‘Dino efuku adinwikeela bu kitentekyesho’
‘Dino efuku adinwikeela buu kitentekyeesho. Anukitshi luno lwendo lwa nteko bwa kusepeela Yehowa.’—EFI. 12:14.
1, 2. Efuku kinyi dya kutentekyesha aditungu kwikala na muulo ukata kwi beena Kidishitu booso, na mbwakinyi?
NSAA yokwete kunangwila pabitale efuku dya kutentekyesha, efuku kinyi adifiki mususa umune mu binangu byoobe? Muntu mupwe kwibakila mmulombeene kwamba’shi nyi “efuku dinakitshiine dibaka.” Bangi mbalombeene kutentekyesha efuku dibakitshikile mwanda ukata, bu efuku dibapetele eumbo dyabo bulungantu. Kadi otentekyesha efuku dikata dibaabadi abatentekyesha takudi bipwa bikile pa 3 500 su?
2 Dyaadya efuku dya kutentekyesha nyi efuku dya Lukilo. Dibaadi adilesha pabatuukile beena Isalele a kala mu bupika mu Ejiipitu. Dyadya efuku abitungu diikale na muulo koodi. Bwakinyi? Mwanda nditale muwa oobe mu mishindo kampanda i na muulo. We mulombeene kupwandikisha shi, ‘feete a Lukilo baadi a beena Yuuda ami ntshii mwina Yuuda nya. Bwakinyi abitungu shi ntuule binangu ku kino kitentekyesho?’ Lwalulo twi balombeene kwilupetela ku ano mayi akata: “Kidishitu aye mulambu wetu wa [kidibwa kya lukilo] baapwile kulambulwa.” (1 Kod. 5:7) Bwa kupusha uno mwanda kalolo, abitungu tuukye bibaadi feete a Lukilo a beena Yuuda na kumutaluula muyiile mwiya wabadi bape beena Kidishitu booso.
BWAKINYI ABAADI ABAKITSHI FEETE A LUKILO?
3, 4. Myanda kinyi ibaadi ikitshikye ku feete a Lukilo a kumpala?
3 Bantu midiyo nkama mu nsenga ishima bashii beena Yuuda abauku ndambo ya myanda itale bibakitshikile mu mafuku a feete a Lukilo a kumpala. Pangi mbabadikye myanda i mu Bible mu mukanda wa Efilu, mbebalondele myanda sunga’shi mbamone ma filme aalesha yaaya myanda.
4 Beena Isaleele pabaabadi mu bupika mu Ejiipitu munda mwa bipwa bikile bungi, Yehowa batumine Moyiise na Aarone mukwabo mulume kwi Faraone mu kumuteka bwashi apoosole mwilo Waaye. Yawa nfumu a mu Ejiipitu sha kwitatula tabaadi mukumiine kupoosola beena Isaleele bwashi bende nya, ndjo Yehowa nkutumina eumbo bipupa bi bukopo. Ku nfudiilo Efile Mukulu nkutuma bipupa ekumi, lufu lwa mwana mbedi a mu Ejiipitu ndjo kibatakwile Faraone bwashi ebapoosole.—Efi. 1:11; 3:9, 10; 5:1, 2; 11:1, 5.
5. Bibaadi abitungu shi beena Isaleele belumbuule bwa kukita kinyi bwa kwikala balungantu? (Tala kifwatulo ki ku mbangilo kwa mwisambo.)
