1, 2. Bwakinyi Mpoolo baadi etulu pa mbalo ya bantu babofule?

ATWE booso atubafulaa ingi nsaa. Kwikala na kikoolo munda mwa nsaa ipeela sunga ungi mukumbo nkulombeene kwitubofusha mu mushindo watudi balombeene kukutwa bukome bwa kukita midimo yetu ya kwifuku n’efuku. Binobino banda kupwandjikisha shi wepusha mubofule, kushi penda mu lubingo lumune sunga ibidi, kadi munda mwa myeshi. Yaaya nsaa, twe mupwandjikiile kusangala su bangi abalesha shi bakwete kwituula pa mbalo yoobe?

² Mpoolo mutumibwa baadi auku bi kubofushwa akufikaa ku nkalakasho ayitukila paasha pa kakongye na ya munda mwa kakongye. Misango ibungi, baadi amono shi bafudiila. (2 Kod. 1:8; 7:5) Pakula pabitale nshalelo aye na nkalakasho ibungi ibaadi mupete bu mwina Kidishitu sha bulamate, Mpoolo alesha shi: “Mubofule nanyi, kushi’mi namu kubofula?” (2 Kod. 11:29) Na pabitale beena kakongye ka beena Kidishitu belekenelekene, bapwandjikishibwe na bipindji bya mbidi ya muntu, Mpoolo bakwile shi: “Dingi, sunga bipindji bya mbidi abimweka bu bibofule, twi’nka nabyo lukalo.” (1 Kod. 12:22) Badi akyebe kwamba kinyi? Bwakinyi abitungu shi tumone baaba  babofule mushindo awibamono Yehowa? Na myabi kinyi yatupete patukitshi byabya?

3. Nkinyi kikumbeene kulwisha mweneno etu a baaba be na lukalo lwa bukwashi mu kakongye?

³ Twi mu nsenga mwi kwipikena na mwi bantu abatumbisha bukome na bunsongwa. Bebungi abakitshi myanda mu mushindo wabakumiina, kushi kutala bikumbeene kupusha baaba babofule ku mashimba. Tatutopeka wawa mwikelo nya, kadi twibalombeene kushi kuuka kutamisha mweneno ebubi a baaba be na lukalo lwa bukwashi nsaa yooso, mpa na mu kakongye. Kadi twibakumbeene kwikala na mweneno ebuwa, bu a Efile Mukulu.

4, 5. (a) Mushindo kinyi wi kileshesho ki mu 1 Beena-Kodinto 12:21-23 akitukwasha bwa kuuka mushindo aumonaa Yehowa bantu babofule? (b) Mushindo kinyi watudi balombeene kupeta muloo patukwasha bantu babofule?

⁴ Twi balombeene kuuka mushindo aumonaa Yehowa kubofula kwa bantu mu kileshesho ki mu mukanda wa kumpala wa Mpoolo ubaadi mufundjile beena Kodinto. Mu shapitre 12, Mpoolo etutentekyesha shi sunga kipindji kya mbidi kishy’akikambaa kumweneka sunga kikile kubofula ki na mudimo. (Badika 1 Beena-Kodinto 12:12, 18, 21-23.) Uno mpushisho a myanda pabitale mbidi ya muntu abaadi bamweleshe mpaka kwi bangi bantu abakumiinaa shi bintu mbitukile. Kadi, myanda yabadi bafumbule mu kulonga kwa mbidi ya muntu ayilesha shi bipindji bya mbidi abimweka bu bishi na muulo bi na mudimo ukata mu mbidi. * Bu kileshesho, bangi abaadi abapwandjikisha shi ena dipela tadi na mudimo nya; kadi binobino, atuuku shi di na mudimo ukata bwashi mbidi ikale ayimana kalolo.

⁵ Kileshesho kya Mpoolo akilesha shi bantu booso be mu kakongye be na muulo. Bilekene na Satana, kwete kumona bantu bu bashi na kinemo, Yehowa ataa bafubi baye booso, mpa na baaba abamweka bu bakile kubofula, bu ‘be na muulo.’ (Yob. 4:18, 19) Abitungu kyakya kinangu kikwashe ooso a kwatudi bwadya kwikala na muloo pabitale mudimo wadi nao mu kakongye kabo na mu kakongye ka bafubi b’efile pa nsenga ishima. Bu kileshesho, banda kunangushena nsaa ibodi molole eyasa dyoobe kwi muntu mununu baadi lukalo na bukwashi. Boodi mukimbe bwa kwimana kalolo bwashi omukwate. Tomonoshi kukwasha bangi kwibuwa na nkukupe muloo su? Eyendo, nsaa yatukumbasha nkalo ya bangi, atupete muloo wa kwitatshisha bwabo, na atutamisha lwishinko lwetu, kifulo kyetu, na atutama mu kikudi. (Ef. 4:15, 16) Nshetu a kifulo auku shi kakongye akataa beena kakongye booso na muulo, kushi kutala kubofula kwabo, kakwete kulesha nkatshinkatshi na kifulo.

