“Efile Mukulu e mwiilu akatûlu bungi bufumu, bushyabukalwishibwa. Bwabwa bufumu t’abukapono mu mâsa mwa ungi mwilo, ooo. Abukafingakasha na kufudîsha mafumu oso abebubadidîle. Anka pend’abo, nyi abukekadidîla ikalaika.”—Danyele 2:44, EEM.

Bufumu bw’Efile Mukulu nyi guvernema a mwiyilu. Yesu Kidishitu ndjo Nfumu aabo abadi basangule, akyebe kukaasha mafumu ooso a baana ba bantu na kukita bwashi akikyebe eshimba dy’Efile Mukulu kikitshikye kushii penda mwiyilu, mpa na pa nsenga. (Mateo 6:9, 10) Uno guvernema tabakamupyana kwi guvernema su ngumune a baana ba bantu, mwanda aye nyi ‘mbulopwe [bufumu] bwa looso bwa Mfumwetu na Mupaashi Yesu Kidishiito.’ Butaale bwa looso abukekala kwanka.—2 Mpyeele 1:11.

“Takwi mwanda wa kukaanya ooo, mwanda Satana namwinyi euku kwialula bu mwikeyilu’etaata. Ta mwanda upya su bafubi be abealula bu bafubi ba kululama. Anka nfudiilo aikebafikila mupunda byabya bya bakitshi.”—2 Beena-Kodinto 11:14, 15, Kilombeno kipya.

Bipwilo bya madimi abakebilesha patoka bu mifubo ya Diabulu na abakebibutula pa nsenga. Ntondo yooso ya bipwilo na kwipayishena tabikala dingi kwanka nya. Bino abikyebe kukwasha bano booso bafule “Efile Mukulu sha muwa na biinyibiinyi” bwashi bamulangwile mu “lukumiino lumune” na “mu kikudi na mu biinyibiinyi.” Akukekala kufukama na bu umune.—1 Beena-Tesalonika 1:9; Beena-Efeeze 4:5; Yowano 4:23.

“Efile Mukulu ê nabêne akekala n’abo, akekala Efile âbo. Akebakumuna mpolo yoso. T’akukekalanyi lufu, sunga mmâlo, sunga nkutompola, sunga mmitanyo, mwanda myanda ya kala ibapu kushimina.”—Bifumbulwe 21:3, 4, EEM.

Yehowa Efile Mukulu akeekasha bino byooso ku bukwashi bwa Yesu Mwanaaye, batuushile muwa waye bwa bantu booso. (Yowano 3:16) Ku bukunkushi bwa Yesu, bantu abakekala bapwidikye.  T’akukela makyenga su ngapeela mwanda “Efile Mukulu ê nabêne akekala n’abo” na akyebe kukumuna “mpolo yoso [ku meso kwabo].” Kubashaala mafuku apeela kukutwa kwa kupwidika kwa bantu akukyebe kwikala bu mwanda wa kala; “balulame abapete eumbo na abeemushaala looso.”—Misambo 37:29.

‘[Yesu Kidishitu] bakwatshile nyoka, nyoka a kala, mwikale Kafilefile na Satana; bamwelele mu lukano bwa bipwa kinunu. Baamupukile mu lupongo lubaafungile, bamwelele kitampi, bwa’shi tala alendwisha dimo maumbo.’—Bifumbulwe 20:2, 3.

Myanda yooso ya Satana ayikyebe kushimina nsaa yabakyebe kukwata Satana na bademo bwa kwibanya myooshi na kwibeela mu “lupongo” na dingi, tabeekala na bukome nya. T’abekala dingi abatumika na bukome bwabo bwi bubi bwa kukunkusha myanda ya bantu nya. Akukekala kwiyikeela kukata apakeekala bantu mu nsenga ishii Satana dingi mpa na bikudi bibi.

“Mafuku a nfudiilo” aakapu na kyakya kibetamiine Yesu bu “mpombo ikata.” Bambile shi: “Akwikala mpombo ikata, byaishyeekeele dimo byatshile ku mbangilo aa byaa-pano nyaa na ku binobino; anka taayikeekala dimo kwanka bwa looso.”—Mateo 24:21.

Mpombo ayikekala ikata mu mushindo wayishekeele kwanka kasha. Ino ayikyebe kwikala mbangilo a “ngoshi y’efuku dikata dy’Efile Mukulu Sha bukome booso,” ayiukiibwa kalolo bu “Armagedone.”—Bifumbulwe 16:14, 16.

Mbalo yooso i bantu bafule myanda ya kululama abakulupila shi, uno ndumbulwilo a myanda akyebe kufudiila. Banda kutala miloo ipeela yabakyebe nkapeta mu Bufumu bw’Efile Mukulu.

“Kibumbu kikata” akikalamiibwa mu ndumbulwilo mupya a kufukama: Eyi dy’Efile Mukulu adyamba shi “kibumbu kikata” kya bantu be bungi bushii bulombeene muntu kubala “abakatukila mu kutompibwa kukata” na abakalamiibwa mu ndumbulwilo mupya a kululama. (Bifumbulwe 7:9, 10, 14; 2 Mpyeele 3:13) Kipandjilo kyabo abakyebe kwikipetela kwi Yesu Kidishitu, “mukooko-Wana w’Efile Mukulu, ashimishaa milwisho ya baa-pano pa nsenga.”—Yowano 1:29.

Myabi ayikyebe kutuukila ku malongyesha a Efile Mukulu: Mu ndumbulwilo mupya, “eumbo [nsenga] adiikala dyuule na kuuka kwa Yehowa.” (Yeeshaya 11:9) Ano malongyesha a Efile Mukulu aakyebe kwikala dingi malango atale mushindo wa kwikala mu kufukama na bantu booso betwifunyishe. Efile Mukulu mmulee shi: “Nnaami Yehowa, Efile Mukulu oobe akupa bulambukishi abukukwasha, akukunkusha mwishinda dyoobe.”—Yeeshaya 48:17.

Bakwetu ba kifulo abakasangudiibwa ku lufu: Pabaadi pa nsenga, Yesu basangwishe kuukw’aaye Lazaare ku lufu. (Yowano 11:1, 5, 38-44) Byabya balesheshe kyakyebe kukita mu Bufumu bw’Efile Mukulu.—Yowano 5:28, 29.

Butaale na kululama abikyebe kushadidiila bwa losoo: Mu bufumu bwa Kidishitu, kukutwa kwa kukookyela miiya takukekala dingi kwanka nya. Mu mushindo kinyi watwiuku byanka? Mwanda Yesu, e na mushindo wa kumona bi mu mashimba, na dingi akyebe kutumika na bwabwa bukombe bwashi atshibe kiimu pankatshi pa bantu balulame na bashii balulame. Baaba abapele kushintuluka ku bubi bwabo tabekala na mushindo wa kushaala mu ndumbulwilo mupya a Efile Mukulu.—Misambo 37:9, 10; Yeeshaya 11:3, 4; 65:20; Mateo 9:4.

Myanda ibatutaluula nyi ndambo ipeela ya ku matemuki a mu Bible aalesha myanda ibuwa ayikafiki kumpala. Bufumu bw’Efile Mukulu pabukabanga kumunana pa nsenga “butaale bw’eyendo” abukekala kwanka bwa losoo. (Misambo 37:11, 29) Byooso abifwisha makyenga akwete kupombesha bantu abikapu. Eyi dy’Efile Mukulu aditushinkamiisha shi: “Talaayi! Naayikasha bintu byooso bipya. . . . Myaako ino tayii mpaka, ngya biinyibiinyi.”—Bifumbulwe 21:5.