1, 2. Bwakinyi madimi ngapalakane, na mmadimi a mushindo kinyi atukwete kupusha lelo uno? (Tala kifwatulo ki ku mbangilo.)

MADIMI na bulandwe, mbintu biule mu uno ndumbulwilo a myanda. Bino ta mbilombeene kwitukanyisha nya. Bible alesha patooka shi Satana Diabulu nyi nsha madimi mukata, na aye ndjo mukunkushi a uno ndumbulwilo. (1 Tim. 2:14; 1 Yo. 5:19) Bu byatukwete kwifubwila ku nfudiilo kwa uno ndumbulwilo e bubi, nsungu ya Satana ikwete kwenda na kutama mwanda auku shi: “Kubamushadila mafuku apeela.” (Bif. 12:12) Bu byabidi shi bantu be ku bukunkushi bwa Diabulu, madimi ngapalakane lelo uno, baaba bantu bakwete kukita mwabo mooso bwa kupambusha mpa na balangwidi ba binyibinyi.

² Mayi a kupambusha bantu na madimi pabitale bafubi ba Yehowa na myanda itale lukumiino lwabo, atwibimono ku bintu bya mishindo ilekeene abilungula bantu myanda. Mitwe ya myanda ya ma jurnale, ma filme a ku televizio, na ma site a Internet bakwete kutumika nawo bwa kupalakasha madimi. Pa mwanda wa byabya, bangi bantu bakwete kupambushibwa ababanga kukumiina aa madimi.

3. Nkinyi kilombeene kwitukwasha bwa kukambila madimi?

³ Bwa kukambila ano madimi a beshikwanyi aalwisha binangu, twi na muloo mwanda twi na Eyi dy’Efile Mukulu di na ‘mufubo wa . . . kuludika bilubilo.’ (2 Tim. 3:16, Kilombeno kipya) Bibaadi Mpoolo mutumibwa mufunde abilesha shi, mu siekele a kumpala bangi beena Kidishitu ba mu Tesalonika babaadi bapambushibwe, abo nkukumiina myanda ya madimi. Baadi mwibalungule bwashi tabekalanga ‘bakalakashwe mu binangu [byaabo].’ (2 Tes. 2:1, 2) Ano malango abakwile Mpoolo na kifulo kyooso aetulongyesha kinyi, na mushindo kinyi watudi balombeene kwiatumikila mu nshalelo etu?

4. Mushindo kinyi ubaabadi badimushe beena Kidishitu ba mu Tesalonika pabitale kufika kwa “efuku dya Yehowa,” na mushindo kinyi wabakwete kwitudimusha naamu?

⁴ Mu mukanda waye wa kumpala ubaadi mufundjile  beena Tesalonika, Mpoolo baadi mwibadimushe pabitale kufika kwa “efuku dya Yehowa.” Tabaadi akumiina’shi bakwabo bekale mu mufito na bakutwe kwilumbuula. Anka baadi mwibalungule shi bu byabadi “baana b’eetaata” ‘tabalalanga tulo . . . bekale bapasukye.’ (Badika 1 Beena-Tesalonika 5:1-6.) Lelo uno tukwete kutengyela kabutu ka Babilone Mukata, nsangilo a bipwilo byooso bya madimi. Bino abikyebe kwikala bu mbangilo a efuku dikata dya Yehowa. Twi na mwabi, mwanda mpushisho etu a mushindo autambuka mpàngo ya Yehowa kwete kwenda na kutama. Na dingi ku bukwashi bwa kakongye, tukwete kupeta malango pa nsaa ilombane aetukwasha bwa kushaala bapasukye. Kulamiina ano malango atukwete kupetanga nkulombeene kunyingisha kitshibilo kyetu kya kukitshina Efile Mukulu ‘mudimo wiselele na mufubo wetu wa kinangu.’—Lom. 12:1, Kilombeno kipya 2009.

