1. Nkinyi kilombeene kwitushinkamiisha shi lukumiino lwetu ndunyingye?

BANTU bebungi abamba shi, mbalombeene kukumiina anka penda mu bintu byabadi balombeene kumona na meeso aabo. Mushindo kinyi watudi balombeene kukwasha bangi bantu bwabadya kutamisha lukumiino lwabo mwi Yehowa? Kunyima kwa byooso, Bible aamba bino: “Takwi muntu su ngumune tabaamwene Efile Mukulu.” (Yo. 1:18) Pa bitale wawa mwanda, mushindo kinyi watudi balombeene kushinkamisha shi lukumiino lwetu ndunyingye mwi “Efile Mukulu shyamwekâ”? (Kol. 1:15, EEM) Kintu kya kumpala ki na muulo nyi nkutundula malongyesha akwete kupuuta bantu ku meeso pabitale bya binyibinyi bya Yehowa. Akupu, twi balombeene kutumika kalolo na Bible bwa kukaasha ingi nangunangu ‘ayipeesha kyuukilo ky’Efile Mukulu.’—2 Kod. 10:4, 5.

2, 3. Mmalongyesha kinyi abidi akwete kupuuta bantu ku meeso pa mwanda bya binyibinyi bitale Efile Mukulu?

² Mu malongyesha a madimi e mbalo yooso akwete kupuuta bantu ku meeso pabitale bya binyibinyi by’Efile Mukulu mwi ndambukisho ya shi, bintu mbiituukile. Ngyelelo a binangu a bano bantu mmwikutwene na akyakula Bible na abakutshisha bantu kwikala na lukumiino. Ano malongyesha a shi, bintu mbituukile aashinkamisha shi ta kwi muntu mupangye bintu byooso bi kwanka nya; bino abilesha dingi shi mpa na miuwa ya bantu. Nyi nkwamba shi, ta twi balombeene kupatuula bwakinyi twi pano pa nsenga.

³ Ingi nsaa, bantu ba mu bipwilo bya madimi abalekaa Bible ku lupese na kulongyesha shi bintu byooso bi mwiyilu na pa nsenga, abiyooka na bish’abiyooka, tabidi penda ndambo ya binunu bya bipwa kasha byekala kwanka. Abamba shi Efile Mukulu mmupangye bintu byooso nka penda mu mafuku asamombo a nsaa 24. Dino dilongyesha dyabetamina bu créationnisme adilesha shi kwi bingi bintu byabashii bapagye kwi Efile Mukulu. Booso bakulupile mu dino dilongyesha abapele bishinkamiisho bya binyibinyi bya bantu balongye myanda ya siyanse mwanda byabya bishinkamiisho mbikutwene na mmweno abadi naaye. Bu bipeta, dilongyesha dya créationnisme adisabuula Bible, adilesha shi Bible mmukanda ushii buwa na ushaupushika kalolo. Bantu bakwete kulonda uno mmweneno mbalombeene kwitutentekyesha  bangi bantu ba mu bipwa lukama bya kumpala abaadi na kishima pa mwanda w’Efile Mukulu “anka kinyi kishima kyabo takii na kiukilo kipatulukye.” (Lom. 10:2, Kilombeno kipya) Mushindo kinyi watudi balombeene kufuba n’Eyi dy’Efile Mukulu bwa kukaasha “makome” a dilongyesha dya evolisio na dya shi bingi bintu ta mbebipangye kwi Efile Mukulu dyabetamina bu créationnisme? * Twi balombeene kukita byabya anka su tukwete kukita mwetu mooso bwa kupeta kiukilo kya bya binyibinyi akituukila mu Bible.

