We kwiyipusha shi: ‘Su Efile Mukulu auku byooso, mpa na bi mu binangu na nkalo yande, bwakinyi abitungu dingi kuteka?’ Luno nyi lukonko lwibuwa. Tomono Yesu baadi mwambe shi Efile Mukule “auku kyanudi nakyo lukalo, kumpala kwanudya kumuteka kyanka”? (Mateo 6:8) Daavide, nfumu a mu Isaleele a kala baadi mushinguule uno mwanda, na bafundjile shi: “Ntantushishe kishima p’edimi dyande, obe Yehowa, we mupwe kwikiuka.” (Misambo 139:4) Byabya, bwakinyi abitungu twele nteko kwi Efile Mukulu? Bwa kwaluula luno lukonko, tubande kutaluula akyamba Bible pabitale nteko ya balangwidi b’Efile Mukulu. *

Sunga byekala shi Bible amba shi Yehowa * Efile Mukulu auku myanda yooso, alesha dingi shi tetatshisha nkapenda bwa kuuka myanda i kwi bafubi baaye nya. (Misambo 139:6; Beena-Looma 11:33) Sunga mbyadi na binangu bya kulama myanda ikilekile bungi, te bu ma ordinatere aalamaa myanda ya bantu kushi kushinguula muntu na muntu kalolo. Anka, Efile Mukulu akambaa kutala bi mu binangu byetu mwanda akumiina bwashi twifubwile pepi naye. (Misambo 139:23, 24; Jaake 4:8) Nyi bwakinyi Yesu baadi mulungule balongi baaye bwa kwela nteko, sunga byekala shi Nshaaye auku kalolo byooso byatudi nabyo lukalo. (Mateo 6:6-8) Nsaa yooso yatulungula Mupangi etu bi mu binangu byetu, atukyebe kwifubwila pepi naaye.

Ingi nsaa, bi kwitwikeele bukopo bwa kuuka kintu akitungu kuteka mu luteko. Yaaya nsaa, Efile Mukulu mukumbeene kumona mpa nkalo i mu mashimba yatushi baukye mushindo wa kwiyakula na kupudisha nkalo yetu muyiile kiukilo kyaaye kikata kya myanda yetu. (Beena-Looma 8:26, 27; Beena-Efeeze 3:20) Patumono shi Yehowa betukitshina kintu kampanda mu muwa wetu, sunga mu mushindo ushy’aukamba kumweka ku meso kwa bantu, atwifubwila pepi naaye.

Bible etushinkamisha shi Efile Mukulu Sha bukome-booso aluulaa nteko ya bafubi baaye basha kululama, kadi etulesha dingi myanda ikumbeene kumukutshisha kuteemesha ingi nteko. Bu kileshesho, mu mafuku abaadi buntomboshi bukile mu Isaleele a kala, Efile Mukulu baadi mutume mutemuki Yeeshaya bwa kulungula mwilo shi: “Nwi balombeene kufimisha nteko yenu, ntanneyitemesha’mi: masa enu ngapatakane na mase.” (Yeeshaya 1:15) Oolo, Efile Mukulu ta mulombeene kuteemesha nteko ya baaba abasabuula miiya yaaye sunga abele nteko na binangu bibubi.​—Myeele 28:9; Jaake 4:3.

Ku lungi lupese, Bible amba shi: “Su twamuteka kintu muyiile kukumiina kwaye, aye etuteemesha.” (1 Yowano 5:14) Byabya, bino abilesha shi Efile Mukulu akyebe kupa balangwidi baaye byooso byabamutekye? Nya. Twate kileshesho kya Mpoolo mutumibwa, baadi musendeele Efile Mukulu misango isatu bwa kumukasha “mulobo mu mbidi.” (2 Beena-Kodinto 12:7, 8) Bi kwikala shi Mpoolo baadi akumbu mukumbo wa meso ushibaadi aupu. Bibaadi bimukalakashe ngofu! Mpoolo  baadi na kipeedi kya kubuka na baadi mpa na mubuushe muntu ku bafwe, kadi baadi na kya kushaala na mukumbo waaye. (Bikitshino 19:11, 12; 20:9, 10) Sunga byekala shi tababaadi bamwaluule mu mushindo ubaadi mukumiine, Mpoolo bakuminyine lwaluulo lw’Efile Mukulu na lutumbu looso.​—2 Beena-Kodinto 12:9, 10.

