1, 2. (a) Nkinyi kibaadi bangi bakata ba bipwilo abakimbi kuuka, na mushindo kinyi ubaadi Mpyeele mwibaluule? (Tala kifwatulo ki kumbangilo kwa mwisambo.) (b) Bwakinyi Mpyeele baadi mupete eshimba dinyingye yaya nsaa?

MAFUKU apeela kunyima kwa lufu lwa Yesu, Mpyeele mutumibwa baadi mufumankane na kisaka kya bantu abaadi n’etombo dikile. Baaba bantu nyi bakunkushi bakata ba bipwilo bya beena Yuuda​—baaba abaadi bayipayishe Yesu. Mpyeele baadi mwibweshe kishetshi. Abo nkumwipusha kubaadi mupetele bukome na mwishina dya nanyi mubaadi mukite kino kipaso. Mpyeele baadi mwaluule n’eshimba dinyingye shi: “Mwishina dya Yesu Kidishitu a mu Naazarete, aye abaanudi bapudikye ku mutshi, abadi basangushe kwi Efile Mukulu ku bafwe, ku bukome bwaye ngi kwikeele uno muntu e kumpala kwenu mupande.”​—Bik. 4:5-10, NWT.

² Kumpala, Mpyeele baadi mutune Yesu misusa isatu na moo ooso. (Mak. 14:66-72) Bwakinyi binobino baadi n’eshimba dinyingye kumpala kwa bakata ba bipwilo? Baadi mupete bukwashi bwa kikudi kiselele, na dingi baadi mushinkamishe shi Yesu mmusangukye. Nkinyi kibaadi kimushinkamiishe shi Yesu mmusangukye? Bwakinyi twi balombene kulungula bangi kwakwa kusanguka?

3, 4. (a) Nsangukilo kinyi ibaadi ikitshikye kumpala kwashi balongi ba Yesu batandikwe? (b) Bantu kinyi babaadi Yesu musangushe?

 ³ Kwamba kw’ashi muntu mufwe mmulombene kusanguka, takubaadi bu mwanda upya kwi batumiibwa ba Yesu nya. Abaadi abauku shi kumpala kwa’bo kutandjikwa, Yehowa bapeele Eliya na Elisee bukome bwa kukita byabya bipaso. (1 Bf. 17:17-24; 2 Bf. 4:32-37) Ungi muntu baadi mufwe basangukile nsaa ibaabadi bamusumbule mu mashama na mbidi yaye nkukuma mifufwa ya Elisee. (2 Bf. 13:20, 21) Beena Kidishitu ba kumpala abaadi bakumiine ino miisambo ya mu Bifundwe, anka bu byatukumiina shi Eyi dy’Efile Mukulu ndya binyibinyi.

⁴ Mu mushindo umune, atwe booso tubaadi bakumibwe ku mashimba ngofu pa kubadika miisambo itale bantu babaadi Yesu musangushe. Pabaadi musangushe mwana umune eleka a mukashi kilele, uno mukashi kilele baadi mukanye ngofu. (Luk. 7:11-15) Ungi mususa, Yesu baadi musangushe nsongwakashi a bipwa 12. Banda kutentekyesha muloo ubaadi nao baledi baye abaadi na kinyongwa nsaa ibaabamwene mwan’abo basanguka! (Luk. 8:49-56) Na disanka dibapushishe bantu abaadi bamone Lazare atuuku mu mashama na muwa na mbidi bukome!​—Yo. 11:38-44.

5. Mushindo kinyi ubaadi lusangukilo lwa Yesu lwilekene na ingi ibaakitshikile kumpala?

⁵ Balongi ba Yesu abaadi abauku shi lusangukilo lwa Yesu ndwilekene na ingi yooso ibaakitshikile kumpala. Bantu babaabadi basangushe, abatuukile na mbidi, na dingi abaadi bafwe. Yesu abaadi bamubushe na mbidi ya mu kikudi isha kufwa dingi. (Badika Bikitshino 13:34.) Mpyeele bafundile shi, Yesu: “Baadi mwipayiibwe mu mbidi, anka basangwilwe dimo na muwa mu kikudi.” Na dingi, ‘ashala ku mboko ibalume y’Efile Mukulu. Nyi kwadi mubikale panundu pa bamwikeyilu na bingi bya matalwa na bya bukome byoso bya mwiyilu.” (1 Mp. 3:18-22, EEM) Nsangukilo yooso ibaakitshikile kumpala ibaadi ayisangasha bantu na ibaadi ya mu bipaso, kadi ta twi balombene kwiyipwandikisha na luno lusangukilo lukata nya.