5, 6. (a) Mpoolo baadi mwakule mwanda kinyi mu mukanda waaye wa kabidi kwi beena Tesalonika? (b) Efile Mukulu akyebe kukita kinyi binobino ku bukwashi bwa Yesu, na abitungu twiyipushe naminyi?

⁵ Mafuku apeela kunyima kwa’ye kutumina beena Kidishitu ba mu Tesalonika mukanda waye wa kumpala, Mpoolo bebatumiine mukanda wa kabidi. Mu uno mukanda baadi mukakye binangu byabo ku mpombo ayikyebe kufika mwifuku dya Mwanana Yesu adyo adikyebe kutwala kiimu ky’Efile Mukulu kwi “bashaabawuku Efile Mukulu, na bashaabakookyela mukandu wibuuwa.” (2 Tes. 1:6-8) Mu shapitre 2 a uno mukanda atusangana shi, bangi bantu ba mu kaaka kakongye abaadi babangye “kutshina” pabitale efuku dya Yehowa mu mushindo ubaababadi abapwandikisha shi kubashaala mafuku apeela bwashi difikye. (Badika 2 Beena-Tesalonika 2:1, 2.) Baaba beena Kidishitu ba kumpala abaadi na penda mpushisho peela a mushindo ukwete kwenda mpàngo ya Yehowa, mpa na Mpoolo baadi mushinkamishe byanka kunyima pabitale butemuki shi: “Kuuka kwetu nkwa kapindji, dingi mbwa kapindji butemuki bwetu. Anka apafiki bupwidikye, kyaakya kilobele akikashimina.” (1 Kod. 13:9, 10) Anka, myanda ibaadi ifunde Mpoolo, na Mpyeele mutumibwa mpa na bangi beena Kidishitu basha kululama ba mu aa mafuku ku bukwashi bwa kikudi kiselele, ibaadi ilombeene kwibakwasha bwa kulama lukumiino lwabo.

⁶ Bwa kutuula myanda mu mulongo, Mpoolo baadi mupatuule ku bukwashi bwa kikudi kiselele shi, kusumbula kukata kwa lukumiino na “muntu mubi” abikyebe  kumweneka kumpala kw’efuku dya Yehowa. * Kunyima kwa byabya, pa nsaa ilombane, Yesu ‘akashimisha’ baaba booso badimbiibwe. Mutemuki baadi muleshe bwakinyi kino kiimu akikebafwila, bambile shi: mpa mwanda wa “kukutwa kwa kwikala bapokyeele kifuloky’eyendo.” (2 Tes. 2:3, 8-10) Twi na kya kwiyipusha shi: ‘Mmushindo kinyi wandi mufule bya binyibinyi? Nkwete kubadikanga ma jurnale na ingi mikanda yooso yabakwete kutuusha bwa mwilo w’Efile Mukulu bwandya kupeta mpushisho mupya a malongyesha a mu Bible atudi naaye lelo uno su?’

7, 8. (a) Bibaadi abitungu shi beena Kidishitu basuukye masaku kinyi? (b) Masaku kinyi e nawo beena Kidishitu ba binyibinyi lelo uno?

⁷ Eyendo shi, ta nka penda bantu basumbule lukumiino na malongyesha aabo ndjo akumbeene kufwishila beena Kidishitu masaku nya. Mpoolo baadi mufundjile Timotee shi, “mushi wa bubi booso nkifulo kya mfwalanga.” Mutumibwa baadi muleshe kalolo shi “pakwimutwela, bamo mbapambukye benda kula na lukumiino, beetapa ku mashimba na nkalakasho iibungi.” (1 Tim. 6:10) Kingi kintu kilombeene kwikala bu masaku akata lelo uno nyi “mifubo ya mbidi.”—Gal. 5:19-21.