4. Abitungu shi lukumiino lwetu lwikale lwimeene pa kinyi?

⁴ Bible etulongyesha bwatudya kukimba binangu. (Mye. 10:14) Yehowa akyebe shi lukumiino lwetu kwadi lwikale lwimeene pa bishinkamiisho na ngyelelo a binangu e buwa, kushii muyiile myeele ya bantu na bipikwa bya mu bipwilo. (Badika Beena-Ebreeyi 11:1.) Bwatudya kunyingisha lukumiino lwetu mwi Efile Mukulu, abikyebe tubande kushinkamisha shi Yehowa e kwanka. (Badika Beena-Ebreeyi 11:6.) Atushinkamisha bino kushi penda ku ngyelelo eetu a binangu, kadi, mu kutaluula myanda ikata na kufubisha “kinangu” kyetu.—Lom. 12:1, Kilombeno kipya 2009.

5. Mmwanda kinyi ulombeene kwitushinkamiisha shi Efile Mukulu e kwanka?

⁵ Mpoolo mutumibwa aleesha bwakinyi twi balombeene kushinkamisha shi Efile Mukulu e kwanka, sunga mbyabya, tatwi balombeene kumumona nya. Mpoolo afundu bino pa bitale Yehowa shi: “Mwikêlo wê ushyaumwekâ na meso, kwamba’shi, bukome bwê bwa ikalayika na bwifile bwê, mbipwe kumweneka patôka mu byabya bi bapangile.” (Lom. 1:20, EEM) Mushindo kinyi oodi mulombeene kukwasha ungi muntu kwete kupela shi Efile Mukulu te kwanka bwadya kukulupila bya binyibinyi bi mu mayi a mu Bible ababadi bafunde kwi Mpoolo? We mulombeene kutaluula ndambo ya ku ino myanda ayilondo ya bipangwa abilesha bukome na binangu bya Mupangi eetu.

6, 7. Mu mishindo kinyi ibidi amumwenekyela bukome bwa Yehowa?

⁶ Bukome bwa Yehowa abumweneka mu bintu bibidi abitukalwila—kibambo kya lupapi kiifunyishe nsenga kyabetamina bu atmosphère na bukome bwa nsenga bwa kukaka bintu bwabetamina bu champ magnétique. Bu kilesheesho, kyakya kibambo kya lupapi kiifunyishe nsenga akitupa lupapi alwitukwasha bwatudya kuyooka. Akitukalwila dingi ku bintu byooso bilombeene kupona ingi mbalo mu lupapi. Tupese twa mabwe tulombeene kutuusha masaku akata, patutwele mu kimbambo kishikiile nsenga atutembe kaalo na kutuusha nsembwe ayitembe bufuku mwiyilu.

⁷ Bukome bwa nsenga bwa kukaka bintu bwabetamina bu champ magnétique, abwitukalwila dingi ku masaku. Buno bukome abutuukila mu nsenga. Mundji a paasha a nsenga, e mu kyamo kibofule kwete kwifunya bu ndundo, atuusha buno bukome bwa kukaka bintu mu nsenga abwende mpaa na kula mu lupapi. Buno bukome abwitukalwila ku lupapi lwi bubi alufiki ku bintu abitanyika mu nguba na kupalakana mu bingi bipindji bi pepi na nguba. Ku bukwashi bwa buno bukome bwa nsenga, ino nsembwe tangilombeene kushiika bintu byooso abiyooka bi pa nsenga nya. Nsenga ayikaka nsembwe akupu ayiyalusha mwiyilu. Atumono bukome bwa kino kintu akitukalwila kyabetamina bu champ magnétique ku malangi a nsembwe ayitembe bufuku pepi na lupese lwa ku pole nord na ku pole sud. Eyendo Yehowa, “makome aaye ngakata bibi.”—Badika Yeeshaya 40:26.

8, 9. Muwa ngulombeene kutungunuka na kwikala kwanka naminyi pa nsenga? Bino abitulongyesha kinyi pabitale binangu bya Yehowa?

