1. Leesha kwilekeena kwi pankatshi pa mmweneno e naye bantu pabitale bupika na bishima byabetunyingisha nabyo bi mu mukanda wa Beena-Looma 12:11.

KWIKALA mpika a Kidishitu nkwilekeene ngofu na mushindo ukwete kupwandjikisha bantu pabitale bupika. Mu binangu byabo, mpika nyi muntu atungu kukyengyesha, kumwisha milongo, na kumukitshiina myanda na kukutwa kwa kululama. Kadi Eyi dy’Efile Mukulu difundjibwe ku bukwashi bwa kikudi kyaaye adilesha shi, kufuba bu mpika akupatuula kufuba mufubo wa Mukata oobe a kifulo n’eshimba dyoobe dyooso. Byabya, pabaadi Mpoolo mutumiibwa mutekye beena Kidishitu ba mu bipwa lukama bya kumpala bwa ‘kufubila Yehowa [bu bapika],’ baadi ebanyingisha bwa kulombasha mufubo wiselele baleeshe shi, mbelumbuule bwa kulesha kifulo kyabo bwa Efile Mukulu. (Lom. 12:11) Uno mushindo wa kufuba bu bapika aulesha kinyi? Mushindo kinyi watudi balombeene kupela kufika bapika ba Satana na ba ndumbulwilo aaye? Na efuto kinyi dyatupete bu byatudi balamate ku mufubo wetu wiselele bu bapika ba Yehowa?

2. (a) Nkinyi kibaadi akitungu mwina Isalele baadi akumiina kutungunuka kwikala mpika? (b) Kutubula etwi dya mpika baadi akumiina kushaala kwa nfumw’aye kubaadi akulesha kinyi?

² Atulongo bupika abukyebe Yehowa shi twikale ku bukwashi bwa Mwiya ubaadi mupe beena Isalele. Abaadi balombeene kufungula mpika mwina Ebreeyi kwi nfumw’aye su balombasha bipwa musambobidi kasha abanga kumufubila. (Efi. 21:2) Byabya, bwa mpika baadi mukumiine nfumw’aye ngofu, na baadi akumiina kushaala ku wawa mufubo, Yehowa baadi mutuushe mwiya wibuwa wa kulonda. Nfumw’aye baadi mulombeene kutuusha mufubi aaye ku kiibi sunga pa ntempa na kumutubul’etwi na mutubulo. (Efi. 21:5, 6) Bwakinyi baadi mulombeene kukita byabya? Mu kiina Ebreeyi, kinangu kya kukookyela akilesha kupusha na kuteemesha. Yawa mpika baadi akumiina kushaala kwi nfumw’aye baadi mulombeene kutunguka na kumufubila na kukokyela kooso. Bino abitukwasha bwatudya kusangeela akipatuula kwilambula kwetu kwi Yehowa—kukumiina kukookyela na kufula Efile Mukulu.

3. Nkinyi akitutakulaa bwatudya kwilambula kwi Efile Mukulu?

³ Nsaa ibaatudi beelambule bu beena Kidishitu, atwe  nkubatshishibwa, tubaadi baate kitshibilo kya kufubila Yehowa, bu bapika baaye. Kwilambula kwetu akumwenekyela mu kukookyela Yehowa na kukita kikyebe ky’eshimba dyaaye. Ta kwi muntu su ngumune mwitutakule bwa kukita byabya nya. Byabya, nsaa i bansongwalume na bansongwakashi ababatshishibwa, mbakite byabya kunyima kwa kwata kitshibilo kya kwilambuula kwi Yehowa, ta nka penda bwa kusangasha baledi baabo nya. Akitakulaa beena Kidishitu bwabadya kwilambula kwi Yehowa Nfumwabo e mwiyilu nkifulo. Yowano mutumibwa bafundjile shi: “Mwanda kifulo ky’Efile Mukulu kii bino: ‘Tulame miiya yaaye.’”—1 Yo. 5:3.

