‘Kitayi bino bwa kuntentekyesha’
“Pabapwile kutumbula Efile Mukulu, beutshokwele [mukate] akula’shi: ‘Uno nyi mbidi yande ayipânyibwa pa mwanda wenu. Ikalai anukitshi bino mwanda wa kuntentekyeshanga.’”—1 KOD. 11:24, EEM.
1, 2. Nkinyi kibaadi kilombeene kunangushena balondji pabitale nsaa ya kwenda ku Yeelusaleme?
‘NSAA ikwete kukumuka makumbi, twi balombeene kumona etaata dya mweshi kwadibanga kukaamina. Mu kyolwa kya nfudiilo, balami ba mu Yeelusaleme abaadi balombeene kumona kubaluka kwa mweshi. Beena Sanedrine pabaabapushishe byabya, abakwile shi mweshi wa Nisane ubabanga. Akupu bantu abelaa tuulo mwiyilo abapalakeeshe wawa mukandu mususa umune, mpa na bantu bepano abaapusha wanka. Eyendo, Yesu taadi ende ku Yeelusaleme bwashi akafikye kumpala kwa kubanga kidibwa kya Lukilo.’
2 Twi balombeene kupwandikisha shi bino mbibaadi mu binangu bya bangi bantu abaafikile na Yesu mu Peree (pepi na Yordano) mu lwendo lwaye lwa nfudiilo lwa ku Yeelusaleme. (Mat. 19:1; 20:17, 29; Mak. 10:1, 32, 46) Pabaadi palombane efuku dya kumpala dya mweshi wa Nisane wa beena Yuuda abaadi balombeene kutengyela mafuku 13 bwa kukita Lukilo aye nguba baapu kutwela mwifuku dya 14 dya mweshi wa Nisane.
3. Bwakinyi beena Kidishitu abatulaa binangu byabo ku efuku dya kukita Lukilo ?
3 Efuku dya kukita Kidibwa kya Mwanana, ndipushene n’efuku dya Lukilo, adikekala kunyima kwa nguba kupona mwifuku dya 14 dya mweshi wa Kananka 2014. Dino adikyebe kwikala bu efuku dikata bwa beena Kidishitu ba binyibinyi na baaba abafiki mu kuteemesha. Bwakinyi? Pa mwanda wa bino byatubadika mu mukanda wa 1 Beena-Kodinto 11:23-25 shi: “Yesu bufuku bubaabamupeene, baatshile mukate; apu kutumbula, aye nkwiutshokola, nkwamba’shi: ‘Kino mbidi yande ipaanyiibwe mwanda wenu; kitaayi byaabya bwa kuntentekyesha.’ Baakitshiine nka byaabya dimo bwa kipulu.”
4. (a) Nkonko kinyi yatudi balombeene kwiyela pabitale Kitentekyesho kya lufu lwa Yesu? (b) Mushindo kinyi wabatundulaa efuku adikitshika Kitentekyesho kya lufu lwa Yesu ku kipwa kyooso? (Tala kashibo ke na mutwe wa mwanda shi: “Kitentekyesho kya lufu lwa Yesu mu 2014.”)
4 Kushii mpaka okapetekyelwa ku kintu kimune kibaadi Yesu mulungule balondji baaye bwashi bekale abatentekyesha ku kipwa kyooso. Banda kwiyipusha shi: ‘Mushindo kinyi wandi mulombeene kwilumbuula bwa kyakya kyolwa? Mbintu kinyi byabakatumika nabyo kwanka? Mushindo kinyi wabakyebe kukita kyakya kitentekyesho? Nadingi, kino kitentekyesho na bintu byabakatumika nabyo bi na muulo kinyi kwandi?’
MUKATE NA NFINYO
5. Yesu baadi mutekye bwashi balumbuule kinyi bwadya kukita kidibwa kya Lukilo kya nfudiilo na balondji baaye?
5 Yesu pabalungwile balondji baaye bwashi bakalumbuule mbalo ya kukitshiina kidibwa kya Lukilo, tabaadi mwibalungule bwashi bemutuule bintu bikile bungi bwa kulengyesha mwanka nya; anka baadi penda na lukalo lwa mbalo ilombane, kadimbo kashii butshafu mulombeene kushaala kisaka kya bantu. (Badika Maako 14:12-16.) Abaadi balombeene kulumbuula bintu kampanda bwa kidibwa, mukate ushii na kitatusho na nfinyo. Kunyima kwa kukita kidibwa kya Lukilo, Yesu baadi mushimikye kasele pabitale bino bintu bibidi.
