1, 2. (a) Nkinyi kilombeene kukitshika su tukwete kunangwila na kwakula myanda ya muntu atudi bafule? (Tala kifwatulo ki ku mbangilo kwa mwisambo.) (b) Nkonko kinyi yatukyebe kutaluula?

KUNANGWILA na kwakula myanda ya muntu atudi bafule akunyingishaa kipwano kyetu naaye. Bi mumune na kipwano kyetu na Yehowa Efile Mukulu. Pabaadi Daavide alama mikooko bufuku bushima, baadi atala eyilu diule nyenyene na kunangwila ku midimo ya kukanya ya Mupangi aayo. Banfudjile shi: “Pa kutal’eyilu, mufubo wa ku minwe yoobe, mweshi na nyenyene byoodi mupangye, muntu naamu ee kinyi, bwody’a kumwelela kinangu; mwan’a-muntu nnanyi, bwa kumufumbakeena?” (Mis. 8:4, 5) Kunyima kwa kunangwila pabitale mushindo ukwete kulombana mpàngo ya Yehowa kwi Isaleele a mu kikudi mu mushindo wa kukanya, Mpoolo mutumibwa bambile shi: “Efile Mukulu nsha-bupeta bukata, na binangu na kapatupatu bifiime!”—Lom. 11:17-26, 33.

² Nsaa yatudi mu mudimo wa bulungudi atunangwilaa na kulungula bantu myanda itale Yehowa. Kukita bino kwi na bukwashi bukata. Bantu bebungi bakwete kwipaana mu mudimo wa nsaa yooso mbasangane shi, mwabi wa kumpala nsaa yabepaana ngofu ku mudimo wa Bufumu nyi nkunyingisha kwa kifulo kyabo bw’Efile Mukulu. Sunga byekala shi okwete kukita mudimo wa nsaa yooso sunga shi we na mpàngo ya kwiukita, banda kwela binangu: Mushindo kinyi ulombeene mudimo wa nsaa yooso kunyingisha kipwano kyobe na Yehowa? Su we mbala-mashinda, eyipushe bino, ‘nkinyi kilombeene kunkwasha bwa kutungunuka na uno mudimo wi na muulo ukata?’ Su t’obangile mudimo wa bu mbala-mashinda, eyipushe shi, ‘mmyanda kinyi ayitungu shi nshintuule bwa kubanga kukita uno mudimo?’ Tubande kutaluula mishindo ilombeene mudimo wa nsaa yooso kunyingisha kipwano kyetu n’Efile Mukulu.

3. Mu mudimo wa bulungudi, mushindo kinyi awitukwasha kwisamba pabitale myabi ya Bufumu ayikyebe kufika?

³ Nsaa yatwakula pabitale myabi ya Bufumu ayikyebe kufika, atwifubwila ngofu pepi na Yehowa. Mbifundwe kinyi  byokuminaa kubadikila muntu nsaa yoodi mu bulungudi bwa ku nshibo na nshibo? We mulombeene kubadika mukanda wa Misambo 37:10, 11; Danyele 2:44; Yowano 5:28, 29; sunga Bifumbulwe 21:3, 4? Nsaa yooso yatwakula pabitale ino milayilo na bangi bantu atutentekyesha shi, kwi Efile Mukulu etu sha kalolo nyi akutuukilaa “kya-buntu kyooso kya muulo na bwedi booso bupwidikye.” Bino abitukwasha bwa kwifubwila pepi naaye ngofu.—Ja. 1:17.

4. Mushindo kinyi watusangeela ngofu kalolo k’Efile Mukulu nsaa yatumono bilwile kipwano kya bantu n’Efile Mukulu?

⁴ Nsaa yatumono mushindo ukutwe bantu muloo na lukulupilo, atusangeela bya binyibinyi ngofu. Mu nsenga ishima bantu ta be na mbalo yabadi balombeene kukulupila shi mbalombeene kupeta bukwashi bwa kwibapa muloo. Bebungi bakwete kwiyipusha pabitale abikala mafuku aabo e kumpala na ta be na muloo. Bakwete kukimba mushindo wa kupeta muloo mu nshaleelo aabo. Mpa na bebungi abendaa mu bipwilo abauku myanda ipeela ya mu Bifundwe. Be nka bu bibaadi bantu abaadi mu Niniive kala. (Badika Yoona 4:11.) Nsaa yatukwete kufuba ngofu mu mudimo wa bulungudi, atumono kalolo kwilekena kukata kwi pankatshi pa kipwano kya bantu na Yehowa mpa na nshaleelo a mu kikudi a mwilo wa Yehowa. (Yesh. 65:13) Tukwete kutentekyeshanga kalolo ka Yehowa pabitale mushindo washii mwimeene penda mu kulombasha kwa nkalo yetu ya mu kikudi; kadi kwete kupa ooso a kwatudi mushindo wa kunyinga na kupeta lukulupilo lwa binyibinyi.—Bif. 22:17.

