Bible nyi mukanda wi nawo bantu bebungi mu nsenga ishima. Bwakinyi? Bwa mwanda umune, bantu mbalombeene kwitundula. Mu Bible amusanganyibwa myanda ya mu nshaleelo a bantu abaadi kwanka na mushindo ubaadi kipwano kya muntu na muntu naaye mpa na kipwano kyabo n’Efile Mukulu. Ino myanda, ayitulongyesha bileshesho bibofule na mu bishima bipeelepeele byabadi balombeene kwaluula mu ndjimi nkama, na mbalombeene kwibipusha kwi bantu bashaale mu ma mbalo ebungi na mu bipungo bilekeenelekeene. Na dingi, miiya ya mu Bible ayikalaa na bukwashi mafuku ooso.

Mwanda wi na muulo nkwamba shi, Bible ta mwikale penda bu mukanda awakwila pabitale Efile Mukulu nya, anka mmukanda aufiki kwi Efile Mukulu. Bible etulungula eshina dy’Efile Mukulu, bi ngikashi yaaye, na mpàngo yaaye ishii ilombeene kwaluluka nsaa ibaadi apanga nsenga na bantu. Bible alondo dingi myanda ya kala ibuwa ibaadi ikambile myanda ibubi: Myanda ibuwa ibaadi ikitshikye kalolo mu nsenga ishima. Kubadika Bible na binangu bi buwa, nyi nkitako kya lukumiino na lukulupilo.

Mu Bible, atwimupete myanda i na muulo yatushii balombeene kupeta ingi mbalo. Bu kilesheesho, Bible etulungula bya binyibinyi pabitale ingi myanda i na muulo bu ino:

• Kwatudi batuukye na bwakinyi tukwete kukyenga

• Mpàngo y’Efile Mukulu bwa kukuula bantu

• Kibaadi Yesu mwitukitshine

• Myanda ayikyebe kukitshika pabitale nsenga na bantu

Twe mulombeene kwasa esiyo mu ano masaki aalondo na kutaluula akyakula Bible pabitale ino myanda yooso su?