5 Nkinyi kibaadi akitungu shi beena Isaleele bakite kumpala kwa kukuudibwa? Bibaadi mu kipungo kya printemps akikalaa bufuku na kanya bula bumune mu kipwa kya 1513 kwibedi kwa Yesu Kidishitu (Eb.Y.K.), mu mweshi wa beena Ebreeyi wabetaminaa bu Abiba wabadi betamine kumongo bu Nisane. * Efile Mukulu bambile shi efuku dy’ekumi dya wawa mweshi, beena Isalele abaadi na kya kubanga kwilumbuula bwa kulonda ingi myanda ibaadi ayitungu bw’efuku dya 14 dya Nisane. Dyadya efuku dibaadi adibanga mu nsaa ya nguba batwele mwanda mafuku a beena Ebreeyi abaadi aabanga nsaa ya nguba batwele na kupwa aye nguba batwele mu dingi efuku. Mwifuku dya 14 mu mweshi wa Nisane bibaadi abitungu shi mu kifuko kyooso bayipee mukooko ulume (sunga mbushi mulume) na kushinga ndamo ya mase ku ntempa a kiibi kya nshibo. (Efi. 12:3-7, 22, 23) Beena nshibo abaadi abadi mwita wa mukooko na mikate ishii na kitatusho na ndambo ya bisaki. Bibaadi abitungu shi mwikeyilu a Efile Mukulu akile mwiumbo na ayipee mwana mbedi a beena Ejiipitu, kadi beena Isaleele baasha kukokyela babaadya kukalwilwa, na abaadi balombeene kushaala balungantu.—Efi. 12:8-13, 29-32.
6. Bwakinyi bibaadi abitungu shi mwilo w’Efile Mukulu wikale aukitshi feete a Lukilo ku kipwa kyooso?
6 Beena Isaleele abaadi na kya kutentekyesha mu bipwa bi kumpala efuku dibaabatuukile mu bupika. Efile Mukulu bebalungwile shi: “Dyady’efuku adiinwikeela buu kitentekyeesho . . . bwa kusepeela Yehowa. Bipungo na bipungo, beekulu beenu abakalondo uno mwiya.” Kunyima kwa kukita kitentekyesho kya Lukilo mwifuku dya 14 dya mweshi wa Nisane, beena Isaleele abaadi abakitshi dingi feete a mafuku musambo abaabadi abetamina bu Feete a mikate ishii na kitatusho. Ano mafuku ooso 8 ngalombeene kwitaminyibwa bu a Lukilo. (Efi. 12:14-17; Luk. 22:1; Yo. 18:28; 19:14) Feete a Lukilo abaadi bamusangule bu dimune dya ku mafuku (a “musangeelo”) dibaadi aditungu shi beena Ebreeyi beditentekyeshe ku kipwa kyooso.—2 Mya. 8:13.
7. Nkintu kinyi kibaadi Yesu mubangye mwifuku dyabo dya nfudiilo dya kukita Kitentekyesho kya Lukilo?
7 Yesu na balondji baaye abaadi beena Yuuda na abaadi abakokyela mwiya wa Moyiise nyi bwakinyi abaadi bakite kitentekyesho kya Lukilo. (Mat. 26:17-19) Mususa wa nfudiilo ubaabakitshine byabya, Yesu babangile kingi kintu kipya kibaadi akitungu shi balondji baaye bashaale abakitshi ku kipwa kyooso—Kidibwa kya Mwanana. Kadi bibaadi abitungu shi bekikite mwifuku kinyi?
EFUKU KINYI DIBAABADI BAKITE KIDIIBWA KYA MWANANA?
8. Ndukonko kinyi lwatudi balombeene kwiyela pabitale efuku dya Lukilo na dya Kidibwa kya Mwanana?
8 Yesu batushishe mwiya wa kukita Kidibwa kya Mwanana mususa umune kunyima kwa kukita kitentekyesho kya Lukilo, kino kintu kipya kibaadi kikitshikye mwifuku dimune na dibaabadi bakite feete a Lukilo. Anka, we mulombeene kumona shi efuku dyabadi baleshe bwa kukita feete a Lukilo a beena Yuuda dyabadi baleshe mu kalandriye ka ano mafuku ndilekeene pangi efuku dimune sunga mafuku ebungi n’efuku dyabakitaa kitentekesho kya lufu lwa Kidishitu. Bwakinyi mbilekeene byabya? Twi kwalula shi mpabitale mwiya w’Efile Mukulu kwi beena Isaleele. Kunyima kwa kwakula pabitale kwipaa mwana a mukooko shi, “kakongye kashima ka kibumbu kya Isaleele akamutshindji mudibu,” Moiise balesheshe nsaa ya mwifuku dya 14 mweshi wa Nisane dibaabadi balombeene kukita Lukilo.—Badika Efilu 12:5, 6.
