ATWE booso atumonaa bantu abafitshi munda, n’atwe namu atufitaa munda ingi nsaa. Sunga mbyatumonaa nsungu bu eyikashi dibubi aditungu kukatusha, twi balombene misusa ibungi kufiita munda, bikishekishe nsaa ayitulwishisha muntu. Ungi mwisambo wa mu mukanda wa (Association américaine de psychologie) aulesha shi: “kukwata nsungu kwibuwa mwanda ta mmukumbo nya, kadi kwi mu ngikashi ya bantu.”

Patutala myanda ibaadi Mpoolo mufunde ku bukwashi bwa kikudi kiselele, atumono shi uno mwanda ngw’eyendo. Bwa kulesha shi muntu mmulombene kukwata nsunga ingi nsaa, Mpoolo bafundjile shi: “Su nwi na nsungu, tanukitanga mwanda ubi; nguba tatwelanga anwe beekale’nka n’eshimba dishiidikye.” (Beena-Efeeze 4:26) Pa mwanda wa byabya, abitungu tulekyeele nsungu yeetu itame, su abitungu kukita mwetu mooso bwa kwiyikanda?

Pabatuushile Mpoolo dino elango pabitale nsungu, abimweka shi baadi mutentekyeshe ano mayi a mufundji a misambo aamba shi: “Sunga nubakwata nsungu, tanulwishanga.” (Misambo 4:4, EEM) Bwakinyi Mpoolo baadi mutuushe dino elango? Atungunuka na kulesha shi: “Bingaayi kwanudi kinyongwa kya kwishimba, bukyelo na nsungu, nulekye kubwela [kulee] na kukaana mulomo; katuushayi bipaso byooso bya mushikwa.” (Beena-Efeeze 4:31) Bino mbilekene menemene na mushindo ulombene kumweneka muntu ku meso, nyi bwakinyi Mpoolo baadi mukankamikye beena Kidishitu bwa kupela kutamisha nsungu. Na dingi, mukanda wa (Association américaine de psychologie) autungunuka na kulesha shi: “Bantu abakimbuulaa myanda mbasangane shi, ‘kulesha nsungu bikishekishe’ akukaamishaa nsungu na bukyelo, ta nkulombene nkukwasha . . . bwa kupudisha mwanda oodi nao.”

Byabya, mmushindo kinyi watudi bakumbene “kubinga” nsungu na kwepa myanda yooso ibubi ayituukila kwanka? Salomone, nfumu a kala a mu Isaleele sha binangu bambile shi: “Muntu sha kinangu ta kwataa nsungu bukidi, dingi apete nkumo palekyeela muntu kito kyaye.” (Myeele 19:11, NWT) Mushindo kinyi ulombene ‘kinangu kya muntu’ kumukwasha nsaa ayimufwila nsungu?

Kwikala na kinangu akulesha kwikala na bukome bwa kushinguula bii mwanda. Akulesha dingi kupela kwimeena penda pa byatupusha. Mmushindo kinyi wabitukwasha nsaa yabetulwishila sunga kwitoolomona?

Mbilombene kwitutonda nsaa yabetukitshina mwanda wibubi. Kadi, su twakwata nsungu bukidibukidi, twi balombene kwikitshina sunga kukitshina bangi bantu mwanda wibubi. Anka bu kaalo kebukopo kalombene kupiisha nshibo, nsungu ibukopo ngilombene kulwisha nkumo yeetu, kipwano kyetu na bangi bantu, mpa n’Efile Mukulu. Byabya, nsaa yatupusha shi nsungu tayikyebe kwitukila bukome, yaya ndjo nsaa ayitungu tutaluule wawa mwanda ngofu. Mweneno ebuwa a mwanda mmulombene kwitukwasha bwa kukanda nsungu yeetu.

Nfumu Daavide, nshaye na Salomone, bakyebele kuponesha mase a muntu ababaadi abetanyina bu Nabale na kifuko kyaye, kadi abaadi bakwashe Daavide bwa kushinguula bii mwanda. Daavide na basalayi baaye abaadi bakalwile mikooko ya Nabale ibaadi mu kabaaka ka Yudeya. Pabafikile kipungo kya kukuula mikooko bwaa , Daavide batekyele Nabale bidibwa. Ndjo Nabale nkumwaluula shi: “Ami ngaate mikate yande, mema ande, mwita wande, byandji mulumbuule bwa abakuula nyema yande bwaa, bwa kwibipa bantu abafiki su kunyi su nkunyi!” Kasaabu ke kashaa! Daavide pabaapushishe ano mayi, bayiile na basalayi baye 400 mu nkayipa Nabale na kifuko kyaye.​—1 Samwele 25:4-13.

Abigaile, mukashi a Nabale bapushishe uno mwanda, aye nkwenda mu kwimoneena na Daavide. Abo nkufumankana, Abigaile bapoone ku ngwa ya Daavide na kwamba shi: “Mufubi oobe mukashi apete mwabi wa kwakula ku matwi oobe! Teemesha bishima bya mufubi oobe mukashi.” Akupu, baadi mupushishe Daavide bii mulume aaye bu muntu mupatakane na kumulesha shi su baata kitshibilo kya kwalusha bubi ku bubi na kuponesha mase paashi akyebe kwinyongola kumongo.​—1 Samwele 25:24-31.

Nkinangu kinyi kibapetele Daavide ku mayi a Abigaile kibaadi kimukwashe bwa kupudisha wawa mwanda? Kya kumpala, bamwene shi Nabale mmuntu a myanda ipatakane, na kya kabidi, Daavide bamwene shi su eobwela, mmulombene kupeta dibaasa dya mase. Anka bu Daavide, mwanda kampanda ngulombene nkufitshisha munda. Nkinyi kyoodi mulombene kukita? Jurnale a ku lupitalo lwa Mayo atuusha dino elango pabitale mushindo wa kwitula nsungu shi: “Ata nsaa ya kuyooka ngofu misango 10.” Oolo, banda kwimana, onangushene pabitale kibafwisha wawa mwanda na pa masaku alombene kutuusha kitshibilo kyonangusheenanga bwa kwata. Abitungu kinangu kiitule nsungu yoobe​—sunga kwiyikatusha.​—1 Samwele 25:32-35.

Mu mushindo umune, bantu bebungi lelo uno mbapete bukwashi bwa kukanda nsungu yaabo. Sebastien baadi mutwele mu lukano mwiumbo dya Pologne na bipwa 23, alesha mushindo wadi mulongye bwa kukanda nsungu yaaye ku bukwashi bwa kulonga kwa Bible. Amba shi: “Kumpala, nabanda kunangushena bii mwanda, akupu ndjo nakimbi mushindo wa kutumikila malango a mu Bible. Nemumone shi Bible mmukanda autuusha bukunkushi bwibuwa.”

Setsuo baadi mulonde namu ano mayele, amba shi: “Naadi nasashila bena mudimo naami nsaa ibaabadi abanfitshisha munda. Kunyima kwa kulonga Bible, nabangile kunangushena kumpala kwa kwibasamina shi: ‘A paapa naanyi sha kilubilo? Ta nnaami lwishanga?’” Kunangushena pabitale ino nkonko kubaadi kuyitule nsungu yaaye, na baadi mupete mushindo wa kukanda binangu bibubi bibaadi abituuku mwishimba dyaye.

Nsungu ngilombene kwikala ibukopo ngofu, kadi elango dya mu Eyi dy’Efile Mukulu di na bukome bukile. Su otumikila dino elango dya binangu na kuteka Efile Mukulu bukwashi, okyebe kupeta kinangu akikukwasha bwa kukanda nsungu yoobe.