Mu mweshi w’ekumi na wa Kabidi bantu bebungi mu nsenga ishima abamonaa bifwatulo bya Yesu bu mwana tooka. E mu kidiilo kya nyema, kashibo kakata kabadi batuule bisuku bya kudiisha nyama. Kadi abitungu tutentekyeshe Yesu bu mwana tooka su?— * Tubande kwisamba pabitale mushindo ukile bukata wa kumutentekyesha. Twi balombeene kulonga byanka ku bibaadi bikitshikile balami ba mikooko bufuku mu kisuku pepi na Beteleeme.

Mwikeyilu bamwekyeele balami ba mikooko mususa umune. Bebalungwile shi: “Lelo uno . . . babeenutandjila Mupaashi; aye ngi Kidishito Nfumu.” Mwikeyilu bebalungwile dingi shi abakyebe kusangana Yesu ‘mbamupombeele mu tulamba, baamuladisha mu kidiilo kya nyema.’ Mususa umune, bangi ba miikeyilu bebungi abaabangile “kutumbisha Efile Mukulu.”

Bodya kupusha naminyi su bopushiishe miikeyilu ayitumbisha Efile Mukulu?— Balami ba mikooko be na muloo! Abamba shi: “Twendeyi nyaa na ku Beteleeme, tumone kikitshikye.” Kwakwa abakasangana “Maariya na Yoosefe, na kyalaala [mwana tooka] nkilaadishwe mu kidiilo kya nyema.”

Mususa umune bangi bantu abafiki ku Beeteleme kwi Maariya na Yoosefe. Balami ba mikooko pababebalungula kibakitshikile, abo booso abaakanya. We na muloo wa kuuka ino myanda ya kukanya su?— Atwe booso bafule Efile Mukulu twi na muloo. Binobino tubande kutala bwakinyi kutandjika kwa Yesu akusangasha bantu bino. Bwa kwibikita, tubande kutentekyesha mafuku abaadi Maariya tatwelele ku bulunda.

Dingi efuku mwikeyilu abetamina bu Gabryele bafikile kwi Maariya. Amulaa shi, akatanda mwana “akeekala mukata, bakamwitaanyine bu Mwana aa Sha-kwiyilu. Akabikala losoo . . . na bufumu bwaye taabwikala na mpwilo.”

Maariya baadi na lukalo lwa kuuka mushindo wabikitshika,  mwanda tabaadi mubande kuuka balume nya. Ndjo Gabryele nkumupatulwila shi: “Bukome bwa Sha-kwiyilu abukubwikila mu mutaala,” na “akatandjikwa aikala eeselele dingi abamwitaanyina buu Mwan’Efile Mukulu.” Kukaasha Mwan’Efile Mukulu mwiyilu na kutwesha muwa waye munda mwa Maariya bwashi akule bu mwana tooka nyi nkipaso kikata!

Tobomwene bifwatulo sunga ma foto aalesha “baasha-kinangu” basatu abafiki mu kutala Yesu mwana tooka pamune na balami ba mikooko su?— Mu mafuku a Nowele bino bintu ambimwenekaa. Anka ta mbya binyibinyi. Baaba “baasha-kinangu” abaadi mbantu abatalaa nyenyene, abaadi abakitshi bintu byabadi bakandikye kwi Efile Mukulu. Tubande kutala kibaadi kikitshikye nsaa ibaabafikile. Bible amba shi: “Abatwele mu nshibo, abo nkumona mwana na Maariya nyinaaye.” Byabya mu aa mafuku Yesu tabaadi mwana tooka mulaale mu kidiilo kya nyema nya; baadi mwana mushaale na Yoosefe na Maariya mu nshibo!

Mushindo kinyi ubaadi baasha kinangu basangane Yesu?— Abaadi abakunkushibwa na “lwenyeenye,” kushii ku Beteleeme, kadi abayile kwa Nfumu Eroode ku Yeelusaleme bwa mususa wa kumpala. Bible akula shi Eroode baadi na lukalo lwa kumona Yesu na kumwipaa. Binobino banda kunangwila ku uno mwanda. Nnanyi opwandikisha bakitshine kyakya kibamwenekyele bu lwenyeenye lubaadi alukunkusha baasha binangu kwi Erode?— Ta Yehowa Efile Mukulu a binyibinyi nya, kadi nyi mwishikwanyi aaye Satana Diabulu!

Lelo uno Satana kwete kutompa kutakula bantu bwabadya kupwandikisha Yesu bu mwana tooka shii mulombeene kukwasha bantu. Kadi mwikeyilu Gabryele balungwile Maariya shi: “Akabikala . . ., bufumu bwaye taabwikala na mpwilo.” Binobino Yesu kwete kumunana bu Nfumu mwiyilu, na akyebe kubutula beshikwanyi booso b’Efile Mukulu. Bino ndjo byatudi balombeene kutentekyesha pabitale Yesu, na abitungu twibilungule bangi.