1. Nkinyi kilombeene kwitwikasha na mashimba kwiyilu?

PABAADI pabangye Bufumu bwa Mesiya mu 1914, ndumbulwilo a Satana baadi mutwele mu mafuku aye a nfudiilo. Ngoshi ibaadi ituukye mwiyilu, na Yesu nkusumbula Diabulu na bademo baaye pa nsenga. (Badika Bifumbulwe 12:7-9.) Satana auku shi “kubaamushaadila mafuku apeela.” (Bif. 12:12) Sunga mbyabya, kino kipungo kyabetanyina bu “mafuku apeela” kibaapu kukita bipwa makumi ebungi, na bangi bakwete kumona shi kibakidi bula. Patukwete kuyindjila bwashi Yehowa akumbashe mulayilo waye, twi na mashimba kwiyilu su?

2. Uno mwisambo aukyebe kwisambila myanda kinyi?

² Kwikala n’eshimba kwiyilu kwi masaku, mwanda nkulombeene twitutuma mu kukita myanda ishi mwishinda. Nkinyi kilombeene kwitukwasha bwa kutungunuka na kuyindjila? Uno mwisambo aukyebe kwitukwasha bwa kutungunuka na kuyindjila mwanda, aukyebe kwaluula ku ino nkonko ayilondo: (1) Kileshesho kya mutemuki Mika akitulongyesha kinyi pabitale kuyindjila Mwanana? (2) Myanda kinyi ayikyebe kulesha shi kipungo kyetu kya kuyindjila takidi ku nfudiilo? (3) Mushindo kinyi watudi balombeene kulesha shi atusangeela lwishinko lwa Yehowa?

3. Mu mafuku a Mika, beena Isaleele abaadi naminyi?

³ Badika Mika 7:2-6. Mika, mutemuki a Yehowa, baadi mumone mushindo ubaadi mwilo wa Isaleele ukwete kwenda na kulwila mu kikudi mpa na bibaudi ufwe mu kikudi mu mafuku a Nfumu Akaaze. Mika baadi mupwandikishe beena Isaleele bakutwe kululama bu ‘milobo’ na bu ‘mpango ya meeba.’ Anka bu mulobo na bu lupango lwa meeba lukumbeene kutapa ooso elwashina, baaba beena Isaleele babi babaadi abalwiisha booso baabafumankana nabo. Bubi bubaadi bupalakane ngofu mpa na bifuko nkulwila. Bu bibaadi auku shi tamulombeene kushintuula kintu su nkimune aye  nabeene, Mika baadi mutuule lukulupilo kwi Yehowa. Byabya baadi ayindjila na lwishinko looso bwashi Yehowa akite ki mwishimba dyaaye. Mika baadi mukulupile shi Yehowa akyebe kupudisha ino myanda mu Yaaye nsaa.

4. Mbitompwanga kinyi byatukwete kufumankana nabyo?

⁴ Anka bu Mika, twi bashale munkatshi mwa bantu abakimbi nka penda buwa bwabo. Bebungi ta be ‘na lutumbu, mbapeeshi ba bintu bya kishila, bashii na lusa.’ (2 Tim. 3:2, 3) Abitushidishaa eshimba kumona shi beena mudimo netu, beena kalasa netu na bekungishanyi netu abakimbaa nka buwa bwabo. Mpa na bangi bafubi b’Efile Mukulu, be mu kutompibwa kukata. Yesu baadi mwambe shi balongi baaye abakyebe kufumankana na kubingwabingwa mu bifuko byabo, na baadi mwakule bishima bi bu bino bi mu mukanda wa Mika 7:6 bwa kulesha mushindo aukyebe kwikala mukandu waye kwi bantu. Bambile shi: “Ne mufikye mu kwabuula, mwana mulume na nshaaye, mwana-mukashi na nyinaaye, shy’a-mwana na nyina-mweno; muntu ayikala mu ngo na bantu ba mu kifuko kyaaye.” (Mat. 10:35, 36) Kukambila kusepibwa na kubingwabingwa akufiki kwi bantu ba mu kifuko bashi beena Kidishitu ta nkubofule nya! Su tukwete kutompibwa mu wawa mushindo, tatulekanga kifuko bwashi kitutoshe kufubila Efile Mukulu nya. Pamutwe pa byabya, atushaala balamate kwi Yehowa na kumwindjila bwashi aye nabeene apudishe myanda. Su tukwete kumuteka nsaa na nsaa bwashi etukwashe, aye akyebe kwitupa bukome na kinangu kikumbeene kwitukwasha bwa kukambila bitompwanga.