9. Muyile mukanda wa Efilu 12:6, nsaa kinyi ibaadi ayitungu kwipaa mukooko wa kukita nawo Lukilo? (Tala dingi kashibo ke na mutwe wa mwanda awamba shi: “Mu nsaa kinyi?”)
9 Ungi mukanda (The Pentateuch and Haftorahs) aulesha pabitale ano mayi e mu mukanda wa Efilu 12:6 shi: Bibaadi abitungu kwipaa mukooko pa “kaa muyilwa-nshoobe.” Mu angi ma Bible abashinkamisha kino kishima. Angi naamu mpa na Bible a beena Yuuda abetamina bu Tanak, mbaluule shi “bufuku pa kwila” mu angi namu shi “nguba batwele.” Byabya, bibaadi abitungu kwipaa mwana a mukooko aye nguba batwele nsaa yakukii etaata, ku mbangilo kw’efuku dya 14 dya mweshi wa Nisane.
10. Muyiile abilesha bangi bantu, nsaa kinyi ibaabadi abayipaa mwana a mukooko, kadi ndukonko kinyi alutungu kwiyela?
10 Kala bangi beena Yuuda abaadi abapwandikisha shi bibaadi abitungu kukisha nsaa ibungi bwa kwipaa baana ba mikooko yooso yabatwala ku ntempelo. Byabya mayi e mu mukanda wa Efilu 12:6 abaadi abeapusha shi ngatale ku nfudiilo kw’efuku dya 14 dya mweshi wa Nisane, pankatshi pa nsaa ayikalaa nguba taadi pa kutwela (kunyima kwa midi) na ku nfudiilo kw’efuku aye nguba baapu kutwela. Su bibaadi byabya, bibaadi abitungu kudya kya kudya nsaa kinyi? Ungi mulongyeshi abetamina bu Jonathan Klawans, atalaa myanda ya kala ya beena Yuuda bafundjile shi: ‘Dingi efuku adibanga nsaa ayitwele nguba, byabya abaadi abatuusha milambu mwifuku dya 14 ku mbangilo kwa Lukilo na kyakudya abekidi mwifuku dya 15, sunga byabidi shi ano mafuku ooso ta mbealeshe mu mukanda wa Efilu.’ Bafundjile dingi shi: “Mikanda ya ba Arabe . . . tayitompo sunga kwitulungula mushindo ubaabadi abakitshi [Kidibwa kya lukilo] kumpala kwa kulwisha kwa Ntempelo” mu kipwa kya 70 K.Y.K.
11. (a) Nkinyi kibaadi kikitshikile Yesu mwifuku dya kukita Lukilo mu kipwa kya 33 K.Y.K.? (b) Bwakinyi efuku dya 15 dya mweshi wa Nisane mu kipwa kya 33 K.Y.K. dibaadi aditaminyibwa bu dya Nsabaato ikata? (Tala mayi e kuushi kw’esaki.)
