1. Mpoolo apusha naminyi pabitale baaba bepaane mu kufubila Yehowa?

MPOOLO mutumibwa baadi atetenkyesha baaba abaadi abafubu ngofu mu mudimo wa kulungula mukandu wibuwa. Bafundile shi: ‘Tatukoko kutentekyesha mudimo wenu wa lukumiino na mudimo wenu wa kifulo na kunyingiila kwenu mwanda wa lukulupilo mwi Nfumwetu Yesu Kidishitu, kumpala kw’Efile Mukulu Nshetu.’ (1 Tes. 1:3) Oolo, Yehowa aye nabene kwete kutentekyesha mifubo ya kifulo ya booso bakwete kumufubila na bulamate, sunga byekala shi be na mushindo wa kukita bibungi sunga bipela.​—Eb. 6:10.

2. Nkinyi kyatukyebe kutaluula mu uno mwisambo?

² Bakwetu bebungi bafubi ba Yehowa​—ba kala na ba binobino—​mbesumine miloo ibungi bwa kufumufibila mu mudimo wa nsaa yooso. Tubande kutala mushindo ubaadi bangi bamufubile mu bipwa lukama bya kumpala. Atukyebe kutaluula ingi midimo ya nsaa yooso ya ano eetu mafuku na kumona mushindo watudi balombene kutentekyesha bano bakwetu ba kifulo bepaane abo banabene mu ino midimo ya pa bwayo.

3, 4. (a) Mushindo kinyi ubaadi aufubu bangi mu bipwa lukama bya kumpala? (b) Mushindo kinyi ubaabadi abapete bukwashi bwa ku mbidi?

³ Mafuku apela kunyima kwa’ye kubatshishibwa, Yesu babangile  mudimo ubaadi na kya kupalakana mu nsenga ishima. (Luk. 3:21-23; 4:14, 15, 43) Kunyima kwa’ye kufwa, balongi baaye abaadi batungunukye na kupalakasha uno mudimo wa bulungudi. (Bik. 5:42; 6:7) Bangi beena Kidishitu bu Fidipe, abaadi abafubu bu balungudi ba mukandu wibuwa na bu ba misionere mu Palestine. (Bik. 8:5, 40; 21:8) Bu kileshesho, Mpoolo na bangi abayile kula mu bingi bibundji mu kulambukisha. (Bik. 13:2-4; 14:26; 2 Kod. 1:19) Bangi namu bu​—Silvanuse (Silase), Maako, na Luuka—​abaadi bakite mudimo wa kufunda mikanda. (1 Mp. 5:12) Bakwetu bakashi Beena Kidishitu abafubanga nabo pamune. (Bik. 18:26; Lom. 16:1, 2) Myanda ibuwa yabadi bamone ngikwashe bwa shi Bifundwe bya Beena Kidishitu bya mu kina Greeke bikale abitusankisha nsaa yatwibibala, na abilesha shi Yehowa kwete kutentekyesha bafubi baye na kwitatshisha bwabo.

⁴ Mmushindo kinyi ubaadi bafubi ba nsaa yooso ba kala abalombasha nkalo yabo ya ku mbidi? Ingi nsaa, abaadi abebatambula kalolo na kwibapa bintu bya bukwashi kwi beena Kidishitu nabo, kadi tababaadi abatekye bino bintu nya. (1 Kod. 9:11-15) Bangi bantu na tukongye abaadi abebakwatshishena na muloo ooso. (Badika Bikitshino 16:14, 15; Beena-Fidipe 4:15-18.) Mpoolo na ba kuuku baye abaadi abatumika dingi mifubo ya masa bwa kwikwasha.

