1, 2. (a) Nkinyi kilombeene kukitshika su mikooko ngilamiibwe kalolo? (b) Bwakinyi bantu bebungi mu mafuku a Yesu abaadi bu mikooko ishii na mulami?

MIKOOKO ayikalaa biya su mulami aayo kwete kwitatshisha bwa kwiyilama kalolo. Mukanda umune utale myanda ya kumuna mikooko awamba shi: “Muntu kwete kwenda penda na mikooko mbalo yayidya kudya lubishi kushi kukita tungi tu myanda atulesha shi mwiyifule na shi i mu binangu byaaye mukumbeene kubanga kumona mikooko ibungi ayikumbu na kukutwa kutanda.” Kadi, su mikooko ayilamibwa kalolo, ayikyebe kwikala bibuwa.

² Mushindo wi balami ba lombe lw’Efile Mukulu abetatshisha bwa mukooko ooso wabadi bebape na kwiubamba aukyebe kukwasha bwashi kakongye kekale kanyingye mu kikudi. Tutentekyeshe shi Yesu baadi mupushishe bibumbu bya bantu lusa mwanda “babaadi bakookye, na bafwambukye buu mikooko ishii na mulami.” (Mat. 9:36) Bwakinyi abaadi mu aa malwa? Mwanda baaba abaadi na mudimo wa kulongyesha bantu miiya y’Efile Mukulu abaadi na mashimba apape, abaadi abakimbi kudiila mu mongo mwa mikooko, na abaadi bansesa. Pamutwe pa kukwasha na kudiisha lombe lw’Efile Mukulu mu kikudi, bakata ba beena Isaleele abaadi abebatenteka “biita bi bushito” ku mapampa.—Mat. 23:4.

3. Nkinyi akitungu shi bakulu ba mu kakongye baukye pabitale kulombasha kwa mudimo wabo bu balami ba mu kikudi?

³ Beena Kidishitu balami ba mikooko lelo uno—bakulu mu kakongye—be na mudimo ukata. Mikooko i mu lombe lwabakwete kulama ngya Yehowa na Yesu, i na muulo ukata kwi Yesu aye “mulami ebuwa.” (Yo. 10:11) Mikooko abaadi ‘beyiule, bafuta muulo utungwe’ ubaadi Yesu mufute na “mase [aaye] aneeme.” (1 Kod. 6:20; 1 Mp. 1:18, 19) Baadi mufule mikooko ngofu, aye nkukumiina kupaana muwa waye bwabo. Abitungu  shi bakulu bekale abatentekyesha shi abo mbalami be muushi mwa ungi Mulami, babakwete kukunkusha kwi Mwana a kifulo a Efile Mukulu, Yesu Kidishitu “Mulami mukata a mikooko.”—Eb. 13:20.

4. Nkinyi kyatukyebe kutaluula mu uno mwisambo?

⁴ Kadi, mushindo kinyi dingi ulombeene bakulu beena Kishitu kukitshina mikooko myanda? Beena kakongye abebatekye bwabadya ‘kukookyela bakunkushi baabo.’ Mu ungi mushindo, bakulu beena Kidiishitu abebatekye bwabadya kupela ‘kumuna baaba babadi bebape kulama.’ (Eb. 13:17; badika 1 Mpyeele 5:2, 3.) Mushindo kinyi ulombeene bakulu basangudiibwe kukunkusha lombe kushii kwilumuna? Mu bingi bishima, bakulu mbalombeene kulombasha nkalo ya mikooko yabadi bebape kwi Efile Mukulu naminyi kushii kutupilwa matalwa abadi bebape?

5. Myanda yabadi besambe mu Yeeshaya 40:11 ayilesha kinyi pabitale Yehowa?

⁵ Mutemuki Yeeshaya bambile pabitale Yehowa shi: “E bu mulami a mikôko adîsha lombe lwê. P’ebwesha mboko yê, aîbungila kwadi. Asapîla [atwala] bâna ba mikôko [mu kyadi kyaaye] na kukunkusha kalolo yaya yoso ayomesha.” (Yesh. 40:11, EEM) Bino bishima abilesha shi Yehowa ekalakasha bwa nkalo ya beena kakongye bashadile sunga babofule ku mashimba. Bu byadi mulami, ashinguula nkalo ya mukooko ooso wi mu lombe lwaye na e kwanka bwa kwiyikwasha, Yehowa auku nkalo ya baaba be mu kakongye na e na muloo wa kwibatwadila bukwashi bwabadi nabo lukalo. Anka bu bi mulami atwalaa kana ka mukooko na kwikabwikiila mu kilamba kyaaye pakudi mushindo, Yehowa—“Yaaya a lusa”— akyebe kwitukwasha ngofu mu bipungo bya mpombo. Akyebe kwitusamba su tubafumankana na kutompibwa kukata sunga kwitukwasha patudi na lukalo lwa kintu kampanda.—2 Kod. 1:3, 4.