5. Kukwasha bangi bantu mu kikudi nkulombeene kwitukwasha bwa kupusha naminyi pabitale myanda yetu?

⁵ Nsaa yatulongyesha bangi bya binyibinyi, atulongo mushindo watushii balombeene kwikalakasha ngofu bwa myanda yetu. Trisha, ungi mbala-mashinda a myeshi yooso mmusangane shi, uno mwanda ngwa binyibinyi nsaa ibaadi ipeleene baledi baaye. Bambile shi: “Uno mwanda ubaadi unkalakashe ngofu mu muwa wande.” Ingi nsaa pabaadi enyongola na epusha bu mulombeene kushaala penda ku nshibo kushii kwenda mu mudimo wa bulungudi, tabaadi ende dingi mu kulonga kwa Bible na bangi baana basatu abaadi na nkalakasho ibungi kwabo ku nshibo. Nshaabo baadi mwibasumbusheene, na tutu aabo baadi ebakyengesha. Trisha amba dingi shi: “Ka mwanda kooso kabaadi akankalakasha takabaadi mumune na lukalakasho lubabadi nalo nya. Patubaadi atulongo, abaadi na muloo ku meso kwabo. Baaba baana abaadi bu kya buntu kya Yehowa bikishekishe aa mafuku.”

6, 7. (a) Lukumiino lwetu alunyingi naminyi nsaa yatulongyesha bangi Bible? (b) Nsaa yatumono mushindo wi balongi ba Bible bakwete kushintuula mwikelo wabo mu kutumikila kwa miiya ya Bifundwe, abitukwasha naminyi pabitale kusangeela kwetu kwa binangu by’Efile Mukulu?

⁶ Kulonga kwa bya binyibinyi bya mu Bible na bangi, akunyingisha lukumiino lwetu. Mpoolo mutumibwa baadi mufundjile bangi beena Yuuda ba mu mafuku aaye abaadi abakutwa kukita myanda ibabadi abalambukisha shi: “Tala! Obe alambukisha bangi, kushii kwilambukisha obe nabeene.” (Lom. 2:21) Kwi kwilekena kukata na ba mbala-mashinda ba ano mafuku! Be na mishindo ibungi ya kulambukisha bantu bya binyibinyi na kulonga nabo Bible. Bwa koobesha kukita byabya abitungu kwilumbuula bwa muntu ooso okyebe kulonga naaye, na we mulombeene kukimbuula mu mikanda bwa kupeta myaluulo. Ungi mbala-mashinda abetamina bu Janeen amba shi: “Nsaa yooso ne na mushindo wa kulongyesha bangi bya binyibinyi, napusha shi lukumiino lwande pabitale bya binyibinyi ndushimate mwishimba na mu binangu byande. Pa mwanda wa byabya, lukumiino lwande talukwete kutshimba nya lukwete kutama.”

⁷ Kumona mushindo wi balongi ba Bible bakwete kulongamisha nshaleelo aabo nsaa yabatumikila miiya ya mu Bible, akwitukwasha bwa kusangeela binangu by’Efile Mukulu. (Yesh. 48:17, 18) Bino abitukwasha bwa kwikala na kitshibilo kikata kya kutungunuka na kutumikila miiya ya mu Bible mu muwa wetu. Ungi mbala-mashinda abetamina bu Adrianna alesha shi: “Nshalelo a bantu mulombeene kulwila ngofu nsaa yabakwete kukulupila penda binangu byabo. Anka nsaa yababanga kutuula lukulupilo mu binangu bya Yehowa ababanga kupeta miloo.” Bi mumune na bino abyamba ungi mbala-mashinda abetamina bu Phil shi: “Omono mushindo wi Yehowa na bukome bwa kushintuula bantu  bashibaadi na mushindo wa kwishintuula abo banabeene.”

