1. Nkikongeno kinyi kya mwilo w’Efile Mukulu kyatukyebe kutaluula, na nkonko kinyi ayitungu kwiyela?

“EBWEYI! Nutumbishe Nfumu Efile eenu bwa ikalaika.” Ku bukwashi bwa bino bishima bi na muulo ukata, mwilo wa kala w’Efile Mukulu ubaadi wibungye mu luteko lumune lwa ku nteko i bula ya mu Bible. (Ne. 9:4, 5) Abaadi bebungile mu Yeelusaleme mwifuku dya 24 dya mweshi wa musambo wa beena Yuuda wabetamina bu Tishri mu kipwa kya 455 ebedi dya Yesu Kidishitu (Eb.Y.K.) Nsaa yatutaluula myanda ibaadi ikidikye mu dyadya efuku dikata, eyipushe shi: ‘Mbiubishi kinyi bibaadi bikwashe bwa koobesha kyakya kisangilo? Malango kinyi dingi andi mulombeene kulongyela ku luno luteko lulumbuulwe kalolo?’—Mis. 141:2.

2. Nkileshesho kinyi ki buwa kyabadi betulekyele kwi beena Isaleele nsaa ibaabadi mu kikongeno kunyima kwa kwibakuula bimano bya Yeelusaleme?

² Kumpala kwa’shi kino kikongeno kikitshikye, takubaadi kupwe kukila mweshi kasha beena Yuuda bapudisha kwibakuula bimano bya Yeelusaleme. (Ne. 6:15) Mwilo w’Efile Mukulu ubaadi ulombashe mudimo penda munda mwa mafuku 52, na abo nkubanga kutuula binangu byabo ngofu ku nkalo yaabo ya mu kikudi. Byabya mwifuku dya kumpala dya mweshi upya wa Tishri, abebungile pa mbalo ayiimenaa bantu booso bwa kuteemesha Esdrase, pamune na bangi beena Leevi, abo nkubadika n’eyi di bukopo na kupatuula Miiya y’Efile Mukulu. Bifuko byooso mpa na “booso abaadi balombeene kupusha,” abayimeene na abo nkuteemesha “kubanga ku nkyeelo mpaa na mu kaanya.” Kino nkileshesho ki buwa bwi kashaa kwi ooso a kwatudi kwete kutwela mu Mashibo a Bufumu ebakwe kalolo! Byabya, poodi mu yaaya mbalo kwi nsaa yobangaa kunangwila ku tu myanda twi na muulo upeela su? Su mbyabya, banda kutala dingi kileshesho kya baaba beena Isaleele ba kala bashibaadi penda abateemesha bisumanga nya, kadi abaadi abatwesha mu mashimba aabo byooso  bibaabadi abapusha mu mushindo ubaabadi babangye mpa na kudila pa mwanda wa kukutwa kwabo kwa kukookyela Mwiya w’Efile Mukulu.—Ne. 8:1-9.

3. Beena Isaleele abaadi bakookyele kulonda eyi kinyi?

³ Byabya, ino tayibaadi bu nsaa ya kutonda milwisho nya. Bu bibaadidi bu efuku dya feete, nyi efuku dibaadi aditungu shi bakishe nsaa yaabo na muloo mu lulangwilo lwa Yehowa. (Mb. 29:1) Byabya Neemi balungwile mwilo shi: “Endaayi nudye bya kudya biibuuwa, nutome bitomwanga bya-kalolo, nutwadile naamu na yaawa shii mumone bya kulumbuula kintu, mwanda dinw’efuku ndyaakishila dya Nfumu eetu. Tanwikalanga na kinyongwa, mwanda muloo wa Yehowa, ngi bwenu bukome!” Mwanda wi buwa, mwilo ubaadi ukookyele na, dyadya efuku nkwaluluka bu efuku dya “muloo [ukata].”—Ne. 8:10-12.

4. Ba nfumu ba bifuko bya beena Isaleele abakitshine kinyi, na nkinyi kibabasangeene ki na muulo ukata mu Musangeelo wa Tushibo twa Mapema?