6. Mushindo kinyi ubaadi lusangukilo lwa Yesu lutale balongi baaye?

⁶ Kusanguka kwa Yesu kubaadi na muulo ukata kwi balongi baaye. Tabaadi muyishe mu lufu bu bibaadi abipwandjikisha beshikwanyi naye nya. Yesu baadi musangukye bu muntu mukata a mu kikudi abashi balombene kwipaa kwi muntu. Lusangukilo lwaye nduleshe shi baadi Mwan’Efile Mukulu, na kino kyukilo kibaadi kipe balongi baaye muloo ukata. Pa mwanda wa byabya, abalekyele kutshina bapeta eshimba dinyingye. Lusangukilo lwa Yesu lubaadi lwimeene pa mpàngo ya Yehowa na pa mukandu wibuwa ubaabadi abalungula mu ma mbalo ooso n’eshimba dinyingye.

7. Nkinyi kikwete kukita Yesu lelo uno, na nkonko kinyi yatudya kwiyipusha?

⁷ Bu byatudi bafubi ba Yehowa, atushinkamisha kalolo shi Yesu baadi muntu mukile kinemo. E na muwa lelo uno na kwete kukunkusha mufubo wa bulungudi utale muntu eese e mu nsenga. Bu byaadi Nfumu a Bufumu bw’Efile Mukulu bwa mwiyilu, Yesu Kidishitu akyebe kusula nsenga ku bubi na kwiyifwisha mpaladiiso amukyebe nkashala bantu bwa looso. (Luk. 23:43) Bino byooso tabibaadya kulombana su Yesu ta mmusangukye. Byabya, mmyanda kinyi ayitutumu mu kukumiina shi baadi musangukye? Lusangukilo lwaye alukyebe kwitukitshina kinyi?

8, 9. (a) Bwakinyi bakata ba bipwilo abatekyele bwashi bakalame mashama a Yesu? (b) Nkinyi kibaadi kikitshikye nsaa ibaafikile bana bakashi ku mashama?

⁸ Kunyima kwa kwipaa Yesu, bakata ba batshite-mwakwidi na baafadisee babayiile kwi Pilato na kumulungula shi: “Mwanana, tubatentekyesha’shi,  yaawa sha-madimi bambile, aye kyatala shi: ‘Kunyima kwa mafuku asatu, naasanguka.’ Byabya, tuma eyi bwa’shi bakalame mashaama nyaa na kwifuku dyaakasatu, tala balondji baaye baafika mu kumwiba, babanga kulungula bantu shi: ‘Baasanguka.’ Aa madimi akunyima ngalombene kukila akumpala ku bubi.’ Pilato nkwibaluula shi: ‘Mbaaba bantu ba kulama. Ndayi nukalamishe mashaama buu byanunangwila.’ Abo nkukita nka byabya.​—Mat. 27:62-66.

⁹ Kitanda kya Yesu abekitudile mu mashama abaabadi babundwile mu lubwebwe lukata kubaabadi bashikye ebwe dikata. Mwamwa nyi mubaadi bakata ba bipwilo bya beena Yuuda abakumiina shi Yesu ashale bwa looso​—kushi na muwa mu aa mashama. Kadi Yehowa baadi na binangu bilekene na byabo. Nsaa ibafikile ba Maariya a mu Mandala na ungi Maariya ku mashama p’efuku dyakasatu, abasangene ebwe dikatushe na mwikeyilu mushale panka. Mwikeyilu nkulungula baaba bana bakashi bwa kutala mu mashama, kadi abamwene shi mwi bisumanga. Akupu bebalungwile shi: “Tee pano nya, mmusangukye.” (Mat. 28:1-6) Eyendo Yesu baadi musangukye!

