1, 2. Okumiinaa kwata bitshibilo, omonaa naminyi pabitale bingi bitshibilo bitobopwile kwata?

MAFUKU ooso, atwataa bitshibilo bibungi. We mulombeene kupusha naminyi nsaa ayikutungu kwata bitshibilo bikata? Bantu bebungi abekalaa na lukalo lwa kwiatshila bitshibilo. Abapwandikisha shi be na bulungantu bwa kwiatshila bitshibilo kushii kulonda binangu bya mungi muntu. Bangi namu abatshinaa kwata bitshibilo bikata. Bangi abakimbaa binangu mu mikanda sunga kwi bantu abatushaa malango na kutuusha makuta ebungi bwa kupeta bukwashi bwabadi nabo lukalo bwa kwata bitshibilo.

² Bebungi ba kwatudi abashinguula shi sunga kwekala bitshibilo bya kwata, tatwi na matalwa akwibyata byooso nya; kwi bitshibilo bi bungi abitungu shi muntu eatshile mu muwa waye. (Gal. 6:5) Byabya, pangi atushinguula shi, bitshibilo byooso byatwata binka buwa sunga shi mbilombeene kwitukwasha.

3. Miiya kinyi yatudi nayo pabitale kwata kwa bitshibilo, kadi ndukalakasho kinyi lwi kwanka?

³ Bu byatudi bafubi ba Yehowa, twi balombeene kwikala na muloo mwanda mwitupe miiya ibuwa pabitale myanda i na muulo mu muwa wetu. Atuuku shi su tubalondo yaaya miiya, twi balombeene kwata bitshibilo bilombeene kwitukwasha na kusangasha eshimba dya Yehowa. Anka, twi balombeene kwikala kumpala kwa myanda yabashii baleshe mu miiya ya mu Bible. Byabya mushindo kinyi watudi balombeene kusangula kya kukita? Bu kileshesho, atuuku shi kwiba kwi bubi. (Ef. 4:28) Kadi kwiba nkutale kinyi? Nkutale muulo wa kintu kyabayibi, akitakula muntu bwa kwi kyata su nkutale ungi mwanda kampanda? Mushindo kinyi watudi balombeene kwata kitshibilo pabitale myanda yabamono kwi bangi bu ishii na mwiya? Nkinyi kilombeene kwitukunkusha?

4. Elango kinyi dyabetupeyaa kumpala kwa kwata kitshibilo?

⁴ Nsaa yatulungula mwina Kidishitu netu shi twi na lukalo lwa kwata kitshibilo kikata, mulombeene kwitulungula  shi, ekyate na binangu bi buwa. Eyendo dyadya nyi elango di buwa. Bible etupa dino elango pabitale kwata kwa bitshibilo lubilo lubilo shi: ‘Yawa abatukila akekala mulanda.’ (Mye. 21:5, EEM) Kadi kwikala na binangu bi buwa akulesha kinyi? Akukyebe kulesha shi abitungu twate nsaa ya kunangusheene pabitale mwanda kampanda, twele binangu kalolo pabitale kitshibilo kya kwata su? Ino myanda yooso i na bukwashi pabitale kwata kwa bitshibilo bi buwa, kadi kwi bi bungi abitungu pabitale kwikala na binangu bi buwa.—Lom. 12:3; 1 Mp. 4:7.

5. Bwakinyi kubanga ku butandwa bwetu tatwi na binangu bi buwa?

⁵ Atushinguula shi ta kwi muntu su ngumune mutandjikwe na binangu bi buwa nya. Bwakinyi atwamba byabya? Mwanda atwe booso twi batandjikwe mu milwisho na twi bakutwe kupwidika nyi bwakinyi ta twi bapwidikye ku mbidi na mu binangu nya. (Mis. 51:5; Lom. 3:23) Na dingi, bebungi ba kwatudi ingi nsaa abaadi munkatshi mwa baaba babadi “babulakashe kinangu” kwi Satana; tatubaadi atuuku Yehowa na miiya yaaye ilulame nya. (2 Kod. 4:4; Tt. 3:3) Byabya, sunga muntu apwandikisha shi takudi bipwa bi bungi ateyaa bitshibilo bimeene pa myanda yamono bu ibuwa na ilongame, ingi nsaa mulombeene kwata bitshibilo bi bubi.—Mye. 14:12.