4. Nkinyi akitungu kukita bwa kwikala “bapika ba bululame”?

⁴ Twi na lutumbu lukata kwi Yehowa bu byadi mwitwikashe bu bapika baaye! Lukumiino lwetu ku mulambu wa nkuulo ya Kidishitu alwitukwasha bwa kutuuka ku bupika bwa mulwisho. Sunga twekala bakutwe kupwidika, twi bakumiine kwikala ku matalwa a Yehowa na Yesu. Mpoolo baadi mwibipatuule mu mukanda waye ubafundjile ku bukwashi bwa kikudi kiselele shi: “Tundulaayi’shi nwi bafwe ku milwisho, anka nwi na muuwa bw’Efile Mukulu, mu Yesu Kidishito.” Akupu aye nkudimusha shi: “Taanuwuku’shi, pa kwituula ku mufubo wa muntu kampanda bu bapika, bwa kumukookyela, nwi bapika baa yaawa aanukookyela su? Sunga ba milwisho aifisha ku lufu, sunga ba kukookyela akufisha ku bululame. Tutumbuleeyi Efile Mukulu: mwanda nubaadi bapika ba milwisho, anka nwi bakookyele n’eshimba dimune ku bulambukishi bwa bantu booso, bwanudi batambule; anwe bapwe kupoosolwa ku milwisho, nubaashaala bapika ba bululame.” (Lom. 6:11, 16-18) Lamiina shi mutumibwa akula pabitale ‘kukookyela n’eshimba.’ Kushii mpaka kwipaana kwetu kwi Yehowa akwitwikasha bu “bapika ba bululame.”

5. Ngoshi kinyi yatukwete kulwa booso, na bwakinyi?

⁵ Anka, kwi bintu bilombeene kukimba mushindo wa kwitukutshisha bwa kwilambula kwetu. Tukwete kulwa ngoshi mu mishindo ibidi. Kya kumpala, kwi nkalakasho ibafumankeene nayo Mpoolo. “Nee na muloo wa kukumbash’Eyi dy’Efile Mukulu mwishimba dyande,” bafundjile dingi shi, “anka, mu bipindji bya mbidi yande, naasangana dingi eyi, adilu ngoshi n’eyi dikumiine kinangu kyande; adingikasha mwina-lukano a mwiya wa milwisho wi mu bipindji bya mbidi yande.” (Lom. 7:22, 23) Kukutwa kwa kupwidika kwatudi bapyane kukii mwatudi. Anka tukwete kulwa ngoshi ishy’ayipu na nkalo ya mu mbidi yetu. Mpyeele mutumibwa etunyingisha shi: “Shaalaayi bu bantu beeyikeele, kushii kutuula bulungantu bu bwa kufwamisha nabo bukyelo bwenu, anka kitaayi bu bafubi b’Efile Mukulu.”—1 Mp. 2:16.

6, 7. Mushindo kinyi ukwete Satana kufuba na bintu bya uno ndumbulwilo bwa kwitukwata?

⁶ Twi na ngoshi ya kabidi ayitungu shi tulwe, tukwete kulwa na uno ndumbulwilo e ku bukitshishi bwa bademo. Satana, nfumu a uno ndumbulwilo kwete kwitutee tuteo twaye bwa kutompa kutshokola kipwano kyetu kwi Yehowa na Yesu. Kwete kukimba bwa kwitwikasha bu bapika baaye nsaa yakwete kwitutakula bwashi tulonde bukitshishi bwaye. (Badika Beena-Efeeze 6:11, 12.) Mushindo umune ukwetu Satana kufuba nawo nyi nkulesha shi ndumbulwilo aaye e buwa bukile. Yowano mutumibwa baadi mutuushe dino elango: “Su muntu afula byaa-pano, kifulo kya Yaya takii munda mwaye nya. Mwanda kyooso kii pano—ndàkalaka ya mbidi, ndàkalaka ya meeso, na lwabi lwa kwisadikila mu bupeta—byaabya ta mbya kwi Yaya, anka mbya pano pa nsenga.”—1 Yo. 2:15, 16.

