1, 2. Bufumu bw’Efile Mukulu abukakitshi kinyi, na bwakinyi twi balombeene kukulupila shi Bufumu abufiki?

PABAADI ku mwengye pepi na Kapernaume mu kipungo kya printemps mu kipwa kya 31 kunyima kwa Yesu Kidishitu (K.Y.K.), Yesu balongyeshe balondji baaye bwashi batekye shi: “Bufumu bobe bufikye.” (Mat. 6:10) Lelo uno, bantu be bungi tabakumiina shi Bufumu abukafiki. Byabya, twi na lukulupilo shi nteko yatukwete kwela na mashimba etu ooso bwashi Bufumu bw’Efile Mukulu bufikye ayikyebe kwaluulwa.

² Ku bukwashi bwa Bufumu, Yehowa akyebe nkabunga kifuko kyaaye kya be mwiyilu na be pa nsenga. Ino mpàngo y’Efile Mukulu ayikalombana. (Yesh. 55:10, 11) Byabya, Yehowa mmupwe kwikala Nfumu mu ano mafuku etu! Myanda ibuwa ikitshikye munda mwa bipwa 100 bibashaala ayilesha byanka. Efile Mukulu kwete kukitshina midiyo ya bantu baaye baasha kululama midimo ikata na ya kukanya. (Ez. 14:9; Bif. 15:3) Anka, kwikala kwa Yehowa bu Nfumu nkwilekeene na kufika kwa Bufumu bw’Efile Mukulu, bwabwa bubaadi Yesu mwitulongyeshe bwa kuteka. Mushindo kinyi wilekeene ino myanda, na mushindo kinyi wayidi itutale?

3. (a) Yesu bekeele Nfumu mu kipwa kinyi na mbalo kinyi? (b) Mushindo kinyi oodi mulombeene kulesha shi Bufumu bubabangile mu 1914? (Tala mayi e kuushi kw’esaki.)

³ Mu mafuku a ku nfudiilo kwa siekele a 19, etaata dibabangile kutemba pabitale butemuki bubaabadi batemukye kwi Danyele takudi bipwa 2500 shi: “Mu mafuku a baba banfumu, Efile Mukulu e mwiyilu akatûlu bungi bufumu, bushyabukalwishibwa.” (Dan. 2:44, EEM) Balongi ba Bible babakishiishe bipwa makumi na kuleshanga shi, kipwa kya 1914 akiikala kipwa ki na myanda ikata. Bantu bebungi mu aa mafuku abaadi abakumiina wawa mwanda. Nka bu bibafundjile ungi muntu shi: “Mu 1914 nsenga ibaadi iwule na lukulupilo na milayilo.” Byabya, kunyima kwa mafuku mu kyakya kipwa, butemuki bwa mu Bible bubaadi bulombane. Nsala, kutshinkatshinka kwa nsenga, bipupa na kulombana kwa angi matemuki a mu Bible abishinkamisha kalolo shi Yesu Kidishitu babangile kumunana mwiyilu bu Nfumu a Bufumu bw’Efile Mukulu mu 1914. * Pabaatudile Mwan’aaye bu Mesiya Nfumu, Yehowa bekeele bu Nfumu mu mushindo upya!

4. Mwanda kinyi ubakitshine Yesu abo bakyabamutuulu bu nfumu, na kunyima bakitshine dingi kinyi?

⁴ Mudimo wa kumpala wa Nfumu mupya a Efile Mukulu ubaadi wa kulwa ngoshi na Satana mwishikwanyi Mukata a Nshaaye. Yesu na Miikeyilu yaaye babasumbwile Diabulu na bademo baaye pashi. Bino bibaadi bitwale muloo ukata kwi be mwiyilu kadi byatwadila be pa nsenga dikyenga dishekele kwanka dimo. (Badika Bifumbulwe 12:7-9, 12.) Akupu, Nfumu beyalulwile kwi bantu baaye be pa nsenga bwa kwibasuula, bwa kwibalongyesha, na kwibalumbuula bwa kukita akikyebe eshimba dy’Efile Mukulu. Tubande kutala kileshesho ki buwa kyatupete lelo uno ku mushindo ubaabadi bakumiine ino mifubo isatu ya kumunana kwa Bufumu.