6. Nkintu kinyi kilombeene kwitukwasha bwa kwikala na binangu bi buwa?

⁶ Sunga byekala shi tatwi na mbidi sunga binangu bi buwa, Yehowa Nshetu e mwiyilu mupwidikye mu myanda yooso. (Miy. 32:4) Mwitupe kyakya kilombeene kwitukwasha bwa kushintuula binangu byetu na kulonga mushindo wa kwikala na binangu bi buwa. (Badika 2 Timotee 1:7.) Bu byatudi beena Kidishitu, abitungu twele binangu kalolo na kukita myanda mu mushindo wi buwa. Byabya, twi na kya kulonga mushindo wa kukunkusha binangu byetu na byatupushaa mu mashimba etu bwa kulonda kileshesho kya ngelelo a binangu a Yehowa, byapushaa mpa na bikitshino byaaye.

7, 8. Tuusha kileshesho akilesha mushindo ulombeene muntu kwata kitshibilo ki buwa sunga kwekala nkalakasho i naminyi?

⁷ Tubande kwata kino kileshesho: Bangi bantu bebungi abendaa mu maumbo abeene, abekalaa na kipikwa kya kwalusha baana baabo bakii bakinga mu maumbo aabo bwashi bakebakushe kwi beena kifuko nabo bwashi, abo banabeene bekale na mushindo wa kutumika ngofu bwa kupeta makuta ebungi mu dyadya eumbo dyabadi bende mu kufuba. * Ungi mukashi baadi mwende mu dingi eumbo batandjile mwana mulume. Mu aa mafuku babangile kulonga Bible na kwitatshisha bwa kutumikila myanda yalongo. Bangi baloole baaye mpa na beena kifuko naaye ababangile kwibalungula na mulume aaye shi, balonde kipikwa kya kwalusha baana kwabo bwashi bakebakushe kwi ba nkambwa baabo. Kadi yawa mukashi mu kulonga kwaye kwa Bible baadi musangane shi, Yehowa mmupe baledi bushito bwa kukusha baana baabo. (Mis. 127:3; Ef. 6:4) Baadi mulombeene kulonda kyakya kipikwa kya kwalusha baana pa mwanda bangi bantu abaadi abekimono bu ki buwa? Su baadi mulombeene kulonda byabya bibaadi alongo mu Bible, sunga mbyabidi shi badya kwikala na lukalakasho lwa kushaala na ndambo ipeela ya makuta na bangi abadya kumutopeka? Obe naamu bodya kukita kinyi su boodi mufumankane na mwanda wi bino?

⁸ Pa mwanda wa lukalakasho lubaadi apete bwa wawa mwanda, yawa mukashi balungwile Yehowa mwanda ubaadi mwishimba dyaaye na aye nkukimba bukwashi bwaye. Besambile na mukwetu baadi alongo naaye Bible na bangi bantu mu kakongye pabitale wawa mwanda, aye nkubanga kumona bi binangu bya Yehowa pabitale wawa mwanda. Aye nkubanga kunangwila pabitale masaku aafwilaa baana nsaa y’abapu bipwa bi bungi kula na baledi baabo. Kunyima kwa kutaluula wawa mwanda ku bukwashi bwa  Bifundwe, basangeene shi t’abitungu shi alushe mwana kwabo nya. Mulume aaye bamwene mushindo ubaadi beena kakongye abafiki mu kwibakwasha na mushindo ubaadi aukulu mwana na muloo. Aye nkukumiina kulonga Bible na nkubanga kutwela mu bisangilo na mukashi aaye.