11 Byabya, twi na kya kwiyipusha shi, efuku kinyi dibaabadi bakite feete a Lukilo mu kipwa kya 33 K.Y.K. su? Eyendo, mwifuku dya 13 dya mweshi wa Nisane kumpala kw’efuku ‘dibaabadi abakitshi kidibwa kya lukilo,’ Kidishitu balungwile Mpyeele na Yowano shi: “Ndai nuketulumbulwile kidibwa kya lukilo.” (Luk. 22:7, 8, Kilombeno kipya) “Pabakumbeene nsaa” ya kukita kidibwa kya Lukilo, kunyima kwa nguba baapu kutwela mwifuku dya 14 mu mweshi wa Nisane, dilombeene kwikala bu mudya Kananka ku kyolwa. Yesu badiile kya kudya na balondji baaye, akupu aye nkubanga kukita Kidibwa kya Mwanana. (Luk. 22:14, 15) Bwabwa bufuku abaadi bamukwate bamukyengyesha. Abaadi bapudikye Yesu mu nsaa ya pepi na midi mwifuku dya 14 dya mweshi wa Nisane, na bafwile mu dyadya efuku kunyima kwa midi. (Yo. 19:14) Byabya, ‘Kidishitu aye mulambu wetu wa lukilo bapwile kulambulwa’ mwifuku dimune na dibaabadi bayipee mwana a mukooko wa kidibwa kya Lukilo. (1 Kod. 5:7; 11:23; Mat. 26:2) Pepi na ku nfudiilo kwa dyadya efuku dya beena Yuuda, abashiikile Yesu—kumpala kwa’shi efuku dya 15 dya mweshi wa Nisane dibangye. *—Lv. 23:5-7; Luk. 23:54.
KITENTEKYESHO KI NA MUULO KWATUDI
12, 13. Mushindo kinyi ubaadi Kitentekyesho kya Lukilo nkitale baana ba beena Yuuda?
12 Kadi, tubande kutala bibaadi mu Ejiipitu. Moyiise bakwile shi mu mafuku e kumpala, abitungu shi mwilo w’Efile Mukulu ulame Lukilo; ubaadi bu mwiya wa kulonda “bwa losoo.” Bu byakibaadi bu kimune kya ku bitentekyesho bya ku kipwa, baana abaadi balombeene kwipusha baledi baabo pabitale akilesha kyakya kitentekyesho. (Badika Efilu 12:24-27; Miy. 6:20-23) Byabya, kidibwa kya lukilo kibaadya kwikala bu “kitentekyesho” kii na muulo sunga kwi baana bakinga.—Efi. 12:14.
13 Bipungo byooso bya baana abaadi abakulu, abaadi balombeene kupeta malango e na muulo, abaabadi aatungu shi nsha mwana eape mwana aaye mulume. Dimune dya ku aa malango dibaadi dya’shi Yehowa mmulombeene kukalwila balangwidi. Baana abalongyele shi Yehowa nyi Efile a binyibinyi etatshishaa bwa bantu baaye mulombeene kwibakalwila. Baadi muleeshe byanka nsaa ibaadi mupaashe baana-mbedi ba beena Isaleele “pàbaatùùtshile Ejiipitu.” Aye nkulama baana-mbedi na muwa.
14. Elango kinyi ditale Lukilo aditungu shi baledi beena Kidishitu balongyeshe baana baabo?
14 Baledi beena Kidishitu ku kipwa kyooso tabalondelaa baana baabo balume na bakashi akilesha Lukilo nya. Byabya, olongyeshaa baana boobe dino elango dimune dya’shi Efile Mukulu alamaa mwilo waaye su? Webashinkamishaa lukumiino loobe lwashi Yehowa enka Mulami a mwilo waaye binyibinyi su? (Mis. 27:11; Yesh. 12:2) Webalongyeshaa dino elango nsaa yokwete kwisamba nabo miisambo ibuwa kushii penda bu’be ebakitshina mwisambo su? Kita moobe mooso bwa kwibalongyesha dyadya elango bwashi kifuko kyoobe kikule mu kikudi.
Nsaa yanwisamba pabitale Lukilo, mmalango kinyi anudi balombeene kukwasha nawo baana beenu? (Tala paragrafe 14)
15, 16. Nkinyi kyatudi balombeene kulongyela pabitale Yehowa mu mwanda wa Lukilo wi mu mukanda w’Efilu?
