1. Bwakinyi lukuku lubaadi beena Sirii na beena Isaleele badiile Yuuda talubaadi lulombane?

ANGI mafuku munkatshi mwa bipwa 762 na 759 ebedi dya Yesu Kidishitu (Eb.Y.K.), nfumu a Isaleele na nfumu a beena Sirii abaadi bafikye mu kulwa na bufumu bwa Yuuda. Bwakinyi? Bwa kukwata kibundji kya Yeelusaleme, nkukaasha Nfumu Akaaze, na kutuula ungi muntu ku bufumu, pangi muntu shibaadi a mu kifuko kya Nfumu Daavide. (Yesh. 7:5, 6) Bibaadi abitungu shi nfumu a mu Isaleele aukiibwe kalolo. Yehowa baadi mwate kitshibilo shi, umune a ku bekulu ba Davide nyi akashaala ku lupuna-nsulu Lwaye kushii kukatushiibwa, eyi dy’Efile Mukulu tadibaadi dilombeene kukutwa kulombana nya.—Yos. 23:14; 2 Sam. 7:16.

2-4. Patuula mushindo ubaadi ulombane butemuki bwi mu Yeeshaya 7:14, 16 (a) mu siekele a mwanda Eb.Y.K. (b) mu siekele a kumpala K.Y.K.

² Ku mbangilo, beena Sirii na beena Isaleele abaadi abamweneka nka bu be na bukome bukile. Mu ngoshi imune, Akaaze baadi mushimishe basalayi 120 000! Abayipayile Maaseyau, “mwana a nfumu.” (2 Mya. 28:6, 7) Kadi Yehowa baadi amono. Baadi mutentekyeshe mulayilo ubaadi mupe Daavide; byabya, Aye nkutuma mutemuki Yeeshaya na mukandu wibuwa.

³ Yeeshaya baadi mwakule shi: “Nsongwakashi akemita eimi, akatande mwana mulume, akamûdikye bu Emanuele. . . . Kwibedi kwa’shi, yawa mwana akafikye pa bwabwa bukulu [kuuka kufutaala bubi na kusangula buuwa], mu maumbo a baba banfumu babidi [Sirii na Isaleele] abakukwatshishanga mô, amukashâlá mushi bantu.” (Yesh. 7:14, 16, EEM) Misango ibungi atwamba shi kipindji kya kumpala kya buno butemuki nkitale kutandjikwa kwa Mesiya, na bi nka byabya. (Mat. 1:23) Kadi, bu bi bano “banfumu  babidi,” nfumu a Sirii na nfumu a Isaleele, tababaadi dingi abakyebe kulwa na Yuuda mu siekele a kumpala kunyima kwa Yesu Kidishitu (K.Y.K.), butemuki butale Emanuele bubaadi bukumbane musango wa kumpala mu mafuku a Yeeshaya.

⁴ Mafuku apeela kunyima kwa Yeeshaya kutuusha uno mukandu, mukashi aaye baadi mwimite aye nkumutandila mwana mulume abaabadi betanyine bu Makere-Shalale-Hashe-Baze. Abimweneka shi uno mwana nyi baadi “Emanuele” abaabadi besambile kwi Yeeshaya. * Mu mafuku a kala, abaadi abapa mwana eshina dimune p’atandjika, pangi bwa kutentekyeshanga mwanda ukata kampanda ubaadi ukitshikye, kadi baledi na beena kifuko abaadi bakumbeene kumwitanyina dingi eshina. (2 Sam. 12:24, 25) Takwi kintu su nkimune akilesha shi abaadi abetanyina Yesu bu Emanuele nya.—Badika Yeeshaya 7:14; 8:3, 4.

5. Nkitshibilo kinyi ki bubi kibaadi Nfumu Akaaze mwate?

⁵ Pabaadi Isaleele na Sirii abakimbi kulwa na Yuuda, ungi mwilo ubaadi na biina ngoshi bibungi, ubaadi aukimbi namu kwata dyadya eumbo. Aasiriya ndjo baadi kwete kwenda na kukamina bwa kufika eumbo dikile bukome mu nsenga ishima. Muyiile abyamba Yeeshaya 8:3, 4, Aasiriya baadi na kya kwata “bupeta bwa mu Damase” na ‘kupaula bintu mu Samariya’ kumpala kwa kulwa na bufumu bwa kuushi bwa Yuuda. Pamutwe pa kutuula lukulupilo mu mayi a Efile Mukulu abaadi mumutumine na Yeeshaya, Akaaze bakutshile lukumiino aye nkudya kipwano na beena Aasiriya, nyi bwakinyi kunyima Yuuda baponene mu bupika bwabo. (2 Bf. 16:7-10) Akaaze baadi muleshe shi ta mmulami ebuwa a mikooko a Yuuda nya! Twiyele luno lukonko: ‘Nsaa yankyebe kwata kitshibilo kikata, natulaa lukulupilo mwi Yehowa su mmwi bantu?’—Mye. 3:5, 6.