9, 10. Kwikala na binangu bi buwa akulesha kinyi, na mushindo kinyi watudi balombeene kwikala nabyo?

⁹ Uno mpenda mwanda umune, kadi aulesha shi, kutumika na binangu bi buwa ta nkutale penda byatupwandikisha sunga abipwandikisha bangi shi bi buwa nya. Binangu na mashimba etu akutwe kupwidika mbilombeene kwikala nka bu nsaa kwete kutambuka lubilo sunga bipeela. Kulonda kwa yawa nsaa nkulombeene kutuusha masaku ebungi. (Yel. 17:9) Twi na kya kukita bwashi binangu byetu na mashimba etu ekale epushene na miiya y’Efile Mukulu.—Badika Yeeshaya 55:8, 9.

¹⁰ Bible etupa dino elango di buwa: “Kulupila kwi Yehowa n’eshimba dyoobe dyooso, olekye kulonda binangu byoobe’be nabeene. Mu mwikeelo wobe ooso, omutentekyeshe, aye alumbuulaa mashinda oobe ooso.” (Mye. 3:5, 6) Lamiina shi, mwaku “olekye kulonda binangu byoobe’be nabeene;” aufiki kumpala kwa kishima akyamba shi, “omutenteyeshe [Yehowa].” Aye ndjo e na binangu bi buwa. Byabya, patudi na lukalo lwa kwata kitshibilo, abitungu tutale mu Bible bwa kushinguula binangu by’Efile Mukulu pabitale kitshibilo kyatukyebe kwata pabitale mwanda kampanda. Akupu twate kitshibilo muyiile byabya binangu. Atulesha shi twi na binangu bi buwa nsaa yatulondo binangu bya Yehowa.

11. Nkinyi kilombeene kwitukwasha bwa kutundula mushindo wa kwata bitshibilo bi buwa?

¹¹ Kulonga mushindo wa kwata bitshibilo bi buwa na kwibilombasha ta nkubofule nya. Bino mbilombeene kukalakasha baaba bakii bapya mu bya binyibinyi sunga baaba ababanga kwenda kumpala mu kikudi. Byabya bano baana mu kikudi bu abibetamina Bible mbalombeene kwenda kumpala. Banda kutala mushindo aukitaa mwana kyalongo kutambuka kushii kupona. Bwa koobesha abitungu shi, abangye kutambuka kapeela kapeela misusa ibungi. Bi mumune mpa na bwa bano baana bakinga mu kikudi nsaa yabadi na lukalo lwa kwata bitshibilo. Tentekyesha shi Mpoolo mutumibwa akula pabitale bantu banyingye “abo bapwe kuubidisha binangu byabo  bwa kushinguula myanda ibuwa na ibubi.” Bishima “kuubidisha” na “kufubisha” byooso abilesha shi twi na kya kwitatshisha, na baaba bapya be na kya kutungunuka na kwitatshisha bwa kulonga mushindo wa kwata bitshibilo bi buwa.—Badika Beena-Ebreeyi 5:13, 14.

12. Mushindo kinyi watudi balombeene koobesha kwata bitshibilo bi buwa?

¹² Anka bu bibatukatuka mu kumona kumpala, efuku dyooso twi na bitshibilo bi bungi bya kwata, bikata na bipeela. Bangi bantu abatalulaa mushindo awateya bantu bitshibilo abalesha shi, bitshibilo byetu 40 pa lukama mbitale biubishi byetu, ta mbimeene pa myanda yatunangushena nya. Bu kileshesho, ku namashika kooso wateyaa kitshibilo kya kusangula kilamba kya kufwala. We mulombeene kumona uno bu mwanda upeela, na osangula kilamba kushii kwela binangu bikishekishe nsaa yoodi na lukalo lwa kutuuka bukidi. Kadi abitungu shi otale kalolo su kilamba kyofwala nkilombane bwashi bafubi ba Yehowa bafwale. (2 Kod. 6:3, 4) Nsaa yokyebe kuula kilamba, we mulombeene kunangushena pabitale mushindo wabadi bekipwe, kadi onangushenaa namu pabitale muulo wakyo na pabitale kwiyisha su? Kwata kwa bitshibilo bi buwa nkulombeene kwitukwasha bwa kufubisha kiubishi kyetu kya kushinguula, kilombeene kwitukwasha bwa kwata bitshibilo bi buwa mu myanda yooso.—Luk. 16:10; 1 Kod. 10:31.