Eyendo, bangi bantu be mu Bible tababaadi bebakitshine bipaso bwa kwibaluula ku nteko yabo nya. (2 Banfumu 20:1-7) Na dingi, mpa na mu mafuku a kala, ta mbantu booso babaabadi abakitshina bipaso nya. Bangi balangwidi abaadi bapushe bubi ku mashimba mwanda abaadi bamone nka bu’shi Efile Mukulu tabaadi mwaluule nteko yaabo. Nfumu Daavide bepwishe shi: “Ondubu na ku nguba kinyi Yehowa?” (Misambo 13:2) Kadi pabaadi mushinguule shi Yehowa baadi mumupaashe misango ibungi, Daavide baadi muleshe lukulupilo mwi Efile Mukulu. Mu lwalwa luteko lumune, Daavide baadi mwambe dingi shi: “Ami nakulupila kalolo koobe.” (Misambo 13:6) Anka bu Daavide, balangwidi b’Efile Mukulu ba lelo uno mbakumbeene kunyingiila mu nteko mpa na pabakamono shi Efile Mukulu kwete kwaluula nteko yabo.​—Beena-Looma 12:12.

Efile Mukulu aluulaa ku nkalo yetu ya binyibinyi.

Ba nambutwile bebuwa tabapeya bana baabo kyooso kyabebatekye na nsaa yabebatekye kyanka nya; na byabya mbilombane. Bi mumune, Efile Mukulu mukumbeene kukutwa kwaluula nteko yetu mu mushindo watupwandjikisha na nsaa yatwiyitengyela. Kadi twi balombeene kwikala na lukulupilo shi Mupangi etu, anka bu nshe bana sha kifulo, akyebe kwaluula ku nkalo yetu ya binyibinyi mu mushindo na pa nsaa ilombane.​—Luuka 11:11-13.

Efile Mukulu aluulaa ku nteko yetu mu mushindo watushi pangi balombeene kumona.

Byabya, twi kwamba naminyi su atwele luteko bwa kupudisha mwanda kampanda ukwete kutungunuka na kwitukalakasha? Twi kwamba shi bu byashi mwitukitshine kipaso, Yehowa ta mwaluule nya? Nya, twi balombeene kutala su Efile Mukulu mwitukwashe mu mushindo watushi balombeene kumona. Bu kileshesho, pangi kuuku etu kampanda sha kalolo mukite kintu kampanda bwa kwitukwasha pa nsaa ilombane. (Myeele 17:17) Bi kwikala shi Yehowa nyi mukume eshimba dya yawa kuuku bwa kwitukwasha su? Kukaasha byabya, lwaluulo lw’Efile Mukulu ku luteko lwa kukimba bukwashi ndulombeene kufika mu Bible. Mwamwa twi balombeene kupeta binangu bya kupudisha myanda kampanda ayitukalakasha.​—2 Timotee 3:16, 17.

Pamutwe pa kukaasha lukalakasho lwatudi nalo, misango ibungi Efile Mukulu apeyaa bafubi baaye bukome bwa kunyingiila. (2 Beena-Kodinto 4:7) Bu kileshesho, pabaadi Yesu mutekye Nshaaye bwa kukaasha lukalakasho lubaadi kumpala, mwanda baadi atshinyi bwashi eshina dy’Efile Mukulu tadisabulwanga, Yehowa baadi mutume mwikeyilu bwa kunyingisha Mwana aye. (Luuka 22:42, 43) Bi mumune, Efile Mukulu mukumbeene kwitutumina kuuku etu bwa kwitunyingisha nsaa yatudi babofule. (Myeele 12:25) Bu byabidi shi lwaluulo lwi byabya talukamba kumweneka, abitungu twikala atwele binangu kalolo bwa kumona mushindo ukwete Efile Mukulu kwaluula nteko yetu.