⁷ Malaka a kwikala na makuta ebungi ngapalakane mu nsenga ishima. Satana atakula bantu bwabadya kukumiina shi makuta ndjo aatuusha muloo. Makashinyi akata abetamina bu supermaché akwete kufiima. Bantu bakwete kukita ma piblisite abalesha shi bwa kupeta nshalelo ebuwa abitungu kwikala na makuta ebungi na nsaa yakukisha kapapi. Bu kileshesho, ku ma agence aatwala bantu abebalesha shi mbalombeene kwenda nabo ku ma mbalo kampanda aamweneka bu akile buwa muyiile binangu bya uno ndumbulwilo. Oolo, bintu byooso bitwifunyishe bikwete kwitutakula mu kukimba kushintuula nshalelo etu, penda muyiile abikumiina uno ndumbulwilo shi tukite.

8, 9. Mmasaku kinyi e kwanka, na mbwakinyi?

 ⁸ Mu bipwa lukama bya kumpala, Mpoolo mutumibwa baadi mudimushe beena Kidishitu pabitale baaba booso abaadi mu kakongye ababangile kwambula ngyelelo a binangu a uno ndumbulwilo. Bebadimwishe bino shi: “Abasepeela pàabakitshi myanda yaabo ya butesha mu kaany’ebadibadi; butesha na bukitekite ngi abibapa muloo mu madimi aabo, nguba aabadi pamune neenu mu madjo. Mwanda pabaakula myanda ikata ya-bisumanga, abakaka na malaka e butete a ku mbidi bano, bakyabakatuka mu kwilamuna kwi bantu bashaale mu ntupatupa. Abeebalaa bulungaantu, aku’bo baanabeene mbapika ba bubi, mwanda muntu ooso mpika a kintu ki mukambile.”—2 Mp. 2:13, 18, 19.

⁹ Kulombasha kwa “ndàkalaka ya meeso”, ta kulekaa muntu mulungantu nya. Byabya, ekadika ku bupika bwa nfumu a uno ndumbulwilo shaamweka, Satana Dyabulu. (1 Yo. 5:19) Kwikala ku bupika bwa malaka a bintu bya ku mbidi kwi masaku akata—bi bukopo bwa kupanda ku bwabwa bupika.

10, 11. Mba nnanyi lelo uno babakwete kukimba bwa kukwata kwi Satana, na mushindo kinyi ulombeene binangu bya uno ndumbulwilo kwibafwishila nkalakasho?

¹⁰ Anka bu mu Edene, leelo uno, Satana akimbaa dingi pabofwile muntu. Ba nsongwalume na bansongwakashi, nyi baakwete kukimba menemene bwa kwibakwata. Satana ta kwete kusangala nsaa yakwete kumona sungwalume sunga nsongwakashi ooso kwete kufuba bu mpika a Yehowa. Mwishikwanyi n’Efile Mukulu akumiina shi bantu booso abelambula kwi Yehowa bapone paabo kukutwa kukookyela na kulamata kwi Efile Mukulu.

¹¹ Tubande kwalukiila ku kileshesho kya mpika baadi mukumiine bwashi bamutubule etwi. Yawa mpika baadi mulombeene kupusha busungu bwa kapindji kapeela; kadi abupu lubilolubilo, ashadidiila na kyakya kitundwilo kya bupika bwa losoo. Mbilombeene kwikala bukopo sunga lukalakasho kwi nsongwalume sunga nsongwakashi bwa kwata kitshibilo mu muuwa waye bwadya kwilekeena na bantu bamwifunyishe. Satana mmulombeene kwitulesha shi kwipaana mu myanda ya uno ndumbulwilo nkulombeene kusangasha muntu, kadi beena Kidishitu be na kya kuuka muulo wi nawo kulombasha nkalo yaabo ya mu kikudi. Yesu bambile shi: “Basha muloo anka balanda ku kikudi.” (Mat. 5:3, Kilombeno kipya 2009) Beena Kidishitu beelambule kwi Efile Mukulu abakumiinaa kukita akikyebe eshimba dyaye kushii akikyebe Satana. Muloo wabo wi mu miiya ya Yehowa, na abanangusheena mu yaaya miiya kanya na bufuku. (Badika Misambo 1:1-3.) Byabya, bantu bebungi ba ku bafubi ba Yehowa  lelo uno bakwete kwata nsaa ipeela bwa kunangusheena na kupudisha nsala yaabo ya mu kikudi.