13. Nkintu kinyi kilombeene kwitukwasha bwa kushinguula shi, tukwete kulamata ku bitshibilo byatwata?

¹³ Atwe booso atushinguula shi, kwata kwa bitshibilo mmwanda umune, anka kwibilombasha na kulamata ku byanka ngungi mwanda. Bu kileshesho, bangi abakumiina kuleka kutoma nfwanka tabakwete koobesha mwanda wa kukutwa kwa kwata kitshibilo ki bukopo bwa kuleka. Twi na kya kwikala na lukalo lukata lwa kukita myanda yatudi na lukalo lwa kukita. Bangi abalesha shi twi balombeene kutamisha lwalwa lukalo mu mushindo umune na byatunyingishaa mbidi yetu. Su tukwete kwiyifubishanga, ayikyebe kunyinga ngofu. Su tatwiyifubisha misusa ibungi, ayikyebe kubofula. Byabya, nkinyi kilombeene kwitukwasha bwa kunyingisha lukalo lwetu lwa kulamata ku bitshibilo byatwata? Abitungu tutuule lukulupilo lwetu kwi Yehowa bwashi tupete bukwashi.—Badika Beena-Fidipe 2:13.

14. Bwakinyi Mpoolo baadi na bukome bwa kukita kyooso kibaadi akimutungu kukita?

¹⁴ Mpoolo baadi muukye bino ku myanda ibaadi mumone. Baadi mwidile shi: “Kukyeba kukita buuwa nkumbofwile, anka kushii bya kwibikumbasha.” Baadi auku kyakya kibaadi na lukalo lwa kukita kyooso kibaadi akitungu shi akite, kadi kubaadi kintu kibaadi akimukutshisha bwa kwikilombasha. Bambile shi: “Nee na muloo wa kukumbash’eyi dy’Efile Mukulu mwishimba dyande, anka mu bipindji bya mbidi yande, naasangana dingi eyi, adilu ngoshi n’eyi dikumiine kinangu kyande; adingikasha mwina-lukano a mwiya wa milwisho wi mu bipindji bya mbidi yande.” Tabaadi na kya kukulupila su? Nya. Bambile shi: “Lutumbu kw’Efile Mukulu pa kukiila kwi Yesu Kidishitu Nfumwetu!” (Lom. 7:18, 22-25) Bafundjile dingi shi: “Nee mulombeene kukita byooso munda mwa uno anyingisha.”—Fid. 4:13.

15. Bwakinyi abitungu shi twate kitshibilo kya kukita myanda ibuwa?

¹⁵ Eyendo bwa kusangasha Efile Mukulu, abitungu kwata kitshibilo kya kukita myanda ibuwa na kukita mwetu mooso bwa kwiyilombasha. Tentekyesha mayi a Eliya abaadi mulungule balangwidi ba Baale na bangi bantu basumbule lukumiino abaadi munkatshi mwa beena Isaleele ku mwengye wa Karmele shi: “Anùkumbakana byaabya na ku nguba kinyi? Su Yehowa mwikale Efile Mukulu mulondeeyi; anka su Baale, mulondeeyi.” (1 Bf. 18:21) Baana ba Isaleele abaadi abauku kibaadi akitungu shi bakite, kadi abaadi ‘abakumbakana’ pabitale kwata kwa bitshibilo. Mu kwilekena kukata, kunyima kwa bipwa bibungi Yooshwa baadi mulekye kileshesho ki buwa nsaa ibaadi mulungule beena Isaleele shi:  “Anka su taabinusangasha bwa kufubila Yehowa, sangulaayi leelo aanukyebe kufubila . . . Ami na kifuko kyande atufubila Yehowa.” (Yos. 24:15) Miloo kinyi ibaadi mupete na bangi babaadi nabo? Yooshwa na babaadi bashaale naaye abapetele mwabi wa kutwela mu Nsenga ya Mulayilo, “eumbo adyaalaala mabeele na buuki.”—Yos. 5:6.

