukulu baadi mupyanyishe bubi bubaadi apusha mwishimba dyaaye pabaudile nsenga n’etombo na mapembwe e buwa a kumona kifuko kya bantu basha kululama abamulangwila pa nsenga na kitshibilo kya kukita akikyeb’eshimba dyaaye. Lukalo lwa Yehowa talubaadi nka shi bekale bapwidikye nya. Yawa verse umune atungunuka shi: “Eshimba dya muntu nditadiile ku bubi bibangile ku bukinga bwaye.” (Kibangilo 8:21) Banda kutala mushindo ubaadi Yehowa mutungunukye na kulesha lwishinko lwaye kwi bantu.

Efile Mukulu baadi mwele nsenga mulwa. Kubanga mu mafuku a buntomboshi bwa Adame na Eeva, Efile Mukulu belele mulwa wa’shi, kudima akwikala bukopo. Lameke nshaye na Nowa baadi muudikye mwan’aaye mulume bu Nowa, pangi dyadya eshina adipatuula shi “Kiikiisho,” sunga “kusaamba,” na baadi mutemukye shi mwan’aaye mulume akyebe nkatwala bantu mu kiikiisho kya wawa mulwa. Nowa baadi mulombeene kusangala pabamwene shi binobino mukumbeene kumona kulombana kwa bwabwa butemuki na shi, nsenga ayikatuusha bintu byayo nsaa yababanga kudima. Banda kutala, binobino Nowa babangile kudima!—Kibangilo 3:17, 18; 5:28, 29; 9:20.

Mu yaaya nsaa imune, Yehowa bapeele baana ba Nowa miiya ipelepele na ilombeene kwibakunkusha mu muwa wabo—itale mpa na kupela kwa kwipayishena na kutumika bi bubi na mase. Efile Mukulu bakitshine dingi kilombeno na bantu, aye nkwibalaa shi taakanokyesha dingi mpeshi bwa kubutula kantu kooso ke na muwa pa nsenga nya. Bwa kulamata kwi eyi dyaaye, Yehowa batuushile nkongolo bwa kulesha ntumbo yaaye mususa wa kumpala. Kubanga mu dyaadya efuku, nkongolo ooso atumono etutentekyesha bwa kwitunyingisha ku mulayilo wa kifulo wa Yehowa.—Kibangilo 9:1-17.

Su mwanda wa Nowa ubaadi wa kupwandikisha, ubadya kwimana na yawa nkongolo. Anka Nowa baadi muntu a binyibinyi na nshaleelo aaye tabaadi mupelepele nya. Mu aa mafuku pabaadi bantu na mushindo wa kwikala na muwa munda mwa bipwa bikile bungi, Nowa muntu sha kululama baadi mushaale na muwa munda mwa bipwa 350, na mu byabya bipwa nkama baadi mupete nkalakasho ibungi. Bakitshine kilema kikata nsaa ibaadi mukolwe maalwa ungi mususa, kadi kyakya kilema kibaadi kifwishe nkalakasho ibungi nsaa ibaadi mwan’aaye mulume Kanana mukite mulwisho ukile bukata—mulwisho ubaadi umutwadile nkalakasho ibungi na kifuko kyaye. Nowa baadi na muwa munda mwa bipwa bibungi aye nkumona baana baaye nsaa ibabaponene mu milwisho bu kutambuka kwa lusandji na buntomboshi mu mafuku a Nimerode. Byabya, ku lungi lupese, Nowa bamwene Seme mwan’aaye mulume pabaadi mutuushe kileshesho ki buwa kwi kifuko kyaaye.—Kibangilo 9:21-28; 10:8-11; 11:1-11.

Anka bu Nowa, twi na kya kunyingiila sunga kwekala nkalakasho. Nsaa i bangi bantu betwifunyishe abapele kukumiina Efile Mukulu a binyibinyi, sunga kuleka kumufubila abitungu tulonde kileshesho kya bibakitshine Nowa. Yehowa asangalaa ngofu na kwakwa kunyingiila kwa mu lukumiino. Anka bu bibambile Yesu Kidishitu shi: “Akashaala munyingye nyaa na ku nfudiilo, yaawa apanda.”—Mateo 24:13.