“Kyooso kyodi nakyo lukalo, ondungule, nankukitshina kyanka na muloo ooso.” Pangi we bya kupusha bukopo bwa kulungula muntu mwenyi sunga muntu weukeena naye ano mayi. Anka, twe mukumbene kupusha bukopo bwa kwialungula kuuku oobe a p’eshimba nya. Bakuuku bebuwa abekalaa bapelepele bwa kwikwashena bu byabitungu.

Bible alesha shi Yehowa akitaa myanda ayisangasha bafubi baye. Bu kileshesho, Nfumu Daviide baadi mu kipwano kibuwa n’Efile Mukulu, bafundjile shi: ‘Obe Yehowa, Efile ande, we mwitukishîne myanda ya kukânya ikile bungi. . . . Ngikile bungi bwanshya kupudisha kwiibadika.’ (Misambo 40:5, EEM) Kukatusha byabya, Yehowa akitaa mpa na myanda ayisankisha baaba bashy’abandjile kumuuka, ‘auusha mashimba aabo na bya kudya na muloo.’​—Bikitshino 14:17.

Bu bikale shi Yehowa; akumiinaa kukita myanda ayisangasha bangi, byabya kutengyela shi baaba abakumiina kwikala bakuuku b’Efile Mukulu bakite myanda ibuwa bwashi “eshimba dyaye disangale” ta kwi bubi nya. (Myeele 27:11) Kadi mmyanda kinyi menemene yodya kukita bwa kusangasha Efile Mukulu? Bible aluula shi: “Tanulubanga kukitshisheena biibuwa, na kwikwashena kwa mu kibumbu, mwanda yaaya ngi milambu aisangash’Efile Mukulu.” (Beena-Ebreeyi 13:16) Bino abilesha shi kukita bibuwa na kwikwashena na bangi ndjo kyooso akitungu bwa kusangasha Efile Mukule su?

Bible amba shi: “Kushii lukumiino, takwi kipaso kya kulongamina Efile Mukulu.” (Beena-Ebreeyi 11:6) Eyendo, abimweka shi nka kunyima kwa ‘Abrahame kwikala na lukumiino mwi Yehowa’ ndjo “aye nkuudikwa dimo eshina dya bu kuuku a Yehowa.” (Jaake 2:23) Yesu baadi dingi muleshe shi abitungu “tukumiine mwi Efile Mukulu” su atukyebe kupeta mwabi waye. (Yowano 14:1) Byabya, mmushindo kinyi oodi mulombene kupeta lukumiino alukyebe Efile Mukulu shi baaba abefubwila kwadi bekale nalo? We mukumbene kubanga na kwilongyelanga Eyi dyaye Bible kwifuku n’efuku. Su bokitshi byabya, okapete “kyuukilo kya akikyebe eshimba dyaye” na kuyiya bwa kukita “kyooso kya kumusangasha.” Bu byokwete kwenda na kutamisha kyukilo kya Yehowa na kutumika na myanda y’olongo pabitale miiya yaaye ilulame, okyebe kunyingisha lukumiino loobe na kwifubwila pepi menemene naye.​—Beena-Kolose 1:9, 10.