Penda mu bishima bipeela, mukanda wa Kibangilo awo wa kumpala ku mikanda ya mu Bible aupatuula nsulo ya eyilu na nsenga shi: “Ku mbangilo, Efile Mukulu baapangil’eyilu na nsenga.” (Kibangilo 1:1) Kunyima kw’Efile Mukulu kupanga nyema na mitshi, bapangile bantu ba kumpala, Adame na Eeva. Abaadi belekeene na nyema mwanda bantu be na mushindo wa kulesha ngikashi y’Efile Mukulu, be na dingi bulungantu bwa kwisangwila. Byabya, abaadi na kya kwimuka pa mwanda wa bilema byabo. Su abaadi bakokyele miiya y’Efile Mukulu, abaadya kusangeela mpàngo y’Efile Mukulu ya kwikala bu baledi ba kumpala ba bantu pa nsenga ishima balombeene kwikala mu kufukama, na muwa upwidikye bwa looso.

Anka, ungi mwikeyilu sunga kipangwa kya mu kikudi, bapetele binangu bya kukita bwashi bantu bekale ku mufubo waaye. Pa mwanda wa byabya, aye nkufika bu Satana, kupatuula nkwamba shi: “Mwishikwanyi.” Pabaadi akwila mukanwa mwa nyoka, Satana badimbile Eeva amulungula shi, mulombeene kwikala bi buwa su te ku bukunkushi bw’Efile Mukulu. Adame na Eeva abaadi bakumine bibakwile Satana, abo nkutshiba kipwano kyabo na Mupangi aabo. Pa mwanda wa kupela kwabo kwa kukokyela, baledi betu ba kumpala abashimiishe muwa wa looso na abo nkwitulekyela mulwisho, kukutwa kwa kupwidika, mpa na lufu kintu kyatushii balombeene kusuuka.

Mususa umune, Efile Mukulu balesheshe mpàngo yaaye ya kupudisha uno mwanda wi bubi na aye nkupa baana ba Adame mushindo wabadi balombeene kupeta muwa wa looso. Efile Mukulu bambile shi: ‘Keekulu’—muntu mwilekene na bantu booso—akakyebe kubutula Satana na kupudisha makyenga ooso abadi bafwishe kwi Satana, Adame, na Eeva. (Kibangilo 3:15) Nnanyi baadi mulombeene kwikala bu kaaka ‘keekulu’? Atukyebe kuuka.

Mu nsaa imune, Satana kwete kukita mwaye mooso bwa kukutshisha mpàngo y’Efile Mukulu. Mulwisho na buntomboshi abyo nkupalakana mususa umune. Efile Mukulu baatshile kitshibilo kya kubutula bantu ku mpeshi a kabutu. Balungwile Nowa muntu sha kululama bwashi akite bwato—mushete ukata ubaadi aulengama kunundu kwa meema—bwashi apande na kifuko kyaaye, mpa na nyema ibaabadi bamulungule bwashi atweshe mu bwato.

Kunyima kwa kipwa Mpeshi mupwe kubanga, Nowa na kifuko kyaaye abaatukile mu bwato abo nkufika pa nsenga yume. Anka bibaadi abitungu shi ‘keekulu’ kamwenekye.

—Ngwatshiibwe mu mukanda wa Kibangilo, shapitre 1-11; Yuude 6, 14, 15; Bifumbulwe 12:9.