6. Bu byadi mulami a mikooko a mu kikudi, mushindo kinyi ukumbeene mukulu kulonda kileshesho kya Yehowa?

⁶ Nshetu e mwiyilu nyi nkileshesho ki buwa bukile akitungu shi mukulu ooso alonde! Anka bu Yehowa, abitungu ekale mutuule binangu byaaye ku nkalo ya mikooko. Su auku nkalakasho ikwete kufumankana nayo mikooko na nkalo yaayo ayitungu kutaluula bukidi bukidi, mukulu ekala na mushindo wa kwiyikwasha na kwiyinyingisha. (Mye. 27:23) Eyendo, abitungu shi mukulu ekale esamba kalolo na bakwabo beena Kidishitu. Kushii kutwela mu myanda itale muntu nabeene, mukulu etatshisha bwa kumona na kupusha myanda yooso ayikitshika mu kakongye bwa kumona mushindo wa “kukwasha . . . babofule.”—Bik. 20:35; 1 Tes. 4:11.

7. (a) Mushindo kinyi ubaabadi abakitshina mikooko y’Efile Mukulu myanda mu mafuku a Ezekyele na Yeelemiya? (b) Kutopeka kubaadi Efile Mukulu mutopekye balami bakutwe kululama akwitulongyesha mwanda kinyi?

⁷ Tubande kutala bibaadi ngikashi ya balami ba mikooko babaabadi batopekye kwi Efile Mukulu. Mu mafuku a Ezekyele na Yeelemiya, Yehowa baadi mutopekye baaba babaadi na bushito bwa kulama mikooko yaaye paabo nkukutwa kukita wawa mudimo kalolo. Pakubaadi kukutwe muntu a kulama mikooko, lombe lwaye lubaadi mu masaku. Pamutwe pa kudiisha mikooko, baaba balami abeyikyengyeshanga na “abeediishanga’bo baanabeene.” (Ez. 34:7-10; Yel. 23:1) Pangi twi kwamba shi kutopeka kubaadi Efile Mukulu mutopekye baaba balami nkutale bakata ba bipwilo bikwete kwiyamba bu bya bwina Kidishitu. Kadi akulesha dingi shi, abitungu bakulu mu kakongye ka beena Kidishitu betatshishe ngofu bwa kulama mikooko na kifulo kyooso.

8. Mushindo kinyi ubaadi Yesu muleshe kileshesho ki buwa pabitale kutopeka ngikashi ibubi?

⁸ Pa mwanda wa kukutwa kwa kupwidika, mbikumbeene kwikala bukopo bwashi  ingi mikooko y’Efile Mukulu ipushe kalolo akikyebe Efile Mukulu bukidi bukidi. Ngikumbeene kukutwa kobesha kukita myanda muyiile malango a Bifundwe, sunga shi mbalombeene kukita myanda ayilesha shi ta mbanyingye mu lukumiino nya. Nkinyi kikumbeene kukita bakulu? Abitungu balonde kileshesho kya lwishinko lubaadi nalo Yesu pabitale balongi baaye, babaadi abekalakasha bwa kuuka su nnanyi a kwabadi akekala mukile bukata mu Bufumu bw’Efile Mukulu. Pamutwe pa kushimisha lwishinko, Yesu batungunukile na kulongyesha balongi baaye na kwibapa elango ditale kulesha kwiyisha. (Luk. 9:46-48; 22:24-27) Pa’ye kwibasuula mikoolo, Yesu baadi mwibalongyeshe kwiyisha, eyikashi aditungu shi bakulu beena Kidishitu bekale nadyo.—Badika Yowano 13:12-15; 1 Mp. 2:21.

9. Nkinyi kibaadi Yesu mulungule balongi baaye bwashi bakite?

⁹ Mweneno a Yesu pabitale mudimo wa mulami a mikooko y’Efile Mukulu mwilekeene na yawa baadi naye Jaake na Yowano. Bano batumibwa babidi abakimbile kwikala na mwasu ukata mu Bufumu bw’Efile Mukulu. Kadi Yesu baadi mwibakwashe bwa kwaluula binangu byabo, aye nkwamba shi: “Anuuku’shi banfumu ba bisamba mbebimune mu bufumu bwabo, na’shi bakata mbatuule bantu ku matalwa aabo. Tabii na kya kwikala byabya munkatshi mwenu nya. Anka, su muntu akyebe kwikala mukata munkatshi mwenu, aikale mufubi eenu.” (Mat. 20:25, 26) Batumibwa abaadi na kya kusumbula binangu bya kukimba ‘kumuna’ bakwabo sunga ‘kutuula bantu ku matalwa aabo.’