6. Bwakinyi ingi misusa Mpoolo baadi afubu na myaku “babofule” na “basha bukome”?

⁶ Eyendo, pabaadi mufundile beena kodinto, Mpoolo baadi mufube na myaku “kubofula” na “mubofule” bwa kulesha mushindo ubaadi bantu bashi beena kidishitu abamono beena Kidishitu ba mu siekele a kumpala na mushindo ubaadi apusha bwaye nabene. (1 Kod. 1:26, 27; 2:3) Nsaa ibaadi Mpoolo mwakule bwa baaba “basha bukome,” tabaadi akyebe kulesha shi bangi beena Kidishitu be kunundu nya. (Lom. 15:1) Pamutwe pa byabya, baadi mwakule shi abitungu beena Kidishitu bapwe kunyinga bekale na lwishinko kwi baaba bashy’abandile kumena mishi mu binyibinyi.

7. Nkinyi kikumbeene kwitukutshishwa kukwasha baaba be na lukalo lwa bukwashi?

⁷ Nsaa yatukwasha “mulanda” atukyebe kwifwana Yehowa na kukuminyibwa kwadi. (Mis. 41:1; Ef. 5:1) Kadi, kwikala na mweneno ebubi bwa baaba be na lukalo na bukwashi  nkulombeene ingi nsaa kwitukutshishwa kwibakwasha. Sunga shi mwanda tatuuku akitungu kwakula, twibalombeene kupusha bufu na kusuka baaba be mu nkalakasho. Cynthia, * mukwetu mukashi ababadi basumbushene kwi mulume aaye, amba shi: “Su bakwenu beena Kidishitu be nobe ku bula sunga tabakwete kukukitshina myanda bu ba kuuku, mbilombeene nkwinyongosha. Nsaa yodi mu nkalakasho, we na lukalo lwashi bantu bekale peepi nobe.” Daavide baadi auku abipushaa muntu abadi basumbushene.​—Mis. 31:12.

8. Nkinyi kikumbeene kwitukwasha bwa bwa kwituula pa mbalo ya bangi?

⁸ Atukyebe kwituula pa mbalo ya bangi su atutentekyesha shi bakwetu balume na bakashi mbabofushibwe na bipungo bibukopo​—mikumbo, kwikala mu kifuko ki baledi beabule, sunga twinyongoshi. Myanda ibino ngilombeene kwitufwila namu dingi efuku. Kumpala kwa kutwela mu nsenga ya mulayilo, Beena Isaleele abaadi balanda na babofule mu nsenga ya Ejiipitu, abaadi bebatentekyeshe shi tabitungu “bapapishe mashimba aabo” kwi bakwabo be mu nkalakasho. Yehowa baadi mwibatekye bwa kumona balanda bu bantu bakumbeene kukwasha.​—Miy. 15:7, 11; Lv. 25:35-38.

9. Nkinyi akitungu kukita mususa umune bwa kukwasha baaba abafumankana na nkalakasho? Tusha kileshesho.

⁹ Pamutwe pa kwelela bantu binangu bibubi, abitungu tutushe bukwashi bwa mu kikudi kwi baaba be mu nkalakasho. (Yob. 33:6, 7; Mat. 7:1) Twate kileshesho: Su muntu atambushaa ntukutuku bapete masaku na bende ku lupitalo, ba munganga be kubanga kukimba bya kuuka su nnaye bafwisha masaku? Nya, abakyebe mususa umune kumubuka. Mu mushindo umune, su mukwetu mwina Kidishitu mubofushibwe na nkalakasho yaye, abitungu mususa umune kutuusha bukwashi bwa mu kikudi.​—Badika 1 Beena-Tesalonika 5:14.

10. Mushindo kinyi ukumbeene baaba abamweka bu babofule kwikala “bampeta mu lukumiino?”

¹⁰ Su atunangushena pa nkalakasho ya bakwetu, twibalombeene kumona kubofula kwabo mu ungi mushindo. Banda kunangushena pabitale bakwetu bakashi bakwete kukambila bulwishi bwa bifuko byabo munda mwa bipwa bibungi. Bangi mbakumbeene kumweka bu benyongole na babofule, byabya tabakwete kulesha shi be na lukumiino n’eshimba dinyingye su? Nsaa yomonaa muledi mukashi kwete kukusha bana bupenka afiki ku bisangilo na mwana sunga bana baye, lukumiino lwaye na kitshibilo kyaye tabikukanyishaa su? Na twi kwamba kinyi bwa bansongwa balamate ku bya binyibinyi sunga bakwete kupeta nkalakasho ku kalasa? Mu kwakula kwa kalolo, tuukye shi baaba abamweka bu babofule bekwikala “bampeta mu lukumiino” nka bi bano booso be na nshalelo ebuwa.​—Ja. 2:5.