5. Nkusuula kwa mushindo kinyi kubaadi kukitshikye pankatshi pa 1914 na ku mbangilo kwa 1919?

⁵ Kunyima kwa Nfumu kukaasha Satana na bademo na bikitshino byabo bi bubi mwiyilu, Yehowa batumine Yesu bwashi afikye mu kutala na kusuula balongi baaye mu kikudi. Mutemuki Malakii ayitamina bino bu kusuula kwa mu kikudi. (Mal. 3:1-3) Myanda ya kala ayilesha shi bino bibaadi bikitshikye pankatshi pa 1914 na ku mbangilo kwa 1919. * Bwa kwikala mu kifuko kya Yehowa kya be mwiyilu na be pa nsenga, abitungu twikale batoshiibwe sunga shi beselele. (1 Mp. 1:15, 16) Tatukumanga kulwishibwa na kantu su nkamune ka mu bipwilo bya madimi sunga myanda ya politike.

6. Mushindo kinyi wabatushaa bidibwa bya mu kikudi, na bwakinyi bi na muulo?

⁶ Akupu Yesu baatshile matalwa aaye a bu nfumu aye nkusangula “mpika a kishima na mupatulukye.” Uno mpika akyebe kwikala atuusha bidibwa bibuwa bya mu kikudi kwi booso be mu “lombe lumunenka” ku matalwa a Yesu. (Mat. 24:45-47; Yo. 10:16) Kubanga mu 1919, kasaka kapela ka balume bashingwe mwimu mbatwale na kululama kooso buno bushito bukata bwa kudiisha “ba mu nshibo.” Bidibwa bya mu kikudi bi bungi byabakwete kutuusha kwi bano bakwetu abitunyingisha bwashi tumone mushindo wa kukula mu kikudi. Abinyingisha kitshibilo kyetu kya kushaala beselele mu kikudi, mu mwikelo, mu binangu na ku mbidi. Bino bidibwa bya mu kikudi dingi abitulongyesha na kwitulumbuula bwatudya kwipaana mu mudimo wi na muulo ukata ukwete kukitshika pa nsenga lelo uno. Okwete kupeta bukwashi bwa bino bidibwa su?

7. Mmudimo kinyi ukata ubabangile Yesu pabaadi pa nsenga, na aukatungunuka na mu mafuku kinyi?

⁷ Yesu pababangile mudimo waaye pano pa nsenga bakwile shi: “Abintungu kukalungula mukandu wi buwa wa Bufumu bw’Efile Mukulu ku bingi  bibalo namu, mwanda kyakya nyi ky’abantumîne.” (Luk. 4:43, EEM) Munda mwa bipwa bisatu na kipindji, Yesu baadi mutuule binangu byaye ku uno mudimo pa mbalo ya kumpala mu muwa waaye. Balungwile balondji baaye shi: “Peeni panwende, nulambukishe’shi: ‘Bufumu bwa mwiyilu bubefubwila pepi.’” (Mat. 10:7, Kilombeno kipya 2009) Kunyima kwa kusanguka kwaaye, Yesu batemukile shi balondji baaye abakapalakasha mukandu mpa na “kufudiile nsenga.” (Bik. 1:8) Baadi mwibalee shi akyebe nkeekala nabo mu uno mudimo wi buwa mpa na mu ano mafuku etu.—Mat. 28:19, 20.

