1. Bwakinyi kifulo ki pankatshi pa Efile Mukulu na mwan’aye kibaadi kitame?

YESU KIDISHITU, Mwana a Yehowa, bambile shi: “Ne mufule Yaaya.” (Yo. 14:31) Yesu bambile dingi shi: “Yaaya mmufule Mwana.” (Yo. 5:20) Bino ta mbilombeene kwitukemesha nya. Mwanda, nsaa yooso ibaadi mukishe kumpala kwa kufika pano pa nsenga bu muntu, Yesu baadi afubu bu “mukwashi” a Efile Mukulu. (Mye. 8:30) Bu bibaadi Yehowa na Yesu bafube pamune, Mwana baadi mulongye ngofu pabitale ngikashi ya Yaaya na myanda ikile bungi ayilesha bwakinyi bibuwa kumufula. Twi kwamba shi kwikala pamune nkukite bwashi kifulo kyaabo kitame.

2. (a) Kifulo nkitale kinyi? (b) Nkonko kinyi yatukyebe kutaluula?

² Kifulo nkitale byatupusha mwishimba bwa muntu kampanda. Daavide, mufundji a misambo bayimbile shi: “Ne mukufule, Yehowa, obe bukome bwande.” (Mis. 18:1) Bino nyi abitunganga shi tupushe pabitale Efile Mukulu, mwanda aye e netu kifulo. Su atumukokyela, Yehowa akyebe kwitufula. (Badika Miiya Ikituulwe 7:12, 13.) Kadi twi balombeene kufula Efile Mukulu, atushi balombeene kumumona su? Kufula Yehowa akulesha kinyi? Bwakinyi twi na kya kufula Yehowa? Na mushindo kinyi watudi balombeene kulesha shi twi bafule Efile Mukulu?

3, 4. Bwakinyi twi balombeene kufula Yehowa?

³ “Efile Mukulu nkikudi”; byabya, tatwi balombeene kumumona nya. (Yo. 4:24) Kadi, twi balombeene kumufula, na Bifundwe abitutekye bwa kulesha kino kifulo. Bu kileshesho, Moyiise baadi mulungule beena Isaleele shi: “Ofule Yehowa Efile Mukulu oobe n’eshimba dyoobe dyooso na byoobe byooso na makome obe ooso.”​—Miy. 6:5.

⁴ Bwakinyi twi balombeene kufula Efile Mukulu ngofu? Mwanda mwitupangye na lukalo lwa mu kikudi na mwitupe mushindo wa kulesha kino kifulo. Patukumbasha lukalo lwetu lwa mu kikudi kalolo, kifulo kyetu bwa Yehowa akitama na yaaya nsaa twi na kya kwikala na muloo. Yesu bambile shi: “Basha muloo anka balanda ku kikudi, mwanda bufumu bw’eulu mbwabo.” (Mat. 5:3, kilombeeno kipya 2009) Pabitale lukalo alutandjikwaa nalo bantu lwa kulangwila, ungi mukanda awamba shi: “Twi na kya kwikala na moo, kukema na kwikala na kanemo pa kumona mushindo wi bantu ba mbalo yooso bakwete kukimba na kukumiina mwi yawa e kunundu kwa byooso.”​—Man Does Not Stand Alone, wa A. C. Morrison.

5. Mushindo kinyi watuuku shi kukimba kw’Efile Mukulu ta nkukisha kwa nsaa?

⁵ Kukimba kw’Efile Mukulu nyi nkukisha kwa nsaa? Nya, mwanda akumiina bwashi tumufumbule. Mpoolo mutumibwa baadi mwibileshe patooka nsaa ibaadi alambukisha kisaka kya bantu abaadi bebungye mu Aleopashe, e pa mbalo yabadi balombeene kumona kwi muntu e ku pathérnon​—mwengye wa ntempelo a Atena, efile a kibundji kya kala kya Atene. Banda kwimona bu’be baadi panka nsaa ibaadi Mpoolo akula pabitale “Efile Mukulu bapangile eyilu na nsenga na byooso bi mwanka” akupu bapatuula shi “tabombeelaa mu ma ntempelo akitwe na maasa nya.” Bakumbasha shi “bapangile miilo yooso ya bantu ku mase a [muntu] umune bwa kushaala pa nsenga pooso, bapwile kutshiba bipungo bilumbuulwe bya mafuku, na midyanyino ya nsenga yaabo bwashi bakimbe Efile Mukulu su mbalombeene mu kipaso kinyi kumukuma mu kufwakunkanga na kumupeta, sunga aye te kula na muntu ooso a kwatudi.” (Bik. 17:24-27, Kilombeeno kipya 2009) Oolo, bantu mbalombeene kufumbula Efile Mukulu. Batemwe ba Yehowa bakile pa midiyo musambo na kya pankatshi ‘mbamupete eyendo’​—na mbamufule ngofu.