12. Mbitshibilo kinyi bikwete kwata bansongwalume na bansongwakashi lelo uno?

¹² Nfumu a uno ndumbulwilo mmulombeene kufwishila bapika beena Kidishitu nkalakasho mu nshaleelo aabo. Mu mukanda waye wa kumpala kwi Beena-Kodinto, Mpoolo bayipwishe shi: “Boodi mpika pabaabakwitaanyine su?” Aye nkwibalungula dingi shi: “Twebitalanga bu kintu; anka, sunga wekala na kipaso kya kwipetesha bulungantu lumbuula mwikeelo wobe wa bupika.” (1 Kod. 7:21) Bulungantu abufiki ku bupika nyi bwatudi balombeene kukumiina. Mu maumbo e bungi lelo uno, mwi mwiya aulesha bungi bwa bipwa bilombeene ba nsongwalume na ba nsongwakashi kwenda ku kalasa. Kunyima kwa byayba bipwa, balongi mbalombeene kwiatshila bitshibilo. Mbalombeene kwata kitshibilo kya kutungunuka na kulonga tungi tulasa sunga kukita mudimo wa nsaa-yooso.—Badika 1 Beena-Kodinto 7:23.

13. Nkalasa kinyi kalombeene kukwasha bafubi ba Yehowa ngofu?

¹³ Mpoolo adimusha beena Kidishitu ba mu Kolose shi: “Dimukai muntu tenukwatanga mu muteo ku mîsambo ya bisumanga aitûku ku binangu bya bantu. Byabya binangu ta mbitûkye kwi Kidishitu ooo, mbitûkye ku bipikwa bya bantu na ku bikudi bya pa nsenga na bya mwiilu.” (Kol. 2:8, EEM) “Mîsambo ya bisumanga aitûku ku binangu bya bantu” ipalakane mu nsenga ishima lelo uno nyi ikwete kunangusheena bantu bebungi balongye tulasa twibungi. Mu tulasa twa ma université, mwi aa malongyesha ashii alombeene kukwasha balongi bwabadya kukita byabakwete kulonga, na ta mbalombeene kwilumbuula bwa nshalelo aabo efuku dyooso nya. Mu kwilekeena na bano balongi, bafubi ba Yehowa abasangula kulonga kalasa kebuwa akebakwasha bwabadya kutamisha binangu byabo, byabya mbalombeene kwikala n’eyiso dipeelepeele mu nshalelo aabo bwa kufubila Efile Mukulu. Bakwete kuteemesha malango a Mpoolo abaadi mupe Timotee shi: “Oolo, bwin’Efile nyi nsulo a mwabi, bwa yawa asepeela na penda kintu kyaadi nakyo. Mwanda tatwi batwale kintu su nkimune pano pa nsenga; byabya dimo, tatwi balombeene kwipakatuka na kintu su nkimune.” (1 Tim. 6:6, 8) Pamutwe wa kukimba kupeta nkumo na kukamina myasu mu mashina aabo, beena Kidishitu ba binyibinyi mbatuule binangu byabo ku ‘mikanda ayibeesambila’ ino ayilesha bantu babadi bakwashe bwabadya kwikala bu balongi ba Yesu. Bakwete kukita bino nsaa yabepaana ngofu mu mudimo wa bulungudi.—Badika 2 Beena-Kodinto 3:1-3.

14. Muyiile abilesha mukanda wa Beena-Fidipe 3:8, Mpoolo baadi mumone kineemo kyaye kya kwikala bu mpika a Efile Mukulu na Kidishitu naminyi?

 ¹⁴ Banda kutala kileshesho kya Mpoolo mutumibwa. Baadi mulongyele kwa Gamaliyele mulongyeshi a Miiya ya beena Yuuda. Malongyesha abapetele twi balombeene kwiapwandikisha na ano aapete bantu abende ku université lelo uno. Kadi Mpoolo baadi amono aa malongyesha naminyi nsaa ibaadi eapwandikisha na kinemo kya kwikala bu mpika a Efile Mukulu? Bafundjile shi: ‘Námono mpâ na byoso’nka bu bya bisumanga pakwibipima na bukata bwa kinêmo kya kushingûla Kidishitu Yesu Nfumwami.’ Bambile dingi shi: “Pa mwanda wê, nyi mukumîne kushimisha byabya byoso, ntányibimono’nka bu butshafu, kukyeba kwa kwikala na makasa a kwiûka Kidishitu.” (Fid. 3:8, EEM) Binangu bi bino abikwasha beena Kidishitu bansongwalume na bansongwakashi mpa na baledi abatshinyi Efile Mukulu bwabadya kwata kitshibilo ki buwa pabitale kusangula kwa kalasa ka kulonga. (Tala bifwatulo.)

