TAKUDI bipwa bibungi, kasha mu jurnale a Chosun Ilbo mwiumbo dya Koré mwatuuka mutwe wa mwanda wi na muulo ukata. Uno mutwe wa mwanda ubaadi awipusha shi: “‘Shim cheong’, shibaadi auku kintu su nkimune pabitale Yesu​—bayiile mu kaalo su?”

Luno lukonko abaadi belwele mwanda shim cheong baadi nsongwakashi sha kifulo a mu Koré baadi mwipane bwa kukwasha nshaye baadi mpofu. Munda mwa bipwa bibungi, baadi apete bwedi bwibungi. Binyibinyi, mu Koré, “Shim cheong” baadi bu kilesheshe kibuwa kya kwipana.

Bwa bantu bebungi, kwamba shi uno nsongwakashi akyebe nkanyokibwa mu kaalo penda pamwanda washi tabaadi mubatshibwe bu mwina Kidishitu ta nkulombane nya. Na dingi, myanda ya kala ayilesha shi uno nsongwakashi baadi mupwe kufwa bipwa bibungi kumpala kwa shi mukandu wibuwa wa Yesu ufikye mu musoko waabo.

Uno mwisambo ubaadi awakula bwa ungi mukata a kipwilo ababadi bele nkonko. Babaadi bamwipushe su baaba bapwe kufwa kushi kupeta mushindo wa kulonga pabitale Yesu booso bwabo abapete kiimu kya kwedibwa mu kaalo. Baadi mwaluule shi: “Tatuuku nya. Atupwandikisha shi kwi mushindo wa shi baaba bantu bapeta buntu bw’Efile Mukulu.”

Mukanda wa The New Catholic Encyclopedia awamba shi: “Kubatshishibwa nyi nkintu ki na muulo bwa kupeta kipandilo. Anka bu bibambile Yesu shi, su muntu ta mutandikwe ku mema na ku kikudi, ta mulombeene kutwela mu bufumu bw’Efile Mukulu. (Yowano 3:5).” Pamwanda wa byabya, bangi abakumiina shi baaba abafu kushi kubatshishibwa abebele mu kaalo sunga kwibakyengyesha mu mushindo kampanda kunyima kwa kufwa.

Kadi kwi bantu bebungi bashabakumina kino kinangu. Midiyo ya bantu mbafwe kushi kuuka Bible. Abakyebe nkanyokibwa mu kaalo bwa looso su? Nkinyi akilongyesha Bible pabitale uno mwanda?

Bible alesha patoka shi Efile Mukulu tamwilwankane bantu bashibaadi abauku myanda yatekye. Bikitshino 17:30 etushinkamiisha shi: ‘Yehowa takwete kutala bino bipungo bishi na kiukilo.’ Byabya, ndukulupilo kinyi, alutuusha Bible bwa baaba abafwile kushi kupeta mushindo wa kulonga pabitale Efile Mukulu?

Lwalulo atwilupete mu mayi abaadi Yesu mulungule umune a ku bankitshishi’a bubi abafwile mu mbwipi mwaye. Nkitshishi’a bubi balungwile Yesu shi: “Ontentekyeshe pokekala mulopwe.” Nkinyi kibaadi Yesu mwaluule? ‘Eyendo nakulungula lelo uno shi, okekala naami mu Mpaladiiso.’​—Luuka 23:39-43.

Yesu baadi mulee shi yawa muntu ende mwiyilu su? Nya. Yawa muntu tabaadi “mutandikwe dyakabidi” ku mema na ku kikudi, mwanda wa kumpala ubaadi autungu bwa kutwela mu bufumu bwa mwiyilu. (Yowano 3:3-6) Pamutwe pa byabya, Yesu baadi alaa shi yawa nkitshishi a bubi akyebe nkekala dingi na muwa “mu Mpaladiiso.” Bu bibaadi mwina Yuuda, yawa muntu baadi auku Mpaladiiso a pa nsenga​—lupango lwa Edene—​lwabadi baleshe mu mukanda wa kumpala wa mu Bible. (Kibangilo 2:8) Mulayilo wa Yesu ubaadi umupe lukulupilo lwibuwa lwa lusangukilo mu Mpaladiiso nsaa yabamwalushuula pa nsenga.