6. Nkinyi kibaadi Yesu muleshe bu “eyi dikata na dya kumpala”?

⁶ Kifulo kyetu bwa Yehowa abitungu kikatukile mwishimba. Yesu baadi mwibileshe pabaadi ungi Mufalisee mumwipushe shi: “Mulambukishi, eyi kinyi dikile mayi ooso mu mukanda wa Miiya?” Yesu nkumwalula shi: “‘Ofule Efile Mukulu oobe n’eshimba dyoobe dyooso, na kikudi kyoobe kyooso, mpaa na kinangu kyoobe kyooso.’ Dyadya ngi eyi dikata na dya kumpala.”​—Mat. 22:34-38.

7. Nkinyi akipatuula kufula Efile Mukulu na (a) “Eshimba dyetu dyooso?” (b) “Kikudi kyetu kyooso?” (c) “Kinangu kyetu kyooso?”

⁷ Nkinyi kibaadi Yesu muleshe pabakwile shi tufule Efile Mukulu ‘n’eshimba dyetu dyooso?’ Baadi muleshe shi abitungu tufule Yehowa n’eshimba dyetu dyooso dya mu kifwanyi, disangishe nkalo yetu, binangu na byatupusha mwishimba. Abitungu tumufule dingi na “kikudi kyetu kyooso,” sunga muuwa wetu. Na dingi, abitungu tufule Efile Mukulu na “kinangu kyetu kyooso.” Mu kwakula kwa kalolo, abitungu tufule Yehowa ngofu, kushi kwaluka kumongo.

8. Kufula Efile Mukulu ngofu akukyebe kwitutakula bwa kukita kinyi?

⁸ Su twafula Efile Mukulu n’eshimba dyetu dyooso, kikudi na kinangu, atukyebe kwikala balongi b’Eyi dyaye ba kishima, kutumikila mpàngo yaye n’eshimba dyooso, na kulungula mukandu wibuwa wa bufumu na kisumi. (Mat. 24:14; Lom. 12:1, 2) Kifulo ky’eyendo bwa Yehowa akikyebe  kwitwifubwisha peepi naye. (Ja. 4:8) Oolo, tatwibakumbeene kulesha myanda yooso ayitutakula bwa kufula Efile Mukulu nya. Kadi, tubande kutaluula myanda ipela.

9. Bwakinyi twi kufula Yehowa bu Mupangi na Mukwashi eetu?

⁹ Yehowa nyi Mupangi eetu na Mukwashi eetu. Mpoolo bakwile shi: “Mwanda mwadi’ye nyi mwatudi bapetele muuwa.” (Bik. 17:28) Yehowa mwitupe nsenga ibuwa bu kishalelo kyetu. (Mis. 115:16) Mwitupe dingi byakudya na bingi bintu byatudi nabyo lukalo bwa kulama muwa wetu. Nyi bwakinyi Mpoolo baadi mulungule beena kibundji kya Listre abaadi abalangwila ma nkishi shi: “Efile Mukulu sha muwa . . . ta mukutwe kwinulesha kalolo kaye, mwanda baadi mwinutumine mpeshi mwiyilu na kumenesha bintu mu bipungo byabyo, nkuusha mashimba enu na byakudya, na muloo.” (Bik. 14:15-17) Bino tabitutakula namu bwashi tufule Mupangi etu mukata na Mukwashi etu sha kifulo su?​—Mul. 12:1.