⁸ Binangu bya Yehowa abiileesha mu bintu byaadi mupangye abilama muuwa pa nsenga. Tubande kwata kileshesho kya lupata lwi na bantu midiyo lwabadi befunyishe na bimano. Mu luno lupata ta mwi mbalo ya kutweshela meema  ebuwa sunga yakutuushila butshafu nya. Lupata lwi bino ndulombeene kwikala na butshafu bukile bungi na bantu ta mbalombeene koobesha kwimushaala nya. Mu ungi mushindo, ino nsenga yatudi inka bu lwalwa lupata. Mwi ndambo ipeela ya meema e buuwa na tatwi na mushindo wa kukaasha butshafu booso bwi mwanka nya. Anka, nsenga i na mushindo wa kutungunuka na kupa bintu byooso bi panka na muwa byooso byabidi nabyo lukalo bwa kwikala na muwa. Bwakinyi mbibofule? Pa mwanda nsenga i na mushindo wa kutumika dingi na bintu byooso abitungu bwa kwikala na muwa.

⁹ Tubande kutaluula mushindo wi nsenga ayituusha lupapi alukwasha bintu bi na muwa bwa kuyooka. Midiyala ya bipangwa abikakaa lupapi lwabetamina bu oxygène na kutuusha lupapi lwabetamina bu dioxyde de carbone. Sunga byekala shi bino abikitshikaa nsaa yooso, oxygène tapwiyaa efuku su ndimune nya. Bwakinyi byabya mbibofule? Mitshi ayataa bintu bu dioxyde de carbone, meema, nsembwe ya nguba, bufukye na akupu abituusha bintu byabetamina bu hydrates de carbone na oxygène. Nsaa yatukaka oxygène na kutuusha lupapi lwabetamina bu dioxyde de carbone yaya nsaa atulombasha byooso abitungu bwa kwikala na muwa. Kuno kukaka kwa oxygène na kutuusha dioxyde de carbone abekwitamina bu photosynthèse. Yehowa afubu na mitshi yadi mupangye bwa kupa “bantu boso muwa na kuyooka.” (Bik. 17:25, Kilombeno kikpya 2009) Bino binangu abitukanyisha ngofu!

10, 11. Mu mushindo kinyi watudi balombeene kumona binangu bya Yehowa pa mwanda utale kibaubau ky’abetanyina bu monarque na mushishingidi?

¹⁰ Twi balombeene dingi kumona bi binangu bya Yehowa ku mushindo wadi mukite bipangwa bibungi bi na muuwa pa nsenga. Bantu akimbuulaa myanda abalesha shi bino bipangwa bi pano pa nsenga mbilombeene kwilekeena mu bungi bwa midiyo 2 mpa na ku midiyo 100. (Badika Misambo 104:24.) Twi balombeene kulonga pabitale binangu byaaye mu bino bintu byadi mupangye.

¹¹ Bu kileshesho, kibaubau ky’abetanyina bu monarque kii na bongo bwi bukata bwa kayiso ka bike. Aku namu kyakya kibaubau kii na mushindo na bukome bwa kupalala munda mwa bilometre pepi 3 000 kukatuka mu Canada mpa na ku Mexique. Akitambuka kalolo ku bukwashi bwa nguba. Kino kibaubau akikitaa naminyi nsaa ikwete kukamina nguba? Yehowa baadi mupangye bongo bwakyo na mushindo wa kuuka abitambuka nguba, byabya kyakya kibaubau nkilombeene kutambuka kalolo kushii kuluba eshinda. Tubande kutaluula dingi abikalaa mushishingidi. Kino kipangwa ki na meeso abidi, mwiyiso dyooso mwi tuntu twabetaminaa bu lentilles pepi 30 000. Sunga byekala shi bongo bwao mbukile bupeela, uno mushishingidi ngulombeene kutundula myanda yooso yabeuleesha kwi tuno tuntu na kuuka kantu kooso akakitshika yaaya mbalo yaudi ushaale.

12, 13. Mushindo wabadi bapangye cellule kwi Yehowa awitukemesha naminyi?

¹² Ungi mwanda wa kukanya nyi mushindo wi Yehowa mmupangye ma cellule e mwi kintu kyooso ki na muuwa. Bu kileshesho mbidi yoobe i na ma cellules pepi midiyala binunu 100. Munda mwa cellule ooso mwi aside abetaminaa bu ADN (acide désoxyribonucléique). Mu yawa aside mwi bintu bibungi bii na muulo abikwasha bwa kwibaka mbidi yoobe yooso ishima.

