Atwe booso atunangushenaa pabitale mafuku e kumpala. Atwiyipusha mushindo aukekala nshalelo etu na a baaba batudi bafule. Atwiyelaa nkonko bu ino: ‘Bana bande abakyebe nkekala na nshalelo ebuwa? Nsenga ayikyebe nkabutudibwa ku masaku kampanda su? Kwi kintu kyandi mukumbeene kushintuula bwa kulumbuula nshalelo ande a mafuku aafiki?’ Lukalo lwa kuuka bino byooso alulesha byatudi; atukumiinaa kwikala na lukulupilo, kushinkamisha myanda yooso, kwiyituula mu mulongo, na kwikala na mashimba ataale. Su ouku abikala mafuku e kumpala, we kwilumbuula, na bukome boobe booso na binangu byoobe byooso.

Byabya, nshalelo oobe a mafuku aafiki ekala naminyi? Kwi muntu mukumbeene kuuka su? Basha binangu bya kutemuka myanda mbatompe kutemuka ingi myanda ikitshikye kadi ibungi ta ngikitshikye nya. Anka bantu abalesha shi Efile Mukulu mmulombeene kutemuka myanda i kumpala kushi kwidimba. Eyi dyaaye adilesha shi: “Ku mbangilo kooso naukisha akikakitshika, nabadiilaa kuukisha myanda ishy’abandjile kukitshibwa.” (Yeeshaya 46:10) Mmushindo kinyi wadi mobeshe kwibikita?

Bwakinyi abitungu kwikalakasha bwa kuuka su myanda yooso ibatemukile Efile Mukulu kala ibaadi ilombane? Eyendo, su bomono shi myanda yooso ikwete kwakula mwina meteo kampanda ikwete kulombana efuku dyooso munda mwa bipwa bibungi, we kukema. Kushi mpaka, we mukumbeene kuteemesha myanda yakula pabitale nguba efuku dya maloba. Mu mushindo umune, su bolongo shi myanda ibatemukile Efile Mukulu ibaadi ikumbane yooso, wekala na lukalo lwa kuuka kyakwete kutemuka pabitale nshalelo a mafuku aafiki.

KUBUTUDIBWA KWA KIBUNDJI KIKATA:

Bu kileshesho, kutemuka shi kibundji kampanda kikata, kitshokole bingi bibundji munda mwa bipwa nkama, takidi pepi na kubutudibwa ta mwanda upela nya. Ku bukwashi bwa mutemuki aye umune, Efile Mukulu baadi  mutemukye mwanda wi byabya​—kubutudibwa kwa Ninive. (Sofonii 2:13-15) Nkinyi kyabadi bafunde kwi bafundji ba myanda ya kala? Mu siekele a musambo kwibedi kwa Yesu Kidishitu (Eb.Y.K.), bipwa 15 kunyima kwa butemuki bw’Efile Mukulu, beena Babilone na beena Mede abaadi balwe na Ninive abo nkumubutula. Na dingi, Efile Mukulu baadi muleshe kalolo kumpala shi eumbo dya Ninive adikashala ‘disasulwe, dyume bu kabaka.’ Uno mwanda ubaadi ulombane su? Oolo. Kibundji kya Ninive, na misoko yakyo ya mbwipi, bibaadi bilombeene kwikala bukata bwa bilometre 518, bantu babekitshokwele tababaadi balekye kibundji sunga kwimushala, bu bibaadi abipwandikisha bantu nya. Pamutwe pa byabya, abaadi bekibutule. Kwi muntu ataluulaa myanda ya politike mukumbeene kutemuka myanda ayikumbana mu uno mushindo?

MIFUFWA YA BANTU AYIKASHIKIBWA MU KAALO:

Nanyi mulombeene kutemuka​—bipwa 300 kumpala—​eshina dya muntu akyebe kushika mifufwa ku kilambwilo na eshinda dya nkambw’aye, mpa na dya mu kibundji amukekala kilambwilo? Su mwanda wi byabya wakitshika, uno muntu mmukumbeene kwenda nkumo. Mutemuki a Efile Mukulu bakwile shi: “Mwana mulume akatandjikwa mu nshibo ya Daavide, eshina dyaye adikala Yosyase . . . , dingi akashiiki mifufwa ya bantu” panundu pa kilambwilo mu kibalo kya Betele. (1 Banfumu 13:1, 2) Bipwa nkama isatu kunyima, nfumu Yosyase​—eshina dishi ditumbwe ngofu mu Bible—​baadi mutuukye mu kifuko kya Daavide. Anka bu bibabadi batemukye, Yosyase “batumine bantu mu kwata mifufwa ibaadi mu mashama, aye kwiyishika kaalo pa kilambwilo” kibaadi ku Betele. (2 Banfumu 23:14-16) Mushindo kinyi ukumbeene muntu kutemuka ino myanda mpa na tu myanda tupela su ta mukunkushibwe na binangu bikile bya bantu?

