We mukumbeene kukulupila shi Eyi dy’Efile Mukulu dikale dikile ingi mikanda, byabya ndjo bi Bible. Midiyala ya ma Bible ikwete kutuushibwa mu ndimi nkama na nkama. Binangu bi mu Bible bi na bukome bwa kushintuula bantu bwashi bekale bi buwa.—Badika 1 Beena-Tesalonika 2:13; 2 Timotee 3:16.

Atuuku shi Bible mmufikye kwi Efile Mukulu mwanda aleesha kalolo myanda ayifiki kumpala. Ta kwi muntu mulombeene kukita byabya mu’ye nabeene nya. Banda kutala, bino bi mu mukanda wa Yeeshaya. Kipese kyao kibaadi kifundjibwe siekele mushima kumpala kwa kutandjika kwa Yesu abaadi bekisangule mu lubwebwe ku Kalunga kafwe. Akilesha shi, mu lupata lwa Babilone tamukashaala dingi muntu nya. Byabya bibalombeene bwa mususa wa kumpala bipwa bibungi kunyima kwa mudimo wa Yesu pa nsenga.—Badika Yeeshaya 13:19, 20; 2 Mpyeele 1:20, 21.

Bible baadi mufundjibwe mu kipungo kya bipwa 1 600. Kubaadi bantu pepi 40 abafundjile Bible abafundjile mwanda umune kushii kwikutwena mu nfundjilo aabo. Abaadi bebikite naminyi? Efile Mukulu ndjo baadi mwibakunkushe bwa kufunda.—Badika 2 Samwele 23:2.

Ingi nsaa Efile Mukulu baadi esamba na bangi bafundji ba Bible ku bukwashi bwa miikeyilu, bwa bimonwa sunga bilotwa. Misusa ibungi, Efile Mukulu baadi mutweshe binangu byaaye mu mutwe wa mufundji na kumutadiila bwashi asangule bishima byadi mulombeene kufunda mukandu w’Efile Mukulu.—Badika Bifumbulwe 1:1; 21:3-5.