8. Mushindo kinyi ubaadi Nfumu mutume bantu baaye mu kufuba na katshintshi?

⁸ Mu 1919, “mukandu wa Bufumu” ubaadi upete kingi kipatulwilo. (Mat. 24:14) Nfumu baadi amunana mwiyilu, na aye nkubunga pa nsenga kasaka ka bantu baadi musuule. Abaadi bakokyele na muloo ooso ku dino eyi dya Yesu adyamba shi: Lungulayi pa nsenga ishima mukandu wi buwa wa Bufumu bw’Efile Mukulu bukwete kumunana! (Bik. 10:42) Bu kileshesho, bantu pepi na 20 000 be ku lupese lwa Bufumu abaadi mu kikongeno kibungye maumbo ebungi mu Cedar Point, Ohio mu États-Unis mu mweshi wa Kitema mu 1922. Abaadi na muloo ukata nsaa ibaadi mukwetu Rutherford mukite mwisambo wi na mutwe wa mwanda awamba shi, “Bufumu” aye nkwamba shi: “Talayi Nfumu kwete kumunana! Nwi balungudi baaye. Byabya lungulaayi, lungulaayi, lungulaayi Nfumu na bufumu bwaye.” Mwifuku dibalondele, bantu binunu bibidi abayiile mu mudimo wa bulungudi bangi nkutambuka kipindji kya bilometre 72 kula na mbalo ibaabadi bakitshine kikongeno bwa kulungula mukandu wi buwa. Na muloo ooso ungi mukwetu baadi ku kikongeno bakwile n’eyi di bukopo shi: “Ntshii mulombeene kwilwankana musase wa kulungula Bufumu na katshintshi ka bantu abaadi mu kikongeno!” Mpa na bangi namu abaadi bapushe nka byabya.

9, 10. (a) Mpàngo kinyi yabadi baate bwa kulongyesha balungudi ba mukandu wa Bufumu? (b) Mushindo kinyi ukukwashe ano malongyesha?

⁹ Mu 1922, balungudi ba bufumu bakile pa 17 000 babaadi balungule na katshintshi mu maumbo 58. Anka, bibaadi abitungu kwibalongyesha. Mu siekele a kumpala, Nfumu-Musangudibwe bapeele balondji baaye mayi akulonda pabitale mukandu wa kulungula, mbalo na mushindo wa kwiulungula. (Mat. 10:5-7; Luk. 9:1-6; 10:1-11) Bi mumune na lelo uno, Yesu kwete kutala su baaba bakwete kukita mudimo wa kulungula mukandu wa Bufumu bakwete kupeta malango na su be na bintu byabadi nabyo lukalo bwa kukita mudimo wa bulungudi kalolo. (2 Tim. 3:17) Ku bukwashi bwa kakongye ka beena Kidishitu, Yesu kwete kulongyesha bantu baaye bwabadya kukita mudimo wa bulungudi. Mushindo umune wa kwete kwibalongyesha nku bukwashi bwa Kalasa ka mudimo wa Teokrasi kakwete kukitshika mu tukongye tooso tukile pa 111 000 mu nsenga ishima. Ku bukwashi bwa aa malongyesha, balungudi bakile pa midiyo musambobidi binobino mbelumbuule mu bulungudi na kulongyesha mu mushindo ausangasha “bantu booso.”—Badika 1 Beena-Kodinto 9:20-23.

¹⁰ Kukaasha Kalasa ka mudimo wa Teokrasi, tungi Tulasa twa Bible mbetulumbuule bwa kulongyesha  bakulu mu tukongye, ba mbala-mashinda, bakwetu balume bashii bebakile, beena Kidishitu beyibakishene, beena Komite a filiale na bakashi baabo, bakunkushi ba bifunda na bakashi baabo, na ba misionere. * Bangi balongi ba mu kangi Kalasa ka Bible bwa beena Kidishitu beyibakishene abaadi baleshe muloo ubaabadi nawo mu kaaka kalasa shi: “Malongyesha e buwa atudi bapete nganyingishe kifulo kyetu bwa Yehowa na ngetulumbuule bwa kukwasha bangi.”

