Siekele bu inanka kunyima kwa kufundjibwa kwa kipindji kya nfudiilo kya bifundwe bya ki na Ebreeyi, butemuki bwa Mika pabitale Meesiya bubalombeene: Yesu batandjikile mu Beeteleme. Bipwa pepi 30 kunyima, mu kipwa kya 29 K.Y.K., kipindji kya kumpala kya butemuki bwa Danyele pabitale kufika kwa Meesiya kibalombeene. Yesu baadi mubatshishiibwe, na Efile Mukulu nkumushinga mwimu wa kikudi kiselele. Pa nsaa ilombane, Meesiya baadi atengyelwa kubanga kala, Keekulu, bafikile!

Mususa umune Yesu babangile mudimo waye, “end’alungulanga mukandu wibuuwa wa bufumu bw’Efile Mukulu.” (Luuka 8:1) Anka bu bibaabidi bilayibwe, Yesu balesheshe shi mmuntu ebuwa, sha kalolo, na etatshishaa bwa nkalo ya bangi. Malongyesha aaye abaadi aakwasha bantu na kwibalesha kifulo, baadi apaasha “mikumbo yooso,” bino abilesha shi, Efile Mukulu baadi naaye. (Mateo 4:23) Bantu booso bakulu na bakinga abayiile lubilo kwi Yesu na kwamba shi: “Tubaamono Meesiya!”—Yowano 1:41.

Yesu baadi mutemukye shi, kumpala kwa’shi Bufumu bwaye bwate myanda yooso mu maasa, nsenga ishima ayikawulu na ngoshi, kutshinkatshinka kwa nsenga, na ingi nkalakasho ibungi. Baadi mulungule bantu booso bwabadya ‘kwikala bapasukye.’—Maako 13:37.

Yesu baadi muntu mupwidikye baadi akookyela Efile Mukulu, anka kubaadi bantu abaadi bamushikwe abaadi mpa na bamwipee. Lufu lwaye lubekeele bu mulambu upwidikye bwa kukuula kyakya kibaabadi bashimishe kwi Adame na Eeva—kwikala na muwa wa losoo mu Mpaladiiso.

Lufu lwa Yesu lubaadi lulombashe butemuki, nsaa ibaadi Efile Mukulu mumusangushe bu kipangwa kya mu kikudi ki na bukome kunyima kwa mafuku asatu. Akupu Yesu bamwekyeele balondji baaye bakile pa 500. Kumpala kwaye kwenda mwiyilu, Yesu bapeele balondji baaye mudimo wa kulungula mukandu wibuwa pabimutale mpa na pabitale Bufumu kwi bantu ba “miilo yooso.” (Mateo 28:19) Mushindo kinyi ubaabadi batungunukye na kulombasha wawa mudimo?

—Ngwatshiibwe mu mukanda wa Mateo, Maako, Luuka, Yowano, 1 Beena-Kodinto.