 ¹³ Mbintu bungi kinyi bi mu ADN? Twi balombeene kupwandjikisha gramme umune a ADN na CD. CD umune mmulombeene kutwela myanda yooso i mu diksionere. Kadi mwanda wa kukanya ngwa shi CD nyi disque dipeela dya nnanga. Kadi penda gramme umune a ADN mmulombeene kulama myanda i bungi kukila i mu ma CD mudiyaala ushima! Bwa kwakula mu ungi mushindo, lupau lumune lwa musabu lwa ADN, lwi na myanda ilombeene kwikala na mushindo wa kutuusha bantu booso be na muuwa mu nsenga lelo uno! Na mbilombeene kukitshika misusa 350!

14. Bintu byabadi bafumbule kwi bantu balongye myanda ya siyanse abikutakula mu kumona Yehowa naminyi?

¹⁴ Nfumu Daavide baadi muleshe mushindo wabadi bapangye mbidi ya muntu shi, bi nka bu Yehowa baadi mufunde myanda yooso ibaadi ayitungibwa bwa kupanga mbidi ya muntu mu mukanda. Bambile dingi shi: “Bommwene mwanka pa nádi nkí bu kantu kebumbe bisumanga. Ku mpala kwa’mi kumona nguba, bofundjile mu mukanda ôbe mafuku ande oso obódi muntshibile kwikala pa nsenga.” (Mis. 139:16, EEM) Twi balombeene kupusha bwakinyi Daavide baadi akumiina kuteka Yehowa nsaa ibaadi anangusheena pabitale mushindo wabadi bapangye mbidi yaaye. Bantu balongye myanda ya siyanse mbafumbule bintu bibungi mu bipwa bishaale pabitale mbidi ya muntu abitukemesha. Bino bintu byabadi bafumbule abitutakula mu kukumiina bibaadi bifunde uno mufundji a misambo pabitale Yehowa shi: “Nkwete nkutumbisha pa mwanda wa kumpanga mu kino kipaso kya kukânya kukata! Neûku bînyibînyi’shi, byôso by’odi mukite bi bu kilengyeleshi. (Mis. 139:14, Ñono na malango) Eyendo, mushindo kinyi ulombeene bantu kukutwa kumona’shi bipangwa abilesha binyibinyi shi Efile Mukulu e kwanka?

15, 16. (a) Mikanda yetu ngikwashe bantu naminyi bwa kulongyela myanda ku bipangwa bya Yehowa? (b) Nkipindji kinyi kya mu mwisambo wi na mutwe wa mwanda shi “Hasard ou conception?” akikusangasha ngofu?

¹⁵ Munda mwa bipwa bibungi, jurnale a Réveillez-vous! mmukwashe midiyo ya bantu bwabadya kulonga myanda itale Efile Mukulu ku bukwashi bwa bintu byaadi mupangye. Bu kileshesho, mu 2006, mu nimero a mweshi wa Kitema mubaadi mwisambo wi na mutwe wa mwanda awamba shi: “Y a-t-il un Créateur?” Mpàngo ya kutuusha uno jurnale ibaadi ya kukwasha muntu ooso akumiina malongyesha a evolisio na dingi dilongyesha dyabeditamina bu créationisme dya’shi kwi bingi bintu byabashii bapagye kwi Efile Mukulu. Ungi mukwetu mukashi baadi mufundjile filiale a mu États-Unis pabitale uno jurnale. Amba shi: “Kampanye ka kwabila uno jurnale a pabwaye kabaadi buuwa byabya. Ungi mwana mukashi baadi mutekye ma jurnale 20 a uno nimero. Baadi mulongyeshi a Biologie na baadi akumiina shi balongi baaye bapete namu uno jurnale.” Ungi mukwetu mulume bafundjile bino: “Ne mubangye kulambukisha kubanga ku mpwilo kwa kipwa kya 1940 na ntandji na bipwa pepi na 75, kadi kasha ntandambukiishe ngofu bu uno mweshi wa ngabilanga uno nimero a Réveillez-vous!”

