1, 2. Mushindo kinyi ubaadi Yesu munyingishe balongi baaye mwifuku dya lusangukilo lwaye?

TWI MWIFUKU dibaadi disangukye Yesu. Balongi baye babidi abaadi abende mu ungi musoko wi mu kilometre 11 na Yeelusaleme. Abo kushi kuuka shi Yesu mupwe kusanguka, abaadi na mashimba enyongole mwanda wa myanda ibaadi ikitshikye. Mususa umune, Yesu nkwibamwekyela na nkubanga kwenda nabo. Baadi mwibakankamikye. Mushindo kinyi? “Babangiile ku Moyiise na batemuki booso, aye nkwibapatulwila byooso bibambilwe pa mwanda waye mu bifundwe.” (Luk. 24:13-15, 27) Ndjo, mashimba aabo nkubanga kutemba kaalo mwanda baadi “ebapushiisha” bifundwe.​—Luk. 24:32.

² Kyakya kyolwa kimune, baaba balongi babidi nkwalukiila ku Yeelusaleme. Pababasangene bangi batumibwa, abebalungwile myanda ibaabadi bamone mwishinda. Abo bakyabakula, Yesu nkwibamwekyela booso bwabo. Balongi baye abaadi bapushe moo. Akupu abaadi na mialasheno mwishimba. Mushindo kinyi ubaadi Yesu mwibanyingishe? Bible amba shi: “Aye nkwibabuula kinangu, bwabadya kupatuula bifundwe.”​—Luk. 24:45.

3. Nkalakasho kinyi yatudi bakulombene kufumankana nayo, na nkinyi kilombene kwitukwasha bwa kwikala na mweneno ebuwa a mudimo wetu wa bulungudi?

³ Anka bu baaba balongi, twi balombene kwinyongola ku  mashimba. Pangi tukwete kufuba ngofu mu mudimo wa Mwanana, kadi tubatshoboloka mwanda wa kukutwa kumona bipeta bibuwa. (1 Kod. 15:58) Sunga shi bantu batulongo nabo Bible tabakwete kwenda kumpala nya. Mpa na bangi batukwete kukwasha mbalombeene kupela kufubila Yehowa. Nkinyi kyatudi balombene kukita bwa kwikala na mweneno ebuwa a mudimo wetu wa bulungudi? Kintu kilombene kwitukwasha nyi nkushinguula menemene akipatuula nkindji ya Yesu i mu Bifundwe biselele. Tubande kutaluula isatu ya ku yaya nkindji na kumona malongyesha atudi balombene kupeta.

4. Lukindji lwa Yesu pabitale muntu akunu mbyo bakalaala alupatuula kinyi?

⁴ Badika Maako 4:26-29. Nkinyi akipushiisha lukindji lwa Yesu lutale muntu bakunu mbyo bakalaala? Muntu a mu lukindji alesha balungudi ba mukandu wibuwa wa Bufumu. Mbyo nyi mukandu wa Bufumu wabalungula bantu basha mashimba alulame. Anka bu mu nshalelo a efuku dyooso, muntu akunu mbyo ‘alaala bufuku na kubuuka kanya.’ Abitungaa shi kukile mafuku kubanga ku kipungo kya kukuna mpa na ku kipungo kya kumbula. Mu kyakya kipungo “mbyo aimene, ikule.” Mbyo ayende na kukula ‘ayo inabeene,’ ku kapeelakapeela na mu bipindji. Mu mushindo umune, muntu endaa na kukula mu kikudi, sunga kwifubwila peepi na Yehowa, kapeelakapeela mu matabula. Nsaa i muntu bende kumpala mu mushindo aulesha shi taadi na lukalo lwa kufubila Efile Mukulu, ‘atusha bikuba’ p’aye kulambula muwa waye kwi Yehowa na kubatshishibwa.

5. Bwakinyi Yesu baadi mwele lukindji lwa muntu bakunu mbyo bakalaala?

⁵ Bwakinyi Yesu baadi mwele luno lukindji? Yesu etukwasha bwa kumona shi Yehowa ndjo kwete kukusha bya binyibinyi mwi bantu be na “mashimba alombane.” (Bik. 13:48; 1 Kod. 3:7) Atukunu na kumyamina mema, anka tatuuku mushindo wabikwetu kukula. Ta twi balombene kukita bwashi bintu bikule lubilo sunga pa bukopo bwetu nya. Anka bu yawa muntu a mu lukindji, tatuuku mushindo wabikitshika nya. Bu byatukitshi myanda yetu ya kwifuku n’efuku, ta twi balombene kumona mushindo aukulu bya binyibinyi mwishimba dya muntu. Kadi, kunyima kwa mafuku, bya binyibinyi bya Bufumu mbilombene kupa bikuba. Paapa mulongi mupya esanga neetu mu mudimo wa kumbula, na atuseepela na bukwashi bwaye.​—Yo. 4:36-38.