5, 6. Yehowa baadi mupe Mika bwedi kinyi, kadi, mbutemuki kinyi bushibaadi Mika mumone kulombana kwabo?

⁵ Yehowa baadi mupe Mika bwedi mwanda wa lwishinko lwaye. Mika baadi mumone bibaadi bifudiile Nfumu Akaaze na bufumu bwaye bubi. Baadi dingi mumone bibaadi Ezekyase, mwana mulume a Akaaze, mupyane bufumu na kwalusha lulangwilo lwa binyibinyi. Na kiimu kya Yehowa kitale Samadiya bibaadi Mika mutemukye kibaadi kilombane pabafikile beena Asirii mu kulwa na bufumu bwa bisamba bya beena Isaleele bya kunundu.—Mik. 1:6.

⁶ Sunga mbyabya, Mika tabaadi mumone kukumbana kwa myanda yooso ibaadi Yehowa mumutume bwa kutemuka nya. Bu kileshesho, Mika baadi mufunde shi: “Mu mafuku a nfudîlo, Yehowa akakusha mwengyé pebakwe nshibo yê bula kukila ingi yoso, ukasabukile mangulu oso. Bantu ba bisamba bîlekênelekêne abakafiki lubilo bemuûle. Apakafiki baba bantu ba mîlo i bungi, abakelungushêna’shi: ‘Twendeyi, tukakâmine ku mwengyé wa Yehowa.’” (Mik. 4:1, 2, EEM) Mika baadi mufwe mafuku ebungi kumpala kwa kulombana kwa buno butemuki. Sunga mbyabya, baadi na kitshibilo kya kushaala mulamate kwi Yehowa mpa na ku lufu, sunga mbibaadi bantu be pepi naaye na mwikeelo wi bubi. Pa uno mwanda, Mika baadi mufunde shi: “Mwilo na mwilo autambuka mwishina dy’efile aawo, anka bwetu’twe, atutambuka mwishina dya Yehowa Efile Mukulu etu bwa looso.” (Mik. 4:5, NW) Mika baadi mulombeene kwikala na lwishinko munda mwa kipungo ki bukopo, mwanda baadi na lukulupilo mwi Yehowa shi, akyebe kulombasha milayilo Yaaye yooso. Mutemuki sha kululama baadi mutuule lukulupilo mwi Yehowa.

7, 8. (a) Bwakinyi abitungu shi twikale na lukulupilo? (b) Nkinyi kilombeene kukisha nsaa bukidi bukidi?

⁷ Atwe namu twi na lukulupilo lwi byabya mwi Yehowa su? Twi na kya kwikala na lukulupilo lwi byabya. Twi bamone na meso etu mushindo ulombane butemuki bwa Mika. Mu “mafuku a nfudîlo,” midiyo ya bantu ba miilo yooso na bisamba na myakulo yooso mbakamine “ku mwengyé wa Yehowa.” Sunga byekala shi mbafikye mu miilo ishi ipusheene, bano balangwidi bakwete kukupila “myeele yaabo kitootwa, abeeyikitshi nkanya,” na abapele ‘kuyiya kulwa ngoshi.’ (Mik. 4:3) Nyi nkinemo kikata kwikala munkatshi mwa mwilo wa Yehowa wi na kufukama!