6. Lesha kwilekena kwi pankatshi pa bufumu bwa Akaaze na bwa Ezekyase.

⁶ Akaaze bafwile mu kipwa kya 746 Eb.Y.K., na mwana aaye Ezekyase bapyanyine bufumu bwa Yuuda bupwe kupombeshibwa mu kikudi mpa na ku bupeta. Bu byadi mwana mukinga bashala mu nkwasa a bufumu, nkintu nkinyi kyatuulu pa mbalo ya kumpala mu midimo yaaye? Nkutamisha bupeta bwa Yuuda su? Nya. Ezekyase baadi muntu mwipaane ku myanda ya mu kikudi, na baadi mulami a mwilo waye mukumbeene kutudilwa lukulupilo. Kintu kya kumpala kibakitshine, nyi nkwalushuula lulangwilo lw’eyendo na kutamisha kipwano kya mwilo na Yehowa kibaadi kilwile. Pabapushile akikyebe eshimba dy’Efile Mukulu bwaye, Ezekyase baadi mwibikite musango umune. Kino nkileshesho ki buwa bwi kashaa kwatudi!—2 Mya. 29:1-19.

7. Bwakinyi bibaadi abitungu shi nfumu mupya aleshe beena Leevi shi akyebe kwibakwatshishena?

⁷ Beena Leevi abaadi na mudimo ukata pabitale kwalushuula kwa lulangwilo lw’eyendo. Byabya, Ezekyase baadi mwibungye nabo bwa kwibashinkamiisha shi akyebe kwibakwatshishena. Banda kupwandikisha bibaadi bipushe beena Leevi baasha kululama babaadi mu kyakya kisangilo, mpolo ya muloo ibaadi ibanokye ku meso pababapushile nfumu amba shi: “Anwe ngi babaasangulwa kwi Yehowa bwanudy’a kwimana kumpala kwaye, bwa kumufubila.” (2 Mya. 29:11) Oolo, beena Leevi abaadi bapebwe mudimo wa kwalusha lulangwilo lw’eyendo!

8. Mmyanda kinyi ingi ibaadi Ezekyase mukite bwa kulumbuula kipwano kya mwilo na Yehowa, na nkinyi kibaadi kikitshikye?

⁸ Ezekyase bayitanyishe Yuuda mushima na Isaleele ku feete mukata a Lukilo na a Mikate ishi na kitatusho, abaabadi abakitshi mafuku musambo kunyima kwa Lukilo. Mwilo ubaadi usangale na feete ngofu abo nkukumbasha angi mafuku musambobidi. Bible amba shi: “Muloo ubekeele ukata mu Yeelusaleme, mwanda, byaatshiile pa mafuku a Salomone mwana a Daavide, nfumu a Isaleele, takubaadi kukitshikye kintu ki byaabya ku Yeelusaleme.”  (2 Mya. 30:25, 26) Uno feete a myanda ya mu kikudi baadi munyingishe mwilo ngofu! Mu 2 Myanda 31:1, atubadika shi: “Pabapwile byooso byabya, . . . babayiile mu mpàta ya Yuuda bwa kusoosa nkishi, kutshokola misungu ya b’efile, na kubumbula bilangwilo bya pa myengye na bilambwilo byooso.” Mu mushindo wa kukanya, Yuuda babangile kwaluka kwi Yehowa. Kuno kutoosha kwa mwilo mu kikudi mu wawa mushindo kubaadi na muulo ukata pabitale myanda ibaadi kumpala.

9. (a) Mushindo kinyi ubaadi ukutwe kukumbana binangu bibaadi nabyo Isaleele bwa Yuuda? (b) Senakeribe baadi mobeshe kukita kinyi mu Yuuda?

