MIISAMBO YA MBANGILO | SATANA MMUNTU A BINYIBINYI?
Twi bakumbene kutshina Satana su?
Kintu kiabetamina bu monoxide de carbone ki bubi–nka bi Satana
Bii bukopo bwa kutundula luno lupapi lushi n’elangi sunga eshiko, na lukumbene kwipa bantu kushi kuuka lwabetamina bu monoxyde de carbone. Pangi kya pankatshi kya bantu abafu ku mulungo mu nsenga ishima mbafwe pa mwanda wa luno lupapi. Sunga mbyabya, twe mulombene kupampakana nya. Kwi mishindo ya kutundula lwalwa lupapi na kwikalwila. Na budimu booso, bantu bebungi mbatuule bintu abibadimusha na kwibitemesha nsaa yabilesha masaku aatukila ku lwalwa lupapi.
Anka bu lwalwa lupapi, Satana tamwekaa, bii bukopo bwa bantu kumutundula, na e masaku ngofu. Kadi Efile Mukulu ta mwitulekye kushi bukwashi. Twe na kya kutshina Satana su otumika kalolo na bino byabuntu bitupe Efile Mukulu.
Bukome bwa kwisangwila kya kutita. Jaake 4:7 etulungula shi: “Bindwilayi Kafilefile [Diabulu], e namu akenusûku kula.” (EEM). Sunga shi Satana e bukome, ta mmulombene nkutakula pa bukopo bwa kukita myanda yoshi mukumiine kukita nya. We kwisangwila obe nabene kya kukita. 1 Mpyeele 5:9 amba shi: “Mushinamineyi [Diabulu], nunyingye mu lukumiino.” Tentekyesha shi, Satana baadi mulekye Yesu nka kunyima kwa’ye kukambila bitompwanga byooso bisatu bya Satana. (Mateo 4:11) Obe namu we mulombene kusangula bwa kukambila bitompwanga bya Satana.
Kipwano n’Efile Mukulu. Jaake 4:8 etunyingisha bwa ‘kwifubwila kwi Efile Mukulu.’ Yehowa nabene akwitanyina bwa kudya naye bukuuku. Mushindo kinyi oodi mulombene kukita byabya? Mushindo ukile buwa ngwa kubanga kulonga Bible bwa kuuka myanda ibungi pa bimutale. (Yowano 17:3) Myanda y’olongo pabitale Yehowa ayikutumu bwa kumufula, na kyakya kifulo, akikyebe nkutakula bwa kukita akikyebe eshimba dyaye. (1 Yowano 5:3) Bu byokwete kwifubwila peepi na Nshobe e mwiyilu, nkinyi kyakyebe kukita? Jaake atungunuka shi: “[Efile Mukulu] efubwila peepe nobe.”
Yehowa kwete kutuusha bidibwa bya mu kikudi bwa nkulama
Mulayilo wa kulamiibwa. Myeele 18:10 amba shi: “Eshina dya Yehowa nyi epata dilamiibwe; muntu mululame ekusukilaa bwa kupanda.” Oolo, byabya tabilesha shi eshina dy’Efile Mukulu di bu kishimba kya bwanga nya. Kadi, abilesha shi booso abaata eshina dy’Efile Mukulu na kinemo mbalombene kumuteka nsaa yooso bwashi ebalame.
Bileshesho bii mu Bible. Mukanda wa Bikitshino 19:19, (EEM) awitulongyesha mwanda kampanda pabitale beena Efeeze abaadi balulukye bafika beena Kidishitu. Awamba shi: “Bebungi namu ba ku basha masende abatûshîshe mabuku âbo atale myanda ya mu mufito, beashîka mu kâlo kumpala kwa bantu boso. Ababadikile mûlo wa aa mabuku, watûka bu binunu makumi atâno a bingolongolo bya adishâ.” * Baaba beena Kidishitu abashiikile bintu byooso bya malenganyi, sunga mbibaabidi bya makuta ebungi. Kino kileshesho nkilombene kwitukwasha ngofu lelo uno. Uno ndumbulwilo mmwele mishi ngofu mu myanda ya malenganyi na kupaka manga. Sunga bintu na bikitshino kampanda abimweka bu bishi bya malenganyi mbilombene kukaka ba demo. Mu mushindo ooso abitungu tukatushe byabya bintu mu nshalelo eetu.—Miiya Ikituulwe 18:10-12.
Rogelio, atwikele besambile mu mwisambo wa mbangilo wa ku ino miisambo, tabaadi akumiina shi Satana e kwanka mpa na pabafikile na bipwa 50. Kadi baadi mutaluule mweneno aaye. Bwakinyi? Alesha shi: “Panaadi mupete Bible bwa musango wa kumpala mu nshalelo ande. Kiukilo kya mu Bifundwe kibaadi kinshinkamiishe shi Satana e kwanka. Kyakya kiukilo binobino nyi kikwete kunkalwila bwa kupela kupona ku bitompwanga byaye.”
“Kiukilo kya mu Bifundwe kibaadi kinshinkamiishe shi Diabulu e kwanka. Kyakya kiukilo binobino nyi kikwete kunkalwila bwa kupela kupona ku bitompwanga byaye”
Okumiina kumona efuku dishy’adikala Satana kwanka su? Oolo. Bifundwe bibaadi bitemukye shi Diabulu uno kwete kudimba bantu bebungi “akedibwa mwishiba dya kâlo amutembe sufule.” (Bifumbulwe 20:10) Eyendo, kaalo ka ku mbidi ta nkalombene kupiisha kipangwa kya mu kikudi nya. Byabya, eshiba dya kaalo adilesha kabutu ka ikalayika. Satana akashimina bwa looso. Se uno mmwanda wa muloo wi kashaa bwa baaba bafule Efile Mukulu!
Mu kano kapindji kapeela kabashala, tungunuka na kulonga myanda yooso yoodi mulombene kulonga pabitale Yehowa na mashinda aaye. * Banda kupwandikisha kwikala na muwa mu mafuku atwikala atwakula binyibinyi shi “Satana te kwanka dimo nya!”
^ par. 8 Su kingolongolo kya adishâ kyabadi bakwile kibaadi kya ndenalio ya beena Looma, bungi bwabyo bubaadya kwikala mumune n’efuto dy’efuku dimune dya bantu 50 000—makuta ebungi byabya!
^ par. 11 Bwa kuuka myanda ibungi pabitale Satana na bii mweneno a Efile Mukulu pabitale malenganyi, tala shapitre 10 a mukanda wa A nkinyi akilongyesha namu Bible? Teka umune a ku Batemwe ba Yehowa uno mukanda.