⁴ Mwifuku dibalondele, ba nfumu ba bifuko abebungile bwa kutala mushindo ulombeene mwilo kukita myanda ipusheene na Mwiya w’Efile Mukulu. Mu kulonga kwabo kwa Bifundwe, abasangeene shi mweshi wa musambo ubaadi wa kukita Musangeelo wa tushibo twa Mapema na kikongeeno kya nfudiilo kubanga mwifuku dya 15 na kwifuku dya 22 dya Tishri, byabya abo nkubanga kwilumbuula. Abekeele bu mafuku amune akile buwa akukita Musangeelo wa Tushibo twa Mapema kubanga mu mafuku a Yoshwa na, kubekeele “muloo ukile bukata.” Kintu kikile bukata kya ku uno musangeelo nyi nkubadikila bantu booso Mwiya w’Efile Mukulu, “efuku dyooso, kubanga kwifuku dya kwibedi mpaa na ku dya nfudiilo.”—Ne. 8:13-18.

5. Mwilo w’Efile Mukulu ubakitshine kinyi kumpala kwa beena Leevi kwibeelela luteko kwi Yehowa?

⁵ Kunyima kwa mafuku abidi, nsaa ya beena Isaleele booso kutonda milwisho yaabo ya kukutwa kulama Mwiya w’Efile Mukulu ibalombeene. Dino tadibaadi bu efuku dya musangeelo nya. Anka, mwilo w’Efile Mukulu ubatwelele mu kishila abo nkufwala mpaaya bwa kulesha shi be mu maalo. Na dingi ababadikiile mwilo Mwiya w’Efile Mukulu munda mwa nsaa isatu ku namashika. Kunyima kwa midi, “babaatondanga milwisho, abo nkwiyela paashi kumpala kwa Yehowa Efile Mukulu.” Akupu beena Leevi nkubanga kwelela mwilo luteko lubaabadi balumbuule kalolo. —Ne. 9:1-4.

6. Nkinyi kibaadi kikwashe Beena Leevi bwabadya kwela luteko lwi buwa, na abitulongyesha kinyi?

⁶ Kushii mpaka, kubadikanga kwa Mwiya w’Efile Mukulu kubakwashile beena Leevi bwabadya kulumbuula luno luteko lwi buwa. Maverse ekumi a kumpala aakwila penda pabitale midimo ya Yehowa na ngikashi yaaye. Mu kipindji kya luteko kibashaala abaakwila misusa ibungi pabitale “lusa lukata” lw’Efile Mukulu lwabaakwila dingi na kushinkamisha kooso shi, beena Isaleele tababaadi balombeene  kufwilwa lwalwa lusa nya. (Ne. 9:19, 27, 28, 31) Nteko yetu kwi Yehowa ngilombeene kwikala buwa su atulondo kileshesho kya beena Leevi kya kunangwila efuku dyooso ku Eyi dy’Efile Mukulu na kutadiila Yehowa bwashi etulungule kya kukita kumpala kwa kwela luteko kwadi.—Mis. 1:1, 2.

7. Beena Leevi abatekyele Efile Mukulu kinyi, na bino abitulongyesha kinyi?

⁷ Mu luteko lwabo abaadi batekye kintu kimune kipeela. Akisanganyibwa mu kipindji kya nfudiilo kya verse 32, mwatubadika shi: “Binobino, Efile Mukulu eetu, Efile Mukata Sha-bukome naa a-kutshiina, alama kilombeeno kyoobe kya kifulo, toleenguulanga ino mpombo iitukwate, atwe na milopwe yeetu, banfumu beetu, baamasheetu na mwilo wobe ushima, kubangila ku kipungo kya milopwe ya beena Aasiriya mpaa na ku leelo.” Byabya, beena Leevi mbetulekyele kileshesho kya kutumbisha na kutumbula Yehowa kumpala kwa kumulungula mu luteko mwanda watudi nawo mwishimba.

8, 9. (a) Beena Leevi ababangile luteko lwabo mu mushindo kinyi aulesha kwiyisha? (b) Abaadi baakule pabitale bilwilo kinyi bibidi bya mwiyilu?

⁸ Sunga mbibaadi shi luteko lwabo lubaadi lulumbuulwe kalolo, baaba beena Leevi abaadi beyishe na abaadi bashinguule shi bishima byabo ta mbilombeene kupa Yehowa ntumbo yooso ibaadi mulombeene kupeta nya. Byabya, luteko lwabo abaadi belubangye na uno ngakwilo alesha kwiyisha kwa mwilo w’Efile Mukulu shi: “Batumbishy’eshina dyoobe dya kinemo, adyo dikile bintu byooso ku nkumo.”—Ne. 9:5.