⁹ Anka bu bibambile Yeeshaya, beena Aasiriya abaatshile bufumu bwa Isaleele a kunundu abo nkutwala bantu booso mu bupika mu Aasiriya. Byabya Isaleele tabaadi dingi na mushindo wa kukumbasha binangu byaye bya kulwisha bufumu bwa Daavide nya. Kadi beena Aasiriya abaadi na mpàngo kinyi? Binobino beena Aasiriya abatuudile meso aabo kwi Yuuda. “Mu kipwa ky’ekumi naa kya kananka kya bufumu bwa Ezekyase, Senakeribe, nfumu a beena Aasiriya, baayiidiile mpàta yooso ilamiibwe ya Yuuda, aye nkwiyikwata.” Abimweneka shi, Senakeribe baadi mukwate mpata 46 ya mu Yuuda. Banda kupwandikisha biboodi mulombeene kupusha su bodya kwikala mu Yeelusaleme mu aa mafuku. Efuku dyooso, mpata ya mu Yuuda ibaadi ayipono mu maasa a basalayi ba beena Aasiriya!—2 Bf. 18:13.

10. Bwakinyi mayi e mu Mika 5:4, 5 abaadi alombeene kunyingisha Ezekyase kwishimba?

¹⁰ Eyendo, Ezekyase baadi auku shi masaku akwete kufika, kadi pamutwe pa nkakimba bukwashi bwa mwilo kampanda wa ba mpangano, bu bibakitshine Akaaze, nshaaye baadi musumbule lukumino, Ezekyase baadi mutuule lukulupilo mwi Yehowa. (2 Mya. 28:20, 21) Pangi baadi auku mayi a mutemuki Mika, baadi mutemukye aa mafuku aabo shi: ‘Bwa Aasiriya, atumwibweshesha balami ba mikooko musambobidi, baana-buwa ba bantu mwanda. Abadiisha nsenga ya Aasiriya na mwele.’ (Mik. 5:4, 5) Ano mayi a Yehowa abaadi alombeene binyibinyi kunyingisha Ezekyase kwishimba, mwanda abaadi aleshe shi beena ngoshi bashi bu bangi booso abakyebe kulwa na beena Aasiriya beshikwanyi na kwibatshokola.

11. Mafuku kinyi abaadi aatungu shi butemuki butale balami ba mikooko musambobidi na baana-buwa ba bantu mwanda bulombane bwa mususa wa kumpala?

¹¹ Butemuki butale balami ba mikooko musambobidi na baana-buwa ba bantu mwanda  (“bakunkushi,” EEM) bubaadi na kya kulombana dingi mafuku ebungi kunyima kwa kutandjikwa kwa Yesu, ‘muludiki a Isaleele, aye baadi na nfumbukilo ya ku kala.’ (Badika Mika 4:14–5:1.) Ano nyi mafuku e bafubi ba Yehowa mu masaku akile bukata aafiki kwi bantu be bu beena “Aasiriya”. Makome kinyi aabakyebe kutuma kwi Yehowa ku bukwashi bwa Mwana aaye kwete kumunana lelo, bwa kulwa na uno mwishikwanyi e moo ukata? Atukyebe kumona. Kadi kya kumpala, tubande kutala kikumbeene kwitulongyesha kibakitshine Ezekyase pabaadi kumpala kwa masaku aafiki kwi beena Aasiriya.

12. Myanda kinyi ibaadi ikite Ezekyase na booso abaadi naaye bwa kukalwila mwilo w’Efile Mukulu?

¹² Yehowa akuminaa kwitukitshina nka kyakya kyatushii balombeene kobesha kwikitshina, kadi akumina shi tukite byabya byatudi balombeene kobesha. Ezekyase baadi mwisambe na “bakata baaye ba mbulamatadi na ba basalaayi,” na abo booso abaatshile kitshibilo kya “kushika akutuukila meema a tu-myeela twi pasha pa lupata . . . Ezekyase baabangile kwibakuula kimano kyooso kibaabumbwilwe, n’eshimba dinyingye. Beebakiishe tuleya pa kimano, na kangi pasha pa kimano, . . . nkukitshisha masola ebungi na ngabo ibungi.” (2 Mya. 32:3-5) Bwa kukalwila na kukunkusha mwilo Waye aa mafuku, Yehowa baadi mutumikye na balume bebungi be na mashimba anyingye​—Ezekyase, bakata baaye ba mbulamatadi, na batemuki babaadi banyingye mu kikudi.

