ESESELE PEPI N’EFILE MUKULU
“Talaayi! Naayikasha bintu byooso bipya”
We na lukalo lwa kwikala na mbidi bukome na muwa wa losoo obe na kifuko kyoobe su? Okulupila kwikala na muwa wa losoo pa nsenga ayikekala mitanyo, makyenga, na lufu bu bintu bya kala su? Yaaya nsenga ta mwanda wa kupwandjikisha nya. Anka, nsenga ipya ya kululama ayikekala kwanka, mwanda Yehowa Efile Mukulu mmwate mpàngo ya kwiyikita. Tala mushindo wabalesha abikalombana buno butemuki mu mukanda wa Bifumbulwe 21:3-5.—Badika.
“[Efile Mukulu] akakumuna mpolo yooso ku meso aabo.” (Bifumbulwe 21:4) Mpolo ya mushindo kinyi y’akakumuna? Ta mpolo ya muloo sunga ino ayilamaa meso etu nya. Mulayilo w’Efile Mukulu ngutale mpolo ayifiki ku makyenga na mpombo. Efile Mukulu t’akyebe penda kukumuna mpolo; akeyikumuna bwa losoo mu kukaasha myanda ayitutushisha mpolo bisumanga—makyenga na mpombo.
“Lufu taalwikala kwanka dimo.” (Bifumbulwe 21:4) Nkinyi kikwete kufwisha mpolo ya bisumanga, bu lufu mwishikwanyi? Yehowa akabuusha bantu baasha kukokyela ku lufu. Mushindo kinyi? Mu kukaasha kyakya kikwete kufwisha lufu: mulwisho wa Adame watudi bapyane. (Beena-Looma 5:12) Yehowa akyebe kushintuula bantu baasha kukokyela bwashi bekale bapwidikye ku bukwashi bwa mulambu wa nkuulo wa Yesu. * Akupu, lufu mwishikwanyi a nfudiilo “akabutulwa.” (1 Beena-Kodinto 15:26) Bantu baasha kululama abakekala na muwa bu bibaadi mpàngo y’Efile Mukulu bwabo—kwikala na mbidi ipwidikye bwa losoo.
“Taakwikala dimo sunga . . . kwidila.” (Bifumbulwe 21:4) Nkwidila kwa mushindo kinyi kushy’akwikala dingi? Kwidila kooso kwa mu binangu, mwishimba, na ku mbidi kutuukile ku mulwisho na kukutwa kwa kupwidika kufwishe nshalelo a mpombo kwi midiyo ya bantu takwikala dingi kwanka.
Muwa ushii na mpolo, lufu na mitanyo awikala kwanka binobino. We mulombeene kwiyipusha shi, ‘kunyi?’ ‘Pangi, ndjo bi mpàngo y’Efile Mukulu bw’eyilu su?’ Nya. Banda kutala bwakinyi. Kya kumpala, mulayilo aubanga na ano mayi shi “kishaaleelo ky’Efile Mukulu [ki] na bantu,” bantu mbashaale pa nsenga. (Bifumbulwe 21:3) Kya kabidi, mulayilo awisambila pabitale mu nsenga ‘mushy’amwikala dimo lufu’—lufu lubaadi pa nsenga talwikala dingi panka nya. Kasha lufu talwekeele mwiyilu, kadi alwikalaa pa nsenga. Eyendo shi Efile Mukulu akalombasha mulayilo waye wa kutuula nshalelo ebuwa pano pa nsenga.
Efile Mukulu akyebe kukamisha myela ya mpolo ipongolokye mwanda wa mpombo
Yehowa akumiina shi tukumiine mulayilo waaye wa kutuula nsenga ipya ya kululama. Mususa umune kunyima kwa kulesha myabi ayikafiki, ashinkamisha mulayilo waye shi: “Talaayi! Naayikasha bintu byooso bipya.” Bakwile dingi shi: “Myaaku ino tayii mpaka, ngya binyibinyi.” (Bifumbulwe 21:5) Bwakinyi twe mulombeene kulonga bi bungi pabitale mushindo wanudi balombeene kwikala obe na bantu boodi mufule munkatshi mwa balangwidi baasha muloo abakamono kulombana kukata kwa mulayilo w’Efile Mukulu?
Kubadika kwa Bible bwa uno mweshi
1 Mpyeele 1-5; 2 Mpyeele 1-3; 1 Yowano 1-5; 2 Yowano 1-13; 3 Yowano 1-14; Yuude 1-25–Bifumbulwe 1-22
^ par. 3 Bwa kuuka myanda ibungi pabitale mulambu wa nkuulo wa Kidishitu, tala shapitre 5 a mukanda wa A nkinyi akilongyesha namu Bible? wabadi batuushe kwi Batemwe ba Yehowa.