11, 12. (a) Nkinyi kikumbeene kwitukwasha bwa kulumbuula mweneno etu bwa bantu babofule? (b) Nkinyi kibatulongo pabitale mushindo ubaadi Yehowa mukitshine Aarone myanda?

¹¹ Bakwete kwitukwasha bwa kulumbuula mweneno etu a bantu babofule bwashi ekale bu a Yehowa pa kutalula mushindo ubaadi mukitshine bangi bafubi baaye myanda. (Badika Misambo 130:3.) Bu kileshesho, su bodi na Moyiise nsaa ibaadi Aarone mukite nkishi a mwana a ngombe a oòlò, bodya kwikala mupushe naminyi pabaadi Aarone mupele kukumiina kito kyaye? (Efi. 32:21-24) Sunga shi, mushindo kinyi obodya kwikala mumone mwikelo wa Aarone nsaa ibaadi Miryame mumufishe mu kwipula Moyiise mwanda wa mukashi a bingi bisamba abaadi mwibakile? (Mb. 12:1, 2) Nkinyi kibodya kukita nsaa ibaadi Aarone na Moyiise bapele kutumbisha Yehowa pabaadi mutuushe mema mu kipaso ku Meriba?​—Mb. 20:10-13.

¹² Mu ino myanda yooso Yehowa baadi mukumbeene kunyoka Aarone mususa umune. Kadi  baadi mushinguule shi Aarone ta muntu ebubi nya sunga shi tabaadi mupile bikishekishe nya. Abimweka shi Aarone baadi mutadile nshalelo sunga bangi bantu abamutakula mu kukita myanda ishi ilulame. Anka, nsaa ibaadi mukite byaye bilubilo, baadi mukumiine na kukokyela manyoka a Yehowa. (Efi. 32:26; Mb. 12:11; 20:23-27) Yehowa baadi mutale lukumiino lwa Aarone na kwilanga kwaye. Bipwa nkama kunyima, Aarone na bana baye abaadi bebatentekyeshe bu bantu abatshinyi Yehowa.​—Mis. 115:10-12; 135:19, 20.

13. Nkinyi kyatudi bakumbeene kutalula pabitale mushindo watumona kubofula kwa bangi bantu?

¹³ Bwashi twikale na mweneno bu a Yehowa, abitungu tutalule mweneno atudi naye bwa baaba babofule. (1 Sam. 16:7) Bu kileshesho, nkinyi kyatukitaa su nsongwa talesha binangu sunga budimu nsaa yakyebe kusangula bwa kukisha kapapi? Pamutwe pa ku mutopeka bikilekile, bwakinyi kupela kunangushena pa kyatudi bakumbeene kukita bwa ku mukwasha bwashi atame mu kikudi? Twibalombeene kwata mpàngo bwa kukwasha yawa e na lukalo lwa bukwashi, na patukitshi byabya atukyebe kutamisha mpushisho etu na kifulo kyetu.

14, 15. (a) Mushindo kinyi ubaadi Yehowa mupushe pabitale kukutwa kw’eshimba dinyingye kwa Eliya? (b) Nkinyi kyatudi bakumbeene kulongyela ku myanda ibaadi Eliya mupete?

¹⁴ Abetukwasha dingi bwa kutamisha mweneno etu bwa bangi pakupwandikisha binangu byetu na mushindo ubaadi Yehowa mukitshine bangi bafubi baye abaadi babofule mu kikudi myanda. Eliya baadi umune a kwabadi. Sunga mbibaadi mutshokole batemuki 450 ba baale kushi kutshina, Eliya baadi musukye Yesabele mukashi a nfumu nsaa ibaadi mupushe shi akyebe kumwipa. Kunyima kwaye bapu kutambuka bilometre 150 mutadile ku Beere-sheba, batwelele mu kabaaka. Mukokye na luno lwendo lwa mu kanya kebukopo, mutemuki bashalele  mushi mwa mutshi na “batekyele lufu.”​—1 Bf. 18:19; 19:1-4.