6. Nkinyi akitungu shi tushinguule pabitale kukula kwa muntu mu kikudi?

⁶ Nkinyi akitulongyesha luno lukindji? Kya kumpala, tushinguule shi tatuuku mushindo aukulu muntu atulongo naye Bible mu kikudi nya. Byabya, kwiyisha akukyebe kwitukwasha bwa kupela kumutakula sunga kumukitshisha bwa kubatshishibwa. Abitungu tukite mwetu mooso bwa kukwasha yawa muntu, kadi abitungu tushinguule na kwiyisha kooso shi, nnaye nabeene mukumbene kwata kyakya kishibilo. Kwilambula nyi mwanda autungu shi ukatukile mwishimba dya muntu nabene mwanda wa kifulo kyaye bw’Efile Mukulu. Yehowa akumiina kwilambula kwetu nka nsaa yatulesha shi twi bamufule mwiyendo.​—Mis. 51:12; 54:6; 110:3.

7, 8. (a) Malongyesha kinyi dingi atupetela ku lukindji lwa Yesu pabitale muntu bakunu mbyo bakalaala? Tuusha kileshesho. (b) Bino abitulongyesha kinyi pabitale Yehowa na Yesu?

⁷ Kya kabidi, kupusha kalolo dilongyesha aditupa luno lukindji akukyebe kwitukwasha bwa kupela kutshoboloka su muntu atulongo naye takwete kwenda kumpala. Abitungu twikale na lwishinko. (Ja. 5:7, 8) Su tubakitshi mwetu mooso bwa kukwasha muntu, kadi bya binyibinyi tabikwete kutama munda mwaye, byabya tabilesha shi twi balongyeshi bakutwe kishima nya. Yehowa atadiilaa bwashi bya binyiinyi  bikule mwishimba dya muntu sha kwiyisha ena lukalo lwa kushintuluka. (Mat. 13:23) Byabya ta twi balombene kwamba shi twi balungudi bebuwa mwanda washi tukwete kufisha bantu bebungi ku lubatshisho nya. Yehowa tasepeela na mudimo wetu pa mwanda wa shi bantu batulongyesha Bible babeukumina. Anka, asangeela na kwitatshisha kwetu sunga byekala shi bipeta tabikwete kumweka.​—Badika Luuka 10:17-20; 1 Beena-Kodinto 3:8.

⁸ Kya kasatu, taatumonaa kwaluluka akukitshika mwishimba dya muntu nya. Bu kileshesho, ungi mulume na mukashi abaadi abalongo Bible na ungi misionere abayiile kwadi, bamuteka shi abakyebe kwikala balungudi bashii babande kubatshishibwa. Misionere baadi mwibaluule shi, abitungu babande kuleka kutoma nfwanka. Mwanda wa kukaanya, yawa mulume na mukashi abambile shi, taabaadi bapwe kuleka takudi myeshi ibungi. Bwakinyi abaadi baate kitshibilo kya kuleka nfwaka? Abatundwile shi Yehowa baadi mulombene kwibamona na mmushikwe bulamalama. Ndjo mashimba aabo nkwibatakula mu kwata kitshibilo​—kya kutoma kumpala kwa yawa misionere sunga kya kuleka kutoma booso bwabo. Ndjo kifulo kyabo bwa Yehowa nkwibakwasha bwa kusangula kibuwa kya kukita. Eyendo abaadi bakule mu kikudi, sunga byekala shi misionere tabaadi auku mushindo ubaabadi bashintulukye.