5. Nkinyi kibaadi bangi ba mulume na mukashi bapushe pabitale nshalelo aabo mu mudimo wa nsaa yooso?

⁵ Lelo uno namu, bakwetu bebungi bakwete kwipaana mu mifubo ilekenelekene ya nsaa yooso. (Tala kashibo akamba shi: “ Mishindo ilekene ya mudimo wa nsaa yooso.”) Mushindo kinyi wabakwete kupusha pabitale mudimo wabo? Luno ndjo lukonko loodi mukumbene kwibepusha, na lwaluulo lwabo alukyebe nkunyingisha. Bu kileshesho: Ungi mukwetu bafubile bu mbala-mashinda a myeshi yooso, bu mbala-mashinda a nsaa yooso, bu misionere, na bu mwina Betele mu dingi eumbo aamba shi: “Namono shi kutwela mu mudimo wa nsaa yooso nyi nkitshibilo kikile buwa kinaadi mwate. Panaadi na bipwa 18, naadi nekalakasha bwa kwata kitshibilo kya kwenda mu kulonga ku universite, kukita mufubo wa maasa nsaa yooso, na kukita mudimo wa bu mbala-mashinda. Myanda yandi mumone ngindeshe shi Yehowa tayilwankanaa kwipaana kwetu bwa kumufubila nsaa yooso. Ne mupete mushindo wa kutumika na kyukilo na ngobesha yooso impe Yehowa mu mushindo wanshi nadya kukita bino su naadi musangule bwa kukita ungi mufubo.” Mukashi aaye alesha shi: “Mbalo yooso ibaabadi abetutumu bwa kwenda mu kufuba nginkwashe bwandya kutama mu kikudi. Twi bapushe bulami na bukunkushi bwa Yehowa misango ibungi mu mushindo watushibaadi balombene kupushya su tubaadi bashale kwetu. Nkwete kutumbula Yehowa efuku dyooso bwa nshalelo eetu mu mufubo wa nsaa yooso.” We mukumbene kutala namu nshalelo oobe mu uno mushindo su?

6. Yehowa kwete kupusha naminyi pabitale mudimo watukwete kumufubila?

⁶ Eyendo, bangi bantu be mu nshalelo ishi ilombene kwibapa mushindo wa kukita mudimo wa nsaa yooso. Kadi twibalombene kukulupila shi Yehowa kwete kwata byooso byabakwete kwitatshisha bwa kukita n’eshimba dyabo dyooso na muulo. Banda kunangushena bwa bano babadi batemune kwi Mpoolo mu Filemone 1-3, na booso beena kakongye ka mu Kolose. (Badika.) Mpoolo baadi mwibasangele, mpa na Yehowa dingi. Mu mushindo umune, Nshetu e mwiyilu kwete kusangeela mudimo oobe. Kadi, mushindo kinyi oodi mukumbe kukwasha bano be mu mudimo wa nsaa yooso?

7, 8. Mudimo wa bu Mbala-mashinda autekye kinyi, na mushindo kinyi ulombene beena kakongye kwibakwasha?

⁷ Anka bu balungudi ba mukandu wibuwa ba mu bipwa lukama bya kumpala, ba mbala-mashinda  basha kisumi bakwete kunyingisha tukongye. Bebungi bakwete kukita mwabo mooso bwa kutuusha nsaa 70 ku mweshi. Mushindo kinyi oodi mulombene kwibakwasha?

⁸ Ungi mukwetu mukashi mbala-mashinda abetamina bu Shari amba shi: “Ba Mbala-mashinda bakwete kukita mudimo wibukopo, efuku dyooso. Kadi, be lukalo na bukwashi.” (Lom. 1:11, 12) Ungi mukwetu mukashi baadi mukite mudimo wa bu mbala-mashinda munda mwa bipwa amba pabitale ba mbala-mashinda ba mu kakongye kabo shi: “Bakwete kufuba ngofu kushi kukooka. Nsaa i bangi abepana mu mudimo wa bulungudi, ebetamine koobe bwa kudya nabo, ebakwashe n’ekuta sunga bungi bukwashi kampanda, abibapa muloo. Abakyebe kumona shi okwete kwitatshisha bwabo binyibinyi.”

9, 10. Nkinyi kibaadi bangi bakite bwa kukwasha ba mbala-mashinda ba mu kakongye kabo?