10. Nkushinkamisha kinyi kutale lusangukilo lwa Yesu kubaadi Mpoolo mutuushe?

¹⁰ Kushi mpaka, myanda ibaadi ikitshikye mu mafuku 40 abalondele ibaadi ileshe shi Yesu basangukile. Bwa kwibishinkamisha, Mpoolo baadi mufundjile beena Kodinto shi: “Kumpala naadi mwinuwukishe mwanda unaadi mutambule ami nabeene wa’shi: Kidishitu baafwile bwa milwisho yeetu, muyiile Bifundwe. Baabamushiikile, asanguka mwifuku dya kasatu, muyiile Bifundwe. Aye nkumwekyela Kefase, akupu baamwekyeele Ekumi na babidi. Kunyima aye nkumwekyela mpaa na bakwetu bakile pa nkama itaano beebungi bakyaabatala, bamo mbafwe. Kunyima aye nkumwekyela Yaakobo, akupu batumiibwa booso. Kunyima kwa booso, aye nkummwekyela naamu, ami ee bu mwana a-kabishi.”​—1 Kod. 15:3-8.

11. Mushindo kinyi ubaadi lusangukilo lwa Yesu lukitshikye “muyile Bifundwe”?

¹¹ Mwanda wa kumpala awitutumu bwa kukumiina shi Yesu baadi musangukye ku bafwe ngwa shi, lusangukilo lwaye ndukitshikye “muyiile Bifundwe.” Eyi dy’Efile Mukulu dibaadi ditemukye lwalwa lusangukilo. Bu kileshesho, Daavide bafundjile shi Efile Mukulu ta mukumbene kutadiila ‘mumulamate’ bwashi ashale mu mashama. (Badika Misambo 16:10.) Mwifuku dya Pantekote a 33 K.Y.K., Mpyeele mutumibwa baadi mutemune uno verse a mu butemuki bwa kwakwila pabitale Yesu shi: ‘[Daavide] baadi mubadiile kumona kusanguka kwa Kidishitu, pa mwanda waye nyi pabaadi mwambe shi; ta mmumutadiile mu kishaalelo kya bafwe, dingi mbidi yaaye tanginyangye nya.’​—Bik. 2:23-27, 31.

12. Nanyi baadi mumone Yesu aye baapu kusanguka?

¹² Mwanda wa kabidi awitutumu bwa kukumiina shi Yesu baadi musangukye ku bafwe ngwa shi, twi na bukamonyi bwa bantu bebungi. Munda mwa mafuku akile pa 40, Yesu mupwe kusangushibwa bamwekyele kwi balongi baaye mu lupango lubaadi mashama aaye na mwishinda adyende ku Emause na mu angi ma mbalo. (Luk. 24:13-15) Mu yaya misusa yooso, baadi mwisambe na bantu, mpaa na Mpyeele, na bibumbu bya bantu. Akupu, Yesu baadi mumwenekyele bantu bakile pa 500! Eyendo mwanda umone bantu bebungi ta twi balombene kwiupela nya.

13. Kisumi kya balongi kibaadi kileshe shi Yesu basanguka naminyi?

¹³ Mwanda wa kasatu awitutumu bwa kukumiina shi Yesu baadi musangukye, nyi nkisumi kibaadi kileshe balondji baaye kya kwakula pabitale wawa mwanda. Kulungula kwabo na kisumi pabitale kusanguka kwa Yesu kubaadi kwibafwishile bulwishi, makyenga na lufu. Su Yesu tabaadi musangukye​—su byabya byooso bibaadi myanda ya madimi—​bwakinyi Mpyeele baadi  mukumbene kutuula muwa waye mu masaku pa kulungula lusangukilo lwa Yesu kwi bakata ba bipwilo abaadi bashikwe Yesu na kumufisha ku lufu? Mwanda shi Mpyeele na bangi balongi abaadi bashinkamishe shi Yesu baadi mmusangukye na baadi akukunkusha mudimo aukumina Efile Mukulu shi ukitshikye. Na dingi, lusangukilo lwa Yesu lubaadi lushinkamiishe balongi baaye shi abo namu abakyebe kusangushibwa. Bu kileshesho, Etshiene baadi mufwe na lukulupilo lwa shi akukekala lusangukilo lwa bafwe.​—Bik. 7:55-60.