⁸ Eyendo shi, twi na lukalo lwa shi Yehowa afudiishe uno ndumbulwilo bukidi bukidi. Bwashi tutungunukye na kuyindjila Yehowa, abitungu tumone myanda mu mushindo awiyimonaa Yehowa. Mmutshibe efuku dyakyebe kusambisha bantu kukidila kwi “muntu aadi musangule” Yesu Kidishitu. (Bik. 17:31) Kadi, kumpala  kwa byabya, Efile Mukulu kwete kupa bantu ba mishindo yooso mushindo wa kupeta “kyuukilo kya binyibinyi,” bwashi bekifubile mu nshalelo aabo na bapande. Muwa wa bantu bebungi wi mu masaku. (Badika 1 Timotee 2:3, 4.) Su twi bepaane ngofu bwa kukwasha bantu bwashi bapete kyukilo kya binyibinyi ky’Efile Mukulu, mafuku abashaala kumpala kwashi Yehowa asambishe bantu aakyebe kukila lubilo. Mu kapindji na’ka—sunga kushi’twe kuuka—aa mafuku aakyebe kufika ku nfudiilo. P’aakafudiila, atwikala na muloo wi kashaa pa mwanda atwikalanga bepaane ngofu mu mudimo wa kulungula mukandu wa Bufumu!

9-11. Mwanda wi mu 1 Beena-Tesalonika 5:3 ngupwe kulombana su? Patuula.

⁹ Badika 1 Beena-Tesalonika 5:1-3. Mu mafuku apeela e kumpala, miilo ayikyebe kwakula shi, “binobino twi mu kufukama na kwiyikeela.” Bwashi bino bishima byabo tabitubasushanga, abitungu “twikale bapasukye, beèlàme.” (1 Tes. 5:6) Tubande kutaluula ndambo ya myanda ayikyebe kukidika kumpala kwa’bo kwakula bino bishima bwashi itukwashe bwatudya kwikala bapasukye mu kikudi.

¹⁰ Kunyima kwa ngoshi ya kumpala ya nsenga ishima mpa na kwa ngoshi ya kabidi, miilo ibaadi ayamba shi ibapete kufukama. Kunyima kwa ngoshi ya kumpala ya nsenga ishima, abaadi bakite Kisamba kya miilo (Société des Nations), bwa kufwisha kufukama. Kunyima kwa ngoshi ya kabidi ya nsenga ishima, Nations Unies baadi mufikye bu lukulupilo lwa bantu bebungi bwa kufwisha kufukama. Ma guvernema ebungi na bakata bebungi ba bipwilo abaadi abamono shi ino ndumbulwilo ngikumbeene kufwisha kufukama munkatshi mwa bantu. Bu kileshesho, mu 1986, Nations Unies baadi mupalakashe mu nsenga ishima shi kyakya kipwa nyi nkipwa kya kufukama. Mu kyakya kipwa, bakata ba bipwilo bibungi na ba maumbo ebungi abaadi bebungye pamune na mukata a Kipwilo kya Katolike mu Assisi, mu Italie, bwa kwela nteko bwa kufukama.

¹¹ Sunga mbyabya, kuno kulungula kwa bantu pabitale kufukama na kwiyikeela sunga kungi kubaabadi bakite angi mafuku ta nkulombashe butemuki bwi mu 1 Beena-Tesalonika  5:3. Bwakinyi? Mwanda tankukitshikye “kabutu mususa umune” bu bibaabadi batemukye nya.

12. Nkinyi kyatuuku pabitale kwamba kwashi “binobino twi mu kufukama na kwiyikeela”?

¹² Mba nnanyi abakyebe nkamba shi, “binobino twi mu kufukama na kwiyikeela”? Mmufubo kinyi aukakitshi bakata ba bipwilo bikwete kwiamba bu bya bwina Kidishitu sunga bakata ba bingi bipwilo pabitale uno mwanda? Uno mwanda wa kwamba shi, binobino twi mu kufukama na kwiyikeela aukekala utale bakata ba mbulamatadi naminyi? Bifundwe t’abilesha bino byooso nya. Kyatuuku mpenda shi sunga bebyamba sunga kwibishinkamisha mu mushindo kinyi, abiikala nka mu mushindo aubasusha bantu. Uno ndumbulwilo mubi akyebe kushaala mu maboko a Satana. Mmupwe kulwila aye ooso mushima na akyebe kushaala nka byabya. Mmwanda wa malwa e kashaa su umune a kwatudi alonda myanda ikwete kupalakasha Satana na kwitwesha mu myanda ya uno ndumbulwilo!

