Nangushena shi ungi nshe bana kwete kwisamba na mwan’aye mulume e na bipwa 7. Amulungula shi: “Mafuku a kala, kala ngofu, Efile Mukulu bapangile nsenga na bintu byooso bi mwanka, bapangile nguba, mweshi, na nyenyeenyi.” Mwan’aye anangushena kapela na amwipusha shi: “Papa, nnanyi bapangile Efile Mukulu?”

Nshaye amwaluula shi: “Takwi muntu mupangye Efile Mukulu. Aye ekadikaa nka kwanka.” Binobino mwana bapusha buwa pababamulungula uno mwanda. Bu byakwete kwenda na kukula, luno lukonko lukwete kutungunuka na kumwelesha binangu. Abimwelela bukopo bwa kukumina’shi kwi muntu mukumbene kwikala kwanka kushi’ye kupangibwa. Aku namu, mpa na eyilu na nsenga bi na mbangilo. Eyipusha shi, ‘Efile Mukulu mmutuukye kunyi?

Mushindo kinyi awaluula Bible? Nka mu mushindo umune na bibaadi bikite yawa nshe bana e mu kileshesho kyetu. Moyiise bafundjile shi: “Yehowa, . . . kumpala kwashi myengye ipangiibwe, na kwashi nsenga na bya-pano byooso bikale kwanka, obe toboodi Efile Mukulu a looso na bwa looso.” (Misambo 90:1, 2) Mu mushindo umune, mutemuki Yeeshaya bakwile shi: “Toowuku, na tokwete kupusha? Yehowa ngi Efile Mukulu a looso, mupangi a mikalo yooso ya nsenga!” (Yeeshaya 40:28) Mpa na mukanda wa Yuude ukwete kulesha Efile Mukulu bu e kwanka “binobino na bwa looso.”​—Yuude 25.

Bino bifundwe bikwete kwitulesha Efile Mukulu bu “Mulopwe a ikalayika,” nka bu bikwete kumulesha Mpoolo. (1 Timotee 1:17) Bino abilesha shi Efile Mukulu e nka kwanka, sunga twalusha binangu ngofu kumongo kwa bipwa bipwe kukila. Na dingi, akeekala nka kwanka mu mafuku aafiki. (Bifumbulwe 1:8) Nnyi bwakinyi, mmwikale bu Sha bukome booso mwanda e kwanka bwa looso.

Bwakinyi ta mbitubofwile bwa kupusha uno mwanda kalolo? Bu byabidi shi muwa wetu ngwa kapindji kapeela, awitupa mweneno mwilekene na a Yehowa pabitale nsaa. Mwanda Efile Mukulu e kwanka bwa looso, kwadi’ye bipwa kinunu bi bu efuku dimune. (2 Mpyeele 3:8) Bu keleshesho: Mpasu, mulombene kulala penda mafuku 50, mmukumbene kupusha bwakinyi muntu alalaa bipwa 70 sunga 80 su? Bibukopo! Kadi Bible alesha shi twi nka bu mpasu pakwipwandjikisha na Mupangi eetu Mukata. Mpa na bukome bwetu bwa kunangushena mbupeela bikata pe bwaye. (Yeeshaya 40:22; 55:8, 9) Byabya, tabitukemesha pakumona shi kwi ingi ngikashi ya bumuntu bwa Yehowa yatushii balombene kupusha kalolo.

Sunga byekala shi tambibofule bwa kukumiina shi kwi Efile Mukulu e kwanka bwa looso, kadi twi bakumbene kumona shi uno mwanda ngwa binyibinyi. Su ungi muntu kampanda baadi mupangye Efile Mukulu, yawa muntu baadya kwikala Mupangi. Anka bu bikwete kulesha Bible, Yehowa nyi “bapangile bintu byooso.” (Bifumbulwe 4:11) Na dingi, atuuku shi nsenga n’eyilu tabibaadi kwanka mu kipungo kampanda nya. (Kibangilo 1:1, 2) Kadi mbituukye kunyi? Bibaadi abitungu shi Mupangi a bino bintu abande kwikala kwanka. Baadi’nyi kwanka kumpala kwa bipangwa byooso bi na binangu, bu Mwan’aye umune eeleka na ba mwikeyilu. (Yoobo 38:4, 7; Beena-Kolose 1:15) Eyendo, baadi mubande kwikala kwanka bupenka bwaye. Takwi muntu baadi mukumbene kumupanga; takwi kintu kibaadi na muwa kibaadi kikumbene kumupanga.

Kwikala kwetu kwa na muwa na kw’eyilu na nsenga kukwete kushinkamisha shi kwi Efile Mukulu a looso. Aye baadi mukite bwashi bino bintu bikale abisanasana, baadi mwibyelele miiya bwa kwibikunkusha, baadi na kya kwikala nka kwanka. Nka’ye nyi baadi mukumbene kupa bingi bintu byooso muwa.​—Yoobo 33:4.