Eyendo, Bible mulee “kusanguka kwa balulame na kwa bashi balulame.” (Bikitshino 24:15) “Bashi balulame” mbano bashi baukye miiya ya kululama y’Efile Mukulu mwanda wa kukutwa kuuka akikyebe Efile Mukulu. Yesu akyebe kusangusha uno nkitshishi’a bubi ‘shi mululame’ baadi mwakule naye pamune na midiyo, pangi midiyala ya bangi bantu babafwile kushi kuuka Efile Mukulu. Byabya, mu Mpaladiiso a pa nsenga, abakyebe kwibalongyesha akitekye Efile Mukulu, na abakyebe kupeta mushindo wakulesha shi mbafule Efile Mukulu pa kukokyela miiya yaye.

Nsaa yabakasangusha bantu bashi balulame, abakyebe kwibatshibila kiimu muyiile myanda ibabadi bakite kala? Nya. Beena-Looma 6:7 alesha shi: “Mwanda yawa mufwe mmupandukye ku milwisho.” Bantu bashi balulame abakyebe kufuta milwisho yabo pa’bo kufwa. Byabya, abakebatshibila kiimu muyiile myanda yabakitshi kunyima kwa kusanguka, kushi muyiile myanda ibabadi bakite pabashibaadi abauku Efile Mukulu kumpala kwa kufwa. Mushindo kinyi wabakyebe kwibakwasha?

Kunyima kwa kusanguka, bantu bashi balulame abakyebe kupeta mushindo wa kulonga pabitale miiya y’Efile Mukulu, yabakyebe kwibalesha nsaa yabakafungula mifungofungo ya mu kimfwanyi. Paapa, abakebatshibila kiimu “muyiile bikitshino byabo,” kwamba shi su abakokyela miiya y’Efile Mukulu na su tabeyikokyela. (Bifumbulwe 20:12, 13) Bwa bebungi ba ku bashi balulame, uno aukekala mushindo wa kumpala bwabo kupeta muwa wa looso pa nsenga nsaa yabalongo na kukita akikyebe Efile Mukulu.

Dino dilongyesha dya mu Bible ndikwashe bantu bebungi bwa kupetuula lukumiino lwabo mwi Efile Mukulu. Yeong Sug ngumune a kwabadi. Baadi mukule mu Katolike. Beena kifuko kyabo abaadi ba mumpele. Na lukulupilo lwa kufika mansele, aye nkwenda mu Kuva. Kunyima, aye nkukatuka mwanda myanda ibaadi mumone mwanka tayibadi imusankishe. Na dingi, tabaadi mukumbene kukumiina lulambukisho lwa inferno a kaalo mwanda baadi amono shi kukengyesha bantu mu inferno a kaalo tankululame na takulesha kifulo.

Akupu, umune a ku Batemwe ba Yehowa nkulesha Yeong Sug ano mayi a mu Bible: “Mwanda abatala abauku shi abafu, anka bafwe tabauku kintu su nkimune, bwabo takuki efutu.” (Mulungudi 9:5) Uno Temwe baadi mumukwashe bwa kupusha shi ba nkambwa baye tabakwete kukyenga mu inferno a kaalo nya. Kadi, mbalale mu lufu, abatengyela lusangukilo.

Kuuka kwashi bantu bebungi tabapushishe binyibinyi bya mu Bible, Yeong Sug baadi mulamiine kwishimba ano mayi a Yesu e mu Mateo 24:14 aamba shi: “Na uno mukandu wibuwa wa bufumu, aukalungulwa pa nsenga yoso yishadibwe, bwa kulesha bu-kamonyi kwi maumbo oso na kunyima nfudilo ayikafiki.” Binobino kwete kulungula mukandu wibuwa na kwishintusheena na bangi lukulupilo lwaye alutukila mu Bible.

Bible etulungula shi: “Efile Mukulu te na ntondo, na shi mu kisamba kyooso, muntu ooso amutshinyi na akitshi myanda ya bululame apokyelwa kwadi.” (Bikitshino 10:34, 35) Kuno ndjo kululama kupwidikye kwatudi bakumbene kukulupila kwi Efile Mukulu, aye “mufule bululame na binyibinyi.”​—Misambo 33:5.