15, 16. Ndumbulwilo a Yehowa kwete kutuusha malongyesha kinyi, na mushindo kinyi watudi balombeene kwiafubisha?

¹⁵ Myanda kinyi ayisanganyibwa mu bilongyelo bikata lelo uno? Ku ino mbalo bantu bakwete kwimona bu be na bulungantu bwa kutomboka bwa kulesha shi, mbafiitshile guvernema na bangi bakata munda. (Ef. 2:2) Anka, ndumbulwilo a Yehowa kwete kutuusha malongyesha e na muulo ukata mu kakongye ka beena Kidishitu, mbalo i kufukama. Ooso a kwatudi e na mushindo wa kupeta ano malongyesha mu Kalasa ka mudimo wa teokrasi. Akupu kwi malogyesha abadi balumbuule penda bwa bakwetu balume ba mbala-mashinda bashii bebakile (Kalasa ka Bible bwa beena Kidishitu bashi bayibakile) na ba mbala-mashinda beyibakishene (Kalasa ka Bible bwa beena Kidishitu beyibakishene). Ano malongyesha a teokrasi aetukwasha bwa kukookyela Yehowa, Nfumwetu e mwiyilu.

¹⁶ Twi balombeene kufumbula myanda ibuwa ya bya binyibinyi mu Index des publications Watch Tower na mu CD-ROM a Watchtower Library. Ano malongyesha ngemeene penda mu kulangwila Yehowa. Aetulongyesha mushindo watudi balombeene kukwasha bangi bwabadya kwaluka mu kipwano n’Efile Mukulu. (2 Kod. 5:20) Ano malongyesha namu, ngalombeene kwibakwasha bwabadya kulongyesha bangi.—2 Tim. 2:2.

17. Kusangula kwa malongyesha ebuwa kwi na efuto kinyi?

¹⁷ Mu lukindji lwa Yesu lwa talanta, bafubi babidi baasha kululama abaadi bapete lutumbu na abaadi basangale pamune na nfumwabo nsaa ibaadi mwibape dingi midimo ibungi. (Badika Mateo 25:21, 23.) Kusangula kwa malongyesha ebuwa lelo uno akutuusha muloo n’efuto dikata. Banda kwata kileshesho kya Michael. Bakitshine byabya pabaadi ku kalasa nsaa ibaadi balongyeshi baaye abamwitamina bwabadya kutwela mu kisangilo kya kwisamba myanda itale kwenda ku université. Abaadi bakanye pababamwene Michael baata kitshibilo kya kupeta penda formation peela mulombeene kumukwasha bwadya kupeta bukwashi ku mudimo waaye wa bu mbala-mashinda. Baadi mwimone bu bashimisha kintu su? Amba shi, “malongyesha a mu kalasa ka teokrasi andi mupete bu mbala-mashinda—na andi mupete patandji bu mukulu mu kakongye e na muulo ukata. Miloo na mashito andi mupete ngakile makuta ooso anadya kupeta. Ne na muloo binyibinyi pa mwanda ntshinaadi mwate kitshibo kya kwenda ku université.”

18. Nkinyi akikutakula bwa kusangula malongyesha ebuwa?

¹⁸ Malongyesha ebuwa aetulongyesha akikyeb’Efile Mukulu na kwitukwasha bwa kwikala bu bapika ba Yehowa. Aetupa mushindo wa ‘kupoosolwa ku bupika bwa bintu abilwila’ na bwashi ku nfudiilo ‘tutambule bulungantu na ntumbo bya baana b’Efile Mukulu.’ (Lom. 8:21) Mu byooso atulongo mushindo ukile buwa watudi balombeene kulesha shi twi bafule Yehowa Nsheetu e mwiyilu.—Efi. 21:5.