¹⁶ Mu bipwa bishaale, mu ma jurnale a Réveillez-vous! ebungi mbabangye kwimwela mwisambo wi na mutwe wa mwanda awamba shi: “Hasard ou conception?” Ino miisambo iipi ngimeene menemene mu mushindo wi bipangwa na mushindo wi bantu bakwete kwambula bintu bibabadi batuushe kwi Mupangi eetu. Mu 2010 tubaadi bapete broshire e na mutwe wa mwanda awamba shi: La vie a-t-elle été créée? Bifwatulo bi buwa na tushibo twi mwanka twi kwanka bwa kwitukwasha bwatudya kwikala na lutumbu kwi Yehowa bwa bintu byadi mupangye. Nkonko i ku nfudiilo kwa kipindji kyooso ayikwasha muntu abadika bwadya kunangushena ku myanda ibakatuka mu kubadika. We na muloo wa kufuba na uno broshire mu mudimo wa bulungudi wa kushibo na nshibo, mu mbalo i bantu bebungi, sunga kulungula mu mpukapuka?

17, 18. (a) Baledi be na bushito kinyi? (b) Mushindo kinyi oodi mulombeene kutumika na ma broshire aesambila myanda ya bipangwa mu lulangwilo lwa mu kifuko?

¹⁷ Baledi, nwi babadikye uno broshire na baana benu mu lulangwilo lwa mu kifuko su? Su nubakitshi byabya, nwi balombeene kwibakwasha bwadya kwikala na lukumiino lwi bukopo kwi. Pangi we na bana be mu bipwa ekumi  bakwete kwenda mu kalasa. Baaba bakwete kulongyesha myanda ya evolisio bakwete kukita mwabo mooso bwa kwibakuminyisha shi, takwi Mupangi. Beena myanda ya siyanse, balongyeshi ba ku tulasa, mpa na myanda i ku televizio ikwete kulesha bipangwa na ma filme aalongyesha shi, evolisio nyi mwanda wa binyibinyi. Nwi balombeene kukwasha baana benu be mu bipwa ekumi bwabadya kukalwila bya binyibinyi nsaa yabatumika na broshire a Cinq questions à se poser sur l’origine de la vie baadi mutuukye mu 2010. Anka bi broshire a La vie a-t-elle été créée? uno broshire akwasha baana bakinga bwabadya kutamisha “kapatupatu” kaabo. (Mye. 2:10, 11) Ebalongyesha mushindo wabadya kutundula su myanda yabebalongyesha ku kalasa ngya binyibinyi.

¹⁸ Ingi nsaa kwi ma rapore aalesha shi, beena myanda ya siyanse mbasangane mifufwa ayilesha shi evolisio mmwanda wa binyibinyi. Sunga shi, nkulombeene kwikala rapore ayilesha shi beena myanda ya siyanse be na mushindo wa kupanga dingi muwa mu ma laboratware. Broshire a Cinq questions à se poser sur l’origine de la vie mmufundjibwe mu mushindo wa kukwasha balongi bwabadya kutundula su yaaya rapore ngya binyibinyi. Anwe baledi, tumikayi na ano ma broshire bwa kukwasha baana benu bwabadya kwikala na lukumiino lwi bukopo nsaa yabapatulwila bantu bwakinyi abakumiina shi kwi Mupangi.—Badika 1 Mpyeele 3:15.

19. Nkinemo kinyi kyatudi nakyo atwe booso?

¹⁹ Twi balombeene kulonga bi bungi pabitale ngikashi ibuwa ya Yehowa nsaa yatubadika myanda itale bipangwa mu mikanda yatupete kwi ndumbulwilo aaye. Bino bishinkamiisho byooso abitutakula mu kutumbisha Yehowa na mashimba etu ooso. (Mis. 19:2, 3) Nyi mwanda wa kinemo kikata kwatudi nsaa yatunemeka na kutumbisha ngofu Yehowa Mupangi a bintu byooso!—1 Tim. 1:17.