“Muntu shi mulombeene kufwila bangi lusa atshibi kitala kyadi mulombene kukidila.” Ano mayi a mu siècle a 17 a ungi muntu a myanda ya kala a mu Grande-Bretagne abetamina bu Edward Herbert, aalesha bwakinyi abitungu twikale atulekyela bantu abetutekye bwa kwibafwila lusa, mwanda binobino sunga ku kala, atukekala na lukalo lwa’shi betufwile naamu lusa kwi bangi. (Mateo 7:12) Pa mwanda wa byabya, kwi ungi mwanda wi na muulo awitutumu bwa kulekyeela bangi bilema byabo. Banda kutala mayi a Mpoolo mutumiibwa e mu Beena-Kolose 3:13.—Badika.

Bu byatudi bantu bakutwe kupwidika, atukitshinaa bangi bilubilo nsaa ibungi, abo naamu abetukitshina byanka. (Beena-Looma 3:23) Mushindo kinyi watudi balombeene kwikala mu kipwano na bakwetu bakutwe kupwidika? Ku bukwashi bwa kikudi ky’Efile Mukulu, Mpoolo etulanga bwatudya kwikala atulekyeela bangi na kwibafwila lusa. Dino elango di na muulo lelo uno nka bu byadibaadi nsaa ibaadi mwidifunde tukudi kupwe kukila bipwa binunu bibidi. Tubande kutala kalolo uno mayi a Mpoolo.

“Ikalayi na lwishinko kwi muntu na muntu.” Mwaku “ikalayi na lwishinko kwi” mu kina Greke aulesha kulekyeela sunga kutadiila muntu bilubilo byaye. Ungi mukanda awamba shi, beena Kidishitu abaleshaa uno mwikeelo pa “kukumina kutwala bilubilo bya bangi sunga ingi ngikashi ishaa ibasangasha na kwibafiitshisha munda.” Mwaku “muntu na muntu” aulesha shi abitungu kwikitshishena myanda muntu na mukwabo. Mu ungi mushindo, nsaa ya tunangushena shi atukitaa bilubilo bilombeene kufitshisha bangi munda, ta twi bakumbeene kuleka bintu byatushaa tukumiina bwashi bilwishe kipwano ki pakantshi na bakwetu nya. Kadi nkinyi kyatudi balombeene kukita su bangi abetufitshisha munda?

‘Ikalaayi . . . anwifwileena lusa ku muntu na muntu.’ Ungi muntu mulongye tulasa twibungi alesha shi, mwaku wa mu kina Greke wabadi baluule bu ‘kwifwileena lusa’ “ta mwaku umune na kulekyela bwa kapindji kapeela sunga kwilwankana nya . . . kadi nyi ngumune wa ku myanda i na muulo ayileesha bukata bwa kwifwileena lusa.” Ungi mukanda awamba bino shi kino kishima nkilombeene kupatuula “kusangeela kintu kampanda, kwikitumbisha, kwikinemeka.” Atuleesha shi atukumiina kufwila bantu lusa nsaa yatudi na “kilumbu na ungi muntu.” Bwakinyi, twibalombeene kufwila muntu lusa mu uno mushindo? Bwa mwanda umune, twi balombeene kwikala na lukalo lwashi betufwile namu lusa.

“Bu binufwile Yehowa lusa, kitayi mbyaa-mumune.” Uno nyi mwanda ukata awitutumu mu kufwila bangi bantu lusa: Yehowa Efile Mukulu mmwitufwile lusa. (Mika 7:18) Banda kunangusheena pabitale buntu bwa Yehowa kwi bantu abeelanga ku milwisho yaabo. Mu kwilekeena neetu, Yehowa takitaa milwisho nya. Byabya, akumiina kulekyeela basha milwisho abelanga ku mashimba sunga mbyauka shi tee na lukalo lwashi baaba basha milwisho bamufwile namu lusa. Binyibinyi, Yehowa nyi muntu mukile bukata afwilaa bantu bakite milwisho abelanga ku mashimba lusa na kalolo kooso!

Kalolo ka Yehowa aketukwasha bwa kwifubwila peepi naaye na kwitutakula bwa kumwambula. (Beena-Efeeze 4:32–5:1) Bibuwa tubande kwiyipusha bino: ‘Bi Yehowa mbafwila lusa bino, mushindo kinyi wandi mulombeene kulekyela muntu nami mukutwe kupwidika beelanga ku kilubilo kyekalanga munkitshiine?’—Luuka 17:3, 4.