8. Mushindo kinyi wi kufuba pamune na balungudi netu akwitukwasha mu mudimo wa bulungudi?

⁸ Kwenda mu mudimo wa bulungudi na balungudi netu akunyingisha kipwano kyetu na Yehowa. (Mye. 13:20) Ba mbala-mashinda bebungi bakwete kukishanga nsaa ibungi mu mudimo wa bulungudi na balungudi nabo. Bino abibapa mishindo ibungi yabadi balombeene “kwikankamisheena.” (Lom. 1:12, Kilombeno kipya; badika  Myeele 27:17.) Ungi mbala-mashinda abetamina bu Lisa alesha shi: “Ku mbalo ya mudimo, bantu bakwete nka kwipikeena na kwikwatshishena kiutu. Efuku dyooso abakudimbiila myanda na nkwamba bishima bi bubi. Byooso bino bwa kukimba penda kwikala pa mbalo ya kumpala. Ingi nsaa abakusabuula na nkusepa pa mwanda wa mwikelo oobe wa bwi na Kidishitu. Byabya, kwenda na bangi beena Kidishitu mu mudimo wa bulungudi akunyingisha ngofu. Ku nfudiilo kw’efuku, nalukiila n’eshimba difukame sunga n’ekala mukookye naminyi.”

9. Kukita mudimo wa bu mbala-mashinda pamune na mwina dibaka netu nkulombeene kukwasha dibaka dyetu naminyi?

⁹ Kwikala booso ba mbala-mashinda na mwina-dibaka netu akunyingisha dibaka dyetu. (Mul. 4:12) Madeline kwete kukita mudimo wa bu mbala-mashinda na mulume aaye alesha shi: “Ami na mulume ande tukwete kukisha nsaa ibungi atwisamba pabitale nsaa ibatukisha mu mudimo wa bulungudi; ingi nsaa pabitale myanda ya tubapete mu kubadika kwa Bible yatudi balombeene kutumika nayo mu bulungudi. Bipwa byooso byatukwete kukisha bu ba mbala-mashinda abitukwasha bwa kwikala pamune.” Bi mumune na abyamba Trisha shi: “Twi batuule binangu byetu mu kupela kwa kwata mabaasa, pa mwanda wa byabya, tatukwete kwitatshisha ngofu mu kukimba kwa makuta nya. Twi na programe umune a mudimo, byabya atwe booso tukwete kutuula binangu mu kwalukiila bwa nkatala bantu babekalanga besambe nabo na babalongaa nabo Bible kwi ooso a kwatudi, byabya abitukwasha bwatudya kushaala banyingye mu kikudi.”

10. Nsaa yatutuulu myanda ya Bufumu pa mbalo ya kumpala na kumona bukwashi bwa Yehowa, mushindo kinyi wabidi bitale lukulupilo lwetu?

 ¹⁰ Lukulupilo lwetu kwi Yehowa alunyingi nsaa yatutuulu myanda ya Bufumu pa mbalo ya kumpala, na kupeta bukwashi bwa Yehowa na p’atumono kwete kwitwaluula ku nteko yetu. Eyendo shi beena Kidishitu ba binyibinyi booso mbatuule lukulupilo lwabo kwadi. Na dingi booso be mu mudimo wa nsaa yooso abashinguula shi lwalwa lukulupilo mwi Yehowa ndulombeene kwibakwasha bwa kushaala mu mudimo wa bu mbala-mashinda. (Badika Mateo 6:30-34.) Ungi mukwetu mbala-mashinda abetamina bu Curt, baadi atumika bu mukunkushi a kifunda mukwashi, baadi mukumiine kukatuka ku nshibo yaaye bwa kwenda mu kukunka kangi kakongye munda mwa nsaa ibidi na kipindji. Aye na mukashi aaye baadi dingi mbala-mashinda, abaadi na ndambo ipeela ya mazute mu mootoka ilombeene nkebafisha ku kaaka kakongye kadi kushii mushindo washi balukiile, abaadi na penda ndambo ipeela ya makuta bwa lubingo lumune. Curt alesha dingi shi, “nabangile kwiyipusha su naadi mwate kitshibilo kibuwa.” Kunyima kwa’bo kwela luteko, abo nkukumiina kwenda ku kaaka kakongye bwa kulombasha mudimo wabo na lukulupilo lwa shi Efile Mukulu akyebe kulombasha nkalo yaabo. Kumpala kw’abo kwaluka, ungi mukwetu mukashi bebetamiine aye nkwibalungula shi e na kantu ka kwibapa. Bebapeele makuta alombeene kwibakwasha bwabadya kwalukiila kwabo. Curt alesha dingi shi, “nsaa yofumankana na myanda i bino misusa ibungi, mbibofule boodya kutundula shi mboko ya Yehowa i noobe.”