⁹ We mukumbene kukwasha ba mbala-mashinda mu mudimo wa bulungudi su? Ungi mbala-mashinda abetamina bu Bobbi amba bino: “Atwikalaa lukalo na bukwashi mund’a lubingo.” Ungi mukwetu mbala mashinda a mu kaka kakongye kamune alombasha shi: “Kupeta muntu a kutuka naye ku kyolwa nyi mwanda wibuwa bukile.” Ungi mukwetu mukashi kwete kufuba binobino ku Betele a ku Brooklyn amba pabitale mudimo wa bu mbala mashinda shi: “Ungi mukwetu mukashi baadi na motoka bamulungwile shi, ‘nsaa yooso yosh’opete muntu a kwenda naye, ngitamine, nafiki bwashi twende nobe.’ Baadi munkwashe bwa kulama mudimo wande wa bu mbala-mashinda.” Shari akula bino pabitale uno mwanda: “Kunyima kwa mudimo, ba mbala-mashinda bashi bebakile abashala nka bupenka. Nwibalombene kwitamina ba mbala-mashinda bashi bebakile sunga bebakilwe nsaa yooso kwenu bwa lulangwilo lwa mu kifuko. Na kukita nabo ingi mifubo nkulombene kwibakwasha bwa kwikala banyingye.”

¹⁰ Ungi mukwetu mukashi baadi mufube mudimo wa bu mbala-mashinda munda mwa bipwa 50 na bangi benaye bakashi bashi bebakikilwe atentekyesha shi: “Bakulu abaadi abafiki mu kwitutala kunyima a myeshi yooso ibidi. Abaadi abetwipusha bi bukome bwetu bwa mbidi na mudimo wetu wa masa, na kutala su tubaadi na lukalakasho kampanda. Abaadi abakumiina kwitukwasha binyibinyi. Abaadi abafiki mu kwitutala bwa kuuka su twi na lukalo lwa bukwashi.” Bino  mbilombene kwitutentekyesha lutumbu lubaadi nalo Mpoolo bwa mudimo ubaabadi bamukitshine kwi ungi muntu a mu kakongye ka mu Efeeze.​—2 Tim. 1:18.

11. Mudimo wa bu mbala-mashinda a nsaa yooso autekye kinyi?

¹¹ Tungi tukongye twi na mwabi wa kufuba pamune na ba mbala-mashinda ba nsaa yooso. Bebungi ba ku bano bakwetu balume na bakashi mbepane bwa kutusha nsaa 130 mweshi ooso mu mudimo wa bulungudi. Mwanda wa nsaa ibungi yabakwete kukisha mu mudimo wa bulungudi na ingi mifubo ya mu kakongye, be na nsaa ipeela sunga shi mbakutwe nsaa ya kukita midimo ya masa. Biro bya filiale bikwete kwibapa bukwashi bupela ku mweshi ooso bwashi bepaane ngofu mu mudimo wa bulungudi.

12. Bakulu na bangi mbalombene kukwasha ba mbala-mashinda ba nsaa yooso naminyi?

¹² Mushindo kinyi watudi balombene kukwasha ba mbala-mashinda ba nsaa yooso? Ungi mukulu afubaa ku biro bya filiale emonenaa na bebungi ba kwabadi amba shi: “Abitungu bakulu bekale abesamba nabo, bawukye bi nshalelo aabo, na kukimba mushindo wa kwibakwasha. Bangi ba Temwe abamonaa shi ba mbala-mashimda ba nsaa yooso be biya mwanda bakwete kwibapa makuta, kadi bakwetu balume na bakashi mbalombene kwibakwasha mu mishindo ibungi.” Anka bu ba mbala-mashinda ba myeshi yooso, ba mbala-mashinda ba nsaa yooso abasankilaa kufuba pamune na bangi bantu mu mudimo wa bulungudi. We mulombene kwenda nabo su?