9. Lukindji lwa bukondja alupatuula kinyi?

⁹ Badika Mateo 13:47-50. Lukindji lwa Yesu pabitale bukondja alupatuula kinyi? Yesu baadi mupwandjikishe kulungula kwa mukandu wa Bufumu kwi bantu booso na kwela kwa bukondja bukata mu mbuu. Anka bu bwabwa bukondja abukwata “mishipa ya bipaso byooso” kushii kusangula, mudimo wetu wa kulungula mukandu wibuwa ukwete kusankisha binunu bya bantu ba miilo yooso. (Yesh. 60:5) Tukwete kwibimona nsaa ayifiki bantu bebungi ku bikongeno na ku Kitentekyesho kya lufu lwa Yesu ku kipwa kyooso. Bangi ba ku ino mishipa ya mu kinfwanyi “bebuwa” na bakwete kwibatwesha mu kakongye ka beena Kidishitu. Bangi namu abamwekaa bu mishipa “ishii na muulo” nta mbooso babakakumiina kwi Yehowa nya.

10. Bwakinyi Yesu baadi mwele lukindji lwa bukondja?

¹⁰ Bwakinyi Yesu baadi mwele luno lukindji? kwabuula kwa mu kinfwanyi kwa mishipa takulesha kiimu kya nfudiilo akikitshika mu kipungo kya mpombo ikata nya. Anka, akulesha myanda ayikyebe kumweka ku nfudiilo kwa uno ndumbulwilo. Yesu baadi muleshe shi ta mbooso abakumiina mukandu wa Bufumu abakyebe kufika bafubi ba Yehowa nya. Bebungi abebungaa neetu mu bisangilo. Bangi namu mbakumiine kulonga neetu Bible kadi tabakumiina kwilambula. (1 Bf. 18:21) Bangi tabaky’abatwelaa dingi neetu mu bisangilo. Bangi basongwa be mu bifuko bya beena Kidishitu kadi tabakwete kulesha kifulo bwa miiya ilulame ya Yehowa nya. Sunga mbyabya, Yesu baadi mwambe shi abitungu muntu eese a kwatudi aate kitshibilo. Baaba abakitshi byabya, Yesu ebamono bu “bintu binême,” bya “mîlo yoso.”​—Ag. 2:7, EEM.

11, 12. (a) Mbukwashi kinyi bwatupetela ku lukindji lutale bukondja? (b) Bino abitulongyesha kinyi pabitale Yehowa na Yesu?

¹¹ Lukindji lutale bukondja ndulombene kwitukwasha naminyi? Kupusha dilongyesha dyatupetela ku lukindji lutale bukondja akwitukwasha bwa kupela kufiita munda sunga kutshoboloka su mulongi a Bible sunga umune a ku bana beetu takumiina kufubila Yehowa. Bino mbilombene kukitshika sunga byekala shi tukwete kukita mwetu mooso. Su muntu kwete kulonga Bible sunga shi e mu kifuko kya beena Kidishitu tabilesha shi yawa muntu  bafiki kuuku a Yehowa nya. Baaba bashy’abakumiina kulonda bukunkushi bwa Yehowa abakakatushibwa munkatshi mwa mwilo w’Efile Mukulu.

¹² Byabya abilesha shi baaba bakatukye mu bya binyibinyi tabakyebe kutambulwa dingi mu kakongye su? Sunga shi, su muntu bakutwa kwilambula kwi Yehowa, abitungu kumwata bu muntu “shii na muulo”? Nya. Ku kii mushindo washi afika dingi kuuku a Yehowa kumpala kwashi mpombo ikata ifikye. Bi nka bu’shi Yehowa kwete kumulungula shi: ‘Alukiila kwandi, ami namu neealusha koodi.’ (Mal. 3:7) Yesu baadi muleshe uno mwanda mu lungi lukindji lubaadi mwele pabitale mwana mushimine.​—Badika Luuka 15:11-32.

13. Lukindji lwa mwana mushimine alupatuula kinyi?

¹³ Lukindji lwa Yesu pabitale mwana mushimine alupatuula kinyi? She bana sha lusa a mu luno lukindji alesha Yehowa nshetu e mwiyilu sha kifulo. Mwana atekye bupyanyi akupu ebulwisha alesha baaba bakatukye mu kakongye. P’aabo kukatuka, be nka bu’bo bende mu lwendo “kwiumbo dii kula,” mu ndumbulwilo a Satana, ekula na Yehowa. (Ef. 4:18; Kol. 1:21) Kumongo bangi abafikaa mu kutundula bito byabo na kwalukiila kwi Yehowa. Bano bantu abalesha kwiyisha na kwilanga ku mashimba, Yehowa Efile Mukulu sha lusa ebatambulaa na kalolo kooso.​—Yesh. 44:22; 1 Mp. 2:25.