⁹ Luteko alutungunuka shi: “Nnoobe mwikale Yehowa, obe buupenka! Nnoobe mupangye’eyilu dishima na byooso bii mwanka, nsenga na byooso bii panka tulunga twa meema na byooso biimuwule. Nnoobe mwibipe muuwa abyo byooso, na dingi bilengwa [bi na ngoshi] bi mwiyilu abikulangwila.” (Ne. 9:6) Eyendo, Yehowa Efile Mukulu bapangile eyilu na nsenga, akita na bisaka bibungi bya nyenyenyi byabetamina bu ma galaxie. Mwanda ungi wa kukaanya, mupangye bintu byoso bi na muwa pa ino nsenga yetu ibuwa mu mushindo wa bikwete kwikwashena bwabidya kutungunuka na kwikala na muwa muyile byaadi mwibikite. Anka penda miikeyilu y’Efile Mukulu i selele ndjo ibaadi ipetekyelwe, yatudi balombeene dingi kwitamina bu “kilwilo kishima kya mwiyilu.” (1 Bf. 22:19; Yob. 38:4, 7) Na dingi, mikeeyilu ikwete kukita akikyeb’eshimba dy’Efile Mukulu na kwiyisha kooso nsaa yayikwete kufubila bantu be na milwisho abo “bee na kya kupeta kipandjilo.” (Eb. 1:14) Kino nyi nkileshesho kikata kyabakwete kwitulekyela kwi miikeyilu atwe bakwete kufubila Yehowa mu buumune bu abikalaa kilwilo kilongyeshibwe kalolo!—1 Kod. 14:33, 40.

10. Mushindo ubaadi Efile Mukulu mukitshine Abrahame myanda awitulongyesha kinyi?

¹⁰ Akupu, beena Leevi abatuudile binangu byabo ku mushindo ubaadi Efile Mukulu mukitshine Abrame myanda, aye baadi mupwe bipwa 99 kushii kutanda su mmwana umune  na mukashi aaye Sarayi baadi nkunga. Kunyima, ndjo kubaadi Yehowa mushintuule eshina dyaaye dyafika bu Abrahame, adipatuula shi “nshe-kisaka.” (Kib. 17:1-6, 15, 16) Efile Mukulu baadi mulee Abrahame dingi shi, ba ku musuku waaye ndjo abakashaala mu nsenga ya Kanaana. Misusa ibungi bantu abalubaa byabadi balee; kadi Yehowa te byabya nya. Anka bu abilesha dingi luteko lwa Beena Leevi shi: ‘Nnoobe Yehowa Efile Mukulu [a binyibinyi] basangwile Abalama bomukatwishe mu kibalo kya Ulu mwiumbo dya bena Kalandea, omwalûla eshina dyafika bu Abrahame. Bomwene bi kishima kyê modi. Byabya, bokitshine n’ê kilombêno omulâ byodya kumupa eumbo dya beena Kanâna, ‘. . . Bwa’shi ba ku musuku wê bemushaale. Bolombêshe wawa mulailo ôbe pa mwanda we mululame.’ (Ne. 9:7, 8, EEM) Atwe booso tulondeyi kileshesho ky’Efile Mukulu eetu nsaa yatukitshi mwetu mooso bwa kulombasha mayi etu.—Mat. 5:37.

11, 12. Leesha akipatuula eshina dya Yehowa na mushindo wabidi bimwenekye mu mishindo ibaadi akitshiina ba ku musuku wa Abrahame myanda.

¹¹ Eshina Yehowa adilesha shi: “Yawa afwishaa,” abilesha shi Efile Mukulu mu myanda yakwete kwenda na kukita, kwete kufwisha milayilo yaaye yooso bu ya binyibinyi. Bino abimweneka kalolo mu mushindo ubaadi Efile Mukulu akitshina ba ku musuku wa Abrahame myanda pabaabadi mu bupika mu Ejiipitu. Mu aa mafuku tabibaadi abimweneka bu bibofule bwashi mwilo ooso ushima utuukye mu bupika na utwele mu Nsenga ya Mulayilo nya. Byabya mu myanda ibaadi ende na kukita, Efile Mukulu bafwishishe mulayilo waaye bu wa binyibinyi, aye nkwilesha shi anka penda aye ndjo mulombeene kwitaminyibwa bu Yehowa.