13, 14. (a) Nkinyi akitungu kutentekyesha pabitale bakunkushi ba bifunda? (b) Nkinyi kyoodi mulombene kukita bwa kukwasha baaba bakwete kukunka bifunda?

¹³ Bakwetu bebungi abamonaa bakunkushi ba bifunda na bakashi baabo bu bantu banyingye ngofu mu kikudi. Nnabyo byabya, anka na’bo namu be na lukalo na kunyingishibwa, kwenda nabo mu mudimo wa bulungidi, na kukisha nabo kapapi pamune kadi na nkatshinkatshi. Nkinyi kyoodi mulombene kukita su mukumbo ubebakwata na abebalama ku lupitalo, pangi bwa shi bebabaale sunga kwibabuka? Kwibatembela na kwibakwasha mu kino kipungo nkulombene kwibakankamika ngofu. Luuka, “mukwetu munganga” baadi mufunde mukanda wa Bikitshino, baadi mukwashe Mpoolo na bangi abaadi abende naye mu kutala tukongye.​—Kol. 4:14; Bik. 20:5–21:18.

¹⁴ Bakunkushi ba bifunda na bakashi baabo be na lukalo na ba kuuku ba kifulo. Ungi mukunkushi a kifunda bafundjile shi: “Ba kuuku bande abaukaa nsaa yandi lukalo na kunyingishibwa. Abangipushaa myanda kalolo, na bino abinkwashaa bwa kwibalungula byampusha. Akupu abinkwashaa ngofu nsaa yabantemesha kalolo.” Bakunkushi ba bifunda na bakashi baabo abekalaa na muloo wibungi wa kumona shi bakwetu balume na bakashi bakwete kwitatshisha bwabo.

15, 16. Mbukwashi kinyi bukwete kutusha bena Betele na bano bakwete kwibaka mashibo a Bikongeno, na mushindo kinyi wa kwibakwasha?

¹⁵ Mu nsenga ishima, bakwetu bakwete kufuba ku Betele n’abafubu bwa kwibaka mashibo a bikongeno bakwete kukwatshishena mudimo wa Bufumu ngofu mu bibundji byabakwete kukunkusha kwi filiale aabo. Su nwi na bena Betele mu kakongye keenu sunga mu kifunda kimune, mushindo kinyi oodi mukumbene kwibatentekyesha?

¹⁶ Nsaa yabafiki ku Betele bwa musango wa kumpala, mbalombene kupeta kinyongwa kya kwikala kula na bakwabo bena kifuko na ba kuuku baabo. Be kupusha muloo ukile su bena Betele na bena kakongye abebakwata bukuuku! (Mak. 10:29, 30) Be na programe ilumbuule kalolo ayibakwasha bwa kutwela bisangilo bya kakongye na kwenda mu bulungudi lubingo looso. Anka ingi nsaa, bena Betele abapetaa mifubo ya panundu. Su tukongye twashinguula uno mwanda na kulesha shi be na muloo bwa mudimo ukwete kukita bena Betele, abikyebe kusangasha muntu ooso.​—Badika 1 Beena-Tesalonika 2:9.

17, 18. Mifubo kinyi ayikitaa bafubi ba nsaa yooso be mu angi maumbo?

¹⁷ Bano akumiina kufubila mu dingi eumbo mbalomene kupeta nkalakasho itale kwilekena kwa byakudya, ndimi, bipikwa na nshalelo mwilekene na abekalanga naye kumpala. Bwakinyi bakwete kukumiina nkalakasho ya kwakwa kwilekena?

¹⁸ Bangi mba misionere, bakwete kufubila mu ma teritware mwi bantu bebungi balombene kupeta bukwashi kukidila ku myanda yabadi balongye. Biro bya filiale bikwete kupa ba misionere bukwashi bulombane bwa kulombasha nkalo yabo. Bangi mbebatuule bwa kufuba mu angi maumbo ku biro bya filiale sunga bwa kukwasha mu kwibaka kwa ma biro a filiale, mashibo a kwalulwila mikanda, Mashibo a bikongeno sunga Mashibo a Bufumu. Bakwete kwibapa mu mushindo ulombane bidiibwa, mbalo ya kushala na bingi bintu. Nka bu bena Betele, bakwete kutwela mu bisangilo byooso na kwipana mu kulungula mukandu wibuwa pa mbalo yabadi. Mbekale mwabi ukata kwi bena kakongye mu mishindo ibungi.

