Bangi bantu bakwete kutshiba mabaka bwashi balongamishe nshalelo aabo, bangi namu abakumiina kushaala bebakile, kadi taabobesha kushaala na mwina dibaka nabo. Aku namu baaba booso bakwete kutshiba mabaka ta mbapete nshalelo ebuwa bu byabapwandjikishanga. Byabya, su nwibatshibe dibaka binobino, pangi nwibalombeene kufumankana na mwanda awinukalakasha ngofu wanushaa fumankeene nao ungi musango. Bii na muulo wa kutaluula angi malango aatuukila mu Bible alombeene kwitukwasha bwa koobesha nkalakasho ya kutshiba dibaka.

Twinyongoshi atufiki ku kukutwa kwa makuta, kukusha kwa baana, na kwikala kwa bupenka mbilombeene kwikala bukopo bukile, na twatwa twinyongoshi tantulombeene kukatuka kwishimba musango umune nya. Judith Wallerstein muntu atalaa myanda ya binangu bya bantu alesha shi, bipwa bibungi kunyima kwa kutshiba dibaka, bangi bantu abeepusha bu babadi balwishishe na babadi basumbusheene, abakulupila shi “kwikala na muuwa ta kwi buwa, ta kwi na muulo, na we nka pa bupenka.”

 KYODI MULOMBEENE KUKITA

• Enyongole pabitale kintu kyoodi mushimishe. We mulombeene kukutwa mwinobe wekalanga mufule ngofu. Su kipwano kyobe kibalwila, we mulombeene kwinyongola mwanda twe na dingi muloo uboodi nao bwa dibaka nya. (Myeele 5:18) Tokumanga kupusha buufu bwa kushinkamisha shi ‘nkipungo kya kudila.’—Mulungudi 3:1, 4.

• Leka kwitola pa bupenka. Nsaa yoodi mu kinyongwa bwa maalo, kwitola pa bupenka takwi buwa nya. (Myeele 18:1) Ikala na ngakwilo e buwa kwi beenobe, mwanda kwidiladila pamwanda wa mwina dibaka noobe a kumpala, sunga byekala shi mwanda wedidi ngwa binyibinyi, mbilombeene kutakula bangi mu kunangusheena mu ungi mushindo. Su abikutungu shi wate bitshibilo bii na muulo kunyima kwa kutshiba dibaka, kiimba bukwashi kwi muntu oodi mukulupile ngofu.

• Bamba bukome boobe bwa mbidi. Twinyongoshi twa kutshiba dibaka atutuushaa nkalakasho ya ku mbidi, bu kukuumba maladi a lwendo lwa mase sunga kunyana. Abitungu kudya kalolo, kukita kalashishi ka mbidi, na kulala kalolo.—Beena-Efeeze 5:29.

• Kaasha kantu kooso akakufiitshisha munda pabitala mwina dibaka noobe a kumpala sunga tokii naye lukalo, kadi lama mikanda ii na muulo. Su kwi bintu bu ma foto a dibaka aakukalakasha, eanye ebofu na weatuule bwa baana beenu.

• Elwa ngoshi na binangu bibubi. Olga baadi mutshibe dibaka na mulume aaye baadi mutambukye lusandji alesha bino shi: “Nkwete kwiyipusha, su ‘yawa mukashi e na kinyi kya nshii nakyo?’” Bu bibaadi Olga anangusheena kunyima, byabya kutungunuka na kunangusheena nkulombeene ‘kwitubofusha.’—Myeele 18:14.

  Bantu bebungi mbamone shi kufunda myanda i mu binangu byabo akwibakwasha bwa kushinguula na kutaluula ngyelelo aabo a binangu. Su okita byabya, kimba bwa kupyanyikiisha binangu bipya ku binangu byakala mu ngoshi yokwete kulwa. (Beena-Efeeze 4:23) Tubande kutaluula bileshesho bibidi:

  Kinangu kya kala: Nnami mutomboshe mwina dibaka naami.

  Kinangu kipya: Bilema byande ta mbipe mwina dibaka naami matalwa a kundimba nya.

  Kinangu kya kala: Nashimisha bipwa byande bibuwa na uno muntu e bubi.

  Kinangu kipya: Nekala na muloo su nashaala mutale anka kumpala mu muuwa wande, kushii kutala kumongo.