NFUDIILO A BUFUMU:

Mbikumbeene kwitukanyisha su muntu atemuka eshina dya muntu kampanda akyebe kubutula eumbo dikile maumbo ooso bukome pa nsenga ishima, mpa na kulesha mayele akyebe nkafuba nao bwa kwidibutula, bino byooso ebitemuka mafuku ebungi kumpala kwashi yawa muntu atandjikwe. Efile Mukulu baadi mutemukye shi Siiruse akyebe kutshokola eumbo dimune. Uno Siiruse akyebe dingi kupososha beena Yuuda ku bupika na kwibakwasha bwa  kwibakuula ntempelo aabo eselele. Na dingi, Efile Mukulu baadi mutemukye shi Siiruse akyebe kukamisha mema na balesheshe shi biibi abikashala bibaule, bwashi basalayi batwele kushi lukalakasho. (Yeeshaya 44:27–45:2) Myanda ibungi ibaadi Efile Mukulu mutemukye ibakumbeene su? Oolo, bafundji ba myanda ya kala abalesha shi Siiruse baadi mutshokole ino ngoshi. Basalayi ba Siiruse abaadi bakite mudimo wi bukopo wa kukumba mema a mwela ukata wa mu Babilone, abo nkukamisha mema. Na dingi, basalayi abatwelele mwiumbo ku biibi bibaabadi balube kubaa. Kunyima Siiruse nkupososha beena Yuuda na kwibapa matalwa a kwibakuula ntempelo abo mu Yelusaleme. Bibaadi mwanda wa kukanya, mwanda Siiruse tabaadi alangwila Efile Mukulu a beena Yuuda nya. (Esdrase 1:1-3) Nanyi kukatusha Efile Mukulu baadi mukumbeene kutemuka ino myanda ya kala ku kamwanda na ka mwanda kooso?

Tubatemuna bileshesho bisatu bya mushindo ubaadi ulombane myanda ibaadi itemukye Efile Mukulu. Ta nkapenda ino myanda nyi ibaadi ikitshikye nya. Yooshwa, mukunkushi a beena Yuuda baadi mwakule mwanda ubaabadi abauku kwi mwilo ooso shi: ‘Anwe namu anuuku n’eshimba dyenu dyooso na byenu byooso shi, eyi su ndimunenka ta ndishale kushi kipeta, ku bishima byooso bikile buwa bibaadi byambe Yehowa Efile Mukulu enu pa mwanda wenu. Byooso mbinukumbeene; su nkimunenka kya ku bino bishima ta nkishale kushi kipeta.’ (Yooshwa 23:1, 2, 14) Mwilo wa Yooshwa taubaadi ukumbeene kupela shi myanda ibaadi itemukye Efile Mukulu ta ngilombane nya. Kadi mushindo kinyi aukumbashaa Efile Mukulu milayilo na matemuki aaye? Kwi kwilekena kukata pankatshi pa mushindo aukitaa Efile Mukulu myanda na mushindo aukitaa bantu. We na kya kwibiuka, mwanda Efile Mukulu kwete kutemuka myanda ya kukanya itayidi pepi na kukitshika na itale nshalelo a mafuku aafiki.

Misusa ibungi matemuki a bantu ngatale myanda ayikimbuulaa beena sianse, ayitaluulaa basha binangu sunga beena lubuko. Kunyima kwa kutemuka, bantu abaashalaa batengyele bwa kumona akikyebe kukitshika.​—Myeele 27:1.

Mu kwilekena na bantu, Efile Mukulu auku myanda yooso. Auku kalolo bi bantu na byabanangushena; byabya nsaa yakyebe kutemuka mwanda, mmukumbeene kumona kumpala kalolo myanda ayikyebe kukita bantu sunga miilo ishima. Anka Efile Mukulu tayimenaa penda paapa nya. Mulombeene kukunkusha na kushintuula myanda kampanda bwa kulombasha mpango yaaye. Amba shi: “Eyi dyande nguba adituuku kwandi tadii kwalukiila kwandi kushii kipeta, . . . kushii kukita kinaadi mwiditumine.” (Yeeshaya 55:11) Ingi nsaa, angi matemuki a Efile Mukulu e kwanka penda bwa kwituukisha kyakyebe kukita mu mafuku e kumpala. Akitaa nka bwashi mayi aye akumbane kalolo.

Kwi butemuki kampanda bwa binyibinyi pabitale nshalelo oobe a mafuku aafiki na a bantu boodi mufule? Su ouka kumpala shi kipapi kikata takidi pepi na kufika, we mukumbeene kwilumbuula bwa kupasha muwa oobe. We mulombeene kukita byabya pabitale matemuki a mu Bible. Efile Mukulu baadi mwakule shi kubashala mafuku apeela bwashi myanda ikata ishintulukye pa nsenga ishima. (Tala kashibo akamba shi: “ Kibaadi Efile Mukulu muleshe pabitale mafuku aafiki.”) Ino myanda itale mafuku aafiki ngilekeene ngofu na myanda ibungi ayitemukaa bantu.

We kunangushena uno mushindo: Ino nsenga i na mwanda umune. Abaadi bapwe kwiufunda, na we mulombeene kuuka kumpala akikyebe kukakitshika ku nfudiilo. Efile Mukulu amba shi: “Ku mbangilo kooso naukishaa akikakitshika, . . . namba shi ‘nangunangu yande aikekala’nka kwanka, dingi kyooso kindongamine nekikitshi.’” (Yeeshaya 46:10) Obe na kifuko kyoobe nwibakumbeene kwikala na nshalelo ebuwa mu mafuku aafiki. Ipusha Batemwe ba Yehowa pabitale akyamba Bible bwa myanda ayifiki. Batemwe tabakwete kubuka myanda, sunga kwisamba na bikudi kampanda nya; na dingi, tabe na bukome kampanda bwa kutemuka myanda nya. Mbalongi ba Bible bakumbeene nkuleesha myanda ibuwa ikwete kulumbuula Efile Mukulu bwa nshalelo a mafuku aafiki.