15 Kyatudi balombeene kulongyela ku Lukilo ta nka penda bukome bwa Yehowa bwa kukalwila bantu nya. Baadi dingi ‘mwibatuushe mu Ejiipitu.’ Banda kunangushena pabitale kibaadi akitungu bwashi batuukye. Abaadi abakunkushiibwa n’ekumbi mpa na kaalo. Abatambukile pa nsenga yuume paabadi Kalunga Kamonga k’etshibe pabidi ku mboko ilume na ku mboko ikashi. Mususa umune abo abaapu kusabuka, abamwene aa mema kwaayipaa basalayi ba beena Ejiipitu. Kunyima beena Isaleele abaapu kupanda abakwile n’eyi di bukopo shi: “Naayimbila Yehowa . . . Mfwalasa naa sha-mfwalasa, bebyeele mu mbuu. Bukome bwande nyi Yehowa, aye ngi aanyimbila, aye kipandjilo kyande.”—Efi. 13:14, 21, 22; 15:1, 2; Mis. 136:11-15.
16 Su we na baana, webakwashaa bwabadya kukulupila mwi Yehowa bu Mupaashi su? Mbalombeene kumona lwalwa lukulupilo moodi mu miisambo yoobe na mu bitshibilo byoobe su? We mulombeene kutwesha mu Lulangwilo lwa mu Kifuko myanda i mu mukanda wa Efilu shapitre 12-15 bwashi nwisambe pabitale mushindo ubaadi Yehowa mupaashe mwilo waaye. Mu ingi nsaa nwi balombeene kwisamba wawa mwanda p’anutaluula Bikitshino 7:30-36 sunga Danyele 3:16-18, 26-28. Eyendo bansongwalume na bansongwakashi mpa na bantu bakulu be na kya kukulupila shi Yehowa ta mpenda Mupaashi a bantu ba kala nya. Bu bibaadi mupaashe mwilo waaye mu mafuku a Moyiise, akyebe kwitupaasha mu mafuku e kumpala.—Badika 1 Beena-Tesalonika 1:9, 10.
KYATUDYA KUTENTEKYESHANGA
17, 18. Kunangwila ku mushindo ubaabadi abatumika na mase kala mu nsaa ya Lukilo akwitutentekyesha kinyi?
17 Beena Kidishitu ba binyibinyi t’abakitaa kitentekyesho kya Lukilo kya beena Yuuda nya. Kyakya kitentekyesho kibaadi mu Mwiya wa Moyiise, na atwe naamu tatwi mu wawa Mwiya nya. (Lom. 10:4; Kol. 2:13-16) Kadi, kwi kingi kintu kyatwataa na muulo ukata, lufu lwa Mwan’Efile Mukulu. Anka twi balombeene kulonga bi bungi ku kitentekyesho kya Lukilo kibaabadi bakite mu Ejiipitu.
18 Mase a mwana a mukooko abaabadi abashingi pa ntempa abaadi aakwasha bwa kupaasha muwa. Lelo tatukwete kulambula nyema kwi Efile Mukulu nya, mu mafuku a Lukilo sunga mu ingi nsaa kampanda. Anka, kwi ungi mulambu ulombeene kupaasha muwa bwa losoo. Mpoolo mutumibwa baadi mufunde pabitale “kiikongeeno kya baana-mbedi, baasha mashina afundwe mwiyilu.” Ku bukwashi bwa “mase [a Yesu] asukumunwe,” nyi akupetela beena Kidishitu bashingwe mwimu muwa wa losoo mwiyilu. (Eb. 12:23, 24) Beena Kidishitu be na lukulupilo lwa kwikala na muwa wa losoo pa nsenga mbalombeene kupashibwa nka ku bukwashi bwa aa mase. Abitungu bekale abatentekyesha na kushinkamisha kooso shi, “mwadi’ye, ku mase aaye, twi bakudiibwe, mwadi’ye, milwisho yeetu ngilekiibwe muyiile bupeta bwa buntu bwaye.”—Ef. 1:7.
