Lufu mmwishikwanyi a kutshiina. Tukwete kulwa nalo na bukome bwetu booso. Twi balombeene kutompa kupela bi lufu nsaa yalukwata muntu atudi bafule ngofu. Sunga’shi patukii na muloo wa ku bukinga, twi balombeene kupwandikisha shi yawa mwishikwanyi ta mulombeene kufika kwatudi—ino nyi mpwandikishi ya madimi yatudi balombeene kwikala nayo.

Bantu bapeela tabapwandikishaa ngofu pabitale kukutwa kwa kufwa bu bibaadi abipwandikisha ba Faraone ba kala nya. Babaadi abepaana na muwa waabo ooso—mpa na miuwa ya nkama na nkama ya bafubi baabo—bwa kukimba bya kwimika lufu. Ma piramide abaabadi abebaka aalesha byanka na mushindo ubaabadi bakutwe koobesha.

Ungi amperere a mu Chine baadi dingi na bino binangu pabitale kukutwa kwa kufwa, anka baadi na mweneno mwilekeene pabitale kwikala na nshalelo ebuwa. Amperere Qin Shi Huang baadi mutekye bwashi ungi mwina sianse atalulaa bintu bilombeene kulama muwa abetamina bu alchemiste amukimbile bwanga bulombeene kwimika lufu. Kadi mu bintu bi bungi bibaabadi basangye mubaadi mercure, na kimune kya ku byabya bintu kibaadi kimwipee.

Mu siekele a 16 K.Y.K., Juan Ponce de León ungi muntu a mu Espagne atalulaa myanda ya kala baadi mwende ku kyese kya mbû a Caraïbe mu kukimba bwashi alukye bunsongwalume. Baadi mufumbule eumbo dya Florida mu États-Unis, pabaadi ende na kukimba, aye nkufwa bipwa bipeela kunyima kwa ngoshi ya ba-Indien ba mu Amerike. Ta mupete mbalo su ngimune kintu kilombeene kumwalusha ku bunsongwalume.

Ba Faraone, ba amperere, na bantu abakimbulaa myanda ya kala abaadi abakimbi bya kwimika lufu. Nnanyi a kwatudi mulombeene kubepuula binangu byabo, sunga byekala’shi twi bashikwe bibaabadi abakitshi? Munda mwetu’twe booso atukuminaa kwikala na muwa.

Bwakinyi twi bashikwe lufu? Bible apatuula bwakinyi. Bible akula pabitale Mupangi etu Yehowa Efile Mukulu * shi: “Akitshi kintu kyooso kilongame pa nguba aakyo; apa eshimba dyaabo [bantu] kyuukilo kya ikalaika.” (Mulungudi 3:11) Atukumiina kusangeela buwa bwa nsenga bwa looso kushii penda munda mwa bipwa 80. (Misambo 90:10) Luno ndjo lukalo lwi mu mashimba etu.

Bwakinyi Efile Mukulu mmutuule “kyuukilo kya ikalaika” mu mashimba etu? Mbwa kwitukwatshisha moo su? Ta mbyabya nya. Anka, Efile Mukulu etulaa shi akukafiki kipindji akikemana lufu. Misusa ibungi Bible akula pabitale kushimisha kwa lufu na mulayilo w’Efile Mukulu wa muwa wa ikalaika.—Tala kashibo ke ku lupese ke na mutwe wa mwanda awamba shi:  “Kwimika lufu.”

Yesu Kidishitu balesheshe patooka shi: “Muuwa wa looso naamu ngi’shi bantu bakuwukye, obe buupenka Efile a biinyibiinyi, na yaawa abotumine, Yesu Kidishitu.” (Yowano 17:3) Byabya ngoshi ya kumona bya kwiminka lufu tayi bukopo koobesha nya. Mwanda Yesu ashinkamisha shi, anka penda Efile Mukulu ndjo mulombeene koobesha kwitutshokwela yanka.