14. Bwakinyi Yesu baadi mwele lukindji lwa mwana mushimine?

¹⁴ Bwakinyi Yesu baadi mwele luno lukindji? Baadi muleshe shi Yehowa akumiina binyibinyi shi bantu bapambukye abelanga balukye kwadi. She bana a mu lwalwa lukindji baadi nka kwete kukulupila shi mwan’aye akalukiila. P’abamweene mwan’aye kwete kufika, sunga mbibaadi “kii ku bula,” she bana bayiile lubilo mu kumukukiila. Kino nyi kileshesho kibuwa kwi baaba bakatukye mu bya binyibinyi bwabadya kwalukiila kwi Yehowa kushii kunyengakana. Mbalombene kwikala babofule mu kikudi mu mushindo wabapusha shi kwalukiila takudi bukopo. Kadi abitungu nka kukita bukopo​—mwanda mpa na mayilu aakyebe kusanka su abalukiila.​—Luk. 15:7.

15, 16. (a) Mmalongyesha kinyi atupetela ku lukindji lwa Yesu pabitale mwana mushimine? Tuusha bileshesho. (b) Bino abitulongyesha kinyi pabitale Yehowa na Yesu?

¹⁵ Ndilongyesha kinyi dyatudi balombene kupetela ku kileshesho kya mwana mushimine? Twi balombene kulonda kileshesho kya Yehowa. Takwete kwituteka bwashi twikale “balulame  bikishekishe” mu mushindo watudi balombene kupela kukukiila basha milwisho abelanga ku mashimba na kwalukiila. Bino abilesha “kwituka” mu kikudi. (Mul. 7:16) Twi balombene kupeta dingi dilongyesha. Abitungu kumona muntu mukatukye mu kakongye bu “mukooko ushimine,” kushi bu muntu shi mulombene kwalukiila. (Mis. 119:176) Su twemonena na muntu mukatukye mu kakongye, atukyebe kumulesha kifulo na kumukwasha bwashi alukiile su? Atukyebe kulungula bakulu mususa umune bwashi bamukwashe su? Twi kukita byabya su atutumikila dilongyesha dibatupete mu lukindji lwa Yesu lwa mwana mushimine.

¹⁶ Tala myanda yabadi baleshe kwi bana bashimine ba mu mafuku eetu pabitale lusa na kifulo bya Yehowa na pabitale bukwashi bwa kakongye. Mukwetu mulume baadi mukatukye mu kakongye munda mwa bipwa 25 amba shi: “Kwaluka kwande kwa mu kakongye kubaadi kumpe muloo wibungi, naadi mupete ‘kipungo kya kukankamika’ akufiki kwi Yehowa. (Bik. 3:19, EEM) Ungi mukwetu mukashi baadi mukite bipwa bitano pasha pa kakongye, akula pabaabadi bamwalushe shi: “Ntamono su mbya kwinulungula kalolo akilesha kifulo kyabadi bakwile kwi Yesu kyandi mumone’mi nabene. Muntu ooso yawa kwete kunyingisha na kundesha kifulo! Binobino ne munkatshi mwa kifuko kikata kya mu kikudi. Kwikala mu ndumbulwilo a Yehowa nyi mwabi ukata!”

17, 18. (a) Mmalongyesha kinyi a muulo abatulongyela ku nkindji ibatutaluula? (b) Nkitshibilo kinyi akitungu twate?

¹⁷ Mmalongyesha kinyi a muulo abatupetela ku bino bileshesho bisatu? Dya kumpala, tubashinguula shi tatuukaa abikulaa muntu mu kikudi. Wawa mmwanda utale Yehowa. Dya kabidi, tatukulupilanga shi bantu booso bakwete kwibunga netu sunga batukwete kulonga nabo Bible abakakumiina kwikala bafubi ba Yehowa nya. Dya nfudiilo, sunga bangi bakatuka mu bya binyibinyi na kutapa Yehowa mongo, tatukumanga kwibamona bu bashi balombene kwalukiila nya. Na su babaluka, twibakukileyi mu mushindo aulesha shi twi na mweneno a Yehowa.

¹⁸ Ooso a kwatudi, atungunukye na kukimba kyukilo na kukimba kushinguula na binangu. Patubadika nkindji ya Yesu, twiyipushe kyayipatuula; bwakinyi mbeyifunde mu Bible; bwakinyi twi balombene kutumikila malongyesha aayo; na kyabitulongyesha pabitale Yehowa na Yesu. Kukita byabya akulesha shi, tukwete kushinguula akipatuula mayi a Yesu.