13. Bwakinyi mikeeyilu ikwete kwimika mpapi ya kabutu?

¹³ Badika Bifumbulwe 7:1-4. Nsaa yatukwete kutengyela kukumbana kwa butemuki bwi mu 1 Beena-Tesalonika 5:3, mikeeyilu ya bukome ikwete kwimika bipapi bya kabutu bya mpombo ikata. Ikwete kutengyela kinyi? Ungi mwanda ukata mbeuleshe kwi Yowano mutumibwa—kwela kwa “bafubi b’Efile eetu” bashingwe mwimu kitampi kya nfudiilo. * Su booso abapete kitampi kya nfudiilo, miikeyilu ayikyebe kufungula mpapi ya kabutu. Nkinyi akikyebe kukitshika?

14. Nkinyi akilesha shi nfudiilo a Babilone Mukata taadi pepi?

¹⁴ Babilone Mukata, nsangilo a bipwilo byooso bya madimi, akyebe kupeta kyaadi mulombeene kupeta. Bantu ba “miilo, bibumbu, maumbo na myakulo” yooso tabekala dingi ku lupese lwaye nya. Tukwete kumona myanda ayilesha shi nfudiilo aaye taadi pepi. (Bif. 16:12; 17:15-18; 18:7, 8, 21) Na dingi, kukutwa kwa kwipaana mu myanda ya bipwilo na kwibikwasha kukwete kwisambibwa ku bisaashi na mu mikanda, mwanda bipwilo na bakata ba bipwilo bakwete kwibalwisha nsaa na nsaa. Sunga mbyabya, bakunkushi ba bipwilo bya madimi bakwete kumona shi tabe mu masaku nya. Bakwete kwidimba ngofu! Kunyima kwa kwamba shi “binobino twi mu kufukama na kwiyikeela” bakata ba myanda ya politike ya uno ndumbulwilo e bubi abakyebe kwialuula kwi bipwilo bya madimi bwa kwibibutula. Babilone Mukata t’ekala dingi kwanka nya! Oolo, twi na kya kwindjila na lwishinko looso bwa kumona ino myanda yooso.—Bif. 18:8, 10.

15. Bwakinyi Yehowa tamupudishe myanda bukidi bukidi?

¹⁵ Sunga mbyabadi basabuule eshina dyaaye kwi bantu, Yehowa atengyela na lwishinko looso bwa kupudisha uno mwanda pa nsaa ilombane. Yehowa takumina shi bantu be na mashimba alulame babutudibwe nya. (2 Mp. 3:9, 10) Nyi byatupusha namu su? Kumpala kwa kufika kwa efuku dya Yehowa, twi bakumbeene kulesha shi atusangeela lwishinko lwaye mu ino mishindo ayilondo.

16, 17. (a) Bwakinyi abitungu tukwashe baaba bapwe kuleka kufuba? (b) Bwakinyi bi na muulo bwa baaba bapwe kuleka kufuba bwabadya kwalukiila kwi Yehowa?

¹⁶ Kwasha balungudi bapwe kuleka kufuba bwabadya kwikala banyingye. Yesu baakwile shi akwikalaa muloo mwiyilu bwa mukooko umune ushimine nsaa yaumweneka. (Mat. 18:14; Luk. 15:3-7) Mu mishindo yooso, Yehowa ekalakasha ngofu bwa booso baleeshe kifulo bwa eshina dyaye, sunga tabakwete kumufubila na katshintshi dingi binobino nya. Nsaa yatukwete kukwasha baaba bantu bwabadya kwalukiila mu kakongye, tukwete kukwatshisheena Yehowa, na bamwikeeyilu bakwete kusangala.