⁸ Mpoolo baadi mudimushe beena Tesalonike pabitale baaba babaadi ayitamina bu ‘batumiibwa ba madimi.’ Munkatshi mwabo mubaadi bantu abaadi na “ndambukiisho ilube bwashi balongi bebalonde mu mongo.” (2 Kod. 11:4, 13; Bik. 20:30) Kunyima Yesu baadi mutumbule beena kakongye ka ku Efèeze mwanda tababaadi balombeene kulama “bantu be bubi.” Baaba beena Efèeze abaadi baleshe binyibinyi shi, baaba bantu abaadi bu batumibwa ba madimi. (Bif. 2:2) Mu mukanda waaye wa kabidi ubaadi mutumine beena Tesalonike Mpoolo baadi mutuushe dino elango: “Anwe bakwetu, atwinutumina eyi, mwishina dya Nfumwetu Yesu Kidishitu, dya kwilamuuna kwi muntu ooso ee na nshaaleelo mupatakane.” Baadi mwakule dingi patooka pabitale beena Kidishitu ‘bashaabakyebe kufuba.’ (2 Tes. 3:6, 10) Su bibaadi abitungu kushikwa bantu baasha lulengu na bashibaadi abakumiina kufuba, abaadi balombeene kushikwa ngofu muntu babanga kusumbula lukumiino. Eyendo, kubanga nka aa mafuku kwikala mu kipwano na baaba bantu kubaadi kulombeene kufwisha masaku ngofu na abaadi balombeene kwibasuuka—binka byabya mpa na lelo.—Mye. 13:20.

9. Bwakinyi abitungu twikale badimukye su muntu abanga kwitutwesha mu mpaka itale mpwandikisho yaaye sunga kwikala na ngakwilo mubi?

⁹ Tatudi pepi ngofu na mpombo ikata na nfudiilo a uno ndumbulwilo mubi a myanda, byabya ano malango abaadi atushibwe ku bukwashi bwa kikudi kiselele mu siekele a kumpala e na muulo ukata lelo uno. Tatukumanga “kupeesha” kalolo ka Yehowa na kwilwankana mulayilo wa muwa wa losoo byabikala mwiyilu sunga pa nsenga. (2 Kod. 6:1) Su muntu afika mu bisangilo byetu bya kakongye na abanga kwitutwesha mu mpaka itale mpwandikisho yaaye sunga kwikala na ngakwilo mubi, abitungu twikale badimukye.—2 Tes. 3:13-15.

10. Abaadi banyingishe beena Tesalonika bwabadya kulamata ku byuubishi kinyi?

¹⁰ Mpoolo balungwile bakwabo ba mu Tesalonika bwabadya “kushimatshiila” na kulamata ku myanda ibaabadi balongye. (Badika 2 Beena-Tesalonika 2:15.) “Mbyuubishi” kinyi bibaabadi bebalongyeshe? Eyendo shi ta mmalongyesha a bipwilo bya madimi ababaadi abalesha bu a binyibinyi sunga bu aasanganyibwa mu Bifudwe nya. Anka Mpoolo baadi akula pabitale malongyesha a Yesu na byabya  bibaadi Efile Mukulu mumulungule na benaaye ku bukwashi bwa kikudi kiselele bwashi bafunde. Mpoolo baadi mutumbule bakwabo ba mu kakongye ka mu Kodinto pabaadi mufunde shi, “nukwete kutentekyesha kipindji kyoso, dingi, nukwete kulonda ndambukisho yande’nka bu bi nenulambukîshe.” (1 Kod. 11:2, EEM) Yaaya ndambukisho ayituukila pa mbalo i buwa na ngya kukulupila.

11. Madimi ngalombeene kubofusha bangi naminyi?

¹¹ Pabaadi afundjila beena Ebreeyi, Mpoolo baadi mukakye binangu ku mishindo ibidi ilombeene beena Kidishitu kushimisha lukumiino na kukutwa kunyinga. (Badika Beena-Ebreeyi 2:1; 3:12.) Bakwile pabitale ‘kupambuka’ na ‘kwilamuuna.’ Bwato, mbulombeene kupambuka sunga kukatuka ku kyese kya mwela kushii muntu kutundula. Mu kapeelakapeela kipindji ki pankatshi paabo na kyese akyende na kutama. Ku lungi lupese, muntu mmulombeene kukatusha bwato kula na kyese kya mwela ku bukome bwaye’ye nabeene. Bino byooso abilesha abikalaa bangi abapono mu madimi, abatadiila lukumiino lwabo mu bya binyibinyi alwende na kubofula kapeelakapeela.