10. Nkinyi akitungu tukite pabitale mpàngo y’Efile Mukulu ya kukasha mulwisho na lufu?

¹⁰ Efile Mukulu mukite bwa kukaasha mulwisho na lufu byatudi bapyane kwi Adame. (Lom. 5:12) Oolo, “Efile Mukulu betulesheshe kifulo kyaye mu bino shi, Kidishitu betufwidile pabatudi twi basha milwisho.” (Lom. 5:8) Kushi mpaka, mashimba etu ngaule na kifulo bwa Yehowa mwanda mmukite mwaye mooso bwashi tupete kulekyelwa kwa milwisho su atwilanga ku mashimba na kulesha lukumiino mu mulambu wa nkuulo wa Yesu.​—Yo. 3:16.

11, 12. Mu mishindo kinyi mwi Yehowa mwitupe lukulupilo?

¹¹ Yehowa ‘etupa lukulupilo alwituusha na muloo na butaale.’ (Lom. 15:13) Efile Mukulu mwitupe lukulupilo alwitunyingisha bwa kukambila myanda ayitompo lukumiino lwetu. Bashingwe mwimu bakwete kulesha ‘kishima mpaa na ku lufu, abebapa lubango [kifulu] lwa muwa mwiyilu.’ (Bif. 2:10) Baaba abalama bululame be na lukulupilo lwa kwikala na muwa pa nsenga abakyebe nkapeta myabi mu mpaladiso. (Luk. 23:43) Nkinyi kyatupusha pabitale ino myanda? Mashimba etu ngaule na muloo, butaale, na kifulo bwa Yaaya “mwitupe kyabuntu kyooso kya muloo na bwedi booso bupwidikye”?​—Ja. 1:17.

¹² Efile Mukulu mwitupe lukulupilo lwa lusangukilo lukwete kwitunyingisha ku mashimba. (Bik. 24:15) Eyendo lufu lwa muntu atudi bafule alwitwinyongoshaa ngofu, kadi mwanda wa lukulupilo lwa lusangukilo, ‘tatukyebe kwikala mu kinyongwa bu bangi bashi na lukulupilo.’ (1 Tes. 4:13) Na kifulo kyooso, Yehowa e na lukalo lwa kusangusha bafwe, bikishekishe baaba be na bulamate, bu Yoobo muntu mululame. (Yob. 14:15) Banda kunangushena miloo ayikekala kwanka pano pa nsenga nsaa yatukakukila baaba abakasanguka. Mashimba etu ngaule na kifulo bwa Nshetu e mwiyilu, aye mwitupe lukulupilo lwa lusangukilo!

13. Nkinyi akitushinkamiisha shi Efile Mukulu kwete kwikalakasha bwetu?

¹³ Eyendo Yehowa ekalakashaa bwetu. (Badika Misambo 34:6, 18, 19; 1 Mpyeele 5:6, 7.) Mwanda atuuku shi Efile Mukulu etu sha kifulo e kwanka bwa kukwasha bano booso bamulamate, tukwete kupusha bu’twe be mu butaale anka bu ‘kisaka kya nyema kya mu kidiilo kyaye.’ (Mis. 79:13) Na dingi, kifulo ky’Efile Mukulu bwetu akikyebe kumweneka mu myanda yaketukitshina kukiila ku Bufumu bwa Mesiya. Kunyima Nfumu aadi musangule Yesu Kidishitu, akakasha bukitekite, buntomboshi, na bubi pa nsenga, bantu basha kukokyela abakapete myabi ya kwikala mu butaale na muloo wa looso. (Mis. 72:7, 12-14, 16) Tomono namu shi ino myanda ayitutakula bwa kufula Efile Mukulu etu n’eshimba, kikudi, bukome na kinangu kyetu su?​—Luk. 10:27.