¹² Luteko lwi mu mukanda wa Neemii alwakula bino pabitale Yehowa: “Boodi mumone kufwambushibwa kwa baamasheetu mu Ejiipitu, obe nkupusha musaase wabo ku bukunkula bwa mbuu a malengye. Bookitshiinyine Faraone, bafubi baaye booso na mwilo ushima wa mwiumbo dyaaye bitundwilo na bipaso, mwanda boowukanga’shi, mu kwitatula kwabo, babaadi beebafwambushe. Ank’obe nkupeta nkumo nyaa na ku leelo. Bootshibile mbuu ku meeso kwabo, abo nkusabuka munkatshy’a mbuu pabaakamine meema; baaba babeebingeenanga nabo, boodi mwibaine muushi, buu mabwe mu mwèshi wa mema eebukopo.” Akupu luteko alutungunuka na kulesha kingi kintu kibaadi Yehowa mukitshine mwilo shi: “Bwebapeele matalwa kumpala kwa baash’eumbo, beena Kanaana . . . babaakwatshile mpàta ilamiibwe, nkupeta na nsenga yaa bya-kudya, na mashibo awule bintu biilekeene, meena a meema, mvinyo, bipafupafu na mitshi ya bikuba biibungi. Babaadiile, baayikuta, abo nkubotoka mbidi, nkushaala mu bintu biibuuwa, pa mwanda wa kalolo koobe kakata.”—Ne. 9:9-11, 24, 25.

13. Mushindo kinyi ubaadi Yehowa mupe beena Isaleele bukwashi bwa mu kikudi, kadi mwilo ubakitshine naminyi?

¹³ Kubaadi ingi myanda ibaadi Efile Mukulu ende na kukita bwa kulombasha mpàngo yaaye. Bu kileshesho, mafuku apeela kunyima kwa Isaleele kutuuka mu Ejiipitu, Yehowa baadi mwibape bukwashi bwa mu kikudi. Beena Leevi abatentekyeeshe mu luteko lwabo kwi Efile Mukulu bamulungula shi: “Pa ngulu a Sinaayi, boodi mwikye mwiyilu, obe nkwisamba nabo. Bwebapeele mayi alulame, miiya ya biinyibiinyi, na bitshibilo bya-kishìma.” (Ne. 9:13) Yehowa balongyeshe mwilo waaye bwashi wikale ulombane bwa kutwala eshina dyaaye bu bantu balombeene kupyana Nsenga ya Mulayilo anka, abaadi basumbushene bintu bi buwa bibabadi balongye.—Badika Neemi 9:16, 18.

14, 15. (a) Mushindo kinyi ubaadi Yehowa muleshe lusa kwi mwilo waaye ubakitshine mulwisho? (b) Mushindo ubaadi Efile Mukulu mukitshine mwilo waaye myanda awitulongyesha kinyi?

¹⁴ Luteko lwa beena Leevi ndutale milwisho ibidi ibaakitshine beena Isaleele mafuku apeela kunyima kwabo kulaa ku Ngulu a Sinayi shi abakyebe kulama Mwiya w’Efile Mukulu. Pa mwanda wa ino milwisho, abaadi balombeene  lufu. Kadi luteko lwabo lubaadi lutumbishe Yehowa mwanda abambile shi: “Mu lusa lwobe lukata, twe mwibasumbusheene mu kabaaka. . . . Mund’a bipwa makumi ananka, bwebapanga byooso bibabadi nabyo lukalo, . . . tambakutwe kintu; bilamba byaabo tambisanukye dingi ngwa yaabo ntangyuule.” (Ne. 9:19, 21) Lelo uno Yehowa kwete kwitupa byooso byatudi nabyo lukalo bwa kumufubila na kululama kooso. Tatukumanga kwikala bu bibaadi beena Isaleele binunu na binunu abafwile mu kabaaka mwanda wa kukutwa kwabo kwa kukookyela na kukutwa kwa lukumiino. Byabya, bino bintu “babeebifundjile bwa kwitulambukisha atwe batabadi ku nfudilo a bipungo.”—1 Kod. 10:1-11.