12. Myanda kinyi ii ano mafuku ilombeene kulwisha kipwano kyetu na Yehowa?

¹² Bino ndjo bibaadi bangi beena Tesalonika. Twi kwamba naminyi lelo uno? Myanda ibungi ngilombeene kukishiisha muntu nsaa. Banda kunangusheena pabitale bungi bwa nsaa ikwete kukishiibwa ku bintu bu kukimba kwisamba na bantu bebungi ku Internet, kubadika na kwaluula ma mesaje, kukisha kwa kapapi, sunga mu kukimba kuuka ka mwanda kooso a katuuku. Ino myanda yooso ngilombeene kukishiisha mwina Kidishitu nsaa na kubofusha katshintshi kaaye. Nkinyi akimwenekaa kumongo? Mulombeene kukutwa kiubishi kya kwela nteko n’eshimba dyaaye dyooso, kubadika Eyi dy’Efile Mukulu, kutwela mu bisangilo, na kulungula mukandu wibuwa. Mushindo kinyi watudi balombeene kupela kwikala bakalakashwe mu binangu?

13. Muyiile bibaabadi batemukye, binangu bya bantu bebungi bi naminyi, na nkinyi kilombeene kukwasha bwashi lukumiino lwetu talulwishibwanga?

¹³ Kintu kimune akitungu shi tukite, nkwikala bapasukye pabitale kipungo kyatudi na kilombeene kutuuka su tukwete kwibunga pamune na bantu bashy’abakumiina shi, twi mu “mafuku a ku nfudiilo.” Mpyeele mutumibwa baadi mufunde pabitale kino kipungo shi: “Akufiki baa-sha-mpaka àbàkasepàna muyiile mpàngo yaabo ibi ya ku mbidi, pa kwamba’shi: ‘Taadi pee kunyi yaawa winyi baalayile kufika? Mwanda kashaa baamasheetu baafwa, byooso mbishaale anka mu kipaso kimune bu bibaabidi ku kibangilo kya bintu.’” (2 Mp. 3:3, 4) Kulonga kwetu kw’Eyi dy’Efile Mukulu efuku dyooso akukyebe kwitukwasha bwatudya kutuula binangu byetu ku kipungo kyatudi, su tubakitshi byabya—atwikala bapasukye na abauku shi, twi mu “mafuku a ku nfudiilo.” Kusumbula kwa lukumiino kubaadi kupwe kumweneka kubanga kala na kuky’akumweneka mpa na lelo. “Muntu mubi” kii kwanka na kyatungunuka na kubingabinga bafubi b’Efile Mukulu. Byabya, twi na kya kushaala bapasukye mwanda efuku dya Yehowa tadidi pepi.—Sof. 1:7.

14. Kwipaana mu mudimo w’Efile Mukulu akwitukalwila mu mushindo kinyi?

¹⁴ Kingi kintu kilombeene kukwasha bwa kupela kukalakashwa mu kinangu nyi nkwipaana mu mudimo wa kulungula mukandu wibuwa wa Bufumu. Byabya pabaadi Yesu Kidishitu, aye Nfumu a kakongye mutumine balondji baaye eyi dya kwenda mu kwikasha bantu ba miilo yooso bu balondji, kwibalongyesha bwa kukita byooso bibaadi mwibalongyeshe baadi mwibape elango dibaadi dilombeene kwibakwasha. (Mat. 28:19, 20) Bwa kulesha shi atuneemeka dino eyi, twi na kya kwikala na katshintshi mu mudimo wa bulungudi. Opwandikisha shi bakwetu ba mu Tesalonika abaadi balombeene kukita mudimo wa bulungudi penda binyi byabya, bu  mudimo wa kukita kushii katshintshi su? Tentekyesha bishima bibaadi bibalungule Mpoolo shi: “Tanutshimbishanga mufubo wa kikudi kiselele, tanupeeshanga kipeebwa kya butemuki.” (1 Tes. 5:19, 20) Matemuki atukwete kulungula bantu na kulonga nabo e buwa bwi kashaa!