10. Yesu akyebe shi bakulu bakitshine lombe lwaye myanda mu mushindo kinyi, na nkileshesho kinyi kibalekyele Mpoolo pabitale uno mwanda?

¹⁰ Yesu akumiina bwashi bakulu beena Kidishitu bakitshine lombe lwaye myanda anka bu byaadi mulombeene kwilukitshina. Abitungu bakumiine kwikala bu bafubi ba bakwabo, kushii bu bakata baabo. Mpoolo mutumibwa baadi na kwiyisha, mwanda balungwile bakulu ba mu kakongye ka Efeeze shi: “Anuwuku byandi neenu mafuku ooso byatshile efuku dinafikile mu Asii. Nee mufubile Mwanaana na kwiyisha kooso.” Mpoolo baadi akyebe shi bano bakulu bakwashe bakwabo n’eshimba dimune, na kwiyisha. Bambile shi: “Nenuleeshanga nguba ooso’shi mu kufwambuka ngi mulombeene kupetshiibwa bintu bya kukwasha nabyo babofule.” (Bik. 20:18, 19, 35) Mpoolo baadi mulungule beena Kodinto shi tabaadi mukata a lukumiino lwabo nya. Anka shi baadi afubu pamune nabo bwashi bekale na muloo. (2 Kod. 1:24) Mpoolo mmulekyele bakulu kileshesho kikata kya muntu sha kwiyisha baadi mwipane mu mudimo.

11, 12. Mushindo kinyi ulombeene mukulu kukwasha mukwabo mwina Kidishitu bwashi aate kitshibilo kibuwa?

¹¹ Abitungu shi mukulu mu kakongye ‘ekale mulamate pepoo ku mukandu wa binyibinyi ulombashene na ndambukiisho.’ (Tt. 1:9, Kilombeno kipya) Kadi akitshi byabya “mu kalolo.” (Gal. 6:1) Pamutwe pa kutompa kukitshisha bakwabo beena kakongye myanda pa bukopo, mulami ebuwa elaa binangu bwa kumona mushindo wa kwibakuma ku mashimba. Mukulu mmukumbeene kulesha mukwetu mayi a mu Bifundwe aadi mulombeene kulonda nsaa yakyebe kwata kitshibilo kikata sunga kutaluula naaye myanda kampanda i mu mikanda yetu. Mukumbeene kutaluula naaye byabadi bapwe kufunda mu mikanda yetu pabitale wawa mwanda. Mmulombeene kulungula muntu bwashi eele binangu pabitale mushindo ukumbeene myanda ilekenelekene yakitshi kulwisha sunga kulongamisha kipwano kyaye na Yehowa. Mukulu mmukumbeene dingi kulesha bwakinyi bibuwa kukimba bukunkushi bw’Efile Mukulu mu luteko kumpala kwa kwata kitshibilo. (Mye. 3:5, 6) Kunyima kwa kwisamba yaaya myanda na mukwabo mwina Kidishitu, mukulu  amutadiila bwashi aye nabeene aate kitshibilo.—Lom. 14:1-4.

¹² Mbalo penda imune ilombeene bakulu beena Kidishitu kupeta malango akupa beena Kidishitu nabo mpenda mu Bible. Byabya, abitungu baukye mushindo wa kutumika kalolo na Bible na kulonda nka akyamba Bible. Kukita byabya akukwasha bakulu bwashi tabatumikanga na matalwa abo bi bubi. Na dingi, abo mbalami be mushi mwa Balami bakata, na mwina kakongye ooso akyebe nkemuka kumpala kwa Yehowa na Yesu bwa bitshibilo byooso byata.—Gal. 6:5, 7, 8.

13, 14. Mmu myanda kinyi amutungu shi mukulu ekale bu kileshesho kwi kakongye?

¹³ Kunyima kwa kulungula bakulu mu kakongye bwashi ‘tabamunanga baaba babadi bebape kulama,’ Mpyeele mutumibwa ebalanga bwashi ‘bekale bu kileshesho kwi kakongye.’ (1 Mp. 5:3.) Mushindo kinyi ulombeene mukulu kwikala bu kileshesho kwi lombe? Tubande kutala myanda ibidi ya ku myanda ayitungu shi muntu “akimbi kwikala bu mukulu a [kakongye]” alombashe. Mmulombeene kwikala “mwiyeeshe,” abitungu dingi “awukye kalolo bya kuludika nshibo yaaye.” Su mukulu e na kyaaye kifuko, abitungu aukye kwikikunkusha kalolo pa’ye kwikala bu kileshesho, mwanda “muntu shi mulombeene kuludika nshibo yaaye aye nabeene, mbii-kunyi byady’a kukunkusha [kakongye] k’Efile Mukulu?” (1 Tim. 3:1, 2, 4, 5) Bwa kwikala mukulu, abitungu shi muntu ekale mwiyeeshe bwa kupusha kalolo miiya y’Efile Mukulu na mushindo wa kwiyitumikila mu nshalelo aaye. Mmuntu e na binangu biishinkye na shendaa na myanda lubilo lubilo. Beena kakongye p’abamono ino ngikashi, abatuulu lukulupilo lwabo mwadi.