14. Bwakinyi okumiina shi Yesu e na muwa?

¹⁴ Mwanda wa kananka awitushinkamisha shi Yesu baadi musangukye, nyi nkishinkamiisho kyatudi nakyo akilesha shi kwete kukunkusha bu Nfumu na kufuba bu Mutwe wa kakongye ka beena Kidishitu. Bu kipeta, bwina Kidishitu bwa binyibinyi bukwete kwenda na kutama. Bino mbilombene kukitshika su Yesu tabaadi musangukye? Su mbyabya, pangi, ta tubaadya kwikala bapushe ata bantu abakula pabitale kukutwa kusanguka kwaye. Kadi, twi na bishinkamiisho bya binyibinyi abilesha shi e na muwa, na kwete kwitukunkusha mu mudimo wa kulungula mukandu wibuwa aukitshika pa nsenga ishima.

15. Bwakinyi lusangukilo lwa Yesu alwitupa eshimba dinyingye bwa kulungula mukandu wibuwa?

¹⁵ Lusangukilo lwa Yesu alwitupa eshimba dinyingye dya kulungula mukandu wibuwa. Munda mwa bipwa 2 000, beshikwanyi n’Efile Mukulu mbakimbe mishindo ilekeene ya bulwishi bwa kufudiisha mudimo wa bulungudi​—malongyesha a madimi, kusengibwa, buntomboshi, kwimika mudimo, kukyengyesha na kwipaa. Aku namu​—‘kilonda kyooso kifushiibwe bwa kulwa neetu’—​tankimikye mudimo wetu wa kulungula kwa mukandu wa Bufumu na wa kwikasha bantu bu balongi. (Yesh. 54:17) Tatutshinyi bantu babakwete kutumika nabo kwi Satana nya. Yesu e neetu, kwete kwitukwasha nka bu bibaadi mulee. (Mat. 28:20) Tatwi na kya kutshina nya, mwanda kyooso kyabadya kukita kwi beshikwanyi n’eetu, ta nkilombene kwitwimika nya!

16, 17. (a) Mushindo kinyi wi lusangukilo lwa Yesu alushinkamisha myanda ibaadi mulongyeshe? (b) Muyile abyamba mukanda wa Yowano 11:25, Efile Mukulu mmupe Yesu bukome kinyi?

¹⁶ Lusangukilo lwa Yesu alushinkamisha myanda yooso ibaadi mulongyeshe. Mpoolo bafundjile shi su Kidishitu tabaadi musangukye, kutuula lukumiino mwi Yesu na mudimo wa kulungula mukandu wibuwa tabibaadya kwikala na muulo nya. Ungi mupatuludi a Bible bafundjile shi: “Su Kidishitu tabaadi musangukye, . . . abadya kwata beena Kidishitu kwi beshikwanyi nabo bu be na madimi akile.” Su Yesu tabaadi musangukye, miisambo i mu ma Evanjile ibadya kwikala nka penda bu miisambo ya kinyongwa ya muntu ebuwa na sha binangu abaabadi bayipee kwi beshikwanyi naye. Kadi Kidishitu baadi musangukye, bwa kushinkamisha myanda yooso ibaadi mulongyeshe, na yooso ibaadi mwakule pabitale mafuku aafiki.​—Badika 1 Beena-Kodinto 15:14, 15, 20.

¹⁷ Yesu bambile shi: ‘Ami ne lusangukilo ne muwa; ankumiina, sunga afwa, akekala na muwa.’ (Yo. 11:25) Kushi kudimba, uno mulayilo wa disanka aukyebe kulombana. Yehowa mmupe Yesu bukome bwa kusangusha ta nka penda baaba abakasanguka na mbidi ya mu kikudi bwa kwenda mwiyilu nya, kadi mpa na dingi midiyo ya bantu abakekala na muwa wa looso pa nsenga. Mulambu wa Yesu na lusangukilo lwaye abilesha shi lufu talwikala kwanka dimo nya. Kino kiukilo ta nkilombene nkunyingisha bwa kukambila nkalakasho n’eshimba dinyingye sunga kumpala kwa lufu su?