19. Mushindo ubaabadi bakite na mulambu wa Lukilo aunyingisha lukumiino lwetu mu butemuki naminyi?
19 Pabaabadi abayipaa mwana a mukooko bwa kidibwa kya Lukilo, tabibaadi abitungu shi beena Isaale batanye mufufwa su ngumune nya. (Efi. 12:46; Mb. 9:11, 12) Twi kwamba naminyi pabitale “mukooko wana w’Efile Mukulu” ubafikile bwa kwitukuula? (Yo. 1:29) Abaadi bamupudikye ku mutshi na bantomboshi babidi ku mpese yaaye. Beena Yuuda abatekyele Pilaato shi, batshokole mikoolo ya bantu babadi bapudikye. Babaadi balombeene kukita byabya bwashi bafwe bukidi tala bashaala ku mitshi mpa na mwifuku dya 15 dya mweshi wa Nisane Nsabaato ya kabidi. Basalayi abatshokwele mikoolo ya bantomboshi babidi, ‘p’abafikile kwi Yesu abo nkumona’shi tabaadi mupwe kufwa tambamutshokole mikoolo nya.’ (Yo. 19:31-34) Bino mbipusheene na bibaabadi bakite na mwana a mukooko a Lukilo, byabya uno mwana a mukooko baadi bu “mwesheshe” wa mulambu wa Yesu mwifuku dya 14 dya mweshi wa Nisane mu kipwa kya 33 K.Y.K. (Eb. 10:1) Na dingi, mushindo ubaadi ukitshikye myanda ubaadi ulombashe mayi e mu mukanda wa Misambo 34:21, bilombeene kunyingisha lukulupilo lwetu mu buno butemuki.
20. Nkwilekeena kukata kinyi kwi pankatshi pa kidibwa kya Lukilo na Kidibwa kya Mwanana?
20 Byabya, kwi kwilekena pankatshi pa kidibwa kya Lukilo na Kidibwa kya Mwanana. Bino abilesha shi Lukilo lubaadi beena Yuuda abakitshi lubaadi bu mwesheshe wa bibaadi Kidishitu mulungule balondji baaye bwashi bakite bwa kutentekyesha lufu lwaye. Kala mu Ejiipitu, beena Isaleele abaadi abadi mwita wa mwana a mukooko kadi kushii kutoma mase aawo. Bino mbilekeene na bibaadi Yesu mulungule balondji baaye bwashi bakite. Bambile shi baaba abakyebe kumunana pamune naaye “mu bufumu bw’Efile Mukulu” mbakumbeene kudya mukate na kutoma mase bu kileshesho kya mbidi na mase aaye. Atukyebe kutaluula uno mwanda kalolo mu mwisambo aulondo.—Mak. 14:22-25.
21. Bwakinyi bi na muulo bwashi tuukye myanda itale Lukilo?
21 Kushii mpaka Lukilo lubaadi na muulo ukata pabitale mushindo ubaadi Efile Mukulu akitshina beena Isaleele myanda na alutuusha malango akata kwi ooso a kwatudi. Byabya bu bi Lukilo lubaadi bu ‘kitentekyesho’ kwi beena Yuuda kushii kwi beena Kidishitu, atwe beena Kidishitu abitungu twiukye lwanka na kupetela kwanka malango e na muulo mwanda ‘Bifundwe byooso abebifundjile mu bukome bwa kikudi ky’Efile Mukulu.’—2 Tim. 3:16.
^ par. 5 Mweshi wa kumpala mu kalandriye ka beena Ebreeyi abaadi abewitamina bu Abiba, kadi kunyima ababangile kwiwitamina bu Nisane kunyima kwa beena Isaleele kwalukiila mu bupika mu Babilone. Mu uno mwisambo, atukyebe kutumika n’eshina dya bu Nisane.
^ par. 11 Efuku dya 15 dya mweshi wa Nisane dibaadi adibanga pa kupona kwa nguba, byabya abilesha shi Nsabaato bu bibaabadi abakitshi mafuku ooso (mu dya Mpooso) mu kyakya kipwa ibaadi ayilombana na efuku dya kumpala dya Feete a mikate ishii na kitatusho dibaadi nka bu efuku dya nsabato. Bu bibaabidi shi Nsaabato yooso ibidi ibaadi ayilombana yooso pamune, dibaadi bu efuku “dikata” dya Nsabaato.—Badika Yowano 19:31, 42.