11. Nkinyi kikwashe balungudi ba mukandu wa Bufumu bwa kunyingiila sunga kwekala bitompwanga bi naminyi?

¹¹ Uno mudimo ukata wa kulungula na kulongyesha mukandu wa Bufumu mpa na byooso bikwete kukitshika bwa kulombasha uno mudimo, Satana mwishikwanyi kwete kwibimona. Kwete kulwisha mukandu wa Bufumu na balungudi baawo ngoshi ayimweneka na meso na ishy’ayimweneka bwa kwimika uno mufubo. Anka mwishikwanyi te na bukome nya. Yehowa mmutuule Mwan’aaye “kunundu kwa ooso makata, matalwa, makome na mafumu.” (Ef. 1:20-22) Bu byadi Nfumu, Yesu kwete kutumika na matalwa aaye bwa kukalwila na kukunkusha balondji baaye bwashi bashinguule shi akikyeb’eshimba dya Nshaaye kikitshikye. * Mukandu wi buwa ukwete kulungulwa, na midiyo ya bantu baasha mashimba alulame bakwete kulongyeshibwa mashinda a Yehowa. Twi na kinemo kikata kya kukita uno mudimo ukata.

12. Kubanga mu 1914, mushindo kinyi wabadi balumbuule bantu b’Efile Mukulu kalolo?

¹² Kasha Bufumu bwabanga kumunana mu 1914, Nfumu mmulongamishe mushindo wilumbuule bafubi b’Efile Mukulu bwa kukita akikyeb’eshimba dya Nshaaye. (Badika Yeeshaya 60:17.) Mu 1919, abaadi batuule mukunkushi a mudimo mu kakongye kooso bwa kukunkusha mudimo wa bulungudi. Mu 1927 abaadi balumbuule mudimo wa kulungula ku nshibo na nshibo mu dya Lubingo dyooso. Booso be ku lupese lwa Bufumu abaadi banyingishibwe bwa kukita uno mudimo ukata mu 1931 nsaa ibaabakuminyine eshina dya mu Bible dya bu Batemwe ba Yehowa. (Yesh. 43:10-12) Mu 1938, kwela kwa tukanda bwa kusangula bakunkushi ba tukongye abaadi bekupyanyishe na kusangula kwa bakunkushi muyiile abyamba Bifundwe. Mu 1972, abaadi batuule kasaka ka bakulu mu kakongye pamutwe pa kwikala na penda mukulu umune bwa kukunkusha kakongye. Booso balume abalombasha myanda itekibwe abaadi banyingishibwe bwa kukimba kupeta mudimo wa ‘kulama lombe lw’Efile Mukulu.’ (1 Mp. 5:2) Mu 1976 Kasaka ka Bakunkushi-Bakulu kabaadi kalumbuulwe mu ma komite asamombo bwa kukunkusha mudimo wa kulungula mukandu wa  Bufumu mu nsenga ishima. Kubanga nka paapa, Nfumu abadi basangule kwi Yehowa kwete kutungunuka na kulumbuula bantu baaye be ku lupese lwa Bufumu bwa kukita myanda muyiile Bufumu bw’Efile Mukulu.

13. Myanda yabadi bapwe kukita mu bipwa 100 bya Bufumu ngitale nshaleelo oobe naminyi?

¹³ Banda kutala byabadi bapwe kukita kwi Bufumu bwa Mesiya munda mwa bipwa 100 bya kumunana. Mmusuule mwilo bw’eshina dya Yehowa. Mmukunkushe mudimo wa kulungula mukandu wa Bufumu mu maumbo 239 na kulongyesha midiyo ya bantu pabitale mashinda a Yehowa. Mmubungye bantu bakile pa midiyo musambobidi baasha kululama, ooso a kwabadi mmwipaane bwa kukita akikyeb’eshimba dya Nshaaye. (Mis. 110:3) Eyendo, midimo ya Yehowa ku bukwashi bwa Bufumu bwa Mesiya ngikata na ngya kukanya. Kukii ingi myanda ibuwa ayifiki kumpala.

14. (a) Nkinyi kyatutekaa Efile Mukulu p’atutekye shi: “Bufumu bobe bufikye”? (b) Mutwe wetu wa mwanda wa kipwa kya 2014 awamba naminyi, na bwakinyi ngulombane?