15. Myanda kinyi ilombeene kwitukwasha ayitungu shi tutaluule mu lulangwilo lwa mu kifuko?

¹⁵ Eyendo, atukumiina kukwasha bifuko byetu bwabidya kulongamisha mushindo wa kukita mudimo wa bulungudi. Bakwetu balume na bakashi bebungi mbasangane shi mbalombene kulombasha uno mwanda su abaata kipindji kya mu nsaa ya lulangwilo lwa mu kifuko bwa kukita kileshesho akilesha byabadi balombeene kukita mu mudimo wa bulungudi. Pangi nwi balombeene kukita kileshesho akilesha mushindo wa kwalukiila mu kutala bantu abekalanga basangeele mukandu wibuwa. Nkinyi kyabakesamba p’abalukiila mu kutala muntu? Myanda kinyi ilombeene kutungunuka na kusangasha baaba baabalukiila mu kutala? Nsaa kinyi ibuwa bwa kwalukila mu kutala bantu? Bebungi abakishaa ingi nsaa yaabo ya mu lulangwilo lwa mu kifuko bwa kulumbuula bisangilo na kutalaluula myanda yabakesambila mwanka. We mulombeene kwilumbuula ngofu bwa kutuusha myaluulo su? Nsaa y’otuusha myaluulo mu bisangilo okyebe kunyingisha lukumiino loobe na kupeta bukwashi bwa kupela kukalakashwa mu binangu. (Mis. 35:18) Kukita kwa lulangwilo lwa mu kifuko akukyebe kwitukalwila pabitale kwikala na mpwandikisho ku myanda yabashii baleshe mu Bible sunga kwikala na mpaka.

16. Nkinyi akinyingisha bashingwe mwimu bwashi tabekalanga bakalakashwe mu binangu?

¹⁶ P’atunangwila ku mushindo ubaadi Yehowa mwelele bantu myabi munda mwa bipwa bibungi na mpushisho mukata a butemuki bwa mu Bible, twi balombeene kusangeela bwedi bukata abukafiki mu mafuku e kumpala. Bashingwe mwimu be na lukulupilo lwa kwikala na Kidishitu mwiyilu. Bino abibanyingisha ngofu bwashi tabekalanga bakalakashwe mu binangu. Twi balombeene kushinkamisha shi ano mayi a Mpoolo kwi beena Tesalonika ngeebatale, pabambile shi: “Twi na kya kutumbula Efile Mukulu kushii kutshina, pa mwanda wenu, anwe bakwetu ba kifulo kikile kwi Yehowa, mwanda Efile Mukulu mmwinusangule . . . bwa kupaashiibwa kwi Kikudi kiselele na kwi lukumiino lweyendo.”—2 Tes. 2:13.

17. Mushindo kinyi aukunyingisha mayi e mu mukanda wa 2 Beena-Tesalonika 3:1-5?

¹⁷ Na baaba abatengyela kwikala na muwa wa losoo pa nsenga be na kya kukita mwabo mooso bwa kupela kukalakashwa mu kinangu. Su we na lukulupilo lwa kwikala na muwa pa nsenga, lamiina dino elango dya kifulo dibaadi Mpoolo mufundjile bakwabo bashingwe mwimu ba mu Tesalonika. (Badika 2 Beena-Tesalonika 3:1-5.) Ooso a kwatudi e na kya kusangeela ano mayi a kifulo ngofu. Eyendo, mikanda ibaabadi bafundjile beena Tesalonika i na malango ebungi pabitale kwikala na mpwangikisho sunga binangu bi bubi. Bu bitatudi bapwe kwisesela ngofu ku nfudilo, ano ndjo malango aatungu shi lelo uno beena Kidishitu basangeele ngofu.