¹⁴ Kwikala kumpala pabitale mudimo wa bulungudi nyi ngungi mushindo wi bakulu bu kileshesho kwi bakwabo beena Kidishitu. Pabitale uno mwanda, Yesu mulekyele bakulu kileshesho kya kulonda. Kulungula mukandu wibuwa wa Bufumu kubaadi mudimo wa muulo ukata wa Yesu pabaadi pano pa nsenga. Baadi muleshe balongi baaye mushindo wa kukita uno mudimo. (Mak. 1:38; Luk. 8:1) Ano mafuku etu, kulungula mukandu wibuwa pamune na bakulu, kumona katshintshi kaabo mu uno mudimo aupasha myuwa, na kulonga mishindo yaabo ya kulongyesha akunyingisha balungudi be bungi ku mashimba! Mushindo ukwete bakulu kwipana na katshintshi bwa kulungula mukandu wibuwa, aku namu be na myanda ibungi ya kukita, kukwete kutuma kakongye kashima bwa kwikala na kaaka katshintshi. Bakulu mbalombeene dingi kwikala bu kileshesho kwi bakwabo su bakwete kwilumbuula kalolo bwa bisangilo bya kakongye na kutuusha myaluulo mpa na kukita ingi midimo ya kakongye, bu kileshesho kusuula na kulumbuula Nshibo ya Bufumu.—Ef. 5:15, 16; badika Beena-Ebreeyi 13:7.

15. Bwakinyi bakulu abendaa mu kutembela beena kakongye?

¹⁵ Mulami ebuwa akitaa bukidibuki mwaye mooso bwa kukwasha mukooko utapikye sunga aukumbu. Bi mumune, bakulu be  na kya kukita byabya bwa kukwasha mwina kakongye ooso kwete kukumba sunga atungu kukwasha mu kikudi. Banunu na baaba bakwete kukumba mbakumbeene kwikala na lukalo lwa bukwashi bwa ku mbidi, kadi lukalo lukata ndwa bukwashi bwa mu kikudi na kunyingishibwa ku mashimba. (1 Tes. 5:14) Bansongwalume na bansongwakashi mbakumbeene kwikala na nkalakasho kampanda, pangi abitungu shi bakambile “ndàkalaka ya ku bunsongwa.” (2 Tim. 2:22) Kulama mikooko nyi nkutembela beena kakongye nsaa na nsaa bwa kuuka myanda yabakwete kufumankana nayo na kwibanyingisha na malango alombane aafiki mu Bifundwe. Su nukwete kukita byabya pa nsaa, nwi balombeene kupudisha myanda kumpala kwa’yo kutama.

16. Su mwina kakongye kampanda e na lukalo na bukwashi, mbukwashi kinyi bulombeene bakulu kumupa?

¹⁶ Kadi su myanda ibakidi bungi mu mushindo aumweneka shi mwina kakongye kampanda e mu masaku mu kikudi? Jaake, umune a ku bafundji ba Bible belele luno lukonko: “Umune aa kwanudi ee na mukumbo su? Aitaanyishe bakulu ba kakongye, bwa’shi bamutekyele, kubaapu bamushingye mwimu wa kishila mwishina dya Yehowa. Dingi, su ee na milwisho yaadi mukite, aimulekyeelwa.” (Ja. 5:14, 15) Sunga yawa muntu akumbu mu kikudi bapele ‘kwitanyina bakulu’ kadi abo su abauku mwanda waye, abitungu bafikye mu kumukwasha bukidi. Nsaa yabasambila na bakwabo na kwibakwasha pa nsaa, bakulu abebataadisha mashimba na kwibanyingisha mu kikudi.—Badika Yeeshaya 32:1, 2.

17. Nsaa i bakulu bakwete kulonda kileshesho kya “mulami mukata,” nkinyi kilombeene kukitshika?

¹⁷ Mu byooso byabakwete kukita mu ndumbulwilo a Yehowa, balami beena Kidishitu abetatshisha bwa kulonda kileshesho kya Yesu Kidishitu, “mulami mukata.” Ku bukwashi bwa mu kikudi abufiki kwi baaba balume banyingye mu kikudi, bafubi b’Efile Mukulu bakwete kukwashibwa ngofu na abatungunuka na kwenda kumpala. Bwa bino byooso, twi na lutumbu lukata na mashimba etu aetutumu bwa kutumbisha Yehowa, Mulami mukile balami booso.