18. Lusangukilo lwa Yesu alwitushinkamisha kinyi?

¹⁸ Lusangukilo lwa Yesu alwitushinkamisha shi, bantu abakashala pa nsenga abakatshibilwa  kiimu mu kulonda miiya ya kifulo ya Yehowa. Pabaadi akula na kisaka kya bana balume na bana bakashi ba mu Atene a kala, Mpoolo bambile shi: “[Efile Mukulu] mmufunde efuku dya kayimwisha ba pano na bululame, kwi muntu aadi musangule, bu bibaadi mwibishinkamiishe bantu booso pa kumusangusha ku bafwe.” (Bik. 17:31) Oolo, Efile Mukulu mmusangule Yesu bu nsushi, na twi na kushinkamisha kooso shi akyebe kusambisha na kululama na kifulo.​—Badika Yeeshaya 11:2-4.

19. Mushindo kinyi wi kwikala na lukumiino mu lusangukilo lwa Kidishitu nkwitutale?

¹⁹ Kukumiina mu lusangukilo lwa Yesu akwitusukuma bwa kukita akikyebe Efile Mukulu. Su Yesu tabaadi mutushe muwa waye na su tabaadi musangukye, tubaadya kushala ku bupika bwa mulwisho na lufu. (Lom. 5:12; 6:23) Su Yesu tabaadi musangukye, tubadya kwikala atwamba shi: “Tudyeeyi naa tutomeeyi mwanda malooba atufu.” (1 Kod. 15:32) Anka tatwi batuule binangu byetu ku miloo ya mu nshalelo. Pamutwe pa byabya, tukwete kusangeela lukulupilo lwa lusangukilo na twi na myanda ibungi ayitutumu bwa kulonda bukunkushi bwa Yehowa mu myanda yooso.

20. Mushindo kinyi wi lusangukilo lwa Yesu alushinkamisha bukata bw’Efile Mukulu?

²⁰ Lusangukilo lwa Yesu alwitushinkamiisha bukata bwa Yehowa, aye “apeeyaa abamukimbi bwedi.” (Eb. 11:6) Yehowa baadi mufube na bukome na binangu byaye bwa kusangusha Yesu na kumupa muwa ushy’akufwa mwiyilu! Na dingi, Efile Mukulu baadi muleshe ngobesha yaye ya kulombasha milayilo yaye yooso. Mpaa na mulayilo w’Efile Mukulu wa mu butemuki aulesha shi “kekulu” akakela na mudimo ukata mu kupudisha kwa madimi atale matalwa a kumunana kwa Bufumu mu nsenga ishima. Kulombana kwa wawa mulayilo kubaadi akutungu shi Yesu afwe na asangukye.​—Kib. 3:15.

21. Lukulupilo lwa lusangukilo alukyebe nkukitshina kinyi?

²¹ Ta twi balombene kwikala na lutumbu kwi Yehowa, aye mwitupe lukulupilo lwa lusangukilo su? Bifundwe abitushinkamisha shi: ‘Talayi! Kishalelo ky’Efile Mukulu na bantu. Ashala naabo. Abaikala miilo yaaye, na aye aikala Efile Mukulu aabo. Akumuna mpolo yooso ku meso aabo. Lufu taalwikala kwanka dimo. Taakwikala dimo sunga maalo, sunga kwidila, sunga mukumbo, mwanda byapano bya kala bibashimina.’ Uno mulayilo wa muloo abaadi beupe Yowano mutumibwa sha bulamate na kumulungula shi: “Funda: myaaku ino tayii mpaka, ngya binyibinyi.” Nnanyi baadi mupe Yowano kino kifumbulwe? Abaadi bamupe kyanka kwi Yesu baadi musangukye.​—Bif. 1:1; 21:3-5.