13. Nkintu kinyi ki na muulo ukile bukata kibaadi kikite Ezekyase bwa kulumbuula mwilo pabitale ngoshi ibaadi kumpala? Patuula.

¹³ Kunyima kwa byabya Ezekyase bakitshine kintu kibaadi na muloo kukila kwimika kwa meema sunga kwibaka bimano bya lupata lulamiibwe kalolo. Bu bibaadi mulami a mikooko etatshisha bwa mikooko yaaye, Ezekyase baadi mubungye mwilo na kwibanyingisha mu kikudi na ano mayi: “Tanwikalanga na moo sunga kutshiina kumpala kwa nfumu a beena Aasiriya . . . , mwanda yawa e neetu mmukile bukome. Aye e na penda bukome bwa bantu, ank’atwe twi na Yehowa Efile eetu bwa kwitukwasha na kwitulwila ngoshi.” Kwibatentekyesha shi Yehowa akyebe kulwila mwilo ngoshi kubaadi kwibanyingishe ku mashimba ngofu! Beena Yuuda “babaanyingile ku mashimba pa kupusha bishima bya Ezekyase nfumu a Yuuda.” Lamiina shi “bishima bya Ezekyase” nyi bibaadi binyingishe bantu ku mashimba. Aye na bakata baaye ba mbulamatadi na bantu baaye ba ngoshi, mpa na mutemuki Mika na Yeeshaya, abaadi baleshe shi mbalami bebuwa ba mikooko, anka bu bibaadi byambe Yehowa mukanwa mwa mutemuki aaye.—2 Mya. 32:7, 8; badika Mika 5:4, 5.

14. Nkinyi kibaadi kikite Rabeshake, na mushindo kinyi ubaadi ukite mwilo?

¹⁴ Nfumu a Aasiriya baadi mutuule kishalelo kyaye mu Lakishe, kuushi kwa Yeelusaleme dya kutwelela nguba. Kwakwa, baadi mutume bantu basatu, aye nkulungula beena Yeelusaleme bwashi belambule kwadi. Mwakwidi aaye, baadi na mwasu wa bu Rabeshake, baadi mutumikye na mayele ebungi. Pabakwile mu kina Ebreeyi, balungwile mwilo bwashi balekye kukokyela nfumu na kukumiina kwilambula kwi beena Aasiriya, ebadimba shi ebatwala mwiumbo mwabakyebe kwikala na nshalelo ebuwa. (Badika 2 Banfumu 18:31, 32.) Akupu Rabeshake bambile shi, anka bi b’efile ba angi maumbo ta mbobeshe kukalwila balangwidi baabo, Yehowa namu tobesha kukalwila beena Yuuda ku maasa a beena Aasiriya nya. Bibakidile kalolo, mwilo ta ngutompe kulonda aa madimi ooso nya, anka bu bikwete kukita bafubi ba Yehowa lelo uno.—Badika 2 Banfumu 18:35, 36.

15. Nkinyi kibaadi akitungu shi beena Yeelusaleme bakite, na mushindo kinyi ubaadi Yehowa mupaashe kibundji?

¹⁵ Ezekyase baadi mwinyongole ngofu, kadi pamutwe pa nkakimba bukwashi kwi ungi mwilo, baadi mwitanyishe mutemuki Yeeshaya. Yeeshaya balungwile Ezekyase shi: “[Senakeribe] taatwele mu luno lupata, teemwasa mikyetwe nya.” (2 Bf. 19:32) Kibaadi kitekibwe kwi beena Yeelusaleme nyi mpenda kushaala banyingye ku mashimba. Yehowa akyebe kulwila  Yuuda ngoshi. Na baadi mwibalwile ngoshi! “Bwinyi bwabwa bufuku, mwikeeyilu wa Yehowa ubaatuukile, awo nkusaasula kishaleelo kya beena Aasiriya.” (2 Bf. 19:35) Yuuda baadi mupashibwe, ta mpa mwanda shi Ezekyase baadi mwimikye nsulo ya meema a mu lupata sunga kwibaka bimano nya, kadi mpa mwanda wa Efile Mukulu.

16. Mba nnanyi batudya kupwandjikisha na (a) beena Yeelusaleme (b) “beena Aasiriya” (c) balami ba mikooko musambobidi, baana-buwa ba bantu mwanda?