16, 17. Tuusha kileshesho akilesha myabi ilombeene muntu kupeta nsaa yaata bitshibilo bipusheene na akikumiina eshimba dy’Efile Mukulu?

¹⁶ Banda kutala kino kileshesho kya ano mafuku. Ungi mukwetu mulume baadi kii na bipwa bipeela mu dibaka, aye na mukashi aaye abaadi na baana basatu. Dingi efuku ungi mwina mufubo naaye baadi mumulungule’shi mbalombeene kwenda naaye mu ungi sosiete abafutu makuta ebungi. Yawa mukwetu mulume nkwela luteko na nkunangushena pabitale wawa mwanda. Baadi kwete kufuba pa mbalo ibaabadi abamufutu makuta apeela, bwashi ekale na mafuku akwikisha mu mpooso, alombeene kumukwasha bwa kutwela mu bisangilo na kwenda mu mudimo wa bulungudi na kifuko kyaaye. Baadi mwele binagu shi, su aleka wawa mudimo bwa kubanga kukita ungi, tekala na mushindo wa kupeta mafuku su ngapeela a kwikisha nya. Obe namu we mulombeene kukita kinyi?

¹⁷ Kunyima kwa kunangwila pabitale bilombeene kino kitshibilo kulwisha kipwano kyaaye na Yehowa, tabaadi mukumiine wawa mudimo wabafutu makuta ebungi nya. Opwandikisha shi, baadi mwinyongole pa mwanda wa kyakya kitshibilo su? Nya. Pamutwe wa kunangwila pabitale kupeta kwa makuta ebungi, bapushishe shi kii na muulo kwadi na kifuko kyaaye nkwifubwila pepi na Yehowa. Yawa mukwetu na mukashi aaye abaadi na muloo ukata nsaa ibaadi mwanaabo mukashi sha bipwa ekumi mwambe shi, mmufule baledi baaye, bakwabo balume na bakashi mpa na Yehowa. Bakwile shi akumiina kulambula muwa waye kwi Yehowa na kubatshishibwa. Kileshesho kya nshaaye kya kutuula lulangwilo lwa Yehowa pa mbalo ya kumpala mu muwa waaye, kibaadi kimukwashe ngofu.

18. Bwakinyi bi na muulo bwashi twikale atwata bitshibilo bi buwa efuku dyooso?

¹⁸ Yesu Kidishitu, Moyiise Mukata kwete kukunkusha balangwidi ba Yehowa ba binyibinyi mu uno ndumbulwilo a Satana e bu kabaaka munda mwa bipwa makumi. Anka bu Yooshwa Mukata, Yesu binobino e na kitshibilo kya kufudiisha uno ndumbulwilo e bubi na kukunkusha balondji baaye mu nsenga ipya ya kululama. (2 Mp. 3:13) Byabya, kino ta nkipungo kya kwaluka ku binangu bya kala, biubishi bya kala, myanda yatubaadi atumono bu ibuwa, na mpàngo ibatudi nayo nya. Kino nyi nkipungo akitungu kutaluula kalolo kyakya akikyeb’eshimba dy’Efile Mukulu kwatudi. (Lom. 12:2; 2 Kod. 13:5) Kitshibilo kyooso kyokumiina kwata efuku dyooso kileshe shi, we muntu mulombeene kupeta mwabi w’Efile Mukulu bwa losoo.—Badika Beena-Ebreeyi 10:38, 39.