6. (a) Kunyima kwa kidibwa kya Lukilo, Yesu baadi mwakule naminyi pabitale mukate? (b) Mmikate ya mushindo kinyi ayitungu kukita nayo Kitentekyesho kya lufu lwa Yesu?
6 Mateo mutumibwa baadi panka bafundjile kunyima shi: “Yesu bâtshile mukate. Pa bapwile kutumbula Efile Mukulu, beutshokwele, eupa balondji bê, âkula’shi: ‘Ataai.’” (Mat. 26:26, EEM) “Mukate” taubaadi na kitatusho nka bibaadi wawa ubaabadi bakite nawo Lukilo. (Efi. 12:8; Miy. 16:3) Mukate ubaadi ukitshiibwe na bukula bwa mikate mpa na mema, kushii kitatusho sunga kwiutoba kantu bu mungwa. Bu byaushibaadi na kitatusho taubaadi ulombeene kutatuka nya. Ubaadi ubaatakane, uume ubofule bwabadya kwiutshokola tupesetupese. Lelo uno kumpala kwa kukita Kitentekyesho kya lufu lwa Yesu bakulu mu tukongye mbalombene kuteka mukwetu kampanda bwashi aate bukula bwa mikate na mema akite mukate, eukite mu mpano abadi beele ndambo ipeela ya mwimu. (Su takwi mushindo wa kupeta bukula bwa mikate, nwi balombeene kwiukita na bukula bwa mupunga, orje, mebele, sunga ingi ntente i byabya.) Sunga kwata mikate ya beena Yuuda yabetamina bu matzoth, mikate yabadi bakipete penda na bukula na mema kushii kwela mayi sunga tutungulu.
7. Yesu baatshile nfinyo ya mushindo kinyi, na lelo uno twi balombeene kukita Kitentekyesho kya lufu lwa Yesu na nfinyo kinyi?
7 Mateo atungunukaa na kwamba shi: “[Yesu] nkwata kipulu, apu kutumbul’Efile aye nkwibapa kyanka aye’shi: ‘Ekitomeeyi booso.’” (Mat. 26:27, 28) Kibaatshile Yesu nyi nkipulu kya nfinyo imonga. (Tayibaadi ilombeene kwikala ya tukuba tubishi nya, mwanda kipungo kya kuumbula kibaadi kipwe kukila.) Nfinyo tayibaadi mu kidibwa kya kumpala kya beena Ejiipitu nya, anka Yesu tabaadi mupele bwashi batumikye nayo mu kidibwa kya Lukilo nya. Baadi mpa na mutumikye na ndambo yaayo mu nsaa ya kukita Kidibwa kya Mwanana. Beena Kidishitu naamu abekalaa na nfinyo nsaa yabakitshi Kitentekyesho kya lufu lwa Yesu. Bu byakushibaadi lukalo lwa kutamisha sunga kunyingisha kineemo kya mase a Yesu, nfinyo yabatumikaa nayo ta nfinyo yabadi beele kintu kya kunyingisha bukome bwayo nya. Abitungu shi bakite na nfinyo imonga ya binyibinyi, nfinyo yabadi bakitshiine ku nshibo sunga kuula nfinyo bu ino yabetaminaa bu beaujolais, bourgogne, sunga chianti.
MUKATE NA NFINYO BI NA MUULO
8. Bwakinyi akipushisha mukate na nfinyo ki na muulo kwi beena Kidishitu?
8 Mpoolo mutumibwa balesheshe patooka shi kukaasha batumibwa, bangi beena Kidishitu be na kya kutungunuka na kukita Kidibwa kya Mwanana. Baadi mufundjile beena Kidishitu naaye ba mu Kodinto shi: “Lulambukisho lunatambwile kwi Nfumu Yesu lwalwa lunenulambukîshe’shi: Nfumu Yesu . . . bâtshile mukate, pabapwile kutumbula Efile Mukulu, beutshokwele âkula shi: ‘Uno nyi mbidi yande aipânyibwa pa mwanda wenu. Ikalai anukitshi bino mwanda wa kuntentekyeshanga.’” (1 Kod. 11:23, 24, EEM) Bi mumune mpa na lelo uno beena Kidishitu abakitaa kino kitentekyesho mususa umune ku kipwa na mbatuule binangu byabo ku akipushisha mukate na nfinyo.