• Tokumanga kuteemesha myanda ibubi yabakula kwi bantu. Bakuuku sunga baloole abamweka bu abakimbi buuwa boobe na beena kifuko noobe mbalombeene kwakula bintu bi bubi sunga bishii bilombane pa mwanda oobe; mbalombeene nkulungula shi: ‘T’ekalanga mukulombeene nya’ sunga shi ‘Efile Mukulu mmushikwe kutshiba dibaka.’ * Byabya, Bible etulanga bino: “Bishima byooso byabatuusha, twebiteemeshanga.” (Mulungudi 7:21) Martina mutshibe dibaka takudi bipwa bibidi alesha bino: “Pamutwe pa kwimeena pa bishima abitapa kwishimba, natompo kumona myanda mu mushino umune n’Efile Mukulu. Binangu byaaye ta bi mumune na binagu byetu.”—Yeeshaya 55:8, 9.

• Teka Efile Mukulu. Efile Mukulu atekye balangwidi baaye bwabadya ‘kumulubwila mpombo yaabo yooso’ bikishekishe nsaa yabadi mu twinyongoshi.—1 Mpyeele 5:7.

Juliana, abaabadi beebakile takudi bipwa 11 amba bino shi: “Naadi nasendeela mulume ande bwashi tatutshibanga dibaka. Kunyima kwaye kwenda, naadi mumufiitshile munda mpa na yawa mukashi abaadi mukashaale naaye.” Bantu bebungi batshibe mabaka abashaala munda mwa bipwa bibungi bafiitshile mwina dibaka naabo munda.  Aku namu abintungu beekale abeesamba misango ibungi bikishekishe su bee na baana.

KYODI MULOMBEENE KUKITA

• Lama kipwano kyobe na mwina dibaka noobe a kumpala. Tuula binangu pa myanda i na muulo na kwakula myanda ipeela na ayipushika. Bantu bebungi mbasangane shi kukita bino akukwasha bwa kutwesha butaale.—Beena-Looma 12:18.

• Shikwa ngakwilo e bubi. Bikishekishe nsaa yoodi mukalakashwe, abitungu kulonda ano malango e buwa a mu Bible: “Muntu sha kiûkilo akakâ edimi dyê.” (Myeele 17:27, EEM) Su umono shi twe na mushindo oodi mulombeene kwalusha miisambo yanukwete kwisamba mwishinda dibuwa bwashi ituushe bipeta bibuwa, we mukumbeene kwakula bino: “Abintungu nangushene ku bino bi bodungula, nakutwadila lwaluulo kunyima.”

• Kaasha bintu byobe byoso kwi bya mwina dibaka noobe a kumpala bu mikanda ya basunshi, mikanda ya makuta na ya ba munganga mu mushindo oodi mulombeene kwibikita.

Maria atentekyesha bibaadi bikitshikye kunyima kwa’bo kutshiba dibaka dyaabo shi: “Ka nsongwakashi kande kabaadi akadidi nsaa yooso na kuneena dingi tufi ku lusala. Na nsaa ibaadi taata aaye atompo kumubombelesha, naadi namono’nyi mwi taata aaye kinyongwa.” Mwanda wa malwa nkwamba’shi, we mulombeene kupusha shi twe na nsaa sunga bukome bwa kukwasha baana boobe nsaa yabadi noobe lukalo lukata.

KYODI MULOMBEENE KUKITA

• Nyingisha baana boobe bwashi bekale abakulungula myanda yaabo pabitale byabanangushena, sunga byekala’shi myanda yabakulungula ayimweka bu bantu ‘bafudiile.’—Yoobo 6:2, 3.

• Lama mashito oobe. Sunga byekala shi abikutungu mafuku ebungi bwa kupeta bukwashi mu binangu na mwan’obe mmulombeene nkupetesha bwabwa bukwashi, mbilombeene kwikala bu bishii bilombane sunga kukutwa kwa kinangu poobe kuteka bukwashi kwi mwana oobe mukinga bwashi akukwashe ku myanda ya bantu bakulu. (1 Beena-Kodinto 13:11) Tokumanga kulungula mwan’obe myanda yoobe ya mwishimba sunga kumutuula pankatshi poobe na mwina dibaka noobe bwanudya kwilungusheena myanda.

• Bamba muuwa wa baana boobe kalolo. Kushaala mbalo imune na kupela kushintuula programe eenu mbilombeene kwikala na bukwashi, kadi kintu kii na muulo ngofu nyi nkulama programe a mu kikudi bu, kubadika kwa Bible na lulangwilo lwa mu kifuko.—Miiya Ikituulwe 6:6-9.

We mulombeene kwenda kumpala mu nshalelo oobe kunyima kwa kutshiba dibaka. Melissa tabaadi mwibakile takudi bikwa 16 alesha bino shi: “Nsaa i naadi mutshibe dibaka, naadi mwele binangu shi, ‘bino bibekala nshalelo ande ta ndjo binaadi nakumiina nya.’” Binobino, e na muloo sunga ekala na nkalakasho. Alesha bino shi: “Anka nsaa inaadi mulekye kukimba bwa kwaluula myanda ipwe kukila, naadi nepusha kalolo kakile.”