19. Nkinyi kyodi mukumbene kutula mu binangu pabitale baaba bakwete kufuba mu angi maumbo?

¹⁹ Mushindo kinyi oodi mulombene kutentekyesha bano bafubi ba nsaa yooso? Tentekyesha shi​—bikishekishe bwa musango wa kumpala—​bebungi tambalombene kwiubidishena musango umune na bidiibwa bya mbalo yanudi. We mulombene kwibatentekyesha su bwebetamina ku kidiibwa; we mukumbene kwibepusha kyabadi bakumiine kudya sunga kyabakimbi kupima bwa kudya. Abitungu kwikala na lwishinko bwabo mwanda bakwete kulonga ludimi na bipikwa bya mbalo yanudi. Mbalombene kukita mafuku e bungi kumpala kwabadya kupusha byanukwete kwibalungula, kadi, nwi balombene kwibakwasha na kalolo kooso bwabadya kwakula bibuwa. Be na lukalo lwa kulonga!

20. Mushindo kinyi wibuwa watudi balombene kutentekyesha bafubi ba mudimo wa nsaa yooso na baledi baabo?

²⁰ Bu bikwete kukila mafuku, bafubi ba nsaa yooso bashale kula na baledi baabo abapu kukula mbalombene kwata kitshibilo kya kukimba mushindo wa kwibakwasha. Su baledi baabo mBatemwe ba Yehowa, mbalombene kumona shi bana baabo bashale mu mudimo wa Yehowa. (3 Yo. 4) Byabya, su baledi babo be na lukalo na bukwashi, bafubi ba mudimo wa nsaa yooso mbalombene kukita mwabo mooso bwa kwibakwasha. Kadi, baaba be pepi na baledi baabo mbalombene kwibakwasha nsaa yabadi lukalo na bukwashi. Tutentekyeshe shi baaba be mu mudimo wa nsaa yooso be na bushito bukata mu mudimo wa kulungula mukandu wibuwa ukwete kukitshika mu nsenga. (Mat. 28:19, 20) We mulombene sunga kakongye kenu kukwasha baledi ba baaba be mu mudimo wa nsaa yooso pabadi na lukalo su?

21. Mushindo kinyi aupushaa bano be mu mudimo wa nsaa yooso pabitale bukwashi na kunyingishibwa byabapete kwi bangi?

²¹ Booso bakwete kutwela mu mudimo wa nsaa yooso, tabakwete kwimutwela mwanda wa kupeta makuta, kadi bwa kupa​—Yehowa na bangi. Abasangela ngofu bukwashi booso boodi mulombene kwibapa. Ungi mukwetu mukashi kwete kufuba mu dingi eumbo alesha bi binangu bya bantu bebungi shi: “Sunga nkufundjila mukanda bwa kulesha lutumbu akulesha shi bangi bantu be nobe mu binangu na shi be na muloo bwa mudimo okwete kukita.”

22. Opushaa naminyi pabitale mudimo wa nsaa yooso?

²² Eyendo kufubila Yehowa mu mudimo wa nsaa yooso nyi nshalelo ebuwa bukile. Kwi na nkalakasho, akwibaka, na akukupa muloo. Nyi mushindo wibuwa wa kwilumbula bwa mudimo wa muloo wa looso awindjila bafubi booso ba Yehowa basha bulamate mu Bufumu bw’Efile Mukulu. Atwe booso ‘tutungunukyeyi na kutentekyesha mufubo wa bulamate na kifulo’ ukwete kukita bakwetu be mu mudimo wa nsaa yooso.​—1 Tes. 1:3.