¹⁴ Sunga byekala’shi Yehowa mmutuule Mwan’aaye Yesu Kidishitu bu Mesiya Nfumu mu 1914 bino tabibaadi bu lwaluulo looso lwa ku luteko lwa’shi “bufumu bobe bufikye” nya. (Mat. 6:10) Bibaadi bipwe kutemukibwa mu Bible shi Yesu akyebe ‘kudya bufumu munkatshi mwa beshikwanyi naaye.’ (Mis. 110:2) Ma guvernema a baana ba bantu e ku matalwa a Satana akwete kutombokyela Bufumu. Nsaa y’atutekye bwashi Bufumu bw’Efile Mukulu bufikye, tukwete kuteka Efile Mukulu shi, Mesiya Nfumu na bantu b’akamunana nabo bafikye mu kufudiisha bukunkushi bwa baana ba bantu na kukaasha booso abatombokyela Bufumu pa nsenga. Kukita kwa bino akukyebe kulombasha mayi e mu mukanda wa Danyele 2:44 aalesha shi Bufumu bw’Efile Mukulu “abufingi na abutuutu aa mafumu ooso.” Abukyebe kukaasha ma guvernema ooso eshikwene na Bufumu. (Bif. 6:1, 2; 13:1-18; 19:11-21) Kipindji kya’shi bino byooso bikitshikye takidi pepi. Mbilombane bwashi mutwe wetu wa mwanda wa kipwa kya 2014, kulombana kwa bipwa 100 bya kumunana kwa Bufumu bw’Efile Mukulu wikale wa mu Mateo 6:10 awamba shi: “Bufumu bobe bufikye”!

15, 16. (a) Myanda kinyi ibuwa ayikakitshika mu Bipwa kinunu bya Bufumu? (b) Nkintu kinyi kya nfudiilo a kikakitshi Yesu ku nfudiilo kwaye bu Mesiya Nfumu, na byabya abikyebe kulesha kinyi pabitale mpàngo ya Yehowa bwa bipangwa byaaye?

¹⁵ Kunyima kwa Mesiya Nfumu kubutula beshikwanyi b’Efile Mukulu, akyebe kusumbula Satana na bademo baaye mu lupongo munda mwa bipwa kinunu. (Bif. 20:1-3) Aye baapu kukatusha bukome bwa Diabulu, Bufumu abukyebe kwenda kumpala bwa kulombasha myabi ya mulambu wa nkuulo ya Yesu na kupudisha myanda yooso yabadi bakite kwi mulwisho wa Adame. Nfumu akyebe kubuusha midiyo na midiyo ya bafwe balaale mu mashama na akyebe kukita programe mukata a kwibalongyesha myanda ya Yehowa. (Bif. 20:12, 13) Nsenga yooso ishima ayikekala nka bibaadi mpaladiso a mu lupango lwa Edene. Bantu baasha kululama booso abasanguka bwa kwikala bapwidikye.

¹⁶ Ku nfudiilo kwa Bipwa kinunu bya Bufumu bwa Kidishitu, Bufumu bwa Mesiya abwikala bupwe kulombasha mudimo wabo. Akupu Yesu akaalusha Bufumu kwi Nshaaye. (Badika 1 Beena-Kodinto 15:24-28.) Takwikala dingi lukalo lwa muntu pankatshi pa Yehowa na baana baaye be pa nsenga nya. Booso baana b’Efile Mukulu be mwiyilu na be pa nsenga abakyebe kwibunga pamune na Nshaabo e mwiyilu bu be mu kifuko kyaaye kya be mwiyilu na be pa nsenga.

17. We na kitshibilo kya kukita kinyi pabitale Bufumu?

¹⁷ Myanda ibuwa ikitshikye mu bipwa 100 bya kumunana kwa Bufumu abitushinkamiisha shi Yehowa kwete kukunkusha na’shi mpàngo yaaye bwa nsenga ayikalombana. Tutungunukyeyi na kwikala bu bantu baaye baasha kululama na kulungula Nfumu na Bufumu bwaye. Atukitshi bino bashinkamishe kalolo shi, kubashaala mafuku apeela bwashi Yehowa aluule ku luteko lwa shi: “Bufumu boobe bufikye”!