¹⁷ We umune a ku bano bapwe kuleka kufubila Efile Mukulu na katshintshi su? Pangi mukwetu umune a mu kakongye mmukukitshine mwanda wi bubi na bino mbikutakule bwa kupela kwibung’anyi mu ndumbulwilo a Yehowa.  Pangi kubaapu kukila ndambo ya mafuku, eyipushe shi: ‘Nshalelo ande balongama su, ne na muloo kukila? Yehowa nyi mundwishishe su mmuntu mukutwe kupwidika mundwishishe? Yehowa tabapwile kunkitshina kintu kintushile masaku su? Eyendo, etukitshinaa nka myanda ibuwa. Na dingi, sunga tatulombasha myanda ipusheene na kwilambula kwetu kwadi, etutadiila bwashi tusangale na bintu byooso bibuwa byakwete kwitupa. (Ja. 1:16, 17) Kubashala mafuku apeela bwashi efuku dya Yehowa difikye. Ino nyi nsaa ilombane bwa kwaluka mu maasa a Nshetu a kifulo e mwiyilu na disanka na kwalukiila mu kakongye—mbalo penda immune i na kwiyikeela mu ano mafuku a ku nfudiilo.—Miy. 33:27; Eb. 10:24, 25.

18. Bwakinyi abitungu shi tukwatshishene baaba bakwete kwitukunkusha?

¹⁸ Kukwatshishena baaba bakwete kwitukunkusha. Mu kifulo kyaye kya bu mulami, Yehowa kwete kwitukunkusha na kwitukalwila. Mmusangule Mwana aaye bu Mulami a mikooko mukata. (1 Mp. 5:4) Bakulu be mu tukongye kukila 100 000 bakwete kulama mukooko umune ku umune w’Efile Mukulu. (Bik. 20:28) Patukwete kukwatshishena baaba basangudibwe bwa kwitukunkusha na kululama kooso, atulesha Yehowa na Yesu shi tukwete kusangeela byooso byabadi bakite bwetu.

19. Mushindo kinyi watudi balombeene kwibunga mu milongo?

¹⁹ Kwikala pepi na bakwetu. Bino abilesha kinyi? Nsaa i kisaka kya basalayi kilongyeshibwe kalolo abekitwelela kwi beshikwanyi, basalayi booso abebungaa mu milongo, nyi kwamba shi abefubwilaa pepi na bakwabo. Abekalwila mu mushindo ushi ulombeene kutwela mwishikwanyi. Satana kwete kufwimisha mishindo yaye ya kulwa na bafubi b’Efile mukulu. Ino ta nsaa ya kulwa ngoshi munkatshi mwetu’twe banabeene nya. Ino nyi nsaa ya kwikala pepi na bakwetu, kushii kutala bilubilo bya bakwetu, na kutuula lukumiino mu bukunkushi bwa Yehowa.

20. Nkinyi akitungu shi tukite binobino?

²⁰ Atwe booso tushaale bapasukye mu kikudi na kutungunuka na kwindjila Yehowa. Tuyindjile na lwishinko looso pabakamba shi, “binobino twi mu kufukama na kwiyikeela” na kwedibwa kwa baaba basangudiibwe kitampi kya nfudiilo. Kunyima kwa byabya, mikeeyilu inanka ayikyebe kufungula mpapi ya kabutu, na Babilone Mukata akabutudibwa. Patukwete kutengyela kukitshika kwa ino myanda yooso, tulonde bukunkushi bwa baaba basangudibwe bwa kwitukunkusha mu ndumbulwilo a Yehowa. Twibungye mu milongo bwa kulwa na Diabulu na bademo baaye! Ino nyi nsaa ya kulonda elango dya mufundji a misambo bambile shi: “Kankamanaayi, nunyingye mashimba anwe booso abakulupila kwi Yehowa.”—Mis. 31:25.