Ku dingi ebaya dikata dishimikye mwishinda dibaabadi bafutshile makuta kwi muntu shy’akumiina shi Efile Mukulu e kwanka, abaadi bafunde shi: “Opusha shi we biya kushi Efile Mukulu su?” Midiyo ya bantu bakwete kupusha byabya. Abalesha binyibinyi shi tabe na lukalo n’Efile Mukulu nya.

Na dingi, bangi abeamba bu abakumiinaa Efile Mukulu, bakwete kwata bitshibilo nkabu’shi Efile Mukulu te kwanka. Ungi mukata a beena Katolike abetamina bu Salvatore Fisichella bakwile bino pabitale beena kipwilo kyaaye: “Bantu p’abetutala ingi nsaa ta mbalombeene kutundula lelo uno shi twi beena Kidishitu mwanda nshalelo etu enka bi a bantu bashii beena kukumiina.”

Bangi tabe na sunga nsaa ya kukimba Efile Mukulu. Bakwete kumumona bu e kula kukile bwashi afika mu kwibakwasha ku myanda ya mu nshalelo aabo. Anka, bano bantu bakwete kukimba Efile Mukulu penda nsaa yabadi mu nkalakasho sunga pabadi na lukalo lwa kintu kampanda—abamumono nka’bu mwina mudimo aabo a kwibakitshinanga kyooso kyabakyebe.

Bangi naamu abamono shi malongyesha a bipwilo ta e na muulo sunga mu mishindo yooso tabakwete kukita myanda yabebalongyesha mu bipwilo byabo nya. Bwa kuteemuna penda kileshesho kimune, beena Katolike ba mu Allemagne 76 pa lukama abakumiina shi mulume na mukashi mbalombeene kushaala mu nshibo imune kumpala kwa kwiyibakisheena—yawa mweneno mwilekeene ngofu na malongyesha a mu Bible na a bipwilo byabo. (1 Beena-Kodinto 6:18; Beena-Ebreeyi 13:4) Eyendo shi ta mpenda beena Katolike ndjo be na nshaleelo mwikutwene na myanda yabebalongyesha mu bipwilo byabo nya. Bakata ba bipwilo bi bungi bakwete kwidila pa mwanda wa beena bipwilo byabo mwanda nshalelo aabo e nka bi a “bantu bashy’abakumiina shi Efile Mukulu e kwanka.”

Bino bileshesho abitakula bantu mu kwiyipusha shi: Twi na lukalo n’Efile Mukulu su? Luno lukonko ta ndupya nya. Lubaadi lwedibwe kubanga kala ku mbangilo a Bible. Bwa kupeta lwalulo ku luno lukonko, tubandeyi kutuula binangu ku lukonko lubaadi lwedibwe mu mukanda wa Kibangilo wi mu Bible.