14. Efile Mukulu mmwitupe kinemo kinyi?

¹⁴ Yehowa mwitupe kineemo kikata kya kumufubila bu Batemwe baaye. (Yesh. 43:10-12) Twibafule Yehowa bwa uno mwabi wadi mwitupe wa kukwatshishena bufumu bwaye  na kutwadila bantu ba mu uno ndumbulwilo mulwile lukulupilo lw’eyendo. Na dingi, twibalombeene kwakula na lukumiino na kushinkamisha mwanda tukwete kulungula mukandu wibuwa autukila mu Eyi dya bya binyibinyi dy’Efile Mukulu, aye sha milayilo ishy’ayikutwaa kulombana. (Badika Yooshwa 21:45; 23:14.) Oolo, myanda ayilesha myabi na kyatudi bakumbeene kufudila Yehowa ngikile bungi. Kadi Mushindo kinyi watudi bakumbeene kumulesha kifulo?

15. Mushindo kinyi wi kulonga na kutumikula Eyi dy’Efile Mukulu akwitukwasha?

¹⁵ Kulonga Eyi dy’Efile Mukulu na kishima na kwiditumikila. Kukita byabya akulesha shi twibafule Yehowa na atukumiina binyibinyi shi eyi dyaye dikale bu ‘etaata aditoosha eshinda dyetu.’ (Mis. 119:105) Su twi na kinyongwa, twibalombeene kupeta bukwashi ku mayi a kifulo bu ano: “tosumbushenaa eshimba dinyongole na disasukye.” ‘Kalolo koobe Yehowa, kabanyingishanga. Pabamonanga mpombo ilekeene, napetanga muloo wa kunyingisha koobe.’ (Mis. 51:19; 94:18, 19) Yehowa aleshaa bantu abakyenge lusa, na Yesu namu apushishaa bantu lusa. (Yesh. 49:13; Mat. 15:32) Kulonga kwa Bible nkulombeene kwitukwasha bwa kuuka mushindo ukwete kwitatshisha Yehowa na kifulo kyooso bwetu, abitukwasha bwashi tumuleshe namu kifulo kikata.

16. Mushindo kinyi wi kwela kwa nteko misusa yooso akutamisha kifulo kyetu bw’Efile Mukulu?

¹⁶ Kwela kwa nteko kwi Efile Mukulu misusa yooso. Nteko yetu ayitwifubwisha peepi ngofu kwi yawa “apushaa ntendo.” (Mis. 65:2) Nsaa yatutundula shi Efile Mukulu aluulaa nteko yeetu, kifulo kyetu mwadi akitama ngofu. Bu kileshesho, pangi twibapwe kumona shi takumiina twatompibwa bikile pa bukome bwetu. (1 Kod. 10:13) Su twi na kinyongwa na su twatadiila kwi Yehowa na kwiyaya ngofu, atukyebe kumona bi “butaale bw’Efile Mukulu” bushi kupwandjikisha. (Fid. 4:6, 7) Ingi nsaa twibakumbeene kwela luteko mu kimume​—bu bibakitshine Neemi​—na kumona shi lubapete lwalulo. (Ne. 2:1-6) Su twi na “katshintshi mu nteko” na su twauka shi Yehowa kwete kwaluula nteko yetu, kifulo kyetu mwadi akitama, na dingi atukulupila shi akyebe kwitukwasha bwa kukambila bitompwanga.​—Lom. 12:12.

17. Su twibafule Efile Mukulu, mushindo kinyi watukyebe kumona kutwela kwa mu bisangilo?

 ¹⁷ Kwikala na kyubishi kya kutwela mu bisangilo na bikongeno bya beena Kidishitu. (Eb. 10:24, 25) Beena Isaleele abaadi abebungu bwa kutemesha na kulonga pabitale Yehowa bwashi bamutshine na kutumikila Miiya yaye. (Miy. 31:12) Su twibafule Efile Mukulu binyibinyi, kutumikila Miiya yaye takwitwelela bushito nya. (Badika 1 Yowano 5:3.) Byabya tatukumanga kutadiila kintu su nkimune kitutakule mu kubepula bisangilo. Tatukumiina shi kintu su nkimune kitufishe mu kushimisha kifulo kibatudi nakyo kumpala bwa Yehowa.​—Bif. 2:4.

