Mu nsenga ishima lelo uno, midiyo ya bantu bakwete kusepeela Nowele bwa tubingilo twibungi. Bangi abakumiina kukisha nsaa ibuwa pamune na bakuuku na beena kifuko. Bamo namu abatentekyesha myanda y’Efile Mukulu sunga kwenda mu kukwasha balanda na bantu abakyengye. Kushi mpaka, ino yooso nyi myanda ibuwa. Anka, ino myanda ibuwa ikwete kufwamisha lupese lwi bubi lwa uno fete.

Kya kumpala, bebungi abasepeela Nowele abanangushena shi ngi efuku dibaabatandjile Yesu. Aku namu, bantu bakwete kutaluula myanda ya kala abamba shi efuku dya kutandjikwa kwa Yesu tadiwukikwa nya. Mukanda wa (The Christian Book of Why) aulesha shi, “beena Kidishitu ba kumpala ta babaadi abakumiina kusangula efuku kampanda bu efuku dya kutandjikwa kwa Yesu nya” mwanda abaadi abakumiina “kwilamuuna ku bipikwa byooso bya ba mpangano.” Binyi byabya, Bible taalesha sunga mmusango umune ubaadi Yesu musepeele kutandjikwa kwaye sunga kwa ungi muntu nya. Pamutwe pa byabya, baadi mulungule balondji baye bwa kutentekyesha lufu lwaye.—Luuka 22:19.

Kya kabidi, bantu bebungi abakimbuulaa myanda mbasangane shi bipikwa bibungi abikitshikaa mwifuku dya Nowele mbikatuukile ku bipikwa bya bantu bashii beena Kidishitu na ba mpangano. Mpa na bingi bipikwa bu; kya Père Nowele, kufuba na mutshi wa gui na mutshi wa Nowele, kwipeshena ma kado, kutembesha ma buji na kupudika bilongo ku bintu, na kwimba misambo ya mu Nowele. Mukanda wa (The Externals of the Catholic Church) awakula pabitale bingi bya ku bino bipikwa shi: “Nsaa yatupa bantu ma kado a Nowele sunga yabetupa anka, na yatupudika bilongo bi bulese ku mashibo eetu na ku bipwilo, mbantu bungi kinyi ba kwatudi abauuku shi tukwete kusepeela bipikwa bya ba mpangano?”

Kadi, obe namu we bya kwiyipusha su kukita byabya bipikwa kwi bubi. Tala uno mwanda wa kasatu bu lwalulo. Efile Mukulu takumiina shi tutweshe bipikwa bya ba mpangano mu lulangwilo lwaye lwiselele nya. Ku bukwashi bwa mutemuki Amose, Yehowa Efile Mukulu baadi mulungule balangwidi baye abaadi na mutwe wibukopo shi: “Nyi mushikwe bikata mafuku enu a kusepêla . . . Lekyeshayi! ngono yenu ainkalakasha!”—Amose 5:21, 23, EEM.

Bwakinyi Yehowa baadi mutuushe bishima bi byabya? Tubande kutala myanda ibaadi ayikitshi bantu abaadi bashale mu bufumu bwa kunundu bwa Isaleele. Nfumu aabo a kumpala Yeroboame, batudile twana twa ngombe twa Òlo mu kibundji kya Dane na kya Betele na kusukuma bantu mu kwitulangwila pamutwe pa kwenda mu kulangwila Yehowa Efile Mukulu ku ntempelo mu Yeelusaleme. Na dingi Yeroboame baadi mutuushe mafuku a kusepeele na kutuula batshite-mwakwidi balombene kukwasha bantu bwashi banemekyele aa mafuku.—1 Banfumu 12:26-33.

Abimweka nka bu’shi beena Isalele abaadi na kabingilo ka kukita byabya. Na dingi, babaadi abakitshi bino byooso pamwanda wa kulangwila Efile Mukulu na kumusangasha? Kadi mayi a Efile Mukulu abafundjile mutemuki Amose na bangi batemuki aetukwasha bwa kupusha mushindo ubaadi Yehowa mumone byabya bipikwa. Kukidila kwi mutemuki Malakii, Efile Mukulu bambile shi: “Ami Yehowa, ntshi mwalulukye’mi.” (Malakii 3:6) Bino tabitulongyesha namu pabitale mushindo ukwete Yehowa kumona fete a Nowele kwete kukitshika lelo uno su?

Kunyima kwa kutaluula yaya myanda i kunundu, midiyo ya bantu ngyaate kitshibilo kya kupela kusepeela fete a Nowele. Kadi, bakwete kupeta muloo wibungi pabakisha nsaa pamune na bakuuku na bifuko byabo bwa kukwasha balanda na bantu abakyengye nsaa yooso yabakumiina ku kipwa.