Ingi nteko I na kya kwindjila apakumbana nsaa y’Efile Mukulu.

Bible amba shi Efile Mukulu Sha bukome-booso asangalaa na bantu basha kwiyisha “pa nguba mutshibiibwe.” (1 Mpyeele 5:6) Byabya su kwamweka shi lwaluulo lukwete kuyisha, tabitungu shi tumone shi Yehowa kwete kulenguula nteko yetu nya. Pamutwe pa byabya, bu byauku kwitukila, Mupangi etu sha kalolo ataluulaa nteko yetu muyiile byauku shi bibuwa bwetu.

Twate kileshesho: Banda kupwandjikisha shi we na mwana oobe mulume mukinga akutekye nkinga. Okyebe musango umune kumupa yanka? Su bomono shi tamubande kulombana bwa kukamina ku nkinga, we mulombeene kwindjila kumpala kwa kwiyula. Anka, okyebe kumudila yanka nka pokamono shi ngikumbeene kwikala bwa buwa bwaaye. Bi mumune, Efile Mukulu mukumbeene kwitupa ‘akikyebe eshimba dyetu’ pa nsaa ilombane su atutungunuka na kuteka.​—Misambo 37:4.

Bible alungula beena Kidishitu ba binyibinyi bwashi tabashimishanga lukulupilo mu muulo wa luteko.  Bangi mbakumbeene kwamba shi: ‘Mbibofule kwakula, pe kukita.’ Oolo, su twi na mwanda ukwete kutungunuka na kwitukalakasha sunga shi abetukitshina myanda ya kukutwa kululama, twi balombeene kumona shi tatwi na kya kwindjila lwaluulo. Kadi, bibuwa tutentekyesha kibaadi Yesu mulongyeshe pabitale kunyingiila mu nteko.

Yesu baadi kutuushe kileshesho kya mukashi kilele umune baadi akimbi bukwashi, aye nkutungunuka na kwenda kwi nsushi umune mukutwe kululama bwashi atshibe mwanda waye. (Luuka 18:1-3) Sunga byekala shi ku mbangilo uno nsushi baadi mupele kumukwasha, kunyima bambile shi: “Nauku kumutshibila mwanda waye, bwa’shi tala afika mu kunkalakasha kapindji na kapindji.” (Luuka 18:4, 5) Muyiile bishima bi mu ndimi ya kala, nsushi baadi mutale mwanda wa mukashi kilelele bwashi “tamukupilanga mu meso,” sunga shi “talwishanga nkumo” yaaye. * Sunga mbibaadi mukutwe kululama, pa mwanda wa kutshina kulwisha nkumo yaaye, nsushi baadi mukwashe uno mukashi kilele; Efile Mukulu etu sha kalolo akyebe kukita kukila paapa bwa baaba “abamwididi bufuku na kanya”! Anka bu bibambile Yesu, Efile Mukulu “atshibi mwanda wabo bukidi bukidi.”​—Luuka 18:6-8.

Sunga byekala shi ingi nsaa twi kwikala bakokye na kuteka kwa bukwashi, abitungu shi tatulekanga ya. Patunyingiila mu nteko, atulesha shi eyendo twi na lukalo lwa kumona mboko y’Efile Mukulu mu muwa wetu. Atulongo dingi mushindo wa kushinguula myaluulo y’Efile Mukulu ku nteko yetu, na byabya abitukwasha bwa kwifubwila pepi naaye. Oolo, twi balombeene kukulupila shi Yehowa akyebe kwaluula nteko yetu ibuwa su atutungunuka na kumuteka na lukumiino looso.​—Luuka 11:9.