¹⁵ Mushindo kinyi ubaadi Yehowa mupushe nsaa ibaadi mutale pashi na kumona mutemuki aye sha lukumiino mukalakashwe? Baadi musumbushene mufubi aye mwanda shi kwete kwinyongola na kukutwa eshimba dinyingye? Nya! Yehowa baadi mumone bi kufudiila kwa Eliya na nkumutumina mwikeyilu. Misusa ibidi mwikeyilu ubaadi unyingishe Eliya bwashi adye. Byabya, eshinda ‘ta ndimwelele bula.’ (Badika 1 Banfumu 19:5-8.) Eyendo, kumpala kwa kumulesha kya kukita, Yehowa baadi mutemeshe mutemuki aye na kwata mpàngo bwa kumukwasha.

16, 17. Mushindo kinyi watudi bakumbeene kwambula kalolo ka Yehowa kwi Eliya?

¹⁶ Mushindo kinyi watudi bakumbeene kwambula Efile Mukulu etu sha kalolo? Tabitungu twikale atupa bantu malango bukidibukidi nya. (Mye. 18:13) Mbikumbeene kwikala buwa kubanda kwata nsaa ya kwitula pa mbalo ya baaba abemono bu “bashi na kinemo” mwanda wa nkalakasho yabo. (1 Kod. 12:23) Paapa atukyebe kwibakwasha muyile nkalo yabo.

¹⁷ Bu kileshesho, banda kunangushena pabitale Cynthia atudi batemune kumpala, ababadi basumbushene na bana baye babidi bakashi kwi mulume. Abo nkushala bupenka. Mushindo kinyi ubaadi bangi bakwetu Batemwe bebakwashe? Amba shi: “Kunyima kw’atwe kwibalungula ku telefone myanda yooso ibaadi ikitshikye, abafikile ku nshibo mu minite 45. Abaadi na mpolo ku meso. Tababaadi betulekye bupenka munda mwa mafuku asatu. Mwanda tatubaadi abadi kalolo na tubaadi na kinyongwa, abaadi betutule ku nshibo yabo munda mwa mafuku.” Kushi mpaka uno mwanda aukutentekyesha kibaadi Yakabo mufunde shi: “Pekale mukwenu mulume sunga mukashi mukutwe kilamba kya kwikingiila sunga kukutwa kyakudya mafuku ooso, su umune a kwanudi namu ebalungula shi: Endayi nukashale pe kibobo, dingi nudye biya, kwanushanwibapa kyakwibalama nakyo na muwa, abibakwasha ku kinyi? Anka byabya, lukumino lushi na bikitshino ndufwe.” (Ja. 2:15-17) Mwanda wa bukwashi bubaadi bakwetu balume na bakashi batushe pa nsaa, Cynthia na bana baye babaadi bapete bukome bwa kwata mufubo wa bu ba mbala-mashinda bakwashi myeshi isamombo kunyima kwa lukalakasho.​—2 Kod. 12:10.

18, 19. (a) Mushindo kinyi watudi bakumbeene kukwasha baaba babofule bwa mafuku apeela? (b) Mbanyi abapete bukwashi nsaa yatukwasha baaba babofule?

¹⁸ Kukiila ku myanda yodi mupete we mulombeene kumona shi abitungu nsaa ibungi bwa kupetuula bukome nsaa ibodi na mukumbo ubayisha. Mu mushindo umune, mwina Kidishitu baadi mubofushibwe na nkalakasho yaye sunga na ingi nshalelo ibukopo mulombeene kwikala lukalo na nsaa bwashi apetuule bukome bwa mu kikudi. Eyendo, uno mukwetu e na lukalo lwa kunyingisha lukumino lwaye nsaa yelongyela bupenka, yatekye, na yakitshi ingi midimo ya beena Kidishitu. Kadi atukyebe kumulesha lwishinko mpa na papetuula bukome bwaye su? Na dingi atukyebe kumulesha kifulo nsaa yakwete kwitatshisha bwashi apete bukome su? Atukyebe kwitatshisha bwa kukwasha baaba babofule bwa mafuku apeela bwabadya kumona shi atwibata na kinemo na kwibalesha kifulo kya bwina Kidishitu?​—2 Kod. 8:8.

¹⁹ Tatwilwankananga shi nsaa yatutusha bukwashi kwi bakwetu beena Kidishitu, atukyebe kupeta muloo wibungi. Atukyebe dingi kupeta bukome abulesha shi atwitula pa mbalo yabo na lwishinko looso. Kadi kwi ingi myanda. Kakongye kooso kashima akekala na muloo na kifulo. Akupu, atwambula Yehowa, aye ataa muntu ooso na muulo. Oolo, atwe twi na kya kulonda elango dya ‘kukwasha babofule.’​—Bik. 20:35.