11. Mmiloo kinyi ingi ayipetaa ba mbala-mashinda?

¹¹ Eyendo shi ba mbala-mashinda mbasangane shi nsaa yabepaana mu mudimo wa Yehowa na kwikala mu kipwano naaye, ‘abapete’ miloo ishii na mpwilo. (Miy. 28:2) Anka, mudimo wa bu mbala-mashinda wi na yawo nkalakasho. Takwi mufubi a Efile Mukulu shii mulombeene kupeta nkalakasho ayifiki ku buntomboshi bwa Adame nya. Ingi nsaa nkalakasho ngilombeene kutakula ba mbala-mashinda mu kubanda kwimika mudimo wabo. Anka kwi mushindo wa kwiyikambila na kwiyisuuka. Nkinyi kilombeene kukwasha ba mbala-mashinda bwa kutungunuka na kusangeela mudimo wabo?

12, 13. (a) Nkinyi akitungu shi mbala-mashinda akite su te na mushindo wa kulombasha nsaa itshibibwe? (b) Bwakinyi kwikala na programe a kubadika na kwilongyela Bible kwifuku dyooso, na kunangwila ku byobadika kwi na muulo?

¹² Ba mbala-mashinda abekalaa na bi bungi bya kukita. Mbilombeene kwibekeela bukopo bwabadya kulombasha myanda yooso, byabya abitungu shi bekale na programe ebuwa. (1 Kod. 14:33, 40) Su mbala-mashinda e na lukalakasho lwa kulombasha nsaa itshibiibwe, abitungu shi ataluule mushindo watumikaa na nsaa yaaye. (Ef. 5:15, 16) Mulombeene kwiyipusha shi: ‘Nkwete kukisha nsaa bungi kinyi mu kukisha kwa kapapi sunga mu kwasha kwa maasha? Abitungu shi nesumine ingi miloo su? Ne mulombeene kutaluula programe ande a mudimo wa ku mbidi su?’ Mwina Kidishitu ooso mulombeene kushinguula shi mbibofule bwa kukumbasha ingi myanda ku programe aadi naaye; byabya baaba be mu mudimo wa nsaa yooso be na kya kutaluula myanda yaabo ya kwifuku dyooso na kushintuula yaaya ayitungu kushintuula.

¹³ Kubadika kwa Bible efuku dyooso, kwilongyela, na kunangwila kwi na muulo mu programe a mbala-mashinda. Pabitale uno mwanda, mbala-mashinda ooso e na kya kwisumina ingi miloo bwashi myanda ishii na muulo tayimwatanga nsaa ibungi. (Fid. 1:10) Bu kileshesho, banda kukita bu’be kwete kumumona nsaa yakwete kwalukiila aye baapu kukisha nsaa ibungi mu mudimo wa bulungudi. E na lukalo lwa kwata nsaa ya kukyolwa bwa kwilumbuula ku bisangilo bya lubingo alufiki. Kya kumpala, babanga kubadika ma mesaje ku Internet. Akupu atungunuka na kwaluula ma mesaje abakatuka mu kubadika. Nsaa yaadi ku Internete, bafungula ungi site bwa kutala su muulo wa kintu kyadi nakyo lukalo ngofu ubapu kwika. Kumpala kwadya kutundula shi nsaa ibakidi, baapu kukisha nsaa ibidi kushii kubanga kwilongyela myanda yaadi mulumbuule bwa kwilongyela ku kyolwa. Bwakinyi uno mwanda ukata? Anka bi bantu  abakitaa kalashishi be na kya kudiisha mbidi yaabo bwashi ishaale inyingye; bi mumune na ba mbala-mashinda be na kya kwikala na kiubishi kya kwilongyelanga bwa kwinyingisha mu kikudi su abakumiina kutungunuka na kukita mudimo wa nsaa yooso.—1 Tim. 4:16.

14, 15. (a) Bwakinyi abitungu shi ba mbala-mashinda bekale na nshaleelo mupelepele? (b) Su mbala-mashinda bapete nkalakasho, abitungu shi akite kinyi?

¹⁴ Ba mbala-mashinda be buwa abakitaa mwabo mooso bwa kwikala na nshaleelo mupelepele. Yesu baadi munyingishe balondji baaye bwabadya kwikala n’eyiso dilulame. (Mat. 6:22) Baadi na nshalelo mupelepele bwashi amone mushindo wa kulombasha mudimo waaye kushii kutuula binangu byaaye kungi. Baadi mwambe shi: “Miseu i na meena ayo mu nsenga, na tonyi twi na maswa, anka Mwana a muntu te na mbalo yadya kulaala.” (Mat. 8:20, Kilombeno kipya) Mbala-mashinda e na lukalo lwa kulonda kileshesho kya Yesu e na kya kushinguula shi su e na bintu bya ku mbidi bikile bungi, abimutekye bwashi ekale ebilama, ebilumbuula, sunga kwibishintulanga.