18. Kifulo bw’Efile Mukulu akitutakula bwa kukita kinyi mu kwipushena na mukandu wibuwa?

¹⁸ Kulungula bangi “binyibinyi bya mukandu wibuwa”na kisumi. (Gal. 2:5) Kifulo kyetu bw’Efile Mukulu akitutakula bwa kwakula pabitale Bufumu bwa Mesiya, mwana aye, akyebe “kukalwila binyibinyi” ku Harmagedone. (Mis. 45:4; Bif. 16:14, 16) Twi na muloo wibungi wa kukita mufubo wa kwikasha bantu bu balongi pa kwibakwasha bwashi balongye pabitale kifulo ky’Efile Mukulu na mulayilo waye utale ndumbulwilo mupya!​—Mat. 28:19, 20.

19. Bwakinyi abitungu tuleshe lutumbu bwa mpàngo ya Yehowa ya kulama mikoko yaye kalolo?

¹⁹ Lesha lutumbu bwa byooso bikite Yehowa bwashi lombe lwa mikooko yaaye lulamibwe kalolo. (Bik. 20:28) Bakulu beena Kidishitu bantu betupe Yehowa bakwete kwitulama. Bakulu “be nka bu kifwamino mu nguba a kipunga, na bu kisukilo ku kipapi kya mpeshi; abekala bu myela ya mema mu nsenga yume bu mutaala wa lubwebwe lukata lwi mu kabaka.” (Yesh. 32:1, 2) Twi kwikala na muloo ukata wa kupeta mbalo ya kufwamina nsaa ayifiki kipapi kibukopo sunga mpeshi a mabwe! Nsaa yakudi kaanya ke bukopo, atwikalaa na muloo wa kupeta mutaala wa lubwebwe. Ino myanda yooso ayitukwasha bwa kumona shi bakulu abatushaa bukwashi na byakudya bya mu kikudi abitungu. Su tubakokyela baaba bakwete kwitukunkusha, atulesha mushindo watulesha lutumbu bwa ‘bantu be bu byabuntu’ na abilesha kifulo bw’Efile Mukulu na Yesu, Nfumu a kakongye.​—Ef. 4:8; 5:23; Eb. 13:17.

20. Su we mufule Efile Mukulu, mushindo kinyi okyebe kutumikila Jaake 1:22-25?

²⁰ Su we mu kipwano kibuwa na Yehowa, okyebe kwikala ‘mukumbashi a Eyi dy’Efile Mukulu, ta’nka penda bu mutemeshi nya.’ (Badika Jaake 1:22-25.) “Mukumbashi” e na lukumiino alumutakula bwa kulombasha midimo bu kulungula mukandu wibuwa na kisumi, kutwela na kwaluula mu bisangilo bya beena Kidishitu. Mwanda we mufule binyibinyi Efile Mukulu, okyebe kukokyela ku “Mwiya upwidikye” wa Yehowa, usangishe myanda yooso yakutekye.​—Mis. 19:7-11.

21. Nteko yenu yanwele n’eshimba dyooso ngikumbeene kwikala bu kinyi?

²¹ Kifulo bw’Efile Mukulu akikyebe nkutakula bwa kutadiila kwadi mu kwela nteko n’eshimba dyooso. Pabaadi anangushena pa mushindo ubaadi aushikibwa kabanda kwifuku n’efuku muyile abyamba Mwiya, Daavide kayimba ka misambo bayimbile shi: “Nteko yande ikale bu musengo wa kabanda utuulwe kumpala koobe [Yehowa], maasa ande ebwe bu mulambu wa kyoolwa.” (Mis. 141:2; Efi. 30:7, 8) Nteko yenu yanwele na kwiyisha, ntendo yenu, mayi enu a kutumbisha n’eshimba dyooso na kutumbula kw’Efile Mukulu bikale nka bu musengo wa kabanda autuusha mapembwe aulesha nteko yabadi bakumiine kwi Efile Mukulu.​—Bif. 5:8.

22. Mu mwisambo aufiki atukyebe kwisambila pabitale kifulo kya mushindo kinyi?

²² Yesu bakwile shi abitungu tufule Efile Mukulu na muntu neetu. (Mat. 22:37-39) Anka bu byatukyebe kwibimona mu mwisambo aufiki, kifulo kyetu bwa Yehowa na miiya yaye abikyebe kwitukwasha bwa kwipushena na bantu booso na kulesha kifulo bwa muntu neetu.