¹⁵ Bi malwa mwanda, kunyima kwabo kutwela mu Nsenga ya Mulayilo, beena Isaleele ababangile kukita myanda i butete, kukita lulangwilo lwa kwipayisheena lwa b’efile ba beena Kanaana. Byabya Yehowa baadi mutadiile bwashi mwilo waaye wadi musangule beukyengyeshe kwi miilo ibaadi pepi nawo. Nsaa ibabadi belangye ku mashimba, na lusa looso Yehowa baadi mwibafwile lusa aye nkwibapaasha ku maasa a beshikwanyi. Baadi akitshi bino “misuusa ibungi.” (Badika Neehemi 9:26-28, 31.) Abambile shi: “Boodi mwibafwile lusa mund’a bipwa biibungi; bwebasopeshanga na kikudi kyoobe, pa kukiila kwi batemuki, tababaateemeshanga. Paapa boodi mwibatuule mu maasa a miilo ya mu angi maumbo.”—Ne. 9:30.

16, 17. (a) Kunyima kwa kwaluka mu bupika, mushindo kinyi wi myanda ya beena Isaleele ibaadi ilekeene na ya ba mashaabo kumpala kwa kutwela mu Nsenga ya Mulayilo? (b) Beena Isaleele abaadi batonde kinyi, na nkinyi kibabalayile bwa kukita?

¹⁶ Sunga kunyima kwa’bo kwalukiila mu bupika, beena Isaleele ababangile dingi kukutwa kukookyela. Nkwilekeena kinyi kubaadi panka? Beena Leevi abaadi batungunukye na kuteka shi: “Leelo, mbaab’atwe bàtabàdi bapika, mwiumbo diboodi mupe baa masheetu, bwa’shi badye bikuba na bintu byaamwo; mbaab’atwe bapika! Bupeta bwadyo bwi mu maasa a milopwe yoodi mwitutadikiishe, pamwanda wa milwisho yeetu, . . . twi mu mpombo ikata.”—Ne. 9:36, 37.

¹⁷ Beena Leevi abaadi abalesha shi Efile Mukulu te na kululama bu byadi mutadiile ano makyenga su? Nya! Abalesheshe shi, “Obe twe na kilumbu, pabitale byooso biitukitshikile, mwanda booleesheeshe biinyibiinyi byoobe, ank’atwe, tubeekeele mu bilubilo.” (Ne. 9:33) Akupu, abafudiishe luteko lubaabadi abeele na mashimba amune abo nkulaa shi mwilo aukyebe kukookyela Mwiya w’Efile Mukulu. (Badika Neemi 10:1; 10:29) Abafundjile mukanda abo nkwiwela byala kwi bakata ba beena Yuuda 84.—Ne. 10:1-27.

18, 19. (a) Twi na lukalo na kinyi bwatudya kutwela mu ndumbulwilo mupya a Efile Mukulu? (b) Kinyi akitungu shi ta tukookanga kuteka, na mbwakinyi?

¹⁸ Twi na lukalo lwa dinyoka dya Yehowa bwatudya kwikala balombane bwa kupanda na kutwela mu nsenga yaaye ipya ya kululama. Mpoolo mutumibwa bayipwishe shi: “Mmwana kinyi abashyaabanyokaa kwi nshaaye?” (Eb. 12:7) Atulesha shi atukumiina bukunkushi bw’Efile Mukulu mu muwa wetu nsaa y’atunyingiila na kululama kooso mu mudimo waaye na kutadiila kikudi kyaaye bwakidya kwitulumbuula. Na su tubakitshi mulwisho ukata, twi balombeene kushinkamisha shi Yehowa akyebe kwitufwila lusa su atwilanga binyibinyi ku mashimba na kwiyisha kooso bwa kukumiina dinyooka dyaaye.

¹⁹ Kubashaala mafuku apeela Yehowa akyebe kukita myanda ikile buwa kukila bibakitshine mu mafuku abatuushile Isaleele mu Ejiipitu. (Ez. 38:23) Anka bu bibaadi mwilo waaye wa kala utwele mu Nsenga ya Mulayilo, beena Kidishitu booso abanyingiila bu balangwidi ba Yehowa baasha kululama abakapete muwa mu ndumbulwilo mupya a kululama a Efile Mukulu. (2 Mp. 3:13) Bu byatudi na luno lukulupilo, tatukookanga kwela nteko bwa kutumbisha eshina dy’Efile Mukulu. Mwisambo aulondo aukyebe kutaluula lungi luteko alutungu shi, tukite myanda ipusheene nalo bwa kupeta myabi y’Efile Mukulu kubanga lelo mpa na bwa losoo.