¹⁵ Ba mbala-mashinda abauku shi mudimo wabo wi na kinemo, anka t’abemonaa bu’bo be na muulo kukila bangi balungudi nya. Byabya, kya buntu kyooso sunga mashito atudi balombeene kupeta twi nawo mwanda wa kalolo k’Efile Mukulu. Bwa kutungunuka na mudimo wa bu mbala-mashinda, mbala-mashinda ooso e na kya kutuula lukulupilo lwaye kwi Yehowa. (Fid. 4:13) Nkalakasho ngilombeene kutuuka. (Mis. 34:19) Su ibatuuku, abitungu shi mbala-mashinda akimbe Yehowa bwashi amukunkushe na amupe mushindo wa kukwasha bangi, pamutwe pa kuleka mudimo waaye mususa umune. (Badika Misambo 37:5.) Nsaa yapete bukwashi bw’Efile Mukulu, akyebe kwifubwila pepi naaye bu Nshaaye a mwiyilu akumukwasha.—Yesh. 41:10.

16. Su okyebe kwikala bu mbala-mashinda, abitungu shi okite kinyi?

¹⁶ Su okumiina kupeta miloo bu ino ikwete kupeta bano be mu mudimo wa nsaa yooso, eukishe Yehowa lukalo loobe. (1 Yo. 5:14, 15) Esambe na baaba bakwete kukita mudimo wa bu mbala-mashinda. Ata bitshibilo bilombeene nkukwasha bwa kwikala mbala-mashinda. Byabya ndjo bibakitshine Keith na Erika. Abaadi abakitshi mudimo ubaadi awibaata nsaa ibungi, anka abikalaa bangi beena dibaka, mafuku apeela kunyima kwabo kwiyibakishena abaadi baule nshibo mpa na motoka upya. Abamba shi: “Tubaadi atupwandikisha shi byabya bintu, mbilombeene kwitupa muloo—anka tatwi beupete nya.” Keith nsaa ibaadi mulekye kukita mudimo waaye, babangile kufuba bu mbala-mashinda mukwashi. Atentekyesha shi: “Mudimo wa bu mbala-mashinda ubaadi auntentekyesha muloo autuukila mu mudimo wa bulungudi.” Abaadi bekwateene bukuuku na bangi beena dibaka abaadi abafubu bu ba mbala-mashinda; baaba ba mbala-mashinda abebakwashile bwa kumona muloo wa kwikala na nshalelo mupelepele na kukita mudimo wa bu mbala-mashinda. Keith na Erika abakitshine kinyi? Abalesha shi, “Tubaadi bafunde mulongo wa bitshibilo byetu bya mu kikudi ku mukanda, na atwe nkwibilamika ku frigo, na kutala kitshibilo kyooso su tukwete kwikilombasha.” Pabaabadi abakitshi byabya abaadi na mushindo wa kwikala bu ba mbala-mashinda.

17. Bwakinyi bi na muulo bwa kulumbuula programe oobe sunga nshaleelo oobe bwa kwikala mbala-mashinda?

¹⁷ We mulombeene kwikala mbala-mashinda su? Su twe mubande kupeta mushindo wa kwikala mbala-mashinda, kita moobe mooso bwa kwikala pepi na Yehowa mu kwipaana ngofu mu mudimo wa bulungudi. Su bwele nteko kwi Yehowa na kwela binangu ngofu pabitale mwanda oobe, we mulombeene kusangana shi, kushintuula ingi myanda mu nshaleelo oobe nkulombeene nkukwasha bwa kwikala mbala-mashinda. Su we mulombeene kwikala mbala-mashinda, miloo yoodi mulombeene kupeta ngilombeene kukila miloo yoodi mulombeene kwisumina lelo uno. Okyebe kufwimisha miloo ayituukila mu kutuula kwa myanda ya Bufumu pa mbalo ya kumpala. (Mat. 6:33) Okyebe kupeta dingi miloo ya kukwasha bangi. Na dingi, okyebe kupeta mishindo ya kunangwila na kwisamba myanda ya Yehowa, kutamisha kifulo kyoobe bwaye na kumusangasha.