9. Bangi bantu be na mweneno kinyi e bubi pabitale mukate ubaadi Yesu mutumikye nawo?
9 Bangi bantu abendaa ku bipwilo abalesha shi, Yesu bakwile patoka shi: ‘Kino nyi mbidi yande,’ byabya abilesha shi musango umune mukate ubaalulukile wafika bu mbidi yaaye ya binyibinyi. Anka byabya ta nnabyo nya. * Mbidi ya Yesu ibaadi paapa na balondji baaye baasha kululama, mpa na mukate ushii na kitatusho ubaadi utudiibwe paapa. Abipushika kalolo shi, Yesu baadi akula pabitale bintu bya mu kifwanyi, bu bibaadi akula misusa ibungi.—Yo. 2:19-21; 4:13, 14; 10:7; 15:1.
10. Nkinyi kibaadi akilesha mukate ubaabadi batumikye nawo ku Kidibwa kya Mwanana?
10 Batumibwa, mukate ubaabadi balombeene kumona na kudya ubaadi aulesha mbidi ya Yesu. Mbidi kinyi? Mu angi mafuku bafubi b’Efile Mukulu abaadi abapwandikisha shi bu bibaadi Yesu mutshokole mukate, kadi mufufwa waaye su ngumune taubaadi utshokolwe nya, mukate ubaadi aulesha “mbidi ya Kidishitu,” kakongye ka bashingwe mwimu. (Ef. 4:12; Lom. 12:4, 5; 1 Kod. 10:16, 17; 12:27) Kadi kunyima kwa kukimbuula ngofu, mbasangane shi Bifundwe abilesha shi mukate ubaadi aulesha mbidi ya Yesu bu muntu. Yesu “bafwambukile mu mbidi,” abaadi mpa na bamupudikye. Byabya ku Kidibwa kya Mwanana, mukate ubaadi aulesha mbidi ya Yesu aye nabeene “baasemwine milwisho yeetu.”—1 Mp. 2:21-24; 4:1; Yo. 19:33-36; Eb. 10:5-7.
11, 12. (a) Yesu bakwile kinyi pabitale nfinyo? (b) Nfinyo yabatumikaa nayo ku Kidibwa kya Mwanana ayilesha kinyi?
11 Bino abitukwasha bwatudya kupusha kibaadi Yesu mwakule pabitale nfinyo. Atubadika shi: “Bâtshile namu nyi ekopo nka kipaso kimune âkula’shi: ‘Dino ekopo nyi nkilombeeno kipya . . . akishinkamishwa na mase ande.’” (1 Kod. 11:25, EEM) Mu ma Bible ebungi mbafunde nka bi mumune na bi mu Bible a Robert Young shi: “Dino ekopo nyi nkilombeeno kipya kya mase ande.” Yesu baadi mukite kilombeeno kipya n’ekopo dya binyibinyi su? Nya. Kishima “ekopo” akilesha kyakya kibaadi mwanka—nfinyo. Yesu bakwile naminyi pabitale akilesha nfinyo? Mase aaye abapongolokyele.
12 Mu mukandu wi buwa wa Maako atusangana bino bishima bibakwile Yesu shi: “Kino, mmase ande ‘mase a kipwano,’ aasukumunwa bwa mwilo wa bantu.” (Mak. 14:24) Eyendo bibaadi abitungu shi mase a Yesu “asukumunwe bwa beebungi, bwa kulekyeelwa milwisho.” (Mat. 26:28) Byabya, nfinyo imonga ngilombane bwa kulesha mase a Yesu. Ku bukwashi bwa aa mase, twi balombeene kupashiibwa ku mulambu wa nkuulo ikwashe bwashi ‘milwisho yetu ilekyelwe.’—Badika Beena-Efeeze 1:7.
Batumibwa abatomene nfinyo ibaadi ayilesha mase a Yesu a kilombeno (Tala paragrafe 11, 12)
KUTENTEKYESHA LUFU LWA KIDISHITU
13. Lesha mushindo wabakitaa Kitentekyesho kya lufu lwa Kidishitu?
13 Su bofiki mu kukita Kitentekyesho kya lufu lwa Yesu na Batemwe ba Yehowa bwa musango wa kumpala, okulupila kumona kinyi mwanka? Kyakya kisangilo nkilombeene nkusangasha, mbalo yabadi basuule ilombeene bantu booso kushaala kushii lukalakasho. Mu yaaya mbalo mbalombeene kutuula tu bilongo tupeela, kadi kushii bintu bya kulengyesha nabyo bilombeene nkukaasha binangu ku kisangilo nya. Mukulu umune akyebe kutaluula mu mushindo wi buwa na kanemo kyooso akilesha Bible pabitale kyakya kisangilo. Akyebe kukwasha bantu booso bwabadya kusangeela kibaabadi betukishine kwi Kidishitu. Bafwile bu mulambu wa nkuulo bwashi twikale na muwa. (Badika Beena-Looma 5:8-10.) Yawa akitshi mwisambo akyebe kupatuula nkulupilo ibidi yabadi baleshe mu Bible bwa beena Kidishitu.
14. Mu mwisambo wa Kitentekyesho kya lufu lwa Yesu, abakulaa pabitale nkulupilo kinyi?
14 Lukulupilo lwa kumpala ndwa kumunana na Kidishitu mwiyilu, lukulupilo lwabadi nalo kwi penda ndambo ipeela ya balondji ba Kidishidtu, kileshesho bu batumibwa baasha kululama. (Luk. 12:32; 22:19, 20; Bif. 14:1) Lungi lukulupilo ndwa beena Kidishitu bakwete kufubila Efile Mukulu na kululama kooso mu ano mafuku etu. Be na lukulupilo lwa kwikala na muwa wa losoo pa nsenga yaluulwe mpaladiiso. Akupu akikyeb’eshimba dy’Efile Mukulu akikitshika pa nsenga bu byakikitshika mwiyilu, kintu kikwete kuteka beena Kidishitu takudi mafuku ebungi. (Mat. 6:10) Na Bifundwe abitulesha kalolo nshalelo ebuwa akekala naaye bantu bwa losoo.—Yesh. 11:6-9; 35:5, 6; 65:21-23.
15, 16. Abakitaa kinyi na mukate nsaa ya Kidibwa kya Mwanana?
15 Pepi na ku nfudiilo kwa wawa mwisambo, sha mwisambo akyebe kulesha shi, nsaa ibalombana ya kukita kyakya kibaadi Yesu mulungule batumibwa bwashi bakite. Anka bu byabileshibwanga kumpala, abakyebe kutumika na mukate ushii na kitatusho na nfinyo. Bino bintu abebituulu ku mesa pepi na sha mwisambo. Akyebe kukaka binangu bya bantu ku mwanda wa mu Bible aulesha bibakitshine Yesu pabaabangile kino kitentekyesho. Bu kileshesho, mu mukanda wa Mateo atubadika bino: “Yesu bâtshile mukate, pa bapwile kutumbula Efile Mukulu, beutshokwele, eupa balongi bê, akula’shi: ‘Atai, nudye uno nyi mbidi yande.’” (Mat. 26:26, EEM) Yesu batshokwele mukate ushii na kitatusho bwashi ape balondji baaye booso abaadi mbwipi mwaaye. Okyebe kumona mwifuku dya 14 dya mweshi wa Kananka mbatuule mukate ushii na kitatusho wabadi bapwe kutshokola tupesetupese mbeutuule mwilonga.
16 Abakyebe kutuula ndambo ya malonga ilombeene kukwasha bwashi mu nsaa ilombane beakishe kwi bantu booso be panka. Kushii kukita kipikwa kampanda. Abakyebe kwela luteko mu kikoso, kunyima kwa byabya abakisha malonga mu molongo, muyiile byabya abimweneka bu bi buwa mbalo yanudi. Bantu bapeela (pangi kushii muntu sungumune) abakyebe kudya mukate bu byabikalanga mu tukongye twi bungi nsaa yabekalanga bakishe mukate mu kipwa kya 2013.
17. Ku Kitentekyesho kya lufu lwa Yesu, mushindo kinyi wabalondaa malango aaye pabitale nfinyo?
17 Akupu akyebe kushimika kasele ku mayi abakwile Mateo shi: “[Yesu] batshile ekopo . . . batumbwile Efile Mukulu, bebapeele ebalungula’shi: ‘Tomai anwe boso; mwanda ano nyi mase ande, “mase a . . . kilombeno” . . . akapongolokyela bantu bebungi pa mwanda wa kulekyela kwa milwisho.’” (Mat. 26:27, 28, Kilombeno kipya) Mu kulonda kwa kyakya kileshesho, abakitshi lungi luteko na kukisha ‘ekopo’ dya nfinyo imonga kwi bantu booso.
18. Bu byabidi shi mpenda bantu bapeela abadiyaa mukate na kutoma nfinyo, bwakinyi mbi nka na muulo kwikala ku Kitentekyesho kya lufu lwa Yesu?
18 Bebungi ba ku baaba be mwanka abapelaa kudya mukate na kutoma nfinyo na kanemo kooso nsaa yabakwete kwibikisha mwanda Yesu bakwile shi nka penda baaba abakamunana naaye mu Bufumu bwa mwiyilu ndjo balombeene kudya na kutoma. (Badika Luuka 22:28-30; 2 Tim. 4:18) Bangi be mwanka abalondesha na kanemo kooso. Anka, Kidibwa kya Mwanana ki na muulo ukata kwabadi, pabadi panka abalesha shi bakwete kwata mulambu wa Yesu na muulo ukata. Nsaa ya Kitentekyesho, mbalombeene kunangwila ku myabi yabadi bakumbeene kupetela ku mulambu wa nkuulo wa Yesu. Be na lukulupilo lwa kwikala munkatshi mwa “kibumbu kikata” kya abakapanda pa nsaa ya “kutompibwa kukata.” Baaba balangwidi abakyebe ‘kutumpa nkandjo yaabo, beeyitoosha mu mase a Mukooko wana.’—Bif. 7:9, 14-17.
19. Nkinyi akitungu shi tukite bwa kwilumbuula’shi Kidibwa kya Mwanana kitukwashe?
19 Batemwe ba Yehowa mu nsenga ishima abelumbuula bwa kino kisangilo kikata. Kumpala kwa mbingo, atukyebe kwipaana mu kwabila bantu bebungi masaki akwibetamina nawo bwashi bafikye mu Kitentekyesho kya lufu lwa Yesu. Na dingi, mu mafuku e pepi n’efuku dya Kitentekyesho, atwe booso atukyebe kubadika myanda ibakitshiine Yesu na kibaadi kikitshikye mwifuku dya kumpala kwa Kidibwa kya Mwanana mu kipwa kya 33 kunyima kwa Yesu (K.Y.K.) Atukyebe kulumbuula bintu byetu byooso bwatudya kupetekyelwa kwanka. Bi na muulo bwashi tufikye kumpala kwa nsaa ya kuyimba loono na kukita luteko bwashi twiyimushene na bantu benyi abafiki mu kuteemesha programe ooso mushima. Atwe beena kakongye booso na bantu benyi, atukyebe kupeta muloo wa kulondesha mu ma Bible etu byabya byabakwete kwisamba. Kintu ki na muulo nkino, kupetekyelwa kwetu kwa ku Kitentekyesho kya lufu lwa Yesu akulesha shi atusangeela na mashimba etu ooso mulambu wa Yesu na atukyebe kunangwila ku mwiya waaye wa’shi: “Ikalai anukitshi bino mwanda wa kuntentekyeshanga.”—1 Kod. 11:24, EEM.
^ par. 9 Heinrich Meyer ungi muntu a mu Allemagne atalulaa myanda ya mu Bible alesha shi: “Kumona . . . kwa’shi mbidi ya Yesu tayibaadi itshokolwe (baadi na muwa), na’shi, mase Aye taabaadi apongoolwe, muntu su ngumune a ku baaba babaadi pa mesa [batumibwa] tabaadi mulombeene kupwandikisha shi, . . . kwete binyibinyi kudya yaaya mbidi na kutoma mase a Mwanana, [byabya] Yesu aye nabeene tabaadi mulombeene kupwandikisha shi balondji mbalombeene kupusha bishima Byaaye mu ungi mushindo nya.”