¹⁶ Butemuki bwa balami musambobidi na baana-buwa ba bantu mwanda bukwete kulombana dingi mu ano mafuku. Beena kibundji kya Yeelusaleme abaadi bebatuukye ngoshi kwi beena Aasiriya. Mu mafuku aafiki, bafubi ba Yehowa abamweneka bu bashi na bukome abakyebe kwibatuuka ngoshi kwi “beena Aasiriya” ba ano mafuku, bakwete kukimba kwibatuuta. Bifundwe abisambila pabitale kwakwa kutuukibwa kwa ngoshi mpa na kutuukibwa kwa ngoshi ya ‘Gog a ku Magog,’ ngoshi ya “nfumu a kunundu,” na ngoshi ya “banfumu ba pa nsenga.” (Ez. 38:2, 10-13; Dan. 11:40, 44, 45; Bif. 17:14; 19:19) Ino yooso ayilesha ngoshi ilekenelekene su? Nya. Bible mmukumbeene kwisamba pabitale ngoshi imune kadi kwiyitanyina mu mishindo ibungi. ‘Mbina ngoshi kinyi bifwame’ byabadi baleshe mu butemuki bwa Mika byabalesha shi Yehowa akyebe kwibwesha bwa kulwisha yawa mwishikwanyi mukata—“Aasiriya”? Pangi mmukumbeene kutumika na “balami ba mikooko musambobidi, baana-buwa ba bantu mwanda”! (Mik. 5:4) Balami ba mikooko na baana-buwa (sunga “bakunkushi,” EEM) mu kino kisaka kya ngoshi nyi mbakulu mu tukongye. (1 Mp. 5:2) Lelo uno, Yehowa mutuushe bidibwa bibungi bya mu kikudi bwa kudisha mikooko yaaye, bwa kunyingisha mwilo waaye bwa ngoshi i kumpala ayikyebe kufika kwi “Aasiriya” a ano mafuku. * Butemuki bwa Mika abwamba shi abakyebe ‘kudiisha nsenga ya Aasiriya na mwele.’ (Mik. 5:5) Oolo, mu ‘bina ngoshi byaabo,’ atusangana ‘kimpulu akibapa kikudi,’ Eyi dy’Efile Mukulu.—2 Kod. 10:4; Ef. 6:17.

17. Malongyesha kinyi ananka akumbeene kupeta bakulu mu uno mwanda ubatukatuka mu kulonga?

¹⁷ Bakulu bakwete kubadika uno mwisambo mbalombeene kupeta ano malongyesha ku uno mwanda ubatukatuka mu kulonga: (1) Etabula dii na muulo dyatudi balombeene kukita bwa kwilumbuula ku ngoshi ayikeetulwisha “Aasiriya” ndya kunyingisha lukumiino lwetu mwi Efile Mukulu na kukwasha bangi bakwetu bwabadya kukita byabya. (2) Nsaa ayiketutuuku “Aasiriya” ngoshi, bakulu mbalombeene kwikala na lukulupilo shi Yehowa aketupaasha. (3) Mu yaaya nsaa, mayi akumbeene kwitupa ndumbulwilo a Yehowa bwa kwitupaasha ngalombeene kumweneka bu ashii buwa muyiile binangu bya bu bantu. Ooso a kwatudi e na kya kwikala mwilumbuule bwa kukokyela mayi ooso abadi balombeene kwitupa, su amweneka bu alombane muyiile binangu bya bantu sunga akutwe kumweneka bu ebuwa. (4) Ino nyi nsaa ayitungu shi booso bakwete kutuula lukulupilo lwabo mu tulasa tukata, mu bintu bya ku mbidi sunga mu ndumbulwilo ya baana ba bantu bwabadya kushintuula ngyelelo aabo a binangu. Abitungu shi bakulu bekale belumbuule bwa kukwasha bano bakwete kutshimbisha lukumiino lwabo.

18. Kunangusheena ku uno mwanda nkulombeene kwitukwasha mu mushindo kinyi mu mafuku e kumpala?

¹⁸ Kwi kipungo akikekala bafubi ba Yehowa ba lelo uno bu be mu masaku nka bu bibaadi beena Yuuda mu Yeelusaleme mu mafuku a Ezekyase. Mu aa mafuku, abitungu shi mayi a Ezekyase etunyingishe atwe booso. Tatulubanga shi beshikwanyi netu be na “bukome bwa bantu, anka atwe twi na Yehowa Efile etu bwa kwitukwasha na